Inamuna sa Olaleya Ihapari Sooreera

YESU ohaavaha ntakiheryo nooloka atthareli awe na moota akhanle aya oolaleya ihapari sooreera. Owo aanirowa mapuro yaakhala atthu onaalaleerya ni owiixuttiha empa ni empa wala mapuro oowaatta atthu. (Math. 9:35; 13:36; Luka 8:1) Ohiya-vo, Yesu anilaleerya muttitthi wa atthu, mutthu mmosa paahi ni aaniwiixuttiha atthareli awe. (Mar. 4:10-13; 6:35-44; Yoh. 3:2-21) Nave Yesu aanittottela mureerelo khula okathi wira aalipihe ni waamaaliha atthu. (Luka 4:16-19) Hata okathi yoole aaphavela awe omumula, owo khaahiya waalaleerya atthu. (Mar. 6:30-34; Yoh. 4:4-34) Okathi ninsoma ahu muteko woolaleerya wa Yesu, niireke khanimphavela omutakiha? Tthiri moonelo ahu onoolikana ni moonelo yaarina aya arummwa.—Math. 4:19, 20; Luka 5:27, 28; Yoh. 1:43-45.

² Nrowe niwehe inamuna maKristau arina aya eparakha ya okhaliherya muteko woolaleerya waapacerihiwe ni Yesu Kristu iyaakha 2.000 sivinre.

OLALEERYA EMPA NI EMPA

³ Okhala wira na Anamoona a Yehova, ninnisuwela efaita muteko woolaleya ihapari sooreera sa Omwene mwa enamuna yootthokiheya ni empa ni empa. Ninnirumeela enamuna ela okhuma khalai, nto ennisuweliwa okhala ethoonyeryo ahu. Ohiya-vo, sookhumelela saya enamuna ela, ennooniherya wira ti ya miruku maana ninnaaphwanya atthu imilyau sinceene okathi vakhaani paahi. (Math. 11:19; 24:14) Olaleerya empa ni empa enamuna yooloka nnooniherya ahu wira ninnimphenta Yehova ni atthu akina.—Math. 22:34-40.

⁴ Enamuna ya olaleerya empa ni empa khahiyo ekumiheriwe ni Anamoona a Yehova. Murummwa Paulo ohimmye wira aaniixuttiha empa ni empa. Olavulaka ni axitokweene a wEefeso voohimya sa muteko woolaleerya, owo aahimmye so: “Okhuma nihiku naphiyalyaka wAsia. . . . Nkinakhotte wileva mw’etthu p’itthu yatthuna worerihani: nto kiholalèryani ehapari yorera, kiwixuttihakani mmuthukumanoni ni mmawannyinyu”. Mwa enamuna ela, murummwa Paulo aahaalaleerya “ni nthiti aYuda n’amalapo wira erukunuxerye mirima saya wa Muluku, ni wira emwamini Yesu Kristu Pwiy’ahu”. (Mit. 20:18, 20, 21) Okathi ole, aRoma yaanitumererya waakokhorela amuluku eethiru, nto atthu anceene ‘yanattitimiha vanjene amuluku aya’. Nto vaari vooloka moohipisa omphavela Muluku “opattunxe olumwenku ni sothene siri memmo”, yoowo aaleela “atthu othene a mulaponi mothene wira ahana orukunuxa murima”.—Mit. 17:22-31.

⁵ Olelo-va nnootepa waattamela wanikisa wa olumwenku ola wootakhala. Nto ti vooloka waalaleerya atthu anceene ihapari sooreera. Mwaha woosuwela eyo, nihaana wuncererya wiimananiha wahu oluttuweliwa olaleerya. Okathi ovinre, ohooniherya wira khiivo enamuna ekina yooloka ya owaavya atthu arina etala ya omunepani ohikhanle owaavya empa ni empa. Olelo-va, enamuna ela ennikhumela saana ntoko okathi wa Yesu ni arummwa.—Mar. 13:10.

⁶ Niireke nyuwo munnilaleya ihapari sooreera empa ni empa? Akhala wira munnilaleerya, mukupaliki wira Yehova onnisiveliwa vanceene wiimananiha wanyu. (Ezek. 9:11; Mit. 20:35) Woonasa wene, khivanookhweelani olaleerya empa ni empa. Pooti wira mookhalana mixankiho sa okumi aahiiso munilaleerya muttetthe atthu anceene ahiniphavela aya woowiriyanani. Nave pooti wira elapo anyu muteko ahu woolaleerya onnikhoottihiwa ni kuvernu. Ohiya-vo, woonasa wene mwa mutthu oowuuliwa muru, nto eyo ennooxankihani ovaanela ni atthu muhinaasuwela anyu. Nto khula okathi munrowa anyu olaleerya empa ni empa munnixanka. Niireke muhaana okhulumuwa? (Okhum. 4:10-12) Muxankiho anyu onoolikana ni wa anna ni arokora a mapuro makina.

