Anamalaleerya a Ihapari Sooreera

YEHOVA oonivaha ntakiheryo na Mwanawe, Yesu Kristu wira nitthareke. (1 Ped. 2:21) Vaavo mutthu onikhala awe mutthareli a Yesu, mutthu owo onnikhala murumeyi a Muluku. Yesu aahooniherya wira eyo yaamwaahakalalihaka vaavo aahimmye awe wira: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele”. (Math. 11:28, 29) Atthu otheene aneemererya nlattulo na Yesu annoona yiiraneyaka moolumo awo mookumini mwaya!

² Okhala wira Yesu Murumeyi muulupale a Muluku, owo ohaalattula atthu akina wira amutthareke. (Math. 9:9; Yoh. 1:43) Owo aahiwiixuttiha moota woolaleerya ni aahaaruma wira yavareke muteko mmosaru aavara awe. (Math. 10:1–11:1; 20:28; Luka 4:43) Muhoolo mwaya, Yesu aahaaruma awiixutti 70 wira yalaleyeke ihapari sooreera sa Omwene wa Muluku. (Luka 10:1, 8-11) Okathi aarumme awe awiixutti awe, Yesu aalenle wira: “Oniwiwelelani, onikìwelela miyo: onokhottani, onkikhotta miyo. Vano, ole onkikhotta miyo, onimukhotta ole okirumme”. (Luka 10:16) Ni moolumo ala, Yesu aahooniherya wira awiixutti ale yaahikhalana muritti muulupale. Awo yaarummwale ni Yesu vamosa ni Yehova. Olelo-va, etthu emosaru ennivarihana ni atthu ale aneemererya nlattulo na Yesu nni: ‘Mwarwe mukitthareke’. (Luka 18:22; 2 aKor. 2:17) Atthu otheene aneemererya nlattulo na Muluku annirowa olaleya ihapari sooreera sa Omwene ni waapaka awiixutti.—Math. 24:14; 28:19, 20.

³ Mwaha wa weemererya nlattulo na omutthara Yesu, hiyo nookhalana eparakha ya ‘omusuwela’ Yehova ni Yesu Kristu. (Yoh. 17:3) Nave, nihiixutta moota woomusiveliha Yehova. Tthiri nikhaliheriwaka ni Yehova, ninniwerya wuuluula osuwela wahu ni owara omutthu musya onivarihana ni malamulo a xariya a Yehova. (aRom. 12:1, 2; aÉf. 4:22-24; aKol. 3:9, 10) Oxukhurela wahu onniniiriha wiivahererya wa Yehova ni opatisiwa mmaasini. Moohaanyiherya, opatisiwa onninsuwanyeiha okhala arumeyi a Yehova.

⁴ Muhiliyale wira nihaana onvarela muteko Muluku ni matata ooloka wala murima wooloka. (Esal. 24:3, 4; Yes. 52:11; 2 aKor. 6:14–7:1) Omwaamini Yesu onninikhaliherya okhalana murima wooloka. (aHéb. 10:19-23, 35, 36; Wis. 7:9, 10, 14) Murummwa Paulo aahaatumererya maKristau wira itthu sotheene anipaka aya ahaana onvuwiha Muluku ni ohaakhumuliha atthu akina. Nave murummwa Pedru aahooniherya efaita erina aya mweettelo wooloka wira atthu akina yiixutte ekeekhai. (1 aKor. 10:31, 33; 1 Ped. 3:1) Munrowa omukhaliherya sai mutthu ophwanelela okhala namalaleerya a ihapari sooreera?

ANAMALALEERYA ASYA

⁵ Okhuma okathi nimpacerya ahu omusomiha mutthu Biibiliya, nihaana omutumererya waaleela atthu akina itthu oniixutta awe. Owo pooti waaleela amusi awe, apatthani, ale onvarana awe muteko, onsomana awe oxikola wala atthu akina. Eyo etthu yooloka vaavo ninwiixuttiha ahu ale nnaasomiha ahu omutthara Yesu Kristu wira akhale anamalaleerya a ihapari sooreera. (Math. 9:9; Luka 6:40) Vaavo ole nimmusomiha ahu Biibiliya onrowa awe okelaka vahoolo momunepani ni osuwela olaleerya moohiilokiherya, eyo enoomukhaliherya ophavela olaleerya vamosa ni muloko.

