Inamuna Isya sa Moota Woopaceriha Soosoma sa Biibiliya
1. Inamuna xeeni isya sa erevista A Sentinela ya atthu otheene, nto sitthokiheriwe sai?
1 Okhuma Janero 2011, erevista A Sentinela ya atthu otheene enoruuhaka inamuna isya sinrowa onikhaliherya opaceriha soosoma sa Biibiliya. Muru aya oni: “Aprenda da palavra de Deus”. Tthiri, atthu akina mmuttettheni anoosiveliwa osoma khuta mwaha ori murevistani, seiyo silokiheriwe wira nivaaneleke ni atthu.
2. Sinrowa okhala sai miru sa murevistani?
2 Makhalelo aya: Muru muulupale ni miru saamukhaani silempwale ntoko nikoho wira nimukoheke mwaneene etthoko okathi onivaanela ahu. Soolepa sinittittimiherya iponto suulupale, khasilempwale masu aya, sirooromoliwa paahi wira simukhaliheryeke mwaneene etthoko osoma mBiibiliyani. Ittima saya khasinaatta masu wira niweryeke othokorerya moohipisa, hata neemenle ene vatthokoni. Khuta muru oniromola eliivuru Biibiliya Oniixuttiha Exeeni, wira onikhaliheryeke opaceriha soosoma sa Biibiliya nirumeelaka eliivuru ela akhala wira vannireerela.
3. Vaavo vanilaleya ahu khuta empa, ninrowa orumeela sai inamuna isya sa opaceriha yoosoma ya Biibiliya hata neemenle ene vatthokoni?
3 Moota Woorumeela: Vaavo vanikawa anyu irevista, nyuwo pooti opaka nikoho nnimwiiriha mutthu owo osiveliwa mwaha onilavula anyu. Mwa ntakiheryo, erevista 1 ya Janero ennithokorerya moota Biibiliya sinnikhaliherya awe. Nyuwo pooti omukoha so: “Munoona wira Biibiliya ti Nuulumo na Muluku wala eliivuru yooreera paahi? [Nwehereryeke waakhuliwa.] Mmuru ola koophwanya etthu yooreera”. Mmooniherye nikoho noopacerya, musome ettima yoopacerya ni yoolepa eri vaavo. Mutthikele okoha nikoho noopacerya nto nwehereryeke waakhula wawe. Muthokorerye myaha sinireerela, murumeelaka makoho anilavula mwaha owo. Muhinatthi ovenya, mmooniherye makoho anittharelana ni mpake marehereryo wira mutthikele omuxukurya ni othokorerya mwaha owo. Nvikanihe omuxukurya khula esumana wira muthokorerye myaha sikina siri murevistani, mpakha oruuha erevista ekina. Enamuna ekina, ti onvaha yoosoma ya Biibiliya mukwaha onipacerya anyu olavulana. Nto, murumeele muru ori murevistani wira mmooniherye moota woosoma.
4. Ninrowa orumeela sai miru siri murevistani vaavo vanipaka ahu mikwaha sootthikela?
4 Nyuwo pooti-tho orumeela inamuna iya isya wa atthu yaale anaahiyerya anyu irevista khuta mweeri, ni akina anaatthikela anyu waaxukurya. Nyuwo pooti ohimya so: “Ookhala mwaha musya murevistani A Sentinela. Kiniphavela owooniheryani moota woorumeela”. Tivonto, mavekelo ahu toowi inamuna iya isya siwiirihe anamunceene ‘osuwela ekekhai’.—1 Tim. 2:4.