⁷ Yesu aahaaroromeliha awiixutti awe oriki: “Vano miyo kinokhala ni nyuwo mahiku othene, mpakha elapo omala”. (Math. 28:20) Yooleiherya ela ya Yesu enninikhaliherya wiirela mpantta muteko wowaapaka awiixutti. Moonelo ahu onoolikana ni wa murummwa Paulo yoowo aahimmye so: “Kinniwerya sothene mwa [ole] . . . onkivaha ikuru”. (aFil. 4:13) Muttotteleke mureerelo mareheryo muloko onipaka awe wira mwalaleerye empa ni empa. Vaavo munrowa anyu olaleeryaka ni atthu akina, eyo enimoolipihani ni wookhaliheryani vanceene. Nave munvekeleke Muluku wira ookhaliheryeni oxintta khula muxankiho munrowa anyu okumana ni mwiimananiheke vanceene olaleya ihapari sooreera.—1 Yoh. 5:14.

⁸ Vaavo munaalaleerya anyu atthu akina ihapari sooreera, nyuwo munimwaavaha eparakha ya osuwela “mwaha w’ororomela ori mwa nyuwo”. (1 Ped. 3:15) Nto munrowa otepaka woona ovirikana okhanle eriyari ya atthu arina nlipelelo na Omwene ni ahirina nlipelelo. (Yes. 65:13, 14) Nave munimooniherya wira munniiwelela yooruma ya Yesu ya ohiya “warya wanyu” waamwaleelaaka atthu ni munookhalana eparakha ya waakhaliherya atthu akina omusuwela Yehova ni ekeekhai eniphwanyiha ekumi yoohimala.—Math. 5:16; Yoh. 17:3; 1 Tim. 4:16.

⁹ Ennipakiwa eprokrama ya olaleerya empa ni empa wanikisa wa esumana ni eriyari ya esumana. Mittetthe onixankiha aya waaphwanya atthu othana, miloko sikina sinnipaka eprokrama ya olaleerya vahalaka wiila wala ohiyu. Woonasa wene okathi owo atthu anniphavela owaakhela aletto ohiya voosiisu.

OWAAVYA ALE ANIPHAVELA

¹⁰ Yesu aahaaleela atthareli awe ‘waphavela’ wala owaavya atthu aniphavela. (Math. 10:11) Yesu aaniwaavya ale aniphavela olaleeryaka empa ni empa. Owo anilaleerya okathi wotheene wooreerela, okhale olaleerya moowiilokiherya ni moohilokiherya. (Luka 8:1; Yoh. 4:7-15) Nave arummwa yaanilaleerya mapuro otheene yaaphwanya aya atthu.—Mit. 17:17; 28:16, 23, 30, 31.

¹¹ Moolikanasa, olelo-va yoolakela ahu ori waaphwanyiha atthu anceene vaaweryaneyaka muhupi wa Omwene. Nto wira nipake eyo, nihaana otthara enamuna yoolaleerya ya Yesu ni arummwa awe, ni wiilimaleliha marukunuxo a okathi ni makhalelo a atthu a muttetthe ahu. (1 aKor. 7:31) Mwa ntakiheryo, anamalaleerya anceene anniphwanya mireerelo vaavo anaalaleerya aya atthu mapuro anivara aya muteko. Olaleerya mphironi onnikumiherya mireerelo sinceene ilapo sinceene, ntoko olaleerya mapuro aniweliwa ikaaro ni khula opuro nnaaphwanya ahu atthu. Miloko sikina sinnirumeela ikarinyu ni meesa okathi woolaleerya. Ohiya-vo, mapuro anikhala atthu anceene, ebetheli ennipaka mareheryo a opaka ekampaanya ya vameekhaaya ya olaleerya mapuro oowaatta atthu mpooma arumeeliwaka anna ni arokora a miloko soovirikana. Nto eyo ennaakhaliherya anamalaleerya olavula ni atthu nihinaaphwanya ahu okathi ninlaleerya ahu empa ni empa.

¹² Mapuro oowaatta atthu, akhala wira mutthu onniphavela ihapari sooreera pooti onvaha eliivuru wala etthu ekina ninrumeela ahu. Wira nimukhaliherye wuncererya ophavela wawe ihapari sooreera, nyuwo pooti onvaha nummuru nanyu wira mmuxukurye okathi mukina, nave pooti omuleela esaiti ahu jw.org wala okathi ni nipuro nowaattamela nimpaka ahu mithukumano. Mwiira siiso, munimoona wira olaleerya mapuro oowaatta atthu ti woohakalaliha ni munimuncererya muteko anyu woolaleerya.