MIKHALELO ANIVEKELIWA AYA

⁶ Muhinatthi omukuxa mutthu orowa olaleerya empa ni empa ekwaha yoopacerya, muhaana osuwelexa akhala wira onniiwelela malamulo a mBiibiliyani. Muhaana opaka eyo mwaha woowi, atthu ale ninrowana ahu olaleeryana anooniwa okhala Anamoona a Yehova. Nto atthu nnaalaleerya ahu anoona wira onneettela malamulo a xariya a Biibiliya ni pooti okhala namalaleerya oohipatisiwa.

⁷ Vaavo munimusomiha anyu mutthu, muhaana othokorerya malakiheryo a mBiibiliyani, eyo enimookhaliheryani omusuwela oratteene. Woonasa wene, munimoona wira onniiwelela ele oniixutta awe. Masi sookhala itthu sikina axitokweene anrowa aya ovaanela ni nyuwo vamosa ni ole munimusomiha anyu.

⁸ Mutokweene oniiraaniha nikhuuru na axitokweene, onimwaavekela axitokweene anli (mmosa a ekomisau ya muteko) wira avaanele myaha iyo ni nyuwo vamosa ni ole munimusomiha anyu Biibiliya. Miloko ari aya axitokweene vakhaani, mutokweene ni murumeyi oorumeela oophwanelela pooti ovara muteko owo. Anna anithanliwa ahaana othokorerya mwaha owo moohipisa. Mwa ntakiheryo, akhala wira anileeliwa omithukumanoni wira ookhala naxikola oniphavela okhala namalaleerya oohipatisiwa, awo pooti ovaanelana nuumala mithukumano. Ahaana othokorerya mwa enamuna yoovaanela. Ohinatthi ole onisomihiwa Biibiliya weemereriwa okhala namalaleerya oohipatisiwa, axitokweene aahaana osuwelexa akhala wira:

1. (1) Onneemererya wira Biibiliya uupuxeriwe ni Muluku.—2 Tim. 3:16.

2. (2) Onnisuwela sowiixuttiha soopacerya sa mBiibiliyani. Maana okathi onrowa awe okohiwaka, owo onrowa omurumeelaka Biibiliya ohiya waakhula moovarihana ni sowiixuttiha sa etiini yoowootha wala muupuwelo awe.—Math. 7:21-23; 2 Tim. 2:15.

3. (3) Onniiwelela yooruma ya mBiibiliyani ya othukumana ni atthu a Yehova mmithukumanoni vaaweryaneyaka.—Esal. 122:1; aHéb. 10:24, 25.

4. (4) Onnisuwela ele Biibiliya oniixuttiha awe voohimya sa orupihana woohiloka, ohela muhina oraruwa, waatteya ni orupihana alopwanaru wala athiyanaru ni akhala wira onniiwelela sowiixuttiha iyo. Akhala wira onikhala ni mulopwana wala ni muthiyana ohikhanle mmusi awe, ahaana olepiha orexistu ekasamento aya.—Math. 19:9; 1 aKor. 6:9, 10; 1 Tim. 3:2, 12; aHéb. 13:4.

5. (5) Onniiwelela yooruma ya Biibiliya voohimya sa ohapaliwa. Nave khonilya mirette soohapala vahikhanle wira olepeliwe oxiripitali.—2 aKor. 7:1; aÉf. 5:18; 1 Ped. 4:3, 4.

6. (6) Onnisuwela efaita erina aya osyaka weetta ni apatthani oohiloka.—1 aKor. 15:33.

7. (7) Oohiya etiini yeetta awe ni oohimya wira nsina nawe nikumihiwe elista ya etiini eyo, ohela muhina miteko sikina sinikhaliherya etiini yoowootha.—2 aKor. 6:14-18; Wis. 18:4.

