Nilokiherye Inamuna Sahu Soolaleerya: Mmukhaliheryeke Ole Orina Anyu

Otthuneya Waya: Yesu aanisuwela otthuneya waya olaleerya ni munna mukina. Tivonto, okathi aarumme awe awiixutti awe 70 orowa olaleerya, owo aarumme anli-anli. (Luka 10:1) Namalaleerya mukhwiihu onoowerya onikhaliherya okathi ninxankiheya ahu, wala ohisuwela moota womwaakhula mwaneene etthoko. (Mus. 4:9, 10) Nave, onoowerya onileela ele enisuwela awe, ni ikwaha sikina, onivaha malakiheryo anrowa onikhaliherya okhala anamalaleerya ooloka. (Mir. 27:17) Ohiya-vo, owo onoowerya onilipiha orweela mwa ovaanela saana nuumala okhuma vatthokoni.​—aFil. 4:8.

Moota Wookhaliheryana:

• Nvaheke ephoole vaavo mwaapara anyu onilavula awe. (Yak. 1:19) Okathi onisoma awe yoolepa, mutthareke mBiibiliyani mwanyu. Eyo enimookhweiheryani omukhaliherya okathi onitthuneya aya.

• Mukhale a miruku wira musuwele okathi onireerela anyu olavula wira mmukhaliherye. (Mir. 25:11) Akhala wira ole orina anyu oniiriha yoosoma ya Biibiliya, nyuwo pooti ovaha ikomentaario soohipisa. Masi, mwaalaleeryaka khula empa, waaniheryasa mwaapara anyu onrowa ophavela wira mmuhiye olavuleke akhala wira eyo ekwaha awe. Ekeekhai wira, akhala wira owo namalaleerya a niinano wala khonisuwela saana moota wowaakhula ele enikohiwa awe, moohaaniherya onooxukhurela nikhaliheryo nanyu. Masi pooti mulaleeryaka khula empa, opaka mikwaha sootthikela, wala wiiriha yoosoma ya Biibiliya, muhimukwaseke masu mwaapara anyu, muhiphaveleke olavula mekhinyu, wala opaceriha mwaha mukina.

• Akhala wira muniphavela onvaha malakiheryo ole orina anyu animukhaliherya olaleerya saana, muhoovelele. (Mir. 3:27) Okathi wooreerela, nyuwo pooti ohimya so: “Munoonela sai moota waakhunle anyu”, wala “Miyo kinaakhula so”, aahiiso “Kookhala oowookhaliheryani?” Muupuweleke wira anna akina annisiveliwa ovahiwa malakiheryo okathi mukina, masi anookhumuwa akhala wira khuta okathi ahinipaka aya saana etthu anivahiwa malakiheryo.

Mweererye Ela Mweeri Yoola:

• Nuumaliha olaleerya, mmuleele ole orina anyu ele ehimyale awe wala epanke awe, yookhalihenryeni vanceene.