¹³ Masi, muteko avahiwe aya maKristau olelo-va khahiyo paahi olaleya ihapari sooreera. Maana wira naakhaliherye atthu osuwela ekeekhai eniphwanyiha ekumi yoohimala ti vooloka waaxukurya ikwaha sinceene ale aniphavela wira naakhaliherye okhala maKristau oolipa momunepani.

OPAKA IREVISITA

¹⁴ Yesu aahaaleela atthareli awe wira: “[Nyuwo] munrowa okhala anamon’aka . . . mpakha omalenle elapo”. (Mit. 1:8) Nave aahaaleela wira: “Vano, murowé, mwawixuttiheke atthu a maloko othene, . . . mwawixuttiheke wettela sothene sòrumalyakani”. (Math. 28:19, 20) Opaka irevisita onniniphwanyiha ohakalala okathi ninvara ahu muteko wa Yehova. Vaavo munaaxukurya anyu ekwaha yoopacerya atthu ale aniphavela ihapari sooreera, woonasa wene awo anoohakalala woowehani ekwaha ekina. Vaavo munimakela anyu waaleela myaha sa mBiibiliyani, munoolipiha omwaamini waya Muluku ni munimwaakhaliherya woona wira ahaana omusuwela oratteene Muluku. (Math. 5:3) Akhala wira munimwiilokiherya oratteene ni munimwaaxukurya okathi wooreerela, pooti wira munoopaceriha yoosoma ya Biibiliya. Eyo ehaana okhala yoolakela anyu okathi munipaka anyu irevisita. Hiyo khahiyo nnaala epyo ya ekeekhai paahi masi ninnikhuwari wira yinnuweke.—1 aKor. 3:6.

¹⁵ Atthu akina onnaaxankiha opaka irevisita. Woonasa wene, nyuwo onnookhweelani waalaleerya mowaakuveya ihapari sooreera ni ennoosivelani enamuna eyo ya olaleerya. Masi munnixanka vanceene okathi munuupuwela anyu otthikela waaxukurya wira nvaanele myaha sa mBiibiliyani. Akhala wira ti siiso, muhaana wiilokiherya oratteene ni wiimananiha vanceene. Musuweleke wira malakiheryo ninvahiwa ahu muthukumano wa eriyari ya esumana animookhaliheryani vanceene. Nave nyuwo pooti omulattula namalaleerya orina sookumana sinceene wira mwapake erevisita eyo hoothe.

SOOSOMA SA BIIBILIYA

¹⁶ Okathi aalavula awe ni mulopwana aakenle etiini ya aYuda, yoowo aasoma Nuulumo na Muluku, Filipe aamukonhe so: “Khino munníwa-mo sinsomanyu?” Mulopwana ole aakhunle so: “Kinwerya sai wiwa-mo, ahikhanle mutthu onkitaphulela?” Yowiiraneya eri Miteko ekapiitulu 8, ennooniherya wira opacerihaka ni mpantta wa Soolempwa mulopwana ole aasoma awe, Filipe ‘ahimulalèrya ehapari yorera ya Yesu’. (Mit. 8:26-36) Hiyo khaninsuwela okathi Filipe aavirinhe awe ori ene ni mulopwana ole, masi ihapari sooreera aamulalenrye awe saahimwiiriha mulopwana ole okhalana waamini ni ovekela opatisiwa. Nto mulopwana ole aahikhala mutthareli a Yesu Kristu.

¹⁷ Atthu anceene olelo-va khanimusuwela oratteene Biibiliya, nto nihaana waaxukurya ikwaha sinceene ni waasomiha oratteene Biibiliya isumana sinceene, myeeri sinceene, mwaakha ntero wala ovikana wira akhalane waamini ni aphwanelele opatisiwa. Masi opixa murima ni waakhaliherya moophenta onimwaakhaliherya okhala mutthareli a Yesu ni onniphwanyiha mareeliho ntoko Yesu aahimmye awe oriki: “Mulipa-òvaha onoreriwa onvikana mulipa-òvahiwa”.—Mit. 20:35.

¹⁸ Tthiri nyuwo munniphavela omusomiha mutthu Biibiliya murumeelaka eliivuru epakiwe wira naasomiheke atthu Biibiliya. Vaavo munivarihela anyu muteko malakiheryo ninvahiwa ahu muthukumano wa eriyari ya esumana ni ovara ni anna anisuwela wiixuttiha, munoowerya wiiriha soosoma sa Biibiliya sinrowa vahoolo ni munimwaakhaliherya atthu akina okhala atthareli a Yesu Kristu.

