Okawa eBroxura Esya!
1. Ninrowa okawaka exeeni mweeri wa Novembro, nto tiivi eri yoophavela ya ebroxura ela?
1 Konkresu ahu a eDistritu a 2009 ‘Vikanihani Okhala Ooweha-weha!’, yaahikumiheriwa ebroxura esya erina muru oni: A Bíblia—Qual É a sua Mensagem? Mweeri wa Novembro miloko sa ilapo sotheene sinoopacerya okawa ebroxura ela esya. Masi ebroxura ela enrowa waakhaliherya sai atthu ari mmuttettheni mwahu? Atthu anceene, mwa yaale ekerexa aya ehikhanle ya eKristau, khanimusuwela saana Biibiliya. Tivonto, epaaxina 3 ennitthokiherya yoophavela ya ebroxura ela, eyo piiyo, ‘wooniherya vakhaani ele Biibiliya enihimya awe’.
2. Nihimyeke exeeni okathi wookawa ebroxura ela?
2 Moota Wookawa eBroxura Ela: Hiyo pooti ohimya so: “Nimphavela osuwela moonelo anyu mwa yoolepa ela. [Mmusome 2 Timótheyo 3:16.] Atthu anceene alavulanne ahu annoona wira masu ala teekeekhai; masi akina anoona wira Biibiliya khahiyo eliivuru yookupaleya. Nto tuuvi ori muupuwela anyu voohimya sa Biibiliya? [Nwehereryeke waakhuliwa.] Nnaamwi sookupali sa ekerexa ahu siri ene soovirikana, aakhala mathowa maalupale annitumererya ovarerya saana ele enihimya Biibiliya. [Musome masu oopacerya ari vasulu va epaaxina 3.] Vaavo vanisoma anyu masu ala oohakalaliha a Biibiliya, munimoona wira ookhala mwaha muulupale onithokoreriwa mBiibiliyani”.
3. Mukawelo xeeni mukina oniwerya ahu orumeela, vaavo vanilaleerya ahu muttetthe ori atthu ahikhanle maKristau?
3 Akhala wira munilaleerya muttetthe ori atthu ahikhanle maKristau, moota mukina wookawa tuula: “Nimphavela osuwela moonelo anyu wa ele Muluku enihimya awe va (wala enihimya awe mu eliivuru yowaarya). [Musome Esalimo 37:11.] Munoona wira elapo enrowa okhala sai nuumala wiiraneya eprofesia ela? [Nwehereryeke waakhuliwa.] Nna ntakiheryo nimosa voohimya sa nlipelelo ni yoomaaliha ya Biibiliya, yeeyo atthu a mithinto sotheene aniwerya aya ophwanya”. Nto musome ettima eri vasulu va epaaxina 3, nuumala-vo munvahe ebroxura eyo.
4. Ninrowa orumeela sai ebroxura ela wira nipacerihe yoosoma ya Biibiliya?
4 Opaceriha Yoosoma ya Biibiliya: Okathi onitthikela ahu oxukurya, nihaana omuupuxerya mwaneene etthoko mwaha waalavunle ahu, ni othokorerya ettima emosa wala piili sa muru owo, nirumeelaka nikoho niri wanikisa wa muru owo. Masi, akhala wira okathi owo nimphavela onvaha eliivuru Biibiliya Oniixuttiha Exeeni, hiyo pooti osoma n’uwo epaaxina yookiserya ya ebroxura eyo, nto khiyanvaha eliivuru. Nuumala-vo, mmukohe muru onimusivela, vano nyuwo n’uwo musome ettima emosa wala piili ya muru owo. Tivonto, otheene ahu niimananihe okawa ebroxura ela mweeri wa Novembro!