Apendise

Moolumo wa Anamuyari maKristau:

Ntoko namuyari, munniphavela tthiri waakhaliherya aniinyu wira amphenteke ni wiivahererya wa Yehova. Munrowa opaka exeeni wira mwaakhaliherye wiilokiherya wira apatisiwe? Okathi xeeni anirowa aya okhala oolikana ene wira epake nivalo nla nootthuneya?

Yesu aahaaruma atthareli awe wira: “Mwawixuttiheke atthu a maloko othene, mwabatizaka”. (Math. 28:19) Moovarihana ni yooruma ela, etthu yoopacerya enitthuneya wira mutthu opatisiwe, ori okhala mwiixutti, eyo piiyo, ohiya paahi wiiwexexa ni okupali sowiixuttiha sa Yesu, masi-tho weettela sowiixuttiha iyo. Eyo khahiyo etthu yooxankiha maana hata anamwane anoowerya.

Mwaavaheke ntakiheryo nooloka aniinyu ni nwiixuttiheke voohimya sa Yehova. (Otum. 6:6-9) Eyo enihela muhina orumeela iliivuru Biibiliya Onniixuttiha Exeeni? ni “Muhihiye Omphenta Muluku” wira nwiixuttihe sowiixuttiha soopacerya sa Biibiliya. Nave muhaana owiixuttiha moota woovaanela ni atthu ni weettela malakiheryo a Biibiliya. Mwaakhaliherye otthokiherya sookupali saya erumeelaka moolumo aya. (1 Ped. 3:15) Osuwela wekeekhai ni waalipiha wanyu, okathi wa yoosoma aya, omulompa Muluku vatthokoni, mithukumano sa mmulokoni ni wataana wooloka, onimwaakhaliherya orowa vahoolo wira epatisiwe ni ohihiya wataana ni Yehova. Mwaakhaliherye moota akhanle aya ootepa omwaattamela Yehova.

Miruku 20:11 oni: “Mwanamwane onsuwanyeya ni sowira sawe, mwettelo awe wakhalá worera ni wa xariya”. Itthu xeeni saarowa wooniherya wira mwaana owo vano mwiixutti a Yesu Kristu ni onniphavela opatisiwa tthiri?

Mwaana yoowo onirowa vahoolo wira opatisiwe ohaana owiiwelelaka anamuyari awe. (Mit. 5:29; aKol. 3:20) Biibiliya onihimya wira okathi Yesu aarina awe iyaakha 12 “aniwiwelela” anamuyari awe. (Luka 2:51) Masi muhiliyale wira mwaninyu toohimalela. Hata vari siiso, ole oniphavela opatisiwa, ohaana wiimananiha otthara ntakiheryo na Yesu. Nave ohaana osuweliwa okhala mwaana oniwiiwelela anamuyari awe.

Nave-tho mwaana owo ohaana wooniherya wira onniphavela wiixutta ikeekhai sa mBiibiliyani. (Luka 2:46) Niireke mwaninyu onnisiveliwa mithukumano? Onniirela mpantta? (Esal. 122:1) Niireke onnimusivela omusoma Biibiliya khula nihiku? Ookhalana yoosoma awe ya omwaneene?—Math. 4:4.

Mwaana onirowa vahoolo wira opatisiwe onniimananiha opweha nipuro noopacerya Omwene. (Math. 6:33) Owo onnisuwela wira ookhalana muritti wa waalaleerya atthu akina. Onniirela mpantta inamuna soovirikana sa olaleerya ni khonuuleliwa muru waaleela maprusoore awe ni anaxikola akhwaawe wira owo Namoona a Yehova. Owo onnipaka ipantta sinithanleliwa awe sa muthukumano wa Okumi ni Orummwa Ahu wa eKristau.

