Moota Woorumeela Ebroxura Esya Ihapari Sooreera Sinikhuma wa Muluku! Epakiwe Wira Enikhaliherye Opaka Mikwaha Sootthikela Oxukurya ni Opaceriha Soosoma sa Biibiiya
1. Ebroxura xeeni esya ekumiheriwe okongresuni wa eDistritu “Mukhapelele Mukhalelo wa Murima Anyu!”, enrowa onikhaliherya opaka mikwaha sootthikela ni opaceriha soosoma sa Biibiliya?
1 Kongresu a edistritu “Mukhapelele Mukhalelo wa Murima Anyu!”, naahihakalala waakhela ebroxura esya enirowa onikhaliherya opaka mikwaha sootthikela oxukurya ni opaceriha soosoma sa Biibiliya. Ebroxura Ihapari Sooreera Sinikhuma wa Muluku!, eniranttela ebroxura Muluku Omphavela Exeeni, nto soosoma saya sinoolikana ni ebroxura eyo, ni ti sookhuveya. Ebroxura ela enirowa onikhaliherya wiiriha soosoma sa Biibiliya hata neemenle ene. Ekeekhai wira ebroxura Muluku Omphavela Exeeni yaathokorerya malamulo a eKristau, masi annaavila ale animusoma Biibiliya asya. Nto ebroxura ela esya eniixuttiha ihapari sooreera sinikhuma mBiibiliyani.—Mit. 15:35.
2. Xeeni ehalaka opakiwa ebroxura Ihapari Sooreera?
2 Xeeni ehalaka opakiwa ebroxura ela? Olumwenku wotheene, anna yaanivekela etthu yookhweya yaarowa owiirihaka atthu ophavela ekeekhai, ni waakhulela yoosoma ni eliivuru Biibiliya Oniixuttiha Exeeni. Ikwaha sinci, atthu anoova osoma eliivuru, anniphavela omusoma Biibiliya arumeelaka ebroxura. Ohiya-vo, ebroxura ela ennikhweya otaphuleliwa wa mattaava manceene.
3. Ebroxura ela enivirikana sai ni iliivuru sikina sinirumeela ahu wira nimwiixuttihe Biibiliya?
3 Moota Epakiwe Aya: Iliivuru sahu sinci, silempwale wira mutthu osomeke ni wiiwexexa saana ekeekhai, hata ohikhaliheriwe ni mutthu mukina. Masi, ebroxura ela ti yoovirikana. Epakiwe wira ale animusoma Biibiliya ekhaliheriweke ni Namoona a Yehova. Nto, vaavo muninvaha anyu mutthu, ti vootthuneya othokorerya ettima emosa wala piili. Ittima saya ti sookhuveya, ni pooti othokoreriwa mutthu eemenle ene wala opuro oniiriwa nakoso. Nnaamwi varyeene vooloka opacerya yoosoma 1, hiyo pooti opacerya yoosoma eyo khula epantte ya ebroxura ela.
4. Moota xeeni ebroxura ela ennikhaliherya aya wiixuttiha nimurumeelaka Biibiliya?
4 Iliivuru sahu sinci, makoho ari vathi va ipaaxina, waakhuliwa waya oniphwanyaneya mparagrafoni. Masi, ebroxura ela, makoho manceene anaakhuliwa mBiibiliyani. Atthu anceene, aniphavela wiixutta orweela wa Biibiliya ohiya muliivuruni mwahu. Tivonto, soolepa sinci masu aya kharomolinwe. Nto iyo sihaana osommwa mBiibiliyani. Eyo enimwaakhaliherya ale animusoma Biibiliya osuwela wira ele eniixutta aya enikhuma wa Muluku.—Yes. 54:13.
5. Xeeni vanitthuneya ahu wiilokiheryaka saana wa khula yoosoma?
5 Ebroxura ela khenitthokiherya soolepa sotheene. Masi, epakiwe wira yaatumereryeke ale anisomihiwa opaka makoho ni omweemererya ole oniiixuttiha orumeela saana wiixuttiha wawe. Tivonto, ti vootthuneya wiilokiherya saana wa khula yoosoma. Masi, nihaatteke soohimya. Ekeekhai wira onisivela otthokiherya Soolempwa. Masi, ikwaha sinceene ninniphwanya mureerelo vaavo nninvekela ahu ole onimusomiha ahu ohimya moonelo awe. Nto, akhala wira nnoorumeela saana makoho, nnoomukhaliherya ole onimusomiha ahu wuupuwelela saana yootaphulela ya khuta yoolepa.—Mit. 17:2.
