Othokorerya Woomaliherya Ni Ale Amphavela Opatisiwa

Okhala wene opatiso ompakiwa okathi wa mithukumano suulupale ni mithukumano sa muttetthe wa Anamoona a Yehova. Wanikisa wa mwaha wa opatiso, Mulipa-oolavula mwaha onrowa waavekela ale anrowa opatisiwa wira yeemele ni yaakhule makoho ala manli ni masu oowiiwanyeya ani:

1. Moottharuwa soottheka sanyu, muhiivahererya wa Yehova ni muhaamini wira apinaatamu, anoowerya woopoliwa paahi mwaha wa mukuttho wa Yesu Kristu?

2. Munnisuwela wira opatisiwa wanyu, onooniherya wira nyuwo mwa Namoona a Yehova ni muniirela mpantta mutthenkeso wa Yehova?

Waakhula wanyu makoho ala onithoonyerya ‘ohimya oholo w’atthu’ waamini wanyu yowoopola ni wira muhiivahererya wa Yehova ni murima wotheene. (aRom. 10:9, 10) Vahinatthi, ale anrowa opatisiwa ahaana wuupuwelela makoho ala ni nivekelo wira awerye waakhula moovarihana ni sookupali saya.

Niireke muhiivahererya wa Yehova mpakaka nivekelo, ni moomuleiherya wira munrowa omukokhorelaka yoowo paahi, ni opaka yootthuna awe okhala etthu yootepa otthuneya mookumini mwanyu?

Niireke munnikupali tthiri wira muhaana opatisiwa okathi onaattamela?

Ekuwo xeeni enireerela owara okathi wa opatiso? (1 Tim. 2:9, 10; Yoh. 15:19; aFil. 1:10)

Ale anrowa opatisiwa ahaana owara ikuwo soophwanelela, aphavelaka omuttittimiha Muluku. Nave ahaana osyaka owara ikuwo sinikataniwa sinooneela muhina, wala owara ikuwo silempwale itthu sa elapo aahiiso simmulaleya nakoso.

Ale anrowa opatisiwa ahaana owara ikuwo sooloka, soophwanelela, ni sinireerela okathi owo. Mutthu okhaleke sai okathi woopatisiwa? (Luka 3:21, 22)

Opatiso wa Yesu woovaha ntakiheryo na opatiso wa maKristau olelo-va. Owo aahisuwela wira opatiso nivalo nuulupale, nto ela yaahoonihereya orweela wa mukhalelo awe ni miteko sawe. Tivonto, opuro wa opatiso khahiyo opuro wa othweela, okata, aahiiso mweettelo mukina waarowa ohonona ophwanelela wa okathi ole. Nto khivaarowa okhala voophwanelela muKristau opaka itthu ntoko iyo onakhala wira omuxinttale mutthu. Nnaamwi opatiso oryeene okathi woohakalaliha, ohakalala iwo ohaana wooniheriwa mwa nttittimiho.

Moota xeeni waataana ni muloko onrowa aya wookhaliheryani okhala moovarihana ni wiivahererya wanyu wa Yehova?

Hata nuumala opatisiwa, xeeni munitthuneya anyu okhalana eprograma ya yoosoma anyu ya omwaneene ni ohihiya olaleerya?

MALAKIHERYO WA AXITOKWEENE A MULOKO

Vaavo namalaleerya oohipatisiwa onihimya awe wira oniphavela opatisiwa, ohaana otumereriwa osoma oratteene “Makoho Anikohiwa Ale Aniphavela Opatisiwa”, yaawo ari ipaaxina 185-207 ya elivirinyu ela. Owo ohaana osoma saana “Moolumo wa Namalaleerya Oohipatisiwa”, yaawo ari wanipacerya wa epaaxina 182, anooniherya moota wowiilokiherya wira akohiwe ni axitokweene. Ntoko sinihimya aya epaaxina eyo, ole omphavela opatisiwa pooti orumeela-tho itthu sikina silempe awe ni pooti ohula eliivuru awe okathi onaakhula awe makoho ala. Masi, ohinatthi okumana ni axitokweene khivantthuneya wira mutthu mukina omukhaliherye wuuluula makoho ala.