8. (8) Ohaana osyaka wiirela mpantta epoliitika.—Yoh. 6:15; 15:19; Yak. 1:27.

9. (9) Khoniirela mpantta ikhotto ni myaha sotheene sinivarihana ni ikhotto sa mulaponi.—Yes. 2:4.

10. (10) Onniphavela ni murima wotheene okhala Namoona a Yehova.—Esal. 110:3.

⁹ Akhala wira axitokweene khanikupali oratteene ele naxikola owo onuupuwela awe voohimya sa myaha sikina, ahaana opaka makoho makina arumeelaka soolepa siromoliwe. Ti vooloka ole onisomihiwa Biibiliya osuwela oratteene wira aaphavelaka olaleerya ni Anamoona a Yehova, ohaana wiiwelela malamulo a xariya a mBiibiliyani. Moota onaakhula awe makoho, onimwaakhaliherya axitokweene osuwela akhala wira naxikola owo onnisuwela ele onrowa awe opakaka ni akhala wira onniphwanelela okhala namalaleerya oohipatisiwa.

¹⁰ Moohipisa, axitokweene ahaana omuleela naxikola owo wira oheemereriwa okhala namalaleerya oohipatisiwa. Ikwaha sinceene pooti omuleela nuumala ovaanela ni yena. Akhala wira onniphwanelela okhala namalaleerya oohipatisiwa, axitokweene ahaana omuleela wira annihakalala yena okhala namalaleerya. (aRom. 15:7) Nave ahaana omutumererya opacerya olaleerya ni muloko moohipisa ni ohaana ovahererya erelatoorio awe ya muteko woolaleerya khula mweeri. Axitokweene ahaana omuleela wira vaavo naxikola a Biibiliya oneemereriwa awe okhala namalaleerya oohipatisiwa ni onivahererya awe erelatoorio awe ya muteko woolaleerya ennitthukuliwa ni nsina awe ekartau eniihaniwa Registro de Publicador de Congregação, yeeyo enikhala mwarkiivuni a muloko. Axitokweene annilepa ekartau eyo nsina ni itthu sikina sa namalaleerya owo oohipatisiwa wira mutthenkeso oweryeke okhapelela saana miteko somunepani sa Anamoona a Yehova olumwenku wotheene. Nave axitokweene annipaka eyo wira namalaleerya owo ovareke miteko sa omunepani ni okhaliheriweke momunepani. Ohiya-vo, axitokweene anniwuupuxerya anamalaleerya asya wira itthu iyo sinnikhapeleliwa moovarihana ni malamulo a Anamoona a Yehova ari va jw.org.

¹¹ Omusuwela saana namalaleerya musya ni omuthokorerya saana, pooti omukhaliherya okela vahoolo momunepani. Nave pooti omutumererya ovahererya erelatoorio awe khula mweeri ni wiimananiha omurumeela Yehova.—aFil. 2:4; aHéb. 13:2.

¹² Vaavo axitokweene animweemererya aya mutthu onisomihiwa Biibiliya okhala namalaleerya oohipatisiwa, awo ahaana onvaha eliivuru Mutthenkeso Onipaka Otthuna wa Yehova. Nuumala ovahererya erelatoorio awe ya muteko woolaleerya, ohaana olaleiwa mmulokoni wira owo namalaleerya oohipatisiwa.

MWAAKHALIHERYEKE ANAMWANE

¹³ Anamwane nave pooti ophwanela okhala anamalaleerya a ihapari sooreera. Yesu aaniwaakhela saana anamwane ni aanaareeliha. (Math. 19:13-15; 21:15, 16) Nnaamwi anamuyari arina ene muritti muulupale wa anaaya, atthu akina mmulokoni pooti waakhaliherya anamwane yaawo aniphavela ni murima wotheene olaleya ihapari sooreera sa Omwene. Akhala wira nyuwo mwa namuyari, ntakiheryo nanyu nooloka na olaleerya nnimwaakhaliherya vanceene aniinyu oluttuweliwa ovara muteko wa Muluku. Akhala wira mwaana ookhalana mweettelo wooloka ni onniphavela ni murima wotheene waaleela atthu akina waamini wawe, etthu xeeni ekhanle oopakiwa wira okhaliheriwe mwaana owo?

