Makoho Oowaakhuliwa
◼ Ohinatthi namalaleerya weemeriwa wira obatiziwe, ohaana oviriha myeeri mikavi orowaka omuthukumanoni ni olaleerya?
Obatiziwa ti yoothanla yootepexa otthuneya yeeyo mutthu okhanle awe oopaka. Masi, ohinatthi mutthu weemereriwa wira obatiziwe, ohaana wiiwexexa saana ele Muluku oniphavela awe wa yena. Nave-tho, owo ohaana wooniherya wira onneettela malamulo a Muluku.
MaKristau annitumereriwa ohicompela orowa omuthukumanoni. Nto, namalaleerya ohinatthi weemereriwa wira obatiziwe, ohaana oluttuweliwa voohimya sa orowa omuthukumanoni. (aHéb. 10:24, 25) Ohiya-vo, owo ohaana okomentariki mmuthukumanoni. Woonasa wene, owo ohaana wiilepiha Exikola ya Orummwa wa Muluku, nnaamwi ela ehikhanle yoovekela.
Ohiya-vo, okhala wira maKristau aavahiwa muteko wa olaleya ihapari sooreera ni waapaka awiixutti, namalaleerya oohibatiziwa ohaana olaleeryaka mwa nthiti ohinatthi obatiziwa. (Math. 24:14; 28:19, 20) Nto myeeri mikavi onitthuneya awe oviriha olaleeryaka ohinatthi obatiziwa? Moohaaniherya, owo ohaana oviriha okathi wooreerela onooniherya wira khonrowa ohiya oluttuweliwa muteko woolaleerya khula mweeri. (Esal. 78:37) Masi, nuumala opacerya olaleerya khonitthuneya oviriha okathi munceene wira obatiziwe, waaniheryasa pooti okhala myeeri vakhaani paahi. Nto iwoora kavi sa olaleerya onitthuneya awe ovahereryaka? Khakhanle malamulo oolepwa mmwaha owo. Axitokweene ahaana oweha makhalelo a khula namalaleerya ni okhala ooreera murima.—Luka 21:1-4.
Axitokweene (wala arummwa oorumeela mmiloko sooyeva axitokweene) anithukumana ni ole oniphavela obatiziwa, ahaana wuupuwela wira khuta mutthu toovirikana makhalelo awe. Nto ahaana okhala a miruku wira asuwele akhala wira mutthu owo onnireerela obatiziwa. Awo ahaana osuwelexa akhala wira owo onniphavela tthiri okhala Namoona a Yehova, onnivaha efaita eparakha ya wataana ni nikhuuru nootthokiheya na Yehova ni onnilaleerya. Axitokweene annisuwela saana wira munna owo khonatthi nlelo wunnuwa momunepani, wala osuwela itthu ntoko anamalaleerya abatiziwe khalai. Akhala wira axitokweene anoona wira mutthu owo khoniphwanelela obatiziwa, ahaana mooreerela omuleela mathowa aya arumeelaka Soolempwa ni omukhaliherya momunepani.