Moota Woorumeela Ebroxura Esya Tani Anipaka Yootthuna ya Yehova Olelo-va? Epakiwe Wira Naakhaliherye Ale Animwiixutta Biibiliya Osuwela Nikhuuru Nootthokiheya na Yehova
1. Soolakela xeeni tthaaru erina aya ebroxura Yootthuna ya Yehova?
1 Niireke moopacerya orumeela ebroxura esya eni: Tani Anipaka Yootthuna ya Yehova Olelo-va? Yoolakela aya tiila: (1) waakhaliherya ale anaasomiha ahu Biibiliya waasuwela Anamoona a Yehova, (2) osuwela muteko ahu, ni (3) owooniherya moota nikhuuru nahu nootthokiheya ninvara aya muteko. Ebroxura Yootthuna ya Yehova erina yoosoma emosa wa khuta epaaxina; nto epakiwe wira anamalaleerya athokoreryeke mowaakuveya muhina mwa minutu 5 wala 10 wanikisa wa khula yoosoma ya Biibiliya.
2. Etthokihiwe sai ebroxura Yootthuna ya Yehova?
2 Moota Epakiwe Aya: Ebroxura ela erina ipantte tthaaru; nto khula epantte enithokorerya mwaha woovirikana wa nikhuuru nootthokiheya na Yehova ntoko noonale ahu vasulu-vo. Miru sinci sa khuta yoosoma silempwale ntoko makoho, nto miru saamukhaani ti sooriipihiwa seiyo sinaakhula nikoho nlo. Ebroxura ela yooheliwa ifootu sa ilapo sinivikana 50, seiyo sinooniherya moota onivara ahu muteko ilapo sotheene. Soosoma sinci sookhalana ikaaxa sini: “Musuwele Itthu Sikina”, seiyo sirina malakiheryo makina mukhanle anyu oorumeela wira mmukhaliherye ole onimusomiha anyu Biibiliya.
3. Ninrowa orumeela sai ebroxura Yootthuna ya Yehova?
3 Moota Woorumeela: Wanipacerya mmooniherye muru wa yoosoma olempwale ntoko nikoho. Nto, vaavo munithokorerya anyu yoosoma eyo, muttittimiherye miru saamukhaani silempwale ni ileetera sooriipihiwa. Wanikisa, muthokorerye makoho oowuuluula ari vathi va epaaxina. Nyuwo pooti othokorerya yoosoma yotheene, wala okawanya yoosoma eyo. Muthanleke saana soolepa sinireerela osoma. Nave, muhiliyale othokorerya ifootu ni ikaaxa sini: “Musuwele Itthu Sikina”. Ikwaha sinceene, soosoma iyo sihaana othokoreriwa moottharelana. Masi, pooti otupha yoosoma emosa nto khurowa yoosoma ekina moovarihana ni ele enitthuneya okathi owo. Mwa ntakiheryo, akhala wira asembeleya wala kongresu onnaattamela, nyuwo pooti orowa yoosoma 11.
4. Xeeni munihakalala anyu mwaha wookhalana ebroxura ela esya?
4 Vaavo nimmusomiha ahu mutthu Biibiliya, ninnimukhaliherya omusuwela saana Tiithi ahu a wiirimu. Masi, nihaana-tho omwiixuttiha sa nikhuuru nootthokiheya na Yehova. (Mir. 6:20) Tthiri, ninnihakalala vanci okhalana ebroxura ela esya enirowa onikhweiherya opaka eyo!