¹⁴ Ti vooloka paapa wala maama omuleela mutokweene mmosa a Ekomisau ya Muteko wira athukumane ni mwaana owo wira yoone akhala wira pooti okhala namalaleerya oohipatisiwa. Mutokweene oniiraaniha nikhuuru na axitokweene onimwaavekela axitokweene anli (mmosa a ekomisau ya muteko) wira avaanele ni mwaana owo vamosa ni anamuyari awe (paapa wala maama) aahiiso mutthu mukina onimukhapelela, akhala wira muKristau. Akhala wira mwaana owo onnisuwela itthu soopacerya sa mBiibiliyani ni onnooniherya wira onniphavela olaleerya, eyo enooniherya wira onnikela vahoolo. Nuumala othokorerya itthu iyo ni itthu sikina sinivarihana ni atthu aalupale, axitokweene oowanli ahaana woona akhala wira onniphwanelela okhala namalaleerya oohipatisiwa wala nnaari. (Luka 6:45; aRom. 10:10) Vaavo anithukumana aya ni mwaana owo, khivanitthuneya othokorerya itthu sikina sinireerela othokoreriwa ni atthu aalupale paahi.

¹⁵ Okathi anithukumana aya ni mwaana owo, axitokweene ahaana omuttottopela mwaha wookela vahoolo momunepani ni omutumererya opatisiwa. Okhala wira anamuyari awe anniimaniha omwiixuttiha ekeekhai mwaana owo, awo nave aahaana ottottopeliwa. Wira anamuyari ahihiye waakhaliherya anaaya, axitokweene ahaana waatumererya osoma mpantta oni: “Moolumo wa Anamuyari maKristau”, ipaaxina 179-181 sa eliivuru yeela.

WIIVAHERERYA NI OPATISIWA

¹⁶ Akhala wira munnimusuwela, munnimphenta Yehova ni munneettela malamulo ni munnilaleerya, nyuwo muhaana olipiha waataana wanyu ni Yehova. Moota xeeni? Muhaana opaka eyo mwiivahereryaka ni opatisiwa mmaasini.—Math. 28:19, 20.

¹⁷ Ovahererya, ontaphulela ovalaanya etthu wira evareliwe muteko wowaarya. Wiivahererya wa Muluku ontaphulela opaka nivekelo nimuleiheryaka ni murima wotheene wira ninrowa orumeela okumi ahu wotheene nivaraka muteko wa Muluku ni weettela malamulo awe. Nave onitaphulela omukokhorela Yehova paahi mahiku otheene. (Otum. 5:9) Khula mutthu ohaana opaka eyo. Khuuvo mutthu mukina okhanle opaka eyo nipuro nanyu.

¹⁸ Masi muhaana opaka etthu ekina ohiya paahi omuleela Yehova nnivekelo wira muniphavela omurumeela. Maana muhaana owooniherya atthu akina wira muhiivahererya wa Muluku. Munniwooniherya atthu akina wiivahererya wanyu mpatisiwaka mmaasini, ntoko Yesu iirihiwe awe. (1 Ped. 2:21; 3:21) Akhala wira moolakela omurumeela Yehova ni munniphavela opatisiwa, muhaana opaka exeeni? Muhaana omuleela eyo mutokweene oniiraaniha nikhuuru na axitokweene. Owo onimwaavekela axitokweene akina wira avaanele ni nyuwo wira yoone akhala wira munneettela malamulo a Muluku wira mpatisiwe. Soohimmwa sikina nwehe mpantta oni: “Moolumo wa Namalaleerya Oohipatisiwa”, ipaaxina 182-184, eliivuru yeela ni “Makoho Anikohiwa Ale Aniphavela Opatisiwa”, ipaaxina 185-207.

