Mwaakhaliherye Atthu Wira Anwiriyaneke Muluku
1. Ibroxura xeeni saakumiheriwe okonkresuni “Omwene wa Muluku Orwe!”, nto exeeni eniiriha ibroxura iyo okhala sookhaliherya?
1 Konkresu a eDistritu aarina muru oni: “Omwene wa Muluku Orwe!”, saahikumiheriwa ibroxura piili isya, Munwiriyaneke Muluku Wira Mphwanye Ekumi Ehinimala ni ekina yookhweya Munwiriyaneke Muluku. Okhala wira ibroxura iya sirina masu vakhaani, sinnikhweya otaphuleliwa mowaakuveya. Mwekeekhai, ebroxura Munwiriyaneke Muluku Wira Mphwanye Ekumi Ehinimala, yaaheemereriwa otaphuleliwa mattaava 431 okathi yaapacenrye aya okumiheriwa.
2. Tani anirowa ottottela mureerelo ibroxura iya?
2 Tani anirowa ottottela mureerelo ibroxura iya? Muthokorerye mikhalelo iya sinimakela okhumela olumwenku wotheene:
• Namalaleerya onnivaanela ni mwaneene etthoko, mmukwaha woopacerya wala wootthikela. Vano, onnisuwela wira mutthu owo khonisuwela osoma wala onisoma moohikhalela.
• Namalaleerya onnivaanela ni atthu anilavula nttaava nitaphuleliwe iliivuru vakhaani wala nihirina iliivuru sootaphuleliwa. Aahiiso, anamunceene mmuttettheni khansuwela osoma nttaava nenlo anilavula aya khula nihiku.
• Namalaleerya onirumeela nttaava ninlavuliwa ni matata wira aalaleerye atthu ahiniiwa mmuttettheni.
• Namuyari mmosa oniphavela omwiixuttiha mwanawe ekeekhai, yoowo nlelo ohinsuwela osoma.
3. Ebroxura Munwiriyaneke Muluku, elokiheriwe sai?
3 Moota Xeeni Silokiheriwa Aya: Ebroxura Munwiriyaneke Muluku erina masu ootepa oyeva, ni Yoolepa ya Biibiliya vathi wa khula epaaxina yeeyo enittittimiherya iponto suulupale. Nthowa xeeni? Nilikanyihe wira mutthu mukina ohoovahani ebroxura elempwale nttaava muhinsuwela anyu osoma. Niireke ebroxura eyo yamoosivelani pooti erineene ilatarato sooreera? Nnaari. Moolikanasa, atthu ahinisuwela osoma owoopiha iliivuru sirina masu. Tivonto, khula epaaxina sookhala ilatarato sooreera, sirina iseta sinithoonyerya elatarato enittharelana.
4. Ebroxura Munwiriyaneke Muluku Wira Mphwanye Ekumi Ehinimala, elokiheriwe sai?
4 Ibroxura Munwiriyaneke Muluku Wira Mphwanye Ekumi Ehinimala ni Munwiriyaneke Muluku, sirina ilatarato soolikana. Ebroxura Munwiriyaneke Muluku Wira Mphwanye Ekumi Ehinimala epakiwe wira nisomeke ni atthu ahiniwerya osoma saana wala aniixutta osoma. Ebroxura ela, pooti orumeeliwa-tho ni mulipa onimwiixuttiha Biibiliya vaavo onimusomiha awe ole onirumeela ebroxura Munwiriyaneke Muluku. Wa khula ipaaxina piili, osulu wa moono woothiyana nihaavo nikoho nenlo nnaakhuliwa muhina mwa ipaaxina iyo. Nave-tho, ilatarato sookhalana ikomentaario ni soolepa sa Biibiliya. Vathi wa khula epaaxina, yookhala ekaaxa yoorakama erina soohimmwa sikina ni Yoolepa yooriipihiwa yeeyo enitthuneya othokoreriwa, moovarihana ni osuwela wa ole oniixuttihiwa.
5. Silini ni moota xeeni ninrowa ahu okawaka ibroxura iya?
5 Moota Woorumeela Ibroxura Iya: Nyuwo pooti okawa ibroxura iya mwaalaleeryaka khuta empa vaavo munoona anyu oreerela, pooti mweeri owo sihikaiwaka ibroxura. (Nwehe ekaaxa eni: “Ninrowa Okawaka Sai?”) Mukwaha wootthikela oxukurya, nyuwo pooti opaceriha ebroxura ela mmuleelaka mwaneene etthoko wira ehaavo etthu muniphavela anyu omooniherya, nuumala-vo khiyanvaha ebroxura eyo.