6. Ninrowa orumeela sai ebroxura ela (a) muttetthe yoowo atthu ahinimwaamini aya Muluku ni Biibiliya? (b) vaavo ninlaleerya ahu khula empa? (c) wira nipacerihe soosoma sa Biibiliya mukwaha woopacerya oxukurya? (d) okathi nimpaka ahu mikwaha sootthikela oxukurya?
6 Moolikanasa ni iliivuru sikina sinirumeela ahu wira niirihe soosoma sa Biibiliya, ebroxura ela pooti okaiwa khula okathi, hata ehikaiwaka mweeri yoowo. Anna anceene anrowa osiveliwa orumeela ebroxura ela wira apacerihe soosoma sa Biibiliya mukwaha woopacerya oxukurya pooti yeemenle ene. Nave, ntoko saahimmwale aya okongresuni, orumeela ebroxura ela vaavo munitthikela anyu waaxukurya ale yaasiveliwe ekeekhai, ‘onimookhaliheryani otthikela waaxukurya saana atthu awo!’ Nwehe ikaaxa ipaaxina 5-7.
7. Munrowa owerya sai wiiriha yoosoma ya Biibiliya murumeelaka ebroxura ela?
7 Moota Woowiiriha Yoosoma: Hiyo pooti opacerya othokorerya makoho alempwale ni ileetera sooriipihiwa. Moottharelana, musome ettima ni soolepa siri itaaliku wala sookhoropana. Murumeele saana makoho wira mmukhaliherye mwaneene etthoko wiiwexexa yoolepa eyo. Vano, muhinatthi orowa epantte ekina, munvekele mwaneene etthoko wira aakhule nikoho nilempwale ni ileetera sooriipihiwa, wira musuwele aiwexenxe ene. Nto ekwaha munipacerya anyu omuxukurya, ti vooloka othokorerya nikoho nimosa paahi wa ale alempwale ni ileetera sooriipihiwa. Muhoolo mwaya, pooti wuncererya yoosoma eyo wira muwerye othokorerya yoosoma yotheene.
8. Nihimyeke exeeni okathi oniphavela ahu osoma yoolepa, ni nthowa xeeni?
8 Soolepa sirina masu ani “musome”, ti sinaakhula mooluluwanya nikoho nilempwale ni ileetera sooriipihiwa. Okathi oniphavela anyu osoma yoolepa, musyake ohimya wira: “Murummwa Paulo olempe so”, wala “nwehe ele Yeremiya aahimmya awe”. Maana mwaneene etthoko pooti wuupuwela wira ninsoma masu a apinaatamu. Nto ti vooloka ohimya wira: “Nuulumo na Muluku ninhimya so”, wala “nwehe ele Biibiliya onihimwa awe”.
9. Niireke soolepa sotheene sihaana osommwa okathi wa yoosoma ya Biibiliya?
9 Niireke nihaana osoma soolepa sotheene, wala iye paahi sirina masu ani “musome”? Muhaana oweha mikhalelo sa ole onimwiixuttiha anyu. Khiivo yoolepa eri mbroxurani mmo ehirina efaita aya. Khula yoolepa yookhalana malakiheryo anireerela othokorerya. Masi ikwaha sikina, akhala wira ole onimusoma Biibiliya khorina okathi, wala khonisiveliwa ekeekhai, aahiiso, khonisuwela osoma saana, pooti osoma paahi soolepa sini “musome”.
10. Silini ninrowa ahu oturuka ebroxura wira nirumeele eliivuru Biibiliya Oniixuttiha Exeeni?
10 Okathi Woopaceriha Eliivuru Biibiliya Oniixuttiha Exeeni: Nuumala omusomiha mutthu owo ikwaha sinceene ni moohihiyererya, hiyo pooti othanla opacerya orumeela eliivuru Biibiliya Oniixuttiha Exeeni, wala ovikaniha osoma ebroxura Ihapari Sooreera mpakha omaliha. Anamalaleerya ahaana okhala a miruku wira athanle okathi wooreerela oturuka ebroxura ela. Nto nuumala opaceriha eliivuru Biibiliya Oniixuttiha Exeeni, niireke nihaana othokorerya okhuma wanipacerya wa eliivuru eyo? Khakhanle malamulo voohimya sa mwaha ola. Makhalelo a khula mutthu toovirikana. Masi, anamunceene wa ale anisomihiwa, anoottottela mureerelo akhala wira munoothokorerya mwaha mmosa-mosaru oniphwanyaneya muliivuruni Biibiliya Oniixuttiha Exeeni.
