Musuke
Munnirumeela Ibroxura Iya?
A Bíblia — Qual É a sua Mensagem?
Alepeliwe atthu yaale anisuwela vakhaani voohimya sa Biibiliya, vanceenexa ahikhanle maKristau
Moota wookawa: “Munoonela sai voohimya sa Yoolepa ela (wala eliivuru ya Muluku)? [Musome Esalimo 37: 11, yeeyo eri epantte 11.] Munoona wira elapo enrowa okhala sai nuumala wiiraneya eprofesia ela? [Nwehereryeke waakhuliwa.] Nna ntakiheryo nimosa voohimya sa nlipelelo ni yoomaaliha ya Biibiliya, yeeyo atthu a mithinto sotheene aniwerya aya ophwanya”. Musome ettima eri vasulu va epax. 3, nuumala-vo munvahe ebroxura eyo.
Wala pooti weererya so: Akhala wira munimusomiha mutthu ohikhanle muKristau murumeelaka eliivuru Biibiliya Oniixuttiha Exeeni, murumeeleke minutu vakhaani wanipacerya wala wanikisa wa yoosoma wira mmusuwelihe moota Biibiliya sirya awe.
Um Livro para Todas as Pessoas
Alepeliwe atthu yaale aasomme masi ahimusuwenle saana Biibiliya
Moota wookawa: Mmusome 2 Timótheyo 3:16, 17. Nto muhimye so: “Munnikupali wira Biibiliya ta Muluku wala eliivuru yooreera paahi? [Nwehereryeke waakhuliwa.] Nnaamwi anamunceene arina ene muupuwelo woovirikana mmwaha ola, masi atthu vakhaani paahi tamutokonse oratteene mmensaya. [Musome yowiiraneya eri vathi va muru ori epax. 3.] Ebroxura ela, ennihimya nthowa naya atthu a mithinto sinceene animuthokorerya aya Biibiliya”.
Wala pooti weererya so: Akhala wira mwaneene etthoko onneemererya ebroxura, muhimye so: “Etthu eniwiiriha atthu anceene wuupuwelaka wira omusoma Biibiliya khahiyo etthu yootthuneya, nthowa noowi etiini yoowoka yoomwaakanyererya Biibiliya. Mukwaha mukina kiniphavela owooniheryani ntakiheryo nimosa”. Okathi munitthika anyu, muthokorerye ipax. 4-5.
Munoowerya Okhala Mpatthani A Muluku!
Alepeliwe atthu yaale asomme vakhaani wala ahiniwerya osoma saana
Moota wookawa: “Munoonela sai, vanniweryaneya okhala mpatthani a Muluku? [Nwehereryeke waakhuliwa. Nuumala vo mmusome Yakobo 2:23.] Ebroxura ela epakiwe wira enikhaliherye okhala mpatthani a Muluku ntoko Abrahamu”.
Wala pooti weererya so: Wanipacerya wa oxukurya wala mukwaha wa otthikela oxukurya, mooniherye moota woomusoma Biibiliya, muthokoreryaka nuuwo mwaha wotheene wa yoosoma 1, wala epantte emosa.
Como Ter uma Vida Satisfatória
Alepeliwe atthu yaale ahirina etiini
Moota wookawa: “Nnaaxukurya atthu mwaha woowi atthu anceene anniphavela ohakalala. Otheene ahu sinniniphwanya mixankiho sinniiriha oriipiwa murima. Okathi sinniphwanya aya mixankiho iyo, waaniheryasa ninniphavela malakiheryo wa amusi anaaroromela ahu, wala apatthani, aahiiso orowa mapuro ari iliivuru wala munternetini. Etthu xeeni munoona anyu okhala nikhaliheryo nuulupale? [Nwehereryeke waakhuliwa.] Atthu akina aasiveliwa ophwanya mBiibiliyani malakiheryo ooloka. Moone ntakiheryo nna. [Mmooniherye mwaneene etthoko muru 2 ni muthanle yoolepa emosa wira musome.] Ebroxura ela elempwe wira enitthokiherye moota woophwanya ohakalala wuulupale”.
Wala pooti weererya so: Akhala wira mwaneene etthoko onneemererya ebroxura, mulavule so: “Anamunceene yaatoko wiiwa wira Biibiliya oosareya itthu sowoothiwa. Nihiku kinrowa aka otthika, kinoowooniheryani ntakiheryo nimosa nnooniherya wira Biibiliya teekeekhai voohimya sa siensia”. Okathi munitthika anyu muthokorerye ettima 4 epax. 12.
A Origem da Vida — Cinco Perguntas Que Merecem Resposta
Alepeliwe amiravo maKristau yaawo anisomihiwa oxikola wira itthu siroothatuwa. Ebroxura ela-tho, ti yooloka waavaha atthu yaale anikupali othatuwa, anihoverya akhala wira Muluku ookhala, ni ale ahinikupali wira ookhala. (Ebroxura ela khahiyo epakeliwe okaiwaka khuta empa.)