Nave-tho owo onniimananiha okhalana mweettelo wooloka. Nave onnaasyaka apatthani oohiloka. (Mir. 13:20; 1 aKor. 15:33) Eyo ennooneya orweela wa isipo onithanla awe, iviidiyu, iprograma sa televisau, axooku, ni moota onirumeela awe interneti.

Anamwane anceene yaawo avarihenle muteko wiimananiha wa anamuyari aya, aheettela ekeekhai khuphwanelela wira epatisiwe eri ene amiravo. Nto Yehova ooreeliheni vaavo munaakhaliherya anyu aniinyu opaka nivalo nla nootthuneya wira yaataane ni Yehova.

Moolumo wa Namalaleerya Oohipatisiwa:

Eparakha yuulupale orumeela mmulokoni ntoko namalaleerya oohipatisiwa. Nyuwo munniphwanela ottottopeliwa mwaha wa moota munrowa anyu vahoolo wira mmurumeeleke Muluku. Yoosoma anyu ya Biibiliya ehookhaliheryani omusuwela Muluku ni waamini sooleiherya sawe.—Yoh. 17:3; aHéb. 11:6.

Woonasa wene muhinatthi opacerya omusoma Biibiliya ni Anamoona a Yehova, mweettela itiini sikina, aahiiso, khimwaarina etiini. Waaniheryasa mwaanikhaliherya mwa inamuna sikina itthu seiyo sihinivarihana ni malakiheryo a Biibiliya. Masi vano nyuwo muhooniherya waamini wanyu, maana moottharuwa soottheka sanyu. Niire so, moothanana mwaha wa itthu soohiloka mwaapaka anyu khalai, moorukunuxa murima anyu, ni mookhootta mweettelo woohiloka. Vano moolakela opaka itthu sinimusivela Muluku.—Mit. 3:19.

Waaniheryasa, “okhuma enamwane anyu, mosuwela solempwa sowarya”. Iyo sihookhaliheryani osyaka mweettelo woohikhala weKristau ni opaka itampi suulupale. (2 Tim. 3:15) Nyuwo muhiixutta okhoottela sookhanyererya sa apatthani ni osyaka itthu sinimunanara Yehova. Nyuwo munnooniherya waamini vaavo munaakiherya anyu okokhorela wekeekhai ni waaleela akina sookupali sanyu sa eKristau. Pooti wira nyuwo muhiixuttihiwa moota woolaleerya. Vano, nyuwo moothanla omurumeela Yehova ntoko namalaleerya oohipatisiwa.

Hata mmusuwenle ene Yehova okhuma enamwane anyu aahiiso munnunwe ene, vano nyuwo munnuupuwela opaka mavalo manli anooniherya orowa wanyu vahoolo mwaha wa omurumeela Muluku. Mavalo awo taala: wiivahererya ni opatiso. Nyuwo muhiivahererya wa Yehova mmwaattamelaka owo ni nivekelo ni mmuleelaka yoothanla anyu ya omurumeela yoowo paahi mahiku otheene. (Math. 16:24) Munimooniherya wira muhiivaherya vaavo munrowa anyu opatisiwa mmaasini. (Math. 28:19, 20) Orweela wa wiivahererya ni opatiso, nyuwo munnikhala murumeyi a Yehova Muluku. Tthiri eyo eparakha yuulupale!

Ntoko mwiixuntte ayu okathi mwaamusoma anyu Biibiliya, woonasa wene sinimoophwanyani mixankiho sinceene. Muupuweleke wira opatisiwe ene niinaano, munepa wa Muluku ‘wahimurowana Yesu wothakoni, wira èhereriwe ni Satana’. (Math. 4:1) Nuumala opatisiwa ntoko mwiixutti a Kristu, nyuwo sinimoophwanyani sooweeha sinceene. (Yoh. 15:20) Sooweeha iyo pooti orwa mwa inamuna soovirikana. Nyuwo pooti olupatthiwaka ni amusi. (Math. 10:36) Nave pooti onyoholiwa ni atthu munisomana anyu oxikola, munvarana anyu muteko