Nvareke Muteko Woolaleerya ni Nthiti
OLALEERYA ihapari sooreera ti muteko wootepexa otthuneya onivariwa olelo-va valaponi. Anamoona a Yehova otheene annoona muteko owo okhala eparakha yuulupale vaavo vanirowa aya waapaka awiixutti. Moohaaniherya, nyuwo munnikupali wira mapioneero ni anamalaleerya akina annikumanana mixankiho okathi mukina, seiyo siniwooceeliha okhalela nthiti muteko woolaleerya.
Anamalaleerya akina vannaarikela omphwanya mutthu ooreerela ovaanelana okathi onilaleerya aya empa ti empa. Tthiri anamunceene khanikhala vatthokoni vaya okathi onirowa ahu olaleerya mapuro yaale anikhaliwa. Okathi oniphwanyiwa aya axineene etthoko, akina khaneemererya muhupi wa Omwene onilaleeriwa aya, ni akina annikhala oowali. Nto anamalaleerya akina annixanka mwaha woowi aakhalana muttetthe muulupale orina atthu aniphavela wiiwa ihapari, masi awo anoovelela wira khanirowa owerya waalaleerya atthu otheene. Ni aakhala atthu akina mmulokoni apacenrye olaleerya khalai, nto sivira iyaakha sinceene ovikana ele yaawehererya aya, nto mahiku ala anakhala ookhulumuwa.
Niireke eyo etthu ehinisuwela ahu wira atthu anceene a Yehova sinnaakhumelela mixankiho sinivukula nthiti naya mmutekoni woolaleerya? Nnaari. Tthiri, hiyo khanniwehererya wira vanrowa okhala vookhweya olaleya muhupi wa Muluku yoowo onoopola ikumi olumwenku ola onihooleliwa ni “mutakhali”, Satana Diabo!—1 Yoh. 5:19.
Khula muxankiho onikumana anyu okathi onilaleerya anyu ihapari sooreera, Muluku onimookhaliheryani oxintta. Nto munrowa opaka exeeni wira munnuuherye nthiti nanyu okathi onivara anyu muteko woolaleerya? Nrowe nithokorerye malakiheryo vakhaani.
WAAKHALIHERYA ALE AHILIMALENLE MUTEKO WOOLALEERYA
Khula mwaakha, ikonto sinceene sa atthu annibatiziwa khukhala Anamoona a Yehova asya. Vakhala wira nyuwo nvaherenrye okumi anyu niinano khubatiziwa, moohaaniherya vamoosivelani ovara muteko ni atthu yaale apacenrye khalai muteko owo. Nto vakhala wira nyuwo mpacenrye khalai ovara muteko woolaleerya, niireke khamunoona okhala etthu yoohakalaliha waakhaliherya ni owiixuttiha ale a niinaano?
Yesu aanisuwela wira awiixutti awe yaanitthuneya olakiheriwa wira awerye ovara oratteene muteko aya wa olaleerya, ni aahiwooniherya moota woovara muteko owo. (Luka 8:1) Olelo-va nave, vannitthuneya owiixuttiha akina wira asuweleke ovara muteko woolaleerya saana.
Hiyo nihuupuweleke wira anamalaleerya asya animwiixutta ovara saana muteko owo mwaha wa orowa olaleerya paahi. Munna wala murokora owo onitthuneya olakiheriwa ni anna oophenta anisuwela muteko owo. Malakiheryo awo anihela muhina owooniherya anamalaleerya a niinaano moota (1) woolokiherya ni ovarihela muteko enamuna ya olaleerya, (2) osuwela opaceriha ovaanela ni atthu ari mmaitthokoni wala anivira mphironi, (3) moota wookawa iliivuru, (4) waaxukurya ale anooniherya osiveliwa, ni (5) opaceriha soosoma sa Biibiliya. Masi, malakiheryo awo anrowa ovara muteko aya vakhala wira ale anilakiheriwa annaaweha ni waatakiha ale aniwiixuttiha. (Luka 6:40) Moohaaniherya namalaleerya musya vannimusivela orowa olaleerya ni mutthu oniwiriyana ele enihimya awe ni oniwerya omukhaliherya wakhumelela muxankiho. Anamalaleerya asya anoophwanya mureerelo vakhala wira annittottopeliwa ni ovahiwa malakiheryo anitthuneya.—Mus. 4:9, 10.
NVAANELEKE NI OLE ONILALEERYANA ANYU
Nnaamwi wiimananiha wahu wuulupale oryeene olavula ni atthu anaaphwanya ahu mmaitthokoni, mahiku makina ovaanela wooloka tiiwe onilavula anyu ni ole onilaleeryana anyu. Muupuweleke wira Yesu aarumme awiixutti awe orowa olaleerya “anli-ànli”. (Luka 10:1) Vaavo yaavara aya muteko mukina ni mukhwaawe yanwerya olipihana ni okhaliheryana. Tivonto okathi oniviriha ahu nilaleeryaka ni munna onninivaha eparakha ya ‘olipihana ni wamini omosaru’.—aRom. 1:12.