Moota wookawa namphwanya mutthu onikupali othatuwa wala ohinimukupali Muluku: “Iliivuru sinceene sa masientista olelo va, siniixuttiha wira itthu siroothatuwa. Nto nyuwo munoonela sai, niireke wira itthu siroothatuwa wala yowiixuttiha ela ethiru? [Nwehereryeke waakhuliwa.] Kinnikupali wira nyuwo moosuwela wira naaphavelaka osuwela ekeekhai, nihaana othokorerya mwaha ola. Ebroxura ela ennihimya itthu siri sekeekhai seiyo sinooniherya wira okumi oroopattuxiwa”.
Wala pooti weererya so: Akhala wira muneetta oxikola, mpweheke ebroxura anyu vameesa wira moone akhala wira apatthani anyu a oxikola anniphavela oweha.
A Vida — Teve um Criador?
Elepeliwe wira ekhaliheryeke opaceriha soosoma sa Biibiliya. Ti vooloka orumeela ebroxura ela okathi ninvaanela ahu ni atthu anikupali othatuwa wa itthu, anihoverya akhala wira Muluku ookhala, ni ale ahinikupali wira ookhala. Anamuyari anoottottela mureerelo ebroxura ela wira yaakhaliheryeke anaaya omukupali ni omuxukhurela Muluku mpattuxa.
Moota wookawa wala owaakhula yaale anihimya wira anikupali ophattuwa wa itthu wala ahinikupali wira Muluku ookhala: “Kinniphavela wookohani so: exeeni eniwiirihani wuupuwelaka siiso? [Nwehereryeke waakhuliwa.] Kinoona wira munnikupali wira ola mwaha muulupale. Vaakhanle wira atthu anceene annithokorerya mwaha ola ntoko nyuwo, vaamuloka. Nto kinnikupali wira khahiyo etthu yoonanara mutthu osoma eliivuru enooniherya saana wira okumi wookhalana mpattuxa aya. Kiniphavela osuwela moonelo anyu voohimya sa myaha silavuliwe ni ebroxura ela”.
Wala pooti weererya so: Akhala wira mutthu owo oheemererya ebroxura, mmooniherye makoho ari epaaxina 31 ni mmukohe wira: “Nikoho xeeni muniphavela anyu waakhuliwa waya?” Mmooniherye waakhuliwa waya mphavelaka ekapiitulu ene muliivuruni Biibiliya Oniixuttiha Exeeni Tthiri?
Por Que Devemos Adorar a Deus com Amor e Verdade?
Alepeliwe maHindu
Moota wookawa: “Nivekelo noosuweliwa ni atthu a etiini ya maHindu nnihimya wira: ‘Mukikumihe mweethiruni mukisuwelihe ekeekhai. Mukikumihe mweepiphini mukooniherye waarya. Munoonela sai, niireke ti va efaita omukokhorela Muluku mwa niphento ni ekeekhai? [Nwehereryeke waakhuliwa.] Nkahaya moone etthu Yesu aalavunle awe voohimya sa masu ala”: Mmusome Yohani 4:24. Nuumala-vo musome ettima 4, epaaxina 3 ni munvahe ebroxura.
Wala pooti weererya so: Akhala wira mwaneene etthoko ohaakhela ebroxura eyo, mulavule so: “Asuweli akina ari maHindu anihimya wira ekeekhai evithiwe vamurimani va mutthu. Akina anihimya wira ekeekhai eniphwanyaneya muliivuruni ya Muluku. Nihiku nikina kinimoorwa wira nithokorerye nikoho niri wanikisa wa ettima 3 epaaxina 4 nenno nni: ‘Ninrowa ophwanya vaavi sowiixuttiha sekeekhai sa Muluku?’”
Our Problems—Who Will Help Us Solve Them?
Alepepiwe maHindu
Moota wookawa: “Atthu anceene ninlavulana ahu, ari ooxankiheya mwaha wa itthu sootakhala siniiraneya mulaponi. Munoonela sai, niireke Muluku onoophuka mixankiho iya? [Nwehereryeke waakhuliwa.] Eprofesia ela enninivaha nlipelelo. [Musome Esalimo 37:11.] Etthu esomme aka enikhuma mBiibiliyani, eliivuru yeeyo ikwaha sinceene ehiniiwexexiwa saana ni enirumeeliwa moohiloka. Nyuwo munrowa oweha wira Biibiliya khahiyo eliivuru ya atthu a wAmerica wala wEuropa; ni khenaakawanya atthu nnakhala ovaha efaita nikhuli nikina ovikana nikina. Masi onninivaha nlipelelo wira moohipisa Muluku onoomaliha mixankiho sotheene. Nave-tho onninivaha malakiheryo a moota woophuka mixankiho sahu. Ebroxura ela emivaha malakihetyo manceene.”
Wala pooti weererya so: Nuumala wunnuuherya osiveliwa wa mutthu owo ni masu a Muluku, nihiku munrowa anyu omuxukurya-tho, mmooniherye ifootu siri ipaaxina 4-5 eliivuru Biibiliya Oniixuttiha Exeeni Tthiri. Muthanle yoolepa emosa eromoliwe, nto musome ni munvahe mwaneene etthoko eliivuru.