¹⁹ Akhala wira muniphavela okhaliheriwa moota woopaceriha wiiriha soosoma sa Biibiliya, mulavule ni mutokweene wala munna onsuwela wiixuttiha saana. Nave malakiheryo anikumiheriwa Okumi ni Orummwa Ahu wa Ekristau ni sowooniherya sinipakiwa mmithukumanoni sinimookhaliheryani vanceene. Muhiliyale omuroromela Yehova ni munvekeleke wira ookhaliheryeni ophwanya yoosoma ya Biibiliya. Hata mmusomihaka mmusi anyu, mwiimananiheke omphwanya mutthu mukina wira mmusomiheke Biibiliya. Vaavo munrowa anyu wiirihaka soosoma sa Biibiliya munoohakalalaka vanceene.

WAAKHALIHERYA ATTHU OKELA MMUTTHENKESONI MWA YEHOVA

²⁰ Vaavo nnaakhaliherya ahu atthu omusuwela Yehova ni okhala atthareli a Yesu Kristu, awo anniirela mpantta muloko. Ale nnaasomiha ahu Biibiliya anookela vahoolo momunepani akhala wira anoosuwela wira Yehova ookhalana mutthenkeso ni annivara vamosa ni mutthenkeso owo. Nto ti vooloka owiixuttiha opaka eyo. Sookhala iviidiyu ni ebroxura Tani Anipaka Yootthuna ya Yehova Olelo-va? sipakeliwe wira sinikhaliherye opaka eyo. Nave malakiheryo ari Muru 4 eliivuru yeela pooti onikhaliherya vanceene.

²¹ Okhuma nihiku noopacerya nimmusomiha ahu mutthu Biibiliya, nihaana omukhaliherya woona wira Yehova onnirumeela mutthenkeso awe wira ovariwe muteko woolaleerya valaponi. Mmooniheryeke efaita iliivuru sahu sirina aya ni mmutthokiheryeke wira sinipakiwa ni okaiwa olumwenku wotheene ni anna oowiivahererya animurumeela Muluku. Nave mmulattuleke orowa ni nyuwo mithukumano Empa ya Omwene. Mmutthokiheryeke moota sinipakiwa aya mithukumano sahu ni mmusuweliheke anna akina. Nave mmukhaliheryeke waasuwela Anamoona a Yehova akina okathi wa asembeleya ni konkresu. Okathi mukina mmuhiyeke wira oone mmensawe moota atthu a Yehova aniphentana aya, etthu yeeyo enaasuwanyeiha maKristau ekeekhai. (Yoh. 13:35) Ole munimusomiha anyu Biibiliya onookhalana waataana wooloka ni Yehova akhala wira onimuncererya oxukhurela wawe mutthenkeso wa Yehova.

ORUMEELA ILIIVURU SINIMUTTHOKIHERYA BIIBILIYA

²² MaKristau a eseekulu yoopacerya yaaniluttuweliwa olaleya Nuulumo na Muluku. Awo yaanikopiyari Soolempwa wira arumeeleke mmensaya wala mmulokoni. Nave yaanaatumererya atthu akina wiixutta ekeekhai ya Nuulumo na Muluku. Okhala wira ikoopiya saya saari vakhaani, awo yaanivaha efaita yinceene. (aKol. 4:16; 2 Tim. 2:15; 3:14-17; 4:13; 1 Ped. 1:1) Olelo-va, Anamoona a Yehova annirumeela maakina a niinaano wira yimpirimiriki iliivuru sinceene ni aBiibiliya. Iliivuru iyo sinihela muhina ifolyeeto, ibroxura ni irevista mattaava manceene.

²³ Okathi munaalaleerya anyu atthu ihapari sooreera, muhaana orumeela iliivuru sinikumiheriwa ni mutthenkeso wa Yehova. Woona moota mwaattottenle anyu mureerelo osoma iliivuru sa Anamoona a Yehova, onimookhaliheryani waatumererya atthu akina opaka etthu emosaru.—aHéb. 13:15, 16.

²⁴ Olelo-va annincererya atthu anirumeela interneti wira asome wala awiriyane soohimmwa. Nto ohiya paahi iliivuru sinimutthokiherya Biibiliya, esaiti ahu jw.org ekaruma yuulupale ennikhaliherya olaleya ihapari sooreera. Atthu anceene olumwenku wotheene annaarumeela akomputatore wira asome, owiriyana osommwa wa Biibiliya ni iliivuru sikina sinimutthokiherya Biibiliya mattaava oovirikana. Nto atthu ale ohinaasivela ovaanela ni hiyo wala anikhala mapuro ahikhanle Anamoona a Yehova anoowerya osuwela sookupali sahu amurumeelaka jw.org ari ene owannyeya.