Vano itthu xeeni sikhanle anyu oolavula okathi owo? Niireke mmosa a nyuwo ookhalana yookhumelela yoolipiha? Niireke yookhala eponto yooloka yiixuntte anyu mpakaka yoosoma anyu wala ya emusi anyu? Niireke yookhala etthu yiiwale anyu omuthukumanoni yoolipinheni? Okathi mukina pooti okhuma ni munna ohinatoko anyu orowana olaleerya. Niireke nyuwo munnisuwela moota owo wiixuntte awe ekeekhai? Exeeni emwiirinhe okupali wira ola mulokiheryo wa Yehova? Miteko xeeni wala iparakha xeeni sitonko awe okhalana khalai? Woonasa wene nyuwo pooti omuleela itthu sinisuwela anyu. Moohicikha etthu sa moota muteko woolaleerya sinirowa awe okhumela, ovara muteko ni munna onnikumiherya okathi wooreerela ‘okhaliheryana’ mukina ni mukhwaawe.—1 aTes. 5:11.
MUTTHARIHELE EPROGRAMA ANYU YA OMUSOMA BIIBILIYA
Etthu yootthuneya wira nvikanihe okhalela nthiti muteko woolaleerya ori okhalana ni ottharihela eprograma ya yoosoma ya mutthu mwaneene. “Murumeyi òroromeleya ni ànkhili”, ookumiherya iliivuru soovirikana sirina myaha sinceene sooreerela osoma. (Math. 24:45) Nto sookhala myaha sinceene mukhanle anyu oosoma wira mphwanye yoolya ya omunepani. Vano nrowe nithokorerye ntakiheryo nimosa voohimya sa mwaha wooreerela mutthu osoma: Xeeni muteko woolaleerya Omwene oryaawe wootthuneya vanceene? Ekaaxa eri muru yoola ennitthokiherya mathowa aya.
Nto othokorerya mathowa yaalikeliwe ekaaxa eyo onimookhaliheryani olaleerya ni nthiti. Xeeni ohithanlaka mwaha ola wira musome ni moone mathowa aromoliwe? Nuumala osoma muupuwelele mathowa awo ni soolepa siri vaavo. Wira siiso onimookhaliheryani okhala oolipa ni okhalela nthiti muteko woolaleerya.
MWEEMERERYEKE MALAKIHERYO ANIVAHIWA ANYU
Nikhuuru nootthokiheya na Yehova ninnivaha malakiheryo manceene yaawo apakeliwe onikhaliherya olokiherya inamuna sahu sa olaleerya. Moowuncererya muteko ahu woolaleerya empa ti empa, hiyo pooti olaleerya nirumeelaka iwarakha, telefoni, olaleerya mphironi wala mapuro makina oowaatta atthu, ni waalaleerya atthu mohiilokiherya opuro oniiriwa nakoso. Hiyo-tho pooti okhweiherya makhalelo ahu wira nikhalane okathi munceene oniphiyerya orowa olaleerya mapuro yaale ahinaattela olaleeriwa.
Niireke munniiwelela malakiheryo moota owo? Niireke mootoko weererya ottharihela nnakhala nimosa? Anamunceene atonko opaka eyo aaphwanya ohakalala wuulupale. Nrowe nithokorerye matakiheryo mararu.
Ntakiheryo noopacerya ninhela muhina ovarihela muteko etthu ehimmwale ni Orummwa Ahu wa Omwene sa enamuna ya opaceriha soosoma sa Biibiliya. Eyo yaahimwiiriha murokora mmosa oniireliwa April opaceriha soosoma ni axaapara awe araru anivarana awe muteko. Owo aahitteeliwa murima vaavo atthu awo araru yaakhulenle aya omusoma Biibiliya ni orowa owiriyana mithukumano sa mmulokoni.
Ntakiheryo na nenli nnivarihana ni okawa irevista sahu. Ninnitumereriwa owaavyaka atthu aniwoona ahu wira onimwaasivela mwaha okumiheriwe ni erevista ahu. Mutokweene mmosa a esirkwitu wEstados Unidos onihimya wira aahaavaha Despertai! aalavula sa ipenewu, atthu otheene yaale yaahoolela ilooxa saatumiha ipenewu muttetthe ole. Owo ni amwaarawe yaahikuxa-tho muru oni “Os Desafios de Ser Médico” khwaavaha mameedico aniphiyerya 100 a esirkwitu awe. Owo onihimya wira: “Waaxekurya mameedico ale waahinikhaliherya osuweliwa ni mameedico awo ni waavaha iliivuru sahu. Nuumala waaxukurya mwa enamuna yoopatthaneya atthu awo, nto vano vanninikhweela waalavulana”.
Ntakiheryo na neeraru nnihela muhina olaleerya orumeeliwaka telefoni. Murokora mmosa oniireeliwa Judy aahilepela oseedi wahu ophavelaka oxukhurela otumereriwa wira olaleeryeke omurumeelaka telefoni. Owo onihimya wira ameyawe arina iyaakha 86, ni oowereyasiwa vanceene, vano anniwerya wiirela mpantta muteko woolaleerya amurumeelaka telefoni ni anniphwanya ohakalala mwaha wa oweryaka omwiiriha yoosoma ya Biibiliya muthiyana mukina orina iyaakha 92!