6. Ninrowa wiiriha sai yoosoma ya Biibiliya nirumeelaka ibroxura iya?
6 Okhala wira ebroxura Munwiriyaneke Muluku kherina makoho, yoosoma eyo khenrowa okhala ya makoho ni waakhuliwa, ntoko siniiraneya aya mwiirihaka yoosoma murumeelaka eliivuru Biibiliya Oniixuttiha Exeeni. Ohiya-vo, khuta muttetthe, atthu waasivela owiriyana myaha. Tivonto, murumeele ilatarato siri mbroxurani wira muhimye myaha sa Biibiliya. Nave-tho, mutthokiherye ele sinitaphulela aya ilatarato iyo. Mooniheryeke ohakalala. Munvekele ole onimusomiha anyu Biibiliya wira ohimye ele enuupuwela awe. Nave-tho musome soolepa siri vathi va epaaxina, ni nvaanele nuuwo murumeelaka soolepa iyo. Mpake makoho animwiiriha okomentari ni muttittimiherye wira ohiiwexexa mwaha owo. Ohiya-vo, akhala wira mutthu owo onirumeela ebroxura Munwiriyaneke Muluku Wira Mphwanye Ekumi Ehinimala, musome hoothe masu ni soolepa saya okathi munithokorerya anyu khula elatarato.
7. Ninrowa omukhaliherya sai ole onimusomiha ahu Biibiliya orowa muhoolo?
7 Mmukhaliherye Ole Onimusomiha Anyu Biibiliya Orowa Vahoolo: Tthiri, yoosoma ela enoomwiiriha ole onimwiixuttiha anyu Biibiliya ophavela wiixutta osoma wira oweryeke osoma moolumo a Yehova mmansawe. (Math. 5:3; Yoh. 17:3) Tivonto, akhala wira yoosoma eyo munirumeela ebroxura Munwiriyaneke Muluku, nuuvira okathi nyuwo pooti omwiixuttiha osoma. Nuumala-vo, mpaceryeke omusomiha ebroxura Munwiriyaneke Muluku Wira Mphwanye Ekumi Ehinimala. Hata mmalihaka othokorerya ibroxura iyo piili, ole onimusoma Biibiliya khonrowa ophwanelela wira obatiziwe. Nto, muhaana opacerya orumeela eliivuru Biibiliya Oniixuttiha Exeeni, wala eliivuru ekina yoophwanelela enrowa omukhaliherya omwiiwexexa saana Biibiliya.
8. Xeeni munireerela anyu oxukhurela mwaha wa ibroxura iya isya sa muteko woolaleerya?
8 Atthu ahaana onwiriyana Muluku akhala wira anniphavela ekumi ehinimala. (Yes. 55:3) Yehova “ontthuna wira atthu othene”, ohela muhina ale ahinsuwela osoma, yiixutte moota wonwiriyana. (1 Tim. 2:3, 4) Mwekeekhai, ninnixukhurela vanceene mwaha wa ibroxura iya isya nikhanle ahu oorumeela wira niwiixuttihe atthu wira anwiriyaneke Muluku!
[Ekaaxa epaaxina 3]
Ninrowa Okawaka Sai?
Mmooniherye mwaneene etthoko ipaaxina 2-3, nto muhimye so: “Munniphavela okhala elapo yooreera ntoko ela? [Nwehereryeke waakhuliwa.] Soolempwa sinihimya [wala eliivuru ela yowaarya enihimya] wira Muluku moohipisa onooreeriha elapo ela wira ekhale ya murettele, ohinrowa okhala atthu oohaawa wala aretta. Nkahaya moone ele ekhanle ahu oopaka wira nakhale opuro owo. [Mmusome Yesaya 55:3, yoowo ori vasulu va epaaxina 3.] Eveersu ela enihimya wira ‘nirowe’ wa Muluku ni ‘ninwiriyane’. Masi, ninrowa onwiriyana sai Muluku”? Mmooniherye ipaaxina 4-5 ni muthokorerye nuuwo wakhuliwa waya. Akhala wira khorina okathi, mmuhiyerye ebroxura eyo ni mwiiwanane okathi wootthikela wira muthokorerye nikoho nlo.