Muroweke Vahoolo Ntoko Anamalaleerya
1. Matakiheryo xeeni a eseekulu yoopacerya anooniherya wira nihaana orowaka vahoolo ntoko anamalaleerya?
1 MaKristau ahaana wiimananihaka ntoko anamalaleerya. Ti maana aya Yesu aalokihenrye awe ni owiixuttiha atthareli awe mmuteko woolaleerya. (Luka 9:1-5; 10:1-11) Akila ni Prisila yaahimukuxa Apolo ni ‘khumurowana owannyeya, khumutthokiherya orattene ephiro ya Muluku’. (Mit. 18:24-26) Nave, Paulo aahimutumererya namalaleerya oolimalela Timótheyo wira ovikaniheke wiixuttiha saana, wira “atthu othene yoneke” orowa wawe vahoolo. (1 Tim. 4:13-15) Nto nnaamwi akina a hiyo apacenrye ene khalai orumeela ntoko ipottha sa Apwiya, nihaana ovikaniha olokiherya inamuna sahu soolaleerya.
2. Ninrowa wiixutta sai sa anna akina?
2 Mwiixutteke sa Anna Akina: Enamuna emosa ya olokiherya olaleerya wahu ori wiixutta sa anna akina. (Mir. 27:17) Nvaheke ephoole okathi mukhwiinyu onilaleerya awe. Mwaavekeleke miruku anna oolimalela, ni nwiriyaneke ele enihimya aya. (Mir. 1:5) Niireke vannooxankihani opaka mikwaha sootthikela, opaceriha yoosoma ya Biibiliya, wala wiirela mpantta enamuna ekina yoolaleerya? Munvekele mutokweene a egrupu anyu wala munna mukina oolimalela wira ookhaliheryeni. Nave, munepa wootteela onoonikhaliherya, nto nivekeleke moohihiyererya.—Luka 11:13.
3. Nooneleke sai akhala wira noovahiwa miruku, hata nihivenke?
3 Muhinyoonyiheye akhala wira moovahiwa miruku, hata muhivenke. (Mus. 7:9) Ntoko Apolo, mweemye nikhaliheryo mowiiyeviha ni oxukhurela. Eyo enooniherya wira nyuwo mookhalana miruku.—Mir. 12:15.
4. Nthowa xeeni nuulupale ninniiriha ophavelaka orowa vahoolo ntoko anamalaleerya?
4 Orowa Wahu Vahoolo Onninvuwiha Muluku: Orumeelaka malikanyiho, Yesu aahaatumererya awiixutti awe okhala anamalaleerya. Owo ailikanyinhe ni mwiri wa evidera; awiixutti awe ntoko iritta. Owo aahimyale wira Tiithi awe onnilokiherya iritta siniima mihokorokho “wira sitepeke wima”. (Yoh. 15:2) Ntoko mwaneene ematta ya evidera oniphavela awe wira iritta “sitepeke wima”, nto Yehova oniphavela wira nivikaniheke wunnuuherya “yowima ya iyano” sahu. (aHéb. 13:15, Biblya Exirima.) Exeeni enikhumela vaavo ninrowa ahu vahoolo? Yesu onnaakhula oriki: “Ovuwa w’Atithi aka ti nno: wira mwimeke mihokorokho sowatta”.—Yoh. 15:8.