Mwaalaleeryeke “Atthu Othene”
1. Moota xeeni anamalaleerya anilikanyihiwa aya ni mulipa oovara muteko saana?
1 Mulipa oovara muteko saana onnikhalana ikaruma sinceene, ni onnisuwela okathi ni moota woorumeela. Moolikanasa, hiyo nookhalana ikaruma sinnikhaliherya moota woolaleerya. Mwa ntakiheryo, nookhalana ibroxura sinceene sinnikhweiherya waalaleerya “atthu othene”. (1 aKor. 9:22) Esuplemento ya Orummwa Ahu, ennihimya ibroxura sikina silepeliwe atthu oovirikana, ni moota wookawa ibroxura iyo.
2. Okathi xeeni onireerela orumeela ebroxura naalaleeryaka?
2 Okathi Onireerela Orumeela Ibroxura: Mulipa oovara muteko saana, onnirumeela ekaruma eyo akhala wira tthiri ennitthuneya. Moolikanasa, khuta okathi nihaana ovahaka ebroxura akhala wira mutthu ole onoottottela mureerelo, nihiwehereryaka paahi okathi onilavuliwa aya wira nakawe ibroxura. Mwa ntakiheryo, akhala wira mweeri owo ninkawa eliivuru Biibiliya Oniixuttiha Exeeni, nto khiyamphwanya mutthu ohikhanle mukristau yoowo ohinisiveliwa vanceene Biibiliya, pooti onvaha ebroxura eniphwanelela. Vano pooti onvaha eliivuru Biibiliya Oniixuttiha Exeeni nuumala wunnuuherya osiveliwa wawe masu a Muluku.
3. Nthowa xeeni vanitthuneya ahu orumeelaka saana ikaruma sahu sa muteko woolaleerya?
3 Biibiliya onnaattottopela yaale anivara saana miteko saya. (Mir. 22:29) Tthiri, khuuvo muteko wootepa otthuneya olelo-va, ovikana ‘muteko wolaleya ehapari yorera’. (aRom. 15:16) Wira nikhale “ntoko namuteko ohinùleliwa muru muteko awe”, nihaana wiimananiha orumeela ikaruma sahu.—2 Tim. 2:15.