IRELATOORIO SINOONIHERYA OKELA VAHOOLO WA MUTEKO WOOLALEERYA

¹⁹ Mwa iyaakha sinceene, irelatoorio voohimya sa okela vahoolo wa okokhorela wekeekhai olumwenku wotheene sinnaalipiha atthu a Yehova. Okhuma okathi yoole Yesu aalenle awe awiixutti awe wira ihapari sooreera saamulaleiwa elapo yotheene, maKristau eekeekhai yaaniphavela osuwela moota muteko owo waarowa aya ovariwa.—Math. 28:19, 20; Mar. 13:10; Mit. 1:8.

²⁰ Atthareli oopacerya a Yesu wanaasivela wiiwa irelatoorio sa moota muteko woolaleerya waarowa aya vahoolo. (Mar. 6:30) Eliivuru ya mBiibiliyani ya Miteko enihimya wira yaahikhala awiixutti 120 yaavahiwe munepa wowaarya nihiku na Pentekoositi a 33 nuumala Kristu orwa. Moohipisa, nummuru na awiixutti naahincerereya mpakha ophiya 3.000 nuumala-vo 5.000. Erelatoorio enihimya wira: “Nihiku ti nihiku, Apwiya yanahela mmulokoni mmwe atthu akina yihaneliwe wòpowa”, nave “alipa a mukuttho anjene yahakhela wamini”. (Mit. 1:15; 2:5-11, 41, 47; 4:4; 6:7) Tthiri ihapari iye sa wuncerereya saahaalipiha vanceene awiixutti! Nave irelatoorio iye saahaasivela vanceene ni saahaatumererya ohihiya ovara muteko yaarummwale aya ni Muluku, nnaamwi yaalupatthiwa vanceene ni ahooleli a etiini ya aYuda!

²¹ Eriyari ya mwaakha 60 ni 61, murummwa Paulo aahaalepela aKolosi wira ihapari sooreera ‘sinnaphwanyiha mihokorokho atthu othene ni ntoko emmwarelaya mulaponi mothene’ ni wira ‘ahilaleriwa khula mutthu vathí-va’. (aKol. 1:5, 6, 23) MaKristau a eseekulu yoopacerya yaaniiwelela Nuulumo na Muluku, nave munepa wowaarya wahaavaha owerya wira avare muteko munceene woolaleerya ahinatthi omalihiwa makhalelo a aYuda mwakha wa 70 nuumala Kristu orwa. Tthiri maKristau ale yaanilipa vanceene vaavo yiiwa aya irelatoorio iyo sooniherya muteko waavariwa!

²² Mwa enamuna emosaru, olelo-va mutthenkeso wa Yehova onniimananiha olepa irelatoorio sa moota muteko onivariwa aya ni moota eniiraneya aya eprofesia ya Yesu eri Matheyo 24:14, yeeyo eni: “Ehapar’ila yorera y’Omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”. Arumeyi otheene yiivaherenrye wa Muluku annisuwela wira wookhala muteko wowaakuveya anireerela aya ovara. Nihaana wiimananiha ovara mpantta ahu wira muteko woolaleerya ovariwe moomalela ohinatthi olumwenku ola omala. Niira siiso, okathi Yehova onrowa awe woona wira muteko woolaleerya woomaala, owo onooneemererya.—Ezek. 3:18-21.

ERELATOORIO YA MUTEKO WOOLALEERYA

²³ Etthu xeeni ninreerela ahu ohela murelatoorioni mwahu? Eformulaario Relatório de Serviço de Campo, ninvahiwa ahu ni mutthenkeso, ennooniherya itthu ninreerela ahu ohela murelatoorioni mwahu. Masi moolumo anittharelana animookhaliheryani vanceene.

