Nilokiherye Inamuna Sahu Soolaleerya​—Naalaleeryeke Atthu Otheene a Mmuttettheni Mwahu

OTTHUNEYA WAYA: Zakariya aahihimya vahinatthi wira atthu a malavulelo ni a maloko otheene yaarowa weemereryaka ihapari sooreera. (Za 8:23) Masi tani yaarowa owiixuttihaka? (aRo 10:13-15) Hiyo nookhalana eparakha ni muritti wa omulaleerya ihapari sooreera khula mutthu a mmuttettheni mwahu.​—od-T 84 itti. 10-11.

MOOTA WOOPAKA EYO:

• Mwiilokiheryeke. Niireke munnaaphwanya atthu anilavula nttaava nikina? Nyuwo pooti omurumeela aplikativo JW Language wira mwiixutte masu ookhweya a moota woolaleerya. Wala mmurumeelaka selulari anyu, nyuwo pooti omooniherya mutthu owo moota woophwanya soohimmwa sikina sa nttaava nawe va jw.org.

• Nwehaweheke. Hata mulaleeryaka empa ti empa, muhiyeleele eparakha ya waalaleerya atthu anivira wala ale anilipelela ekaaro. Vakhala wira munilaleerya mapuro oowaatta atthu, muupuweleke wira yoolukama anyu ori olaleerya.

• Mukhalaneke nthiti. Mutthikeleke ipa seiye muhaaphwannye anyu atthu ekwaha yoopacerya. Mwiimananiheke omphwanya hata mutthu mmosa vatthokoni; muroweke okathi woovirikana aahiiso nihiku nikina vasumanani. Atthu akina pooti otthuneyaka olaleeriwa erumeeliwaka epaphelo, telefoni wala olaleeriwa mphironi.

• Mutthikele omuxukurya. Mwaakuveleke waaxukurya ale yoonihenrye osiveliwa ekeekhai. Vakhala wira mutthu owo onilavula nttaava nikina, mwiimananihe omphavela namalaleerya oniwerya olavula nttaava nawe wira omukhaliheryeke. Nvikaniheke omuxukurya mutthu owo mpakha omphwanya namalaleerya onilavula nttaava nawe.​—od-T 94 itti. 39-40.

NWEHE EVIIDIYU ENI: OLALEERYA “MAPURO OORAKAMELA MULAPONI”, NUUMALA-VO MWAAKHULEKE MAKOHO ALA ANITTHARELANA:

• 

  Itthu xeeni anna ni arokora yaapanke aya wira yalaleerye muttetthe woorakamela? (1 aKor 9:22, 23)

• 

  Mixankiho xeeni yaavilenle aya?

• 

  Mareeliho xeeni yaaphwannye aya?

• Wiimananiha xeeni onitthuneya anyu opaka wira mwaalaleerye atthu a mmuttettheni mwanyu?