Haverá Algum Dia um Mundo sem Guerra?
Alepeliwe Ayuda
Moota wookawa: “Ovinyerya khalai, apinaatamu annihaawa vanceene mwaha wa ikhotto. Munoonela sai, xeeni sinivikaniha aya owaniwa ikhotto masi apinaatamu aphavelaka-tho okhalana murettele? [Nwehereryeke waakhuliwa.] Eprofesia ela ya Yesaya enninivaha nlipelelo. [Mmusome Yesaya 2:4.] Nnaamwi vari siiso, annikhumelela makoho ntoko ala: Masu a eprofesia ela anrowa wiiraneya sai ni silini? Nthowa xeeni vanitthuneya ahu okupaliki Soolempwa seiyo siri soororomeleya? Ebroxura ela ennaakhula makoho ala”.
Wala pooti weererya so: Mutthu owo eemererya ebroxura, mmooniherye epaaxina 16-17 nave mulavule so: “Atthu anceene annilavula sa mixankiho sinikhumelela, ntoko ihasara suulupale, nto atthu awo anniikoha wira: ‘Akhala wira Muluku ookhala, nthowa xeeni onnihiya awe nihaawaka?’ Kinootthika wira nilavule mwaha ola”.
As Orientações de Deus — O Caminho para o Paraíso
Alepeliwe Amaka anikhala mapuro ahinikhoottiheriwa aya omusoma Biibiliya
Moota wookawa: “Koosuwela wira Amaka annikupali wira Muluku ekeekhai ori mmosa paahi. Khahiyo ekeekhai? [Nwehereryeke waakhuliwa.] Kiniphavela owooniheryani eprofesia emosa ya khalai enilavula wira muhoolo elapo enrowa okhala eparayiisu wala ecannathi. Kisomeke wira mwiiwe etthu profeta olavunle awe? [Mmusome Yesaya 11:6-9.] Anamunceene anniikoha wira: Muluku onrowa opaka sai itthu iyo? Ebroxura ela ennooniherya etthu maprofeta alavunle aya voohimya sa mwaha ola”.
Wala pooti weererya so: Akhala wira mwaneene etthoko oheemererya waakhela ebroxura eyo, nyuwo pooti olavula so: “Eliivuru ya Muluku ennihimya wira, wanipacerya aahikhala mutthu aakhanle mparayiisu. Nihiku nikina kinimoorwa wira kaakhule nikoho nna: ‘Pinaatamu aahiiye sai omwiiwelela Muluku nto khuyeleela eparayiisu?’” Okathi onrowa anyu otthika, muthokorerye mwaha onipacerya epaaxina 6.
Waamini Wekeekhai Esiiri Eniphwanyiha Okumi Woohakalala
Alepeliwe Amaka anikhala mapuro ahinikhoottiheriwa aya omusoma Biibiliya
Moota wookawa: Mmooniherye efootu eri epaaxina 16-17 nto muhimye so: “Efootu ela va, ti yoovirikana ni itthu sinoona ahu siiraneyaka mahiku ala. Munoonela sai, niireke wira muhoolo elapo enookhala ntoko nipuro nna? [Nwehereryeke waakhuliwa.] Nkahaya moone etthu Muluku onilaiherya awe Muliivuruni mwawe. [Musome masu akumihiwe mBiibiliyani mwanyu.] Ebroxura ela enninikhaliherya okhalana nroromelo noowi yoolakela ya Muluku enimwiiraneya tthiri”.
Wala pooti weererya so: Wanikisa wa ovaanela wanyu, munvekele wira athanle nikoho nimosa oniphavela awe othokorerya, yaawo ari epaaxina yookiserya. Nto, mmuhimeerye wira munootthika wira muthokorerye nikoho nno.
Como Ter Verdadeira Paz e Felicidade
Alepeliwe aChina
Moota wookawa: “Olelo-va, sinniniphwanya mixankiho sinceene sinniiriha ohihakalala. Exeeni enoophwanyihani ohakalala nnaamwi sikhalaka mixankiho? [Nwehereryeke waakhuliwa.] Atthu anceene anniphwanya ohakalala mwaha wootthara miruku siri mBiibiliyani. [Musome Esalimo 119:1, 2.] Atthu akina anuupuwela wira Biibiliya eliivuru ya atthu a wAmerica wala wEuropa paahi. Masi nkawehani ela. [Muthokorerye ettima 16 epax. 17.] Ebroxura ela ennitthokiherya moota woophwanya murettele ni ohakalala wekeekhai”.
Wala pooti weererya so: Akhala wira mwaneene etthoko onneemererya ebroxura, musome hoothe ifrase tthaaru sa ettima 18 epax. 17, ni muhimye so: “Nihiku nikina, kinowooniheryani nlipelelo nrina ahu moovarihana ni Biibiliya”. Okathi munitthika anyu, muthokorerye eponto emosa eri ettima 6 epax. 30.