Mwiixuttiheke Murumeelaka Ebroxura Ihapari Sooreera
1. Epakiwe sai ebroxura eni Ihapari Sooreera?
1 Ntoko sithokorenrye ahu Orummwa ahu wa Omwene wa Julyo, ekaruma emosa yuulupale enihela ahu mmurupani naarowaka olaleerya ti ebroxura Ihapari Sooreera Sinikhuma wa Muluku! Masu a soolepa siromoliwe ebroxura eyo khalempwale muttimani, eyo enoomukhaliherya mwaneene etthoko omusoma Biibiliya awe. Nnaamwi iliivuru sahu sinceene sinimutthokiherya Biibiliya silempwale ene wira khula mutthu oweryeke osoma ni wiiwexexa mekhawe, ebroxura ela epakiwe wira mutthu othokoreryeke ni ole onimusomiha Biibiliya. Tivonto, khula okathi onivaha ahu ebroxura ela nihaana weererya opaceriha yoosoma wira mwaneene etthoko oone oreera waya osuwela ihapari siri mBiibiliyani.—Math. 13:44.
2. Ninrowa orumeelaka sai ebroxura Ihapari Sooreera ekwaha yoopacerya oxukurya?
2 Ekwaha Yoopacerya Oxukurya: Nyuwo pooti ohimya so: “Nnaaxukurya atthu okhala wira anamunceene arooxanka mwaha woohisuwela vanrowa aya omalela olumwenku ola. Nyuwo munoona wira makhalelo anrowa oloka muhoolo? [Nwehereryeke waakhuliwa.] Biibiliya ookhalana ihapari sooreera seiyo sinniphwanyiha nlipelelo. Nwehe makoho ala anaakhuliwa mBiibiliyani”. Munvahererye ebroxura emosa mutthu owo, nto munvekele wira othanle nikoho nimosa nri ottuli wa ebroxura eyo. Nuumala-vo mmooniherye moota siniiriwa aya yoosoma ya Biibiliya muthokoreryaka ettima emosa ya mwaha othanlale awe. Enamuna ekina ti omukoha mwaneene etthoko makoho ooreerela anaakhuliwa ni muru muthanlale anyu wa ebroxura ela, nto khiyamooniherya moota Biibiliya onaakhula awe nikoho nlo murumeelaka ebroxura eyo. Vakhala wira yookhala eviidiyu eri va jw.org enivarihana ni yoosoma emosa, nyuwo pooti orumeela okathi onilaleerya anyu.
3. Mutthokiherye moota siniirihiwa aya yoosoma ya Biibiliya erumeeliwaka ebroxura Ihapari Sooreera.
3 Moota Woowiiriha Yoosoma: (1) Musomeke nikoho nilempwale ni ileetera sooriipa wira mmukhaliherye mwaneene etthoko osuwela eponto yuulupale enithokoreriwa. (2) Musomeke ettima enaakhula nikoho nlo. (3) Musomeke yoolepa elempwale ni ileetera soohekemana, nto murumeeleke makoho ooreerela wira mmukhaliherye mwaneene etthoko woona moota yoolepa eyo enaakhula aya nikoho na ettima eyo. (4) Vakhala wira sookhala ittima sikina sinaakhula nikoho nimosaru, muttharihele malakiheryo ari nivalo 2 ni 3. Vakhala wira eviidiyu eyo ennaakhula nikoho nimosa, nave nyuwo khamunatthi omooniherya mutthu owo, pooti orumeela okathi onilavula anyu eponto eyo. (5) Wanikisa, munvekeleke mwaneene etthoko wira aakhule makoho otheene athokoreriwe wira moone vakhala wira ohiiwexexa saana.
4. Exeeni enrowa onikhaliherya osuwela orumeela ebroxura ela?
4 Mwiixutte orumeela ekaruma ela yuulupale. Murumeeleke khula okathi onireerela aya. Muhinatthi orowa wiiriha khula yoosoma, mpaceryeke omuupuwela ole onimusomiha anyu wira moone enamuna yooreerela ya ovaanelana wira munvare murima ni orumeela saana soolepa sa khula yoosoma. (Mir. 15:28; Mit. 17:2, 3) Okathi onrowa anyu olimalela orumeela ebroxura ela, munrowa woona wira tthiri ti yoovareleya muteko ni enrowa woosivelani orumeela wira nwiixuttihe atthu ekeekhai!