11. Xeeni nintthuneya ahu orumeela saana ebroxura ela esya?
11 Eriyari ya elapo ela yoothowa ihapari sooloka, hiyo nookhalana eparakha yuulupale ya olaleya ihapari sooreera. Hiyo ninnilaleya wira Omwene wa Muluku onnilamulela ni moohipisa onookumiherya elapo esya enrowa okhala exariya! (Math. 24:14; 2 Ped. 3:13) Tivonto, ninniroromela wira anamunceene aniiwa ihapari aya, anrowa olavula moolumo ala a Biibiliya ani: “Mutteliweke murima, mutthapeke! Namitthaka onnorwa, akhumaka omiyakoni, aruhaka ihapari sorera: Owo onniniruhela muhupi wa murettele, onrwa onlalèrya wopoliwa wahu. Owo onnahimerya atthu òSiyoni wira: ‘Muluku anyu ti mwené’”. (Yes. 52:7) Nto nrowe nirumeele ebroxura ela esya wira nilaleye ihapari sooreera sinikhuma wa Muluku wa atthu arina ntthona na ekeekhai mmuttettheni mwahu!
[Ekaaxa epaaxina 5]
Muttetthe Yoowo Atthu Ahinimwaamini Aya Muluku ni Biibiliya:
● Mittetthe sikina anamalaleerya ahoona wira orumeela moolumo oowi: “Muluku” ni “Biibiliya”, onniwiiriha atthu ohiphavela ovaanela. Nto akhala wira eyo enniireya muttetthe anyu, ti vooloka mukwaha woopacerya, olavula myaha sinaaxankiha atthu awo; ntoko otthuneya wa eguvernu yooloka, opuro woophwanya miruku soovareleya muteko sinikhaliherya itthoko, wala voohimya sa ele eniwehererya ahu muhoolo. Waaniheryasa ebroxura Ihapari Sooreera, pooti opacerya orumeela nuuvira ikwaha sinceene nimutthokiheryaka mutthu owo ele ennikupaliha wira Muluku ookhala ni nthowa naya Biibiliya oryaawe oororomeleya.
[Ekaaxa epaaxina 6]
Etthu Yoohimya Naalaleeryaka Khula Empa:
● “Kinaaxukurya atthu, wira kiwooniherye moota orya aya wookhweya osuwela ele Muluku onrowa awe opaka muhoolo mmureerelo wa apinaatamu. Kiireke mootoko wiikoha akhala wira Muluku onoomaliha ohaawa wahu? [Nwehererye waakhuliwa.] Ebroxura ela ennooniherya opuro mBiibiliyani munrowa anyu ophwanya waakhuliwa wa nikoho nno. [Munvahe ebroxura eyo, ni musome ettima yoopacerya ya muru 1 ni yoolepa ya Yeremiya 29:11.] Munoonela sai, niireke Muluku khoniphavela wira nikhalane okumi wooloka? [Nwehererye waakhuliwa.] Mwaaphavelaka, pooti ohalana ebroxura ela. Okathi mukina, ninrowa othokorerya ettima yanenli wira nisuwele moota Biibiliya onaakhula awe nikoho nla nni: ‘Moota xeeni Muluku onirowa awe omaliha ohaawa wa apinaatamu?’” Akhala wira mwaneene etthoko ookhalana okathi mukwaha woopacerya oxukurya, nyuwo pooti othokorerya ettima yanenli ni soolepa tthaaru siri vaavo. Nto mwiiwanane nihiku nootthikela wira mwathokorerye nikoho nanenli na muru owo.