²⁵ Tivonto khula okathi hiyo ninniwooniherya atthu esaiti ahu jw.org. Akhala wira mwaneene etthoko onninikoha voohimya sa sookupali sahu, nyuwo pooti omurumeela telefoni wala komputatore wira mmwaakhule. Nave namphwanya mutthu onilavula nttaava nikina ohela muhina nttaava ninlavuliwa ni matata nihaana omuleela wira esaiti ahu ookhala Biibiliya ni iliivuru sinimutthokiherya Biibiliya nttaava nawe. Anamalaleerya anceene annirumeela iviidiyu wira apacerihe ovaanele ni mutthu voohimya sa Biibiliya.

OLALEERYA MOOHIILOKIHERYA

²⁶ Yesu aahaaleela ale yaavaha ephoole moolumo awe wira: “Nyuwo mwá muthuko w’olumwenku. . . . Siso, warya wanyu wamwaleleke atthu, wira yòneke miteko sanyu sorera, yavuwiheke Atith’inyu ari wirimu”. (Math. 5:14-16) Atthareli ale yaanooniherya moonelo wa Muluku amutakihaka Yesu yoowo aahimmye wira “miyo ki warya w’olumwenku”. Nave Yesu ohaavaha ntakiheryo maKristau otheene mwaha woohiya “warya onvaha ekumi” waamwaleelaka atthu ni waaphwanyiha mareeliho atthu otheene yanwiriyana.—Yoh. 8:12.

²⁷ Nave murummwa Paulo oonivaha ntakiheryo wira nitthareke. (1 aKor. 4:16; 11:1) Okathi aari awe wAthena, owo aanaalaleerya nihiku notheene atthu otheene yaakhala mapuro oowaatta atthu. (Mit. 17:17) MaKristau a oFilipi yaanitthara ntakiheryo na Paulo. Nto Paulo aahaalepela wira yaanaarya “ntoko mithuku sa mulaponi” hata yaakhala eriyari ya “atthu òtakhala murima ni òhononeya”. (aFil. 2:15) Olelo-va, nnoowerya ohiya ikeekhai sa Omwene saaryaka ni moolumo ni mweettelo ahu okathi wotheene ninkhalana ahu eparakha ya waalaleerya atthu akina ihapari sooreera. Ekeekhai wira ntakiheryo nahu nooloka ntoko ororomeleya wahu onniwiiriha atthu akina woona wira noovirikana ni atthu akina a mulaponi. Masi okathi nnaalaleerya ahu ihapari sooreera, awo annisuwela nthowa naya nivirikanne ahu ni atthu awo.

²⁸ Arumeyi anceene a Yehova annaaleela ihapari sooreera atthu anivarana aya muteko, anisomana aya oxikola, aninwelana aya ekaaro wala mapuro otheene anivara aya miteko saya sa khula nihiku. Okathi nneetta ahu mukwaha, pooti okhalana eparakha ya waalaleerya ale nneettana ahu mukwaha. Othene ahu nihaana wiimananiha waalaleerya atthu okathi ninvaanela ahu. Nto nihaana wiilokiherya wira naalaleerye atthu okathi wotheene onireerela aya.

²⁹ Etthu enrowa onikhaliherya opaka eyo, osuwela wira ninnimutthapela Mpattuxa ahu ni ovuwiha nsina nawe. Ohiya-vo, nnimwaakhaliherya ale aniphavela omusuwela Yehova ni omurumeela. Yiira siiso anookhalana nlipelelo na ophwanya ekumi yoohimala mwaha womwaamini Yesu Kristu. Yehova onnixukhurela vanceene wiimananiha wanyu ni onnoona eyo okhala muteko wowaarya.—aHéb. 12:28; Wis. 7:9, 10.

MUTTETTHE WOOLALEERYA

³⁰ Yehova oniphavela wira ihapari sa Omwene silaleiwe olumwenku wotheene okhale mpooma wala mmuttettheni. Wira nipake eyo, miloko ni anna ale anirumeela mapuro oorakamela opooma annithanleliwa ni eBetheli muttetthe woolaleerya. (1 aKor. 14:40) Eyo ennivarihana ni malakiheryo Muluku aavanhe awe maKristau a eseekulu yoopacerya. (2 aKor. 10:13; aGal. 2:9) Okhala wira miteko sa Omwene sinootepa okela vahoolo mahiku ala ookiserya, sinnipakiwa itthu sinceene akhala wira ookhala prokrama ooloka a olaleerya mittetthe sotheene sa muloko owo.