Tthiri malakiheryo anikumiheriwa muliivuruni mwahu voohimya sa olaleerya annivara muteko. Nto nvariheleke muteko! Malakiheryo awo animookhaliheryani okhalela nthiti muteko woolaleerya.
MUKHALANE SOOLUKAMA SOOREERELA
Okhumela wahu saana mmuteko woolaleerya khoniphimmwa ni mwaattelo wa iliivuru siniwerya ahu okawa, soosoma sa Biibiliya sirina ahu, wala mwaattelo wa atthu yaakhalihenrye ahu okhala arummwa a Yehova. Mwa ntakiheryo, atthu akavi yahaakhanle amusi awe, Nowe aawenrye awe waakhaliherya omurumeela Yehova? Hata vari siiso owo onihimmwa okhala namalaleerya ookhumela saana. Etthu yuulupale ti omurumeela Yehova moororomeleya.—1 aKor. 4:2.
Anamalaleerya anceene annoona wira okhalana soolukama sooreerela onnikhaliherya okhalela nthiti muteko woolaleerya. Nto soolukama xeeni? Soohimmwa sikina siniphwanyaneya ekaaxa eri muru yoola.
Mukhaliheriwaka ni Yehova, mmananihe waavya inamuna soowiiriha muteko anyu okhumela saana. Okathi onirowa anyu waakhwaniheryaka soolukama sanyu, munrowa ohakalala mwaha woosuwela wira munnipaka etthu enimuhakalaliha Yehova vaavo vanilaleerya anyu ihapari sooreera.
Ekeekhai wira olaleerya ihapari sooreera ti wooxankiha okathi mukina. Masi yookhala etthu ekhanle anyu oopaka wira mulaleeryeke ni nthiti Omwene. Muttottele mureerelo wa olipihana mukina ni mukhwaawe, mukhalane ni nvarexexe eprograma ya omusoma Biibiliya, nvarihele muteko malakiheryo anivahiwa ahu ni murumeyi oororomeleya ni ankhili, ni mukhalane soolukama sooreerela. Nave muhiliyaleke wuupuwelela wira Yehova toovanheni eparakha ya olaleya ihapari ni okhala Anamoona awe. (Yes. 43:10) Tthiri mwiira siiso munoophwanya ohakalala wuulupale ni munookhalana nthiti okathi woolaleerya!
[Ekaaxa epaaxina 16]
XEENI MUNITTHUNEYA ANYU OKHALELA NTHITI MUTEKO WOOLALEERYA?
▪ Muteko woolaleerya onnikhaliherya waakhwanela wa iprofesia sa mBiibiliyani.—Mar. 13:10.
▪ Hiyo ninnooniherya wira ninnimwiiwelela Muluku vaavo vanivara ahu muteko wa waapaka awiixutti.—Math. 28:19, 20.
▪ Yehova oniphavela wira atakhali otheene alopoliwe ni attharuwe sootakhala sinipaka aya.—Ezek. 3:19.
▪ Hiyo nookhalana muritti wa waaleela ihapari sooreera atthu akina.—Mir. 20:26, 27; aRom. 1:14, 15.
▪ Ovara muteko woolaleerya onniniiriha osyaka nthowa na ephome.—Ezek. 3:18.
▪ Sowiixuttiha siri mBiibiliyani ti sootthuneya wira noopowe, ni sinoowerya owoopola ale anniwiriyana.—1 Tim. 4:16.
▪ Olavula voohimya sa Yehova ni onvuwiha yena siniirela mpantta okokhorela wahu.—aHéb. 13:15.
▪ Ninnooniherya omphenta wahu Yehova ni Yesu vaavo vanivara ahu muteko ola.—Yoh. 14:15; 1 Yoh. 5:3.
▪ Muteko ahu woolaleerya onnivaanyiha itthu sotheene Satana omoothenrye awe Yehova.—Yes. 43:10-12; 2 aKor. 4:4.
[Ekaaxa epaaxina 18]
MUKHALANE SOOLUKAMA SOOREERELA
▪ Mukhalane eprograma ya muteko woolaleerya khula esumana ni mutthareke yeeyo.
▪ Mphaveleke opaceriha yoosoma ya Biibiliya khula okathi.
▪ Vaweryaneya, musomeke yoolepa khula okathi onivaanela anyu ni mutthu vatthokoni wala nipuro nikina.
▪ Muncererye mwaattelo wa irevista sinikawa anyu khula mweeri.
▪ Mutthikele waaxukurya atthu ootheene yaale yoonihenrye osiveliwa muhupi wa Omwene.
▪ Murumeeleke inamuna sinceene sa muteko woolaleerya.
▪ Mwaavye inamuna sinceene sinrowa wookhaliheryani olaleerya moohiilokiherya.