²⁴ Eliinya eni “Publicações (impressas e eletrônicas)”, mulepeke iliivuru sotheene soowimpirimiriwa ni eletroniko nvanhe anyu wala mmunviyarenle anyu mutthu ohikhanle Namoona a Yehova. Vano eliinya eni: “Vídeos mostrados”, mulepeke iviidiyu sotheene sa mutthenkeso ahu moonihenrye anyu.

²⁵ Eliinya eni: “Revisitas”, muhaana olepa ikwaha sotheene mwaamuxukunrye anyu mutthu aasiveliwe ekeekhai ohikhanle Namoona a Yehova. Erevisita pooti opakiwa okathi munrowa anyu owannyawe, omulepela ekarta, omulikarela, omulepela mensaxe, e-mail, onvaha eliivuru wala erevista. Khula okathi munimusomiha anyu mutthu Biibiliya, muhaana-tho olepa okhala erevisita. Paapa wala maama onimusomiha mutthu a etthoko awe pooti okontari okhala erevisita khula okathi onimusomiha awe, nave ahaana olepa okhala erevisita ekwaha emosa vasumanani okathi wa omulompa Muluku vatthokoni akhala wira ookhala mwaana ohipatisiwe.

²⁶ Nnaamwi yoosoma ya Biibiliya epakiwaka khula esumana, ehaana okontariwa wanikisa wa mweeri okhala yoosoma ya Biibiliya emosa paahi. Anamalaleerya ahaana olepa nummuru na atthu anaasomiha aya khula mweeri. Soosoma sa Biibiliya sinihela muhina atthu ale nnaasomiha ahu Biibiliya ahikhanle Anamoona a Yehova ni anna wala arokora apatisiwe niinaano nlelo ahimalinhe osoma eliivuru Biibiliya Onniixuttiha Exeeni? wala Muhihiye Omphenta Muluku. Nave pooti olepa okhala soosoma sa Biibiliya vaavo munimusomiha anyu munna wala murokora aahiyale olaleerya ni orowela mithukumano, akhala wira murooleeliwa ni munna a ekomisau ya muteko ya muloko.

²⁷ Ti vooloka olepa “Iwoora” sekeekhai murelatoorioni mwanyu. Okhala wene, iwoora okathi nvirinhe anyu mulaleeryaka empa ni empa, mpakaka irevisita, mwiirihaka soosoma sa Biibiliya, mulaleeryaka mapuro oowaatta atthu wala mwaalaleeryaka moohilokiherya atthu ale ahikhanle Anamoona a Yehova. Akhala wira anamalaleerya anli annivara vamosa, otheene aya ahaana okontari iwoora avirinhe aya alaleeryaka, masi khula namalaleerya onrowa olepa irevisita sawe ni atthu onaasomiha awe Biibiliya. Okhale paapa wala maama pooti okontari iwoora aniviriha aya khula esumana yaasomihaka anaaya okathi wa Omulompa Muluku Vatthokoni. Anna ahaana olepa okathi aniviriha aya apakaka myaha sa atthu otheene. Nave munna onitaphulela myaha sa atthu otheene pooti okontari ni olepa iwoora iyo. Sookhala miteko sa faita sihinlempwa, ntoko wiilokiherya wira nalaleerye, orowela mithukumano sa muteko woolaleerya ni miteko sikina.

²⁸ Khula namalaleerya ohaana otthara yowuupuxerya ya murima awe yiixuttihiwe ni Biibiliya okathi onilepa awe iwoora ovirinhe awe olaleeryaka. Anamalaleerya akina, anilaleerya mittetthe sowaatta atthu, masi akina anivara mittetthe atthu ari aya vakhaani, nto anamalaleerya awo anneetta mikwaha soorakama. Okhala wira mittetthe sinnivirikana, anamalaleerya aakhalana moonelo woovirikana voohimya sa moota wookontari okathi avirinhe aya alaleeryaka. Anna a Nikhuuru Noolamulela khaniphavela wira miloko sa olumwenku wotheene atthareke yowuupuxerya ya murima aya voohimya sa moota akhanle aya ookontari okathi avirinhe aya alaleeryaka, ni khuuvo mutthu oneemereriwa ohela malamulo awe voohimya sa mwaha ola.—Math. 6:1; 7:1; 1 Tim. 1:5.