Khula mutthu oniphavela opatisiwa, ohaana omuleela mutokweene onuuraanyiha nikhuuru na axitokweene. Nuumala mutthu ole ovekenle opatisiwa okhalana okathi woosoma “Makoho Anikohiwa Ale Aniphavela Opatisiwa”, mutokweene onuuraanyiha nikhuuru na axitokweene onrowa omukoha mutthu owo akhala wira ohiivahererya wa Yehova opakaka nivekelo wira onrowa opaka yootthuna ya Yehova. Akhala wira mutthu owo ohiivahererya wa Yehova, nto mutokweene onuuraanyiha nikhuuru na axitokweene onrowa opaka mareheryo wira axitokweene anli athokorerye ni mutthu owo “Makoho Anikohiwa Ale Aniphavela Opatisiwa”. Wa khula epantta, ohaana othanliwa mutokweene mmosa. Khivantthuneya owehererya ohimmwa nihiku onrowa awe okhala muthukumano muulupale wira akohiwe makoho ala.

Ipantta iyo piili pooti othokoreriwa ewoora emosa khuta mpantta, nnaamwi vahikhanle vootthekeya ovikana ewoora emosa akhala wira ti vootthuneya. Khula epantta ehaana opaceriwa ni omalihiwa ni nivekelo. Hata ole omphavela opatisiwa aahiiso mutokweene, khantthuneya othokoreryaka makoho ala moowaakuva. Axitokweene athanliwe, ahaana opweha opuro woopacerya mprogramani mwaya yoothanleliwa ela, akhala wira aavekeliwa ovara muteko ola.

Ti vooloka omukoha mekhawe khuta mmosa a yaale amphavela opatisiwa, ohiya egrupu. Vaavo mutthu owo onaakhula awe khula nikoho, eyo enimwaakhaliherya axitokweene osuwela akhala wira ohiixutta saana, ahaanyiheryaka ophwanelela wawe wira opatisiwe aahiiso wira ohipatisiwe. Nave-tho, eyo pooti omwiiriha ole omphavela opatisiwa okhala ootaphuwa wira aakhule makoho ala. Mulopwana ni amwaarawe pooti okohiwa oowanli aya hoothe.

Akhala wira ole omphavela opatisiwa murokora, okathi wa makoho mutokweene ni murokora owo ahaana okhala opuro anooniwa aya ni atthu akina, masi vahiniweryaneya aya atthu akina wiiwa ele enilavuliwa. Vakhala wira ti vootthuneya omwiitthana munna mukina wira okhale vaavo, munna owo ohaana okhala mutokweene aahiiso murummwa oorumeela, ntoko enitthokiheriwa aya ettima enittharelana.

Miloko seiye sirina axitokweene vakhaani, arummwa oorumeela oophwanelela ni a miruku pooti othokorerya ni ale aniphavela opatisiwa “Mpantta 1: Itthu Makristau Anikupali Aya”. Axitokweene paahi takhanle oothokorerya “Mpantta 2: Okumi wa Ekristau”. Akhala wira muloko khorina axinna anceene oophwanelela, ohaana oleeliwa mutokweene a esirkwitu wira ovarerye akhala wira axitokweene a miloko sowaattamela pooti okhaliherya.

Akhala wira ole onrowa opatisiwa, mwaana, anamuyari awe Anamoona a Yehova, (wala namuyari mmosa) ahaana okhala vaavo okathi woothokorerya ipantta iyo. Akhala wira anamuyari awe khanrowa okhala vaavo, weeso axitokweene anli (wala mutokweene mmosa ni murummwa oorumeela, moovarihana ni mpantta owo) ahaana okhala vaavo okathi woothokorerya khula mpantta.

Axitokweene ahaana ottittimiherya wira ole omphavela opatisiwa ookhalana osuwela wooreerela wa sowiixuttiha soopacerya sa Biibiliya. Nave-tho, anrowa ophavela osuwelexa akhala wira ole omphavela opatisiwa onnisiveliwa ekeekhai vanceene ni onnooniherya nttittimiho noophwanelela mutthenkeso wa Yehova. Akhala wira mutthu owo khonsuwela saana sowiixuttiha soopacerya sa Biibiliya, axitokweene anrowa opaka marehereryo wira okhaliheriwe mutthu owo wira okhale oolikana wira opatisiwe okathi mukina. Atthu akina annitthuneya ovahiwa okathi munceene wira yooniherye osiveliwa muteko wa olaleerya aahiiso wiiwelela marehereryo a nikhuuru nahu. Axitokweene tanithanla moota woorumeela mwa miruku okathi wa khula mpantta wa makoho, wira asuwele saana akhala wira ole oniphavela opatisiwa oolikanela wira opatisiwe. Ekeekhai wira makoho makina pooti ovekelaka omaliha okathi munceene makina okathi vakhaani, masi makoho otheene ahaana okohiwa.

