Epantte Emosa Ennikhaliherya Olaleerya
1. Soolakela xeeni piili erina aya epantte eni: “Ovaanela Voohimya sa Biibiliya”?
1 Okathi mukina, erevista Owehaweha ya atthu otheene, ennikumiherya epantte eni: “Ovaanela Voohimya sa Biibiliya”. Epantte eyo yookhalana soolakela piili: omwiixuttiha Biibiliya mwa enamuna yoovara murima ni onikhaliherya moota nikhanle ahu oovaanela mooreerela voohimya sa Biibiliya. (1 Ped. 3:15) Nto, nirumeeleke sai oratteene myaha sa epantte eyo?
2. Ninrowa orumeela sai epantte ela mmutekoni woolaleerya?
2 Murumeele Okathi Woolaleerya: Musuke mmurupani mwanyu irevista sikina sa Owehaweha sirina epantte ela. Nto murumeeleke vaavo mwaneene etthoko, wala mutthu onisiveliwa ekeekhai, aahiiso ole onimusomiha anyu Biibiliya onipaka awe nikoho nithokoreriwe mwa epantte ela. Nave, nyuwo pooti onvaha erevista eyo, ni wiivahererya wira musome hoothe. Akhala wira khamurina erevista eyo, waaniheryasa nyuwo pooti obaxari va jw.org.
3. Ninrowa orumeela sai epantte ela wira nivaanele ni mwaneene etthoko?
3 Nto munrowa ovaanela sai ni mutthu mukina murumeelaka epantte ela? Anna akina anninvekela mutthu owo osoma mowiiwanyeya moolumo a mwaneene etthoko, vaavo awo anisoma aya moolumo a Namoona. Awo annoona wira orumeela enamuna eyo ennikhaliherya vanci, maana ennimwiiriha mutthu owo otokosa sookupali sahu mwa enamuna yooreerela.—Otum. 32:2.
4. Ninrowa orumeela sai epantte ela wira niilokiherye voohimya sa muteko woolaleerya?
4 Okathi Onilokiherya Anyu ni Owiixuttiha Akina: Okathi munisoma anyu epantte ela, mulepeke iversiikulu, malikanyiho, ni muupuwelo onirumeeliwa. Nwiriyaneke saana moota ‘namalaleerya owo a ntakiheryo’ onilavula awe. Moottharelana, mweererye orumeela okathi woolaleerya. (Mir. 1:5; 9:9) Murokora mmosa onihimya so: “Osoma myaha iya onilikanasa ni ovara muteko ni pioneero ‘oomalela’ yoowo okathi wotheene onisuwela yoohimya!”
5. Ninrowa waakhaliherya sai ale anaasomiha ahu Biibiliya wira yiilokiherye voohimya sa muteko woolaleerya?
5 Nave-tho, nyuwo pooti orumeela epantte ela wira mmukhaliherye ole onimusomiha anyu Biibiliya wira ailokiherye voohimya sa muteko woolaleerya. Musome mwaha owo hoothe, ni munvekele wira owo okhale ntoko namalaleerya. Opaka eyo, onoomukhaliherya ole onimusomiha anyu Biibiliya olimalela ohimya sookupali saya mooreerela. (aKol. 4:6) Tthiri, Yehova onnirumeela epantte ela wira onikhaliherye ‘onvarela muteko womalela’.—2 Tim. 4:5.