²⁹ Okathi nvirinhe anyu mulaleeryaka muhaana olepa iwoora soomalela ohiya minutu. Ohiya anamalaleerya akina arina mixankiho ntoko wuuluvala, ohiwerya okhuma owaani, waapaxari oxiripitali wala owaani aahiiso etthu ekina enaakhoottiherya olaleerya ewoora ntero. Anamalaleerya akina pooti olepa minutu 15 paahi. Hata avirinhe ene minutu 15 paahi alaleeryaka mweeri owo, awo ahaana olepa. Owo ohaana othokoreriwa okhala namalaleerya a Omwene ohinihiyererya. Malakiheryo ala anivareleya muteko paahi para anamalaleerya ale ahiniwerya orowa olaleerya mwaha wa mixankiho, woonasa wene pooti wira aakhuma okathi vakhaani mwaha wa oretta wala asitenti. Malakiheryo ala anihimmwa paahi anna ale ahiniwerya moomalela orowa olaleerya ntoko anna akina. Ekomisau ya muteko ya muloko tenrowa othanla akhala wira namalaleerya owo pooti ottottela mureerelo malakiheryo ala wala nnaari.

EKARTAU YA NAMALALEERYA A MMULOKONI

³⁰ Itthu sotheene namalaleerya ovanre awe muteko woolaleerya mweeri wotheene sinilempwa ekartau awe eniihaniwa Registro de Publicador de Congregação. Itthu iyo sotheene sinilempwa ti sa muloko. Akhala wira munithaamela muloko mukina, muhiliyale waaleela axitokweene a mmulokoni. Nto sekretaario onooroiha ikartau sanyu muloko owo muthaamenle anyu. Eyo enimwaakhaliherya axitokweene a muloko musya owaakhelani oratteene ni wookhapelelani momunepani. Akhala wira munookhuma muloko owo myeeri miraru, muhaana ovikaniha oroiha erelatoorio anyu ya muteko woolaleerya muloko mukhumme anyu.

XEENI NINVAHA AHU IRELATOORIO SAHU SA MUTEKO WOOLALEERYA

³¹ Niireke mootoko oliyala ovahererya erelatoorio anyu ya muteko woolaleerya? Tthiri okathi mukina otheene ahu nihaana wuupuxeriwa. Masi nasuwela nthowa naya irelatoorio sirina aya efaita ni siri aya sootthuneya, vanoonikweela ovaha irelatoorio sahu sa muteko woolaleerya.

³² Atthu akina anniikoha so: “Okhala wira Yehova onnisuwela itthu sotheene kinvara aka, kiireke tthiri kihaana ovahererya erelatoorio mmulokoni?” Ekeekhai wira Yehova onnisuwela muteko nninvarela ahu ni onnisuwela akhala wira ninvara ni murima wotheene wala nnaari. Masi, muhiliyale wira Yehova aahilepa mahiku Nowe aavirinhe awe ori ene mukalawani, nave aahilepa iyaakha aIsarayeli yaavirinhe aya yeettaka moothakoni. Nave Muluku aahilepa nummuru na atthu yaamwiiwelenle ni yahaamwiiwelenle. Nave-tho aahilepa moota yaakenle aya oKanani ni itthu makhulupale oororomeleya a wIsarayeli yaapanke aya. Tthiri Muluku aahilepa itthu sotheene arumeyi awe yaavanre aya. Owo aahaaleela arumeyi awe wira yaahaana olepa itthu sekeekhai, nto oonivaha ntakiheryo nooloka wira nilepeke itthu sekeekhai.

³³ Sowiiraneya silempwale mBiibiliyani sinnooniherya irelatoorio sekeekhai saalempwale ni atthu a Yehova. Ikwaha sinceene, khivaarowa okhweya ovara murima akhala wira khiyaarowa olempwa mammaru eekeekhai. Nwehe matakiheryo ari: Maphattuwelo 46:27; Okhuma 12:37; Makhulupale 7:7; 2 Mamwene 19:35; 2 Wahala 14:9-13; Yohani 6:10; 21:11; Miteko 2:41; 19:19.