Axitokweene athanliwe wira amukhaliherye ole omphavela opatisiwa, anrowa okumana nuumala okohiwa mpantta wa nenli wira yoone akhala wira anomweemererya mutthu owo wira opatisiwe aahiiso nnaari. Axitokweene anrowa othokorerya mahuweliwo, osuwela, ni mikhalelo sikina sa khuta mmosa. Hiyo nnaaphavela atthu yaale anvaherenrye murima aya Yehova ni aniiwexexa sowiixuttiha soopacerya sa Biibiliya. Mwaha wa nikhaliheryo nanyu noophenta, ale aniphavela opatisiwa anrowa wiilokiherya saana wira evare muteko ola wootthuneya ntoko arumeyi a ihapari sooreera.

Moottharelana, mmosa aahiiso anli a axitokweene awo athanliwe, anrowa okumana ni ole omphavela opatisiwa wira amuleele akhala wira oophwanelela opatisiwa aahiiso khophwanelenle. Akhala wira mutthu owo oophwanelela opatisiwa, axitokweene anrowa othokorerya nuuwo “Othokorerya Woomaliherya ni Ale Amphavela Opatisiwa”, ipaaxina 206-207. Akhala wira mutthu owo khomalinhe yoosoma awe ya iliivuru Biibiliya Onniixuttiha Exeeni ni Muhihiye Omphenta Muluku, axitokweene ahaana omutumererya omaliha nuumala opatisiwa. Nave-tho, axitokweene awo ahaana omuleela mutthu owo wira nihiku ninrowa awe opatisiwa, ninrowa olempwa mukartauni eni: Registro de Publicador de Congregação, mwa nsina nawe. Mmuleele wira axitokweene annilepa myaha iyo sinimuromola munna owo, wira mutthenkeso okhapeleleke miteko sa etinii sa Anamoona a Yehova olumwenku wotheene. Nave mmuleele munna owo wira eyo enoomukhaliherya wiirela mpantta miteko sinilokiheriwa ni muloko, nave onoolipihiwaka ni ovahiwa malakiheryo ni axitokweene. Ohiya-vo, axitokweene ahaana omuleela namalaleerya a ninaano wira myaha sotheene sinrowa olempwa mmulokoni sinimuromola munna owo, sinnisukiwa moovarihana ni malamulo a osuka isiiri sa Anamoona a Yehova a esaite jw.org. Othokorerya nno woomaliherya ohaana okhala wa minutu 10 aahiiso ohiphiya.

Yavira eyaakha emosa nuumala opatisiwa, axitokweene anli ahaana omuxukurya namalaleerya owo oopatisiwa wira amulipihe ni anvahe malakiheryo makina. Mmosa a axitokweene awo ohaana okhala mutokweene oniweherya ekrupu ya mutthu owo. Akhala wira munna owo mwaana, mmusi awe Namoona a Yehova ohaana okhala vaavo. Muthukumano owo ohaana okhala woohakalaliha ni woolipiha. Axitokweene anirowa olavula voohimya sa orowa vawe vahoolo ntoko muKristau, onvaha malakiheryo ootthuneya a moota woohihiya okhalana yoosoma awe ya omwaneene, omusoma Biibiliya khuta nihiku, omulompa Muluku vatthokoni khuta esumana, orowa omuthukumanoni ni wiirela mpantta, ni orowa olaleerya khuta esumana. (aÉf. 5:15, 16) Akhala wira nlelo khomalinhe osoma iliivuru Biibiliya Onniixuttiha Exeeni ni Muhihiye Omphenta Muluku, axitokweene ahaana omphavela mutthu wira omusomiheke munna wala murokora owo. Axitokweene ahaana omuttottopela mooreera murima ni moophenta. Okhala wene, pooti onvaha miruku wala malakiheryo ahimyaka eponto emosa aahiiso piili.