³¹ Eprokrama eyo enihooleliwa ni mutokweene oniweherya muteko woolaleerya. Nto murumeyi oorumeela pooti othanliwa wira okhapeleleke mittetthe soolaleerya. Sookhala inamuna piili sa muttetthe woolaleerya, mittetthe iyo tiiya: Muttetthe woolaleerya wa ekrupu ni muttetthe woolaleerya wa mutthu mwaneene. Mapuro muttetthe woolaleerya ori aya mwaamukhaani, muhooleli ohaana othanla mittetthe ekrupu eyo enrowa aya olaleeryaka. Akhala wira muttetthe woolaleerya muulupale, anamalaleerya pooti othanla muttetthe aya woolaleerya.

³² Akhala wira namalaleerya onnithanla muttetthe awe owo onookhalana opuro woolaleerya okathi anna akina ahinrowa aya olaleerya wala waahireereleke othukumana ni ekrupu wira yalaleerye. Mwa ntakiheryo, atthu akina annithanla muttetthe aya woolaleerya waattamela omutekoni waya, analaleerya okathi woophumurya othana wala nuumala muteko. Nave imusi sikina sinnithanla muttetthe aya woolaleerya waattamela owannyeya, nto annilaleerya mahiku makina ohiyu wala okathi anoona aya oreerela. Okhalana muttetthe woolaleerya pooti omukhaliherya namalaleerya oviriha okathi munceene olaleeryaka. Nave mittetthe sa mutthu mwaneene pooti orumeeliwa wira ekrupu yotheene elaleerye. Akhala wira munniphavela muttetthe anyu woolaleerya, pooti onvekela murumeyi onikhapelela mittetthe soolaleerya.

³³ Akhala wira muhooleli a ekrupu onikhalana muttetthe woolaleerya wala munna onnithanla muttetthe awe woolaleerya, awo ahaana wiimananiha omulaleerya onakhalakaru mutthu mmosa khula empa. Khula muhooleli a ekrupu wala munna orina muttetthe awe woolaleerya ohaana wiimamaniha omaliha eriyari ya myeeri mixexe (4). Enamuna ya omaliha olaleerya muttetthe ohaana ovarihana ni malamulo wala malakiheryo a ekartau ya muttetthe woolaleerya. Nuumala omaliha olaleerya muttetthe, ekartau ene ehaana ottikiheriwa murumeyi onikhapelela mittetthe soolaleerya. Moovarihana ni makhalelo, muhooleli a ekrupu wala namalaleerya pooti othanla ohalana ekartau wira otthikele olaleerya muttetthe owo wala omuttikiherya murumeyi onikhapelela mittetthe soolaleerya.

³⁴ Akhala wira anamalaleerya otheene a muloko anniiraana, muttetthe woolaleerya pooti olaleeriwa moomalela. Nave pooti osyakiwa anamalaleerya anli wala ovikana olaleerya ipa simosaru okathi omosaru, nto eyo yaamwaanyoonya axineene etthoko. Niira siiso, nnimooniherya wira ninnaathokorerya anna ni atthu anikhala muttetthe owo.

WAALALEERYA ATTHU A MATTAAVA OTHEENE

³⁵ Khula mutthu ohaana omusuwela Yehova, Yesu Kristu ni Omwene. (Wis. 14:6, 7) Hiyo nimphavela waakhaliherya atthu a mattaava otheene osuwela nsina na Yehova wira yoopowe ni owara omutthu musya. (aRom. 10:12, 13; aKol. 3:10, 11) Mixankiho xeeni sinikhumelela vaavo ninlaleerya ahu muttetthe anilavuliwa mattaava oovirikana? Ninrowa oxintta sai muxankiho owo mwa enamuna ninrowa ahu waavaha eparakha atthu otheene owiriyana ihapari sa Omwene ni nttaava aniiwexexa aya?—aRom. 10:14.

³⁶ Khula muloko onnithanleliwa muttetthe woolaleerya moovarihana ni nttaava ninlavuliwa. Mittetthe anilavuliwa mattaava oovirikana, anamalaleerya a miloko soovirikana annilaleerya muttetthe mmosaru. Nto ti vooloka khula namalaleerya wiimananiha waalaleerya atthu anilavula nttaava nawe. Malakiheryo mamosaru annivareleya muteko okathi nimpaka ahu ikampaanya sa waalattula atthu. Masi okathi ninlaleerya ahu mapuro oowaatta atthu wala moohiilokiherya, nihaana olavula ni khula mutthu ni onvaha iliivuru sa khula nttaava oniphavela awe.

