Munoottottela Mureerelo Okhalana Muttetthe Anyu Woolaleerya?

1. Ontaphulelani okhalana muttetthe woolaleerya?

¹ Ontaphulelani okhalana muttetthe woolaleerya? Miloko seiye sirina muttetthe muulupale, munna onniveka muttetthe woolaleerya, waaniheryasa waattamela owannya awe. Eliivuru Organizados epaaxina 103, eni: “Okhalana muttetthe anyu woolaleerya vakhiviru onrowa wookhaliheryani orumeela saana okathi anyu nvaraka muteko woolaleerya. Nave-tho, nyuwo pooti omulattula namalaleerya mukina wira mwalaleerye hoothe mmuttettheni mwanyu”.

2. Munrowa okhaliherya sai ekrupu anyu ya muteko woolaleerya hata murina ene muttetthe anyu?

² Okhaliherya Ekrupu ya Olaleerya: Akhala wira moovahiwa muttetthe woolaleerya waattamela omutekoni wanyu, munoowerya olaleerya okathi wa almoso wala muhinatthi ophiya owaani, waaniheryasa vamosa ni munna mukina onilaleerya vakhiviru ni nyuwo. Akhala wira moovahiwa muttetthe waattamela owannyu, nyuwo ni emusi anyu pooti orumeela wira mulaleerye makaaripi. Nto, akhala wira khamunrowa muthukumano wa olaleerya, ti vootthuneya onvekela Yehova wira ookhaliheryeni muhinatthi opacerya olaleerya. (aFil. 4:6) Nave-tho, vanaamwi murina ene muttetthe anyu woolaleerya, ti vootthuneya okhaliherya marehereryo a ekrupu yoolaleerya ya muloko. Vanceenexa wuumalani wa esumana, vaavo anna anceene anithukumana aya wira arowe olaleerya, ti vootthuneya okhaliherya ekrupu anyu ya olaleerya.

3. Mireerelo xeeni onikumiherya aya okhalana muttetthe woolaleerya?

³ Mareeliho: Akhala wira mookhalana muttetthe anyu woolaleerya, pooti olaleerya khuta okathi muniwerya anyu. Nto munoowerya olaleerya vanceene ni oviriha okathi vakhaani mweettaka. Mwaha wa yeeyo, akina anniwerya okhala mapioneero ookhaliherya wala ookilaatheya. Okhala wira ale anisiveliwa ekeekhai anikhala waattamela owannyu, ti vookhweya otthikela waaxukurya ni waasomiha Biibiliya. Anna anceene anniweha wira olaleerya muttetthe aya, onnaakhaliherya waasuwela saana axineene etthoko ni wunnuuherya osiveliwa waya ekeekhai, vanceenexa akhala wira muttetthe owo aawerya olaleerya ikwaha sinceene ahinatthi ottikiha, wira akina nave avekele. Tthiri, okhalana muttetthe anyu woolaleerya, onimookhaliheryani vamosa ni emusi anyu, olaleya ihapari moomalela.​—2 Tim. 4:5.