³⁴ Ekeekhai wira murelatoorioni mwahu khaninhela itthu sotheene ninvara ahu mmutekoni mwa Yehova, masi hata vari siiso itthu iyo sinnikhaliherya vanceene mutthenkeso wa Yehova. Eseekulu yoopacerya, okathi arummwa yaahokolonwe aya muteko woolaleerya, awo yaahimuleela Yesu “sothene sìralyaya ni sixuttihalyaya”. (Mar. 6:30) Okathi mukina, irelatoorio sinnooniherya akhala wira enamuna emosa ya muteko ahu woolaleerya ehaana othokoreriwa. Mammeru annooniherya akhala wira wookhala mpantta nikenle ahu vahoolo, masi mipantta sikina ntoko nummuru na anamalaleerya khanikenle vahoolo. Nto pooti wooniwaka wira anna ahaana otumereriwa wala ophukiwa mixankiho sikhanle mpantta owo. Nave anna arina miritti anoothokorerya irelatoorio ni animwiimananiha ophuka khula muxankiho oniwiiriha anna akina mmulokoni wala anna otheene ohikela vahoolo.

³⁵ Nave irelatoorio sinnikhaliherya mutthenkeso oweha akhala wira mapuro makina anireerela oroihiwa anamalaleerya. Mittetthe xeeni sinikhumela saana? Mittetthe xeeni sinikela vahoolo? Iliivuru xeeni sinrowa waakhaliherya atthu wiixutta ekeekhai? Irelatoorio sinnikhaliherya mutthenkeso osuwela iliivuru ninreerela ahu orumeela naalaleeryaka ilapo sikina olumwenku wotheene. Nto eyo ennikhaliherya mutthenkeso opaka etthu.

³⁶ Tthiri ninnoona wira irelatoorio sinnintumererya vanceene. Niireke khaninhakalala vaavo ninsuwela ahu itthu annihu anivara aya muteko woolaleerya olumwenku wotheene? Tthiri irelatoorio sinninikhaliherya osuwela moota mutthenkeso wa Yehova oninnuwa awe. Sowiiraneya sa anna ni arokora sinninihakalaliha vanceene ni sinninikhaliherya oluttuweliwa. Nto eyo enniniiriha okhaliherya vanceene muteko woolaleerya. (Mit. 15:3) Ovahererya irelatoorio sahu ti wootthuneya ni sinnooniherya wira ninnaathokorerya annihu a ilapo sikina. Niira siiso, nnimooniherya wira ninniiweelela mutthenkeso wa Yehova.—Luka 16:10; aHéb. 13:17.

MUKHALANEKE SOOLUKAMA

³⁷ Nihaana osyaka olikanyiha ele ninvara ahu muteko woolaleerya ni itthu atthu akina anivara aya. (aGal. 5:26; 6:4) Mikhalelo sahu sinnivirikana ni atthu akina. Nave, nnoottottela mureerelo munceene akhala wira nnookhalana soolukama sa omunepani sinrowa onikhaliherya woona akhala wira ninnikela vahoolo muteko woolaleerya. Muhiliyale wira okathi nimphwanya ahu soolukama sahu ninnihakalala vanceene.

³⁸ Ninnikupali wira Yehova onnaakuviha muteko woothukumanyiwa atthu onrowa awe waakhapelela okathi wa maxakha maalupale. Hiyo ninkhala okathi eniiraneya aya eprofesia ya Yesaya eni: “Etthoko anyu yamukhanixa enokhala muttitthi munjene: etthoko anyu yoyevaxa enokhala nloko nowatta atthu”. (Wis. 7:9, 14; Yes. 60:22) Tthiri eparakha yuulupale olaleya ihapari sooreera mahiku ala ookiserya!—Math. 24:14.