³⁷ Masi okathi mukina, miloko sa mattaava makina khasinwerya olaleerya mapuro ootepa orakamela. Akhala wira ti siiso, axitokweene aniweherya muteko woolaleerya a miloko iyo ahaana ovaanela wira awehe etthu yoopaka wira mapuro otheene alaleeriwe mwa enamuna enrowa waaphwanyiha mireerelo atthu otheene. Opaka eyo, enimwaakhaliherya atthu otheene okhalana eparakha ya wiiwa ihapari sa Omwene. Nave anoorowa osyaka anamalaleerya a miloko soovirikana olavula ni mutthu mmosaru.—Mir. 15:22.

³⁸ Nihaana opaka exeeni akhala wira mutthu nnimphwanya ahu naalaleeryaka empa ni empa onilavula nttaava nikina? Nihaana osyaka wuupuwela wira anamalaleerya anilavula nttaava nawe anoomulaleerya. Anamalaleerya akina anniixutta moolumo vakhaani wira yaalaleeryeke atthu a nttaava ninlavuliwa vanceene muttetthe aya. Hiyo pooti omooniherya mutthu owo moota woosoma wala obaxari iliivuru nttaava nawe va jw.org aahiiso pooti onvaha iliivuru ni nttaava nawe.

³⁹ Akhala wira mutthu ene onnooniherya ni murima wotheene wira onniphavela, nihaana onvahererya mutthu onrowa omukhaliherya ni nttaava oniiwexexa awe. Nave nihaana omuleela muloko wowaattamela simpakiwa mithukumano ni nttaava nawe. Akhala wira mutthu owo oniphavela ovaanela myaha sa mBiibiliyani ni mutthu onilavula nttaava nawe, pooti omooniherya moota woolepa eformulaario va jw.org. Akhala wira onoopaka eyo, eBetheli enoomananiha omphwanya namalaleerya a muttetthe mutthu owo onikhala awe, ekrupu wala muloko onrowa omukhaliherya.

⁴⁰ Nihaana ovikaniha omuxukurya mutthu owo mpakha ohimya wira onnixukuriwa ni mutthu onilavula nttaava nawe. Ikwaha sikina, eBetheli pooti ohimya wira khewenrye omphwanya namalaleerya onilavula nttaava na mutthu owo. Akhala wira eyo enimwiiraneya nihaana wiimananiha ovikaniha omukhaliherya. Vaaweryaneyaka pooti omusomiha Biibiliya, woonasa wene nirumeelaka eliivuru ya nttaava nawe wala onsuwela awe. Akhala wira nnoorumeela saana ilatarato ni onvekela osoma soolepa siromoliwe, pooti omukhaliherya wiixutta sowiixuttiha soopacerya sa Biibiliya. Akhala mutthu a emusi awe onisuwela oratteene nttaava nawe ni nttaava na mapuro awo pooti wiivahererya otaphulela ele enihimmwa.

⁴¹ Nihaana omuroiha mutthu owo mmutthenkesoni mwa Muluku nimulattulaka orowela mithukumano hata ohirowaka wiiwexexa ele enihimmwa. Akhala Biibiliya a nttaava nawe, nihaana omukhaliherya ophwanya soolepa sinisommwa. Tthiri okhala vamosa ni atthu akina mmulokoni pooti omukhaliherya okela vahoolo momunepani.

⁴² Ikrupu saamukhaani: Ikrupu saamukhaani ninhimya ikrupu seiye sirina anamalaleerya anilaleerya ni nttaava nihikhanle na muloko hata ohikhanle mutokweene wala murumeyi oorumeela oophwanelela onrowa ohoolelaka mithukumano orumeelaka nttaava atthu anilavula aya. EBetheli pooti weemererya wira muloko mmosa okhapeleleke ekrupu eyo yaamukhaani akhala wira:

1. (1) Aakhala muttetthe owo atthu anceene anilavula nttaava nihinlavuliwa muloko owo.

2. (2) Yakhala anamalaleerya anisuwela nttaava nno wala anniphavela wiixutta.

3. (3) Akhala wira nikhuuru na axitokweene nnoowerya otthokiha muteko woolaleerya nttaava nno.

Akhala wira nikhuuru na axitokweene anniphavela wira muloko owo okhapeleleke ekrupu eyo yaamukhaani, ahaana omukoha mutokweene a esirkwiitu. Woonasa wene, owo onnisuwela muloko oniimananiha waalaleerya atthu a nttaava nno ni pooti wira onnisuwela itthu sikina sinrowa okhaliherya osuwela muloko waarowa okhaliherya saana ekrupu eyo. Nto axitokweene a muloko othanliwe ahaana olepela oBetheli avekelaka wira muloko aya okhapeleleke ekrupu eyo.

⁴³ Ikrupu: Ebetheli pooti weemererya wira muloko okhapeleleke ekrupu akhala wira:

1. (1) Aakhala muttetthe owo atthu anceene aniphavela ni anilavula nttaava na muloko owo ni ekrupu eyo enookela vahoolo.

2. (2) Aakhala hata ari ene vakhaani anamalaleerya anisuwela wala aniixutta nttaava nlo.

3. (3) Ookhala mutokweene wala murumeyi oorumeela oophwanelela onrowa ohoolelaka ekrupu eyo ohoolelaka khula esumana muthukumano mmosa wala mpantta mmosa wa muthukumano, ntoko olavula mwaha wa atthu otheene wala ohoolela yoosoma ya Owehaweha ni nttaava na ekrupu eyo.

Akhala wira sookhala itthu iyo sinivekeliwa, nikhuuru na axitokweene nihaana oroiha oBetheli ekarta ahimyaka itthu sotheene sinireerela ni avekelaka wira muloko aya okhale tonrowa okhapelelaka ekrupu eyo. Mutokweene wala murumeyi oorumeela oophwanelela onihoolela ekrupu eyo onrowa wiihaniwaka “Muhooleli a Ekrupu” ni tonrowa ohoolelaka.

⁴⁴ Nuumala ekrupu eyo weemereriwa wala opakiwa, nikhuuru na axitokweene nihaana woona akhala wira mipantta sikina sa mithukumano pooti wuncereriwa ni mithukumano sinrowa opakiwaka vamweerini. Nave pooti opakiwa eprokrama ya orowa olaleerya. Anna othene a ekrupu eyo anrowa ovaraka ahooleliwaka ni nikhuuru na axitokweene a muloko onikhapelela ekrupu eyo. Axitokweene anrowa oweha-wehaka ekrupu eyo ni anrowa waavahaka malakiheryo oovareleya muteko anna a ekrupu eyo. Okathi mutokweene a esirkwiitu onrowa awe ovaraka ni ekrupu eyo okathi onixukurya awe muloko onikhapelela ekrupu eyo, onooroiha oBetheli erelatoorio yaamukhaani sa moota ekrupu eyo enikela aya vahoolo ni onoohimya etthu enireerela opakiwa. Nuuvira okathi, pooti wira ekrupu eyo enookhala muloko. Vaavo atthu otheene anitthara aya malakiheryo a mutthenkeso, Yehova onnihakalala vanceene.—1 aKor. 1:10; 3:5, 6.

OLALEERYA NI IKRUPU

⁴⁵ Khula muKristau ookhalana muritti wowaalaleerya atthu akina ihapari sooreera. Sookhala inamuna soovirikana soopaka eyo, masi anamunceene a hiyo onisivela orowa olaleerya ni atthu akina. (Luka 10:1) Tivonto miloko sinithukumana aya wira salaleerye eriyari ya esumana wala wanikisa wa esumana. Mahiku a iferiyatu, eparakha yuulupale ninkhalana ahu wira nalaleerye ni ikrupu, maana anna ni arokora anceene khanivara muteko. Ekomisau ya Muteko ya Muloko enoopaka eprokrama ya mapuro ni okathi woorowa olaleerya othana wala ohiyu.

⁴⁶ Olaleerya ni ikrupu onnaakhaliherya anamalaleerya ovara vamosa ni ‘olipihana’ mukina ni mukhwaawe. (aRom. 1:12) Anamalaleerya a niinaano anoowerya olaleerya ni anamalaleerya a khalai wira yiixuttihiwe. Mittetthe sikina, pooti anamalaleerya araru wala ovikana ovara vamosa mwaha woowi mittetthe iyo ti sowoopiha. Hata muupuwelaka orowa ovara mekhinyu, othukumana ni ekrupu onimwaalipiha atthu otheene. Mwaha woosuwela wira aakhala anilaleerya muttetthe mmosaru ni nyuwo onimoolipihani vanceene. Mapioneero khahiyo wira anookhanyereriwa okhaliherya mithukumano sotheene sa muteko woolaleerya sa muloko, otepexa wene akhala wira mithukumano iyo sinipakiwa mahiku otheene. Hata vari siiso, pooti wira anniwerya okhaliherya mithukumano sikina soorowa olaleerya khula esumana.

⁴⁷ Otheene ahu nihaana otthara ntakiheryo nivahiwe ahu ni Yesu vamosa ni arummwa! Nikupaliki ni murima wotheene wira Yehova onoonireeliha akhala wira nnimwiirela mpantta moomalela olaleya ihapari sooreera sa Omwene.—Luka 9:57-62.