● “Atthu anceene waasivela ovekela, vanceenexa okathi sinaaphwanya aya mixankiho. Niireke ni nyuwo munnivekela okathi mukina? [Nwehererye waakhuliwa.] Nyuwo munoona wira Muluku onniwiriyana mavekelo otheene, wala mavekelo makina khanimusivela? [Nwehererye waakhuliwa.] Kihaana-va ebroxura enooniherya moota woophwanya waakhula wa Biibiliya wa makoho awo. [Munvahe ebroxura, ni muthokorerye hoothe ettima yoopacerya ya yoosoma 12 ni musome yoolepa eni “musome”.] Khahiyo voohakalaliha osuwela wira Muluku onniphavela owiriyana mavekelo ahu? Masi wira nittottele mureerelo eparakha ya ovekela, nihaana omusuwela saana Muluku. [Mutthukule yoosoma 2 ni mmooniherye miru saamukhaani.] Mwaaphavelaka, miyo pooti woohiyeryani ebroxura ela, nto okathi mukina ninrowa osoma waakhula wa Biibiliya wa makoho ala oohakalaliha”.
● “Kirwaaka-va, mwaha woowi atthu anceene aaxanka mwaha woohisuwela onirowa aya olumwenku ola. Nyuwo munoona nnoophiya nihiku makhalelo a mulaponi anirowa aya okhala saana? [Nwehererye waakhuliwa.] Atthu anceene annitikinihiwa vaavo aniixutta aya wira Biibiliya ookhalana ihapari sooreera sinivaha nlipelelo. Ebroxura ela yookhalana makoho makina yaawo Biibiliya onaakhula awe”. Munvahe ebroxura, ni munvekele wira othanle nikoho nimosa niri epaaxina yookiserya nenlo nimmusivela vanceenexa. Nto mutthukhule muru owo, ni mmooniherye moota woosoma. Nto mwiiwanane nihiku nootthikela wira mwathokorerye nikoho ninttharelana na yoosoma yeeyo.
[Ekaaxa epaaxina 7]
Mweererye Opaceriha Yoosoma ya Biibiliya Mukwaha Woopacerya:
● “Miyo kihoorwa-va, wira kooleeleni sa kursu musya oomusoma Biibiliya. Ebroxura ela yookhalana soosoma 15 seiyo sinooniherya opuro xeeni mBiibiliyani mwanyu mukhanle anyu oophwanya waakhuliwa wa makoho ootepa otthuneya. [Mmooniherye epaaxina yoopacerya ni yookiserya ya ebroxura eyo.] Niireke mootoko weererya omwiiwexexa Biibiliya? [Nwehererye waakhuliwa.] Kimphavela owooniheryani moota sirya aya sookhweya soosoma saya. [Muthokorerye yoosoma 3, nikoho 3 ni ettima aya yoopacerya, nto mmusome Wisupulula 21:4, 5. Vaareerelaka, muthokorerye ettima enittharelana ni soolepa sini “musome”.] Mwaaphavelaka, miyo pooti woohiyeryani ebroxura ela. Ninnootumereryani weererya omusoma Biibiliya pooti okhala ekwaha emosa paahi. Akhala wira onimoosivelani, nyuwo pooti ovikaniha. Okathi mukina, ninrowa othokorerya yoosoma yoopacerya. Moone wira yoosoma yoorakama eri emosa paahi”.
[Ekaaxa epaaxina 7]
Murumeele Okathi Wootthikela Oxukurya:
● Vaavo munitthikela anyu omuxukurya mutthu aasiveliwe ekeekhai, nyuwo pooti olavula so: “Ti voohakalaliha woophwanyani-tho. Miyo kooruuha ebroxura ela enaakhula makoho manceene ootepa otthuneya. [Munvahe ebroxura, ni munvekele wira owehe epaaxina yookiserya.] Mwaha xeeni oniphavela anyu osoma? [Nwehererye waakhuliwa. Nto mukhunule yoosoma enrowa awe othanla.] Kiniphavela owooniheryani moota ebroxura ela eniwerya aya onikhaliherya ophwanya waakhuliwa wa makoho mBiibiliyani”. Mooniherye yoosoma muthokoreryaka ettima emosa wala piili ni soolepa sini “musome”. Nto vaavo munipaka anyu eyo, nyuwo moopacerya wiiriha yoosoma ya Biibiliya! Mmuhiyerye ebroxura eyo, ni mwiiwanane nihiku nootthikela. Vaavo munimaliha anyu yoosoma emosa, pooti othokorerya yoosoma ekina enirowa othanliwa ni mwaneene etthoko, wala othokorerya okhuma wanipacerya wa ebroxura eyo.