Muhinatthi Waalaleerya, Muhaana Owaavya
1. Xeeni khula muloko onikaweliwa aya muttetthe moovarihana ni mattaava anilavuliwa mmuttettheni mmo?
1 Nuumala waakhela munepa wootteela okathi wa Pentekoositi a 33 E.C, awiixutti a Yesu ‘yahipajerya olavula ilavulelo sikina’ yaalaleeryaka atthu yaakhuma ipantta soottaiwene. (Mit. 2:4) Mwaha wa yeeyo, atthu oowiiraka 3.000 yaahibatiziwa. Hata vari siiso, anamunceene a atthu ale, yaanilavula mattaava yaawo awiixutti ale yaalavula aya, ntoko eHeeberi wala eKriki. Masi, Yehova aahiiriha wira atthu ale awiriyane ihapari sa Omwene ni mattaava aya ooyareliwa. Nto, atthu anceene annaakhulela ihapari sooreera vaavo anilaleeriwa aya nirumeeliwaka nttaava naya nooyareliwa. Tivonto, olelo-va, khula muloko onnikaweliwa muttetthe moovarihana ni mattaava anilavuliwa mmuttettheni mmo. (Esuplemento ya Orummwa Ahu wa Omwene, Julyo 2007, epax. 5 etti. 4 mpakha epax. 6 etti. 1) Ikrupu sinlavula nttaava nikina, khisinivahiwa muttetthe woolaleerya, masi sinilaleerya muttetthe yoole ovahiwe muloko onihoolela ekrupu eyo ni muttetthe wa miloko sowaattamela.
2. (a) Owaavya atthu anilavula nttaava nikina exeeni, nto ninrowa owaavya opuro xeeni? (b) Moota xeeni miloko sinikhaliheryana aya olaleerya mittetthe sinilavuliwa mattaava manceene? (c) Nipakeke exeeni akhala wira nomphwanya mutthu a nttaava nikina onisiveliwa ekeekhai?
2 Akhala wira nyuwo munikhala opuro atthu otheene anilavula aya nttaava nimosaru, muhaana olaleeryaka khula empa. Masi, akhala wira munikhala muttetthe onilavuliwa mattaava manceene, moota woolaleerya pooti ovirikana. Waaniheryasa, muloko mukina onilavula nttaava nikina, onilaleerya muttetthe yoowo. Nto, nnaamwi mukhaliheriwaka ni miloko sikina wira mwaaphwanye ale anilavula nttaava nanyu, muloko anyu wala ekrupu anyu, torina muritti muulupale wowookhaliheryani mmwaha owo. (Nwehe ekaaxa eni: “Mukhaliheryaneke Mukina ni Mukhwaawe”.) Tivonto, muhaana okohaka mmuttettheni mmo, wira musuwele yaakhanle ene atthu anilavula nttaava nanyu. Nto ninrowa owaavya sai atthu awo?
3. Exeeni enikhaliherya muloko wala ekrupu osuwela moota woowaavya atthu a nttaava nikina, ni okathi onireerela oviriha yaaviwaka atthu awo?
3 Moota Woowaavya Atthu: Okathi oniviriha ahu naaphavelaka atthu mittetthe sinilavuliwa mattaava manceene, onnivirikana ni khula muttetthe. Mwa ntakiheryo, atthu akavi mmuttettheni anilavula nttaava nno? Anamalaleerya akavi anikhala mmuttettheni mmo? Indereso kavi muloko wala ekrupu eyo sirina aya? Muloko khonitthuneya owaavyaka atthu awo khula muttetthe, masi pooti othanla owaavya mittetthe seiye sowaatta atthu anilavula nttaava nlo ni akhala wira mittetthe iyo soorakamelana. Nto, opaka marehereryo ooloka wira niwaavye atthu anilavula nttaava nikina ti wootthuneya. Eyo enookhaliherya wira atthu anceene avekele mwa nsina na Yehova.—aRom. 10:13, 14.
4. (a) Olokiheriweke sai muteko wowaavya atthu? (b) Moota xeeni mukhanle anyu oowaaphwanya ale anilavula nttaava nanyu?
4 Wira nisyake olaleerya muttetthe mmosaru, nikhuuru na axitokweene, vanceenexa mutokweene oniweherya muteko woolaleerya, nihaana olokiherya ni oweherya muteko owo. (1 aKor. 9:26) Ikrupu sinirumeela elavulelo ya elapo ekina, munna mmosa oophwanelela, vaweryaneya mutokweene wala murummwa oorumeela, othanliwe ni nikhuuru na axitokweene ninweherya ekrupu eyo, pooti ohoolela. Miloko sinceene ni ikrupu sookhalana malokiheryo owaaphavela atthu, arumeelaka eliivuru ya elista telefônica wala Internet wira aphwanye masina a atthu anilavula nttaava nno. Vano, muteko wowaahaavya atthu, onnivariwa orumeeliwaka telefoni wala waaxukurya atthu awo, moophavela osuwela ti pani anireerela olempwa. Nto vaakhalelaka, nikhuuru na axitokweene na muloko oniweherya ekrupu eyo, pooti ompaka palano wira ikwaha sikina muloko wotheene wiirele mpantta muteko ola.—Nwehe ekaaxa eni: “Moota Wowaaphwanya Ale Anilavula Nttaava Nanyu”.
5. (a) Malakiheryo exeeni anivahiwa aya anamalaleerya anivara muteko woowaavya atthu? (b) Nihimyeke exeeni nawaavyaka atthu?
5 Nihaana okhalana yoolakela khula okathi ninvara ahu muteko woowaavya atthu. Okhala wira muteko ola oniirela mpantta olaleerya, nihaana owaraka saana. Anna anceene ahoona wira winsayari enirowa aya ohimya ni olavula nttaava okathi anaaphavela aya atthu a nttaava nlo, onnaakhaliherya ohakalala ni olavula saana. Nto pooti olepa murelatoorioni mwanyu okathi oniviriha anyu mwaaphavelaka atthu awo. Masi khonilempwa okathi munilokiherya anyu maapha a muttetthe ni ilista sa atthu. Nto, namphwanya mutthu onilavula nttaava nlo, nihaana wiimananiha omulaleerya, nuumala-vo nihaana omuleela mutokweene oniwerya muteko woolaleerya, wala munna oothanliwa nuuwo wira elempwe etthu mukartauni ya muttetthe. Ti vootthuneya olepa endereso ya mutthu owo, pooti ohisivenliwe ekeekhai. Hata muteko ola woowaavya atthu oryeene wa efaita, masi nihiliyaleke orumeela inamuna sotheene sa muteko woolaleerya.—Nwehe ekaaxa eni: “Muhimyeke Exeeni Mwaawaavyaka Atthu”?
6. Owaavya alipa ahiniiwa orina mixankiho xeeni?
6 Owaavya Atthu Ahiniiwa: Owaavya atthu ahiniiwa wookhalana mixankiho seiyo sintthuneya wiilipiha ni ohihiyererya. Ole ohiniiwa khivaniweryaneya omphwanya orweela mwa olepa nsina nawe, makhalelo awe a erutthu, wala owara wawe. Nave-tho, amusi ni apatthani pooti okhootta wala woova waalela anamalaleerya ole animwaavya aya. Malakiheryo anittharelana, anoonikhaliherya okathi nnaaphavela ahu ale ahiniiwa.
7. (a) Itthu xeeni nikhanle ahu ookoha mmuttettheni naaphavelaka atthu ahiniiwa? (b) Moota xeeni ninrowa ahu omala-maliha woova wa mwaneene etthoko?
7 Miloko ni ikrupu sa nttaava naatthu ahiniiwa, sookhumela saana mwaha wookoha mmuttettheni mmo. Pooti wira mwaneene etthoko ootoko onweha namwaattamanani awe, mpatthani oomutekoni, wala mpatthani ooxikola orumeelaka nttaava ninlavuliwa ni matata. Wala pooti wira mustaraatani yookhala ekanyeryo enaaleela atthu wira vakhiviru aakhala anamwane ahiniiwa. Waaniheryasa, owo ookhalana mmusi awe ohiniiwa. Musuweleke wira okathi munaaphavela anyu ale ahiniiwa, atthu akina pooti ohiwaakhelani saana. Masi, munoowerya omwiiriha mwaneene etthoko ohikhala ooxanka, vaavo munooniherya anyu nttittimiho, opatthani ni ohaattiha itthu soohimya. Anamalaleerya akina annikhumela saana vaavo anirumeela aya eviidiyu erina Biibiliya, wala iviidiyu sikina sipakeliwe alipa ahiniiwa, amukohaka mwaneene etthoko akhala wira onnimusuwela mutthu ohiniiwa. Nuumala-vo, annimuleela wira aniwaavya atthu ahiniiwa wira yaalaleerye ihapari sa Omwene. Akhala wira mwaneene etthoko onnoovelela, waaniheryasa onimweemererya onvaha mmusi wala mpatthani awe ohiniiwa epaphelo enilattula orwa mmithukumanoni mwahu.
8. Moota xeeni muloko owaattamela onikhaliherya aya muloko a atthu ahiniiwa?
8 Ekwaha emosa wala piili vamwaakhani, muloko wa nttaava ninlavuliwa ni matata, pooti olattula muloko owaattamela onilavula nttaava nikina wira okhaliherye waaphavela atthu ahiniiwa mmuttettheni mmo. Vano, muthukumano wa orowa olaleerya onirowa opakiwa ni muloko a nttaava ninlavuliwa ni matata, pooti oheliwa muhina soolakiherya sa muteko ola, ni opakiwa yowooniherya. Nto, khula ekrupu ya muteko woolaleerya ehaana othanleliwa namalaleerya onikhuma muloko wa atthu ahiniiwa, ni ovahiwa maapha anihimya muttetthe woowaavya atthu awo.
9. Onirowa ovariwa sai muteko wowaavya atthu ahiniiwa mapuro yaale anithukumana aya wala othweela, aahiiso, mapuro yaale anikhaliheriwa aya?
9 Nave-tho, pooti owaavya atthu ahiniiwa mapuro yaale anithukumana aya wala othweela, aahiiso, mapuro yaale anikhaliheriwa aya mmuttettheni mmo. Anamalaleerya ahaana owara ikuwo mookhalela. Nto, ti vooloka ovaanela ni mutthu mmosa wala anli ni okhala amiruku, ohiya waalaaleerya atthu anceene. Akhala wira ovaneela iwo onnikhumela saana, pooti wiiwanana moota wootthikela okumanasa.
10. Moota xeeni anamalaleerya akhanle aya owaavya alipa ahiniiwa mapuro aniiriwa nakoso?
10 Enamuna ekina ti olokiherya maapha anooniherya mapuro aniiriwa nakoso, nto khiyaxukurya mapuro awo okathi wooreerela. Maapha mamosa pooti olepiwa mapuro anitumihiwa gasolina. Maapha makina pooti olepiwa mapuro anikhattiwa ikuwo, irestauranti, hoteli, wala mapuro makina anipakiwa nakoso. Akhala wira khula maapha aalempwa nipuro na nakoso ninlikana ni mapuro makina, anamalaleerya pooti orumela olaleerya omosaru wira asuwele ni alimalele enamuna eyo ya olaleerya. Mwa ntakiheryo, okhala wira waattela orwa atthu ahiniiwa nwateelo, nihaana mowaakuveya omuleela yoophavela ahu namuteko a nwateelo mmo. Nuumala-vo pooti omuhiyerya iviidiyu sahu ni ipaphelo sinilattula orowa omuthukumanoni wira aavahe makiliente awe ahiniiwa. Mapuro makina aniiriwa nakoso, pooti okoha akhala wira ohaavo namuteko wala kiliente ohiniiwa. Akhala wira ehaavo exikola ya alipa ahiniiwa mmuttettheni, pooti ovaha iviidiyu sipakeliwe alipa ahiniiwa.
11. Xeeni owaavya atthu a nttaava nanyu oryaaya muteko wootthuneya wa olaleerya?
11 Ola Muteko Wootthuneya: Waaphwanya atthu anilavula nttaava nanyu pooti okuxa okathi munceene. Ohiya-vo, atthu akina pooti othaama muttetthe onikhala aya mowaakuveya, nto khinavila osuwela ti pani nlelo ohithamme. Masi, mittetthe sinceene, owaavya atthu a nttaava nanyu ti muteko wootthuneya wa olaleerya. Yehova, yoowo onrumme olaleerya, khonimuthanla mutthu. (Mit. 10:34) “Owo onitthuna wira atthu othene yopowe, [ni] esuwele ekekhai”. (1 Tim. 2:3, 4) Tivonto, nrowe mowiiwanana nivare muteko Yehova onrumme awe, wira niwaavye atthu arina “murima worera ni wowiwelela” yaawo anilavula mattaava oovirikana.—Luk. 8:15.
[Ekaaxa epaaxina 5]
Mukhaliheryane Mukina ni Mukhwaawe
Akhala wira muloko wala ekrupu enniphavela okhaliheriwa waaphwanya ni waalaleerya ale anilavula nttaava nikina, mutokweene oniweherya muteko woolaleerya pooti olavula ni axitokweene a muloko anirumeela nttaava nno. Ti vookhalela ohivekela muloko wootepexa orakamela wira okhaliherye wala muloko yoole oowaatta atthu anilavula nttaava nno. Nto muloko onivekeliwa pooti ohimya yakhala anamalaleerya ene anilavula nttaava nno, awo ahaana olepa endereso aya ni onvahererya mutokweene oniweherya muteko woolaleerya wira oroihe muloko yoole oniveka nikhaliheryo. Axitokweene aniweherya muteko woolaleerya miloko iyo ahaana okhalaka oowiiwanana saana wira amalelihe olaleerya mittetthe sotheene ni waaroiha ale anooniherya osiveliwa ekeekhai omulokoni wala ekrupu enireerela.
Akhala wira anamalaleerya amphwanya mutthu onilavula nttaava nikina onisiveliwa tthiri ekeekhai (wala mutthu ohiniiwa) mowaakuveya muhaana omaleliha olepa eformulaario Queira Visitar (S-43-T) ni munvahe sekretaario a muloko anyu. Eyo enoomwiiriha mutthu owo okhaliheriwa momunepani mowaakuveya.—Nwehe km 5/11 epax. 3.
[Ekaaxa epaaxina 6]
Moota Wowaaphwanya Ale Anilavula Nttaava Nanyu
• Mwaakohe atthu akina, ntoko ale animusoma Biibiliya, amusi anyu, apatthani a oomutekoni, ni akina.
• Murumeele eliivuru ya elista telefônica wira mphwanye masina aatthu anilavula nttaava nanyu. Elista eyo erina masina aatthu moovarihana ni muttetthe onikhala aya pooti ophwanyaneya orweela mwa Internet wala empereesa ya telefoni.
• Mwa ephoole, mukohe mapuro anivariwa muteko akhaliheriwaka atthu, ntoko ibiibilioteka, impereesa sa kuvernu ni ixikola.
• Musomeke exornaale wira nwehe mapuro ari soohimmwa voohimya sa miteko sinivariwa moophavela waakhaliherya atthu anilavula nttaava na elapo ekina.
• Muxukurye ilooxa ni alipa anakoso anilavula nttaava na elapo ekina anikhala mmuttettheni mmo.
• Moweemereriwa ni ole ori xeefi mpweheke iliivuru vameesa mapuro anakoso, universidade, wala opuro oniweliwa ekaaro weiwo atthu anilavula nttaava nlo.
• Akhala wira onneemereriwa ni nlamulo mapuro anikhala anyu, muthume elista telefônica wala eprokrama ya komputadore wira nwaavye atthu awo orweela mwa Internet.
[Ekaaxa epaaxina 7]
Muhimyeke Exeeni Mwaawaavyaka Atthu
Olavula ntoko mpatthani, moohakalala, ni olavula saana onoomaliha woovelela wawe. Ti vooloka wanipacerya wooniherya iliivuru sa nttaava nlo.
Nuumala omulavuliha, pooti ohimya sa: “Ninwaavya atthu anilavula nttaava ___ wira niwooniherye masu ari mBiibiliyani. Nyuwo moomusuwela mutthu nikhanle ahu olavulana?”
Okathi muniwaavya anyu atthu ahiniiwa, nyuwo pooti ohimya so: “Ehaali. Kiniphavela owooniheryani etthu emosa. [Nvarihelaka muteko eviidiyu enettaniwa ya atthu ahiniiwa, mooniherye epantte emosa enikhuma mbroxurani Mpatthani a Muluku.] Eviidiyu ela enooniherya myaha sa Biibiliya sinikumiheriwa ni nttaava ninlavuliwa ni matata na oMoçambique. Nookhalana iviidiyu sinceene sirina masu a Muluku wa atthu ahiniiwa wira mutthu atthuna oweheke moohiliva. Niireke wira nyuwo moomusuwela mutthu ohiniiwa wala orina mixankiho sowiiwa onirumeela nttaava na matata?” Akhala wira mwaneene etthoko khonimuupuwela mutthu, ikwaha sinceene ti vooloka onvekela wira ohimye opuro otonko awe omoona mutthu ohiniiwa, ntoko omutekoni, oxikola, wala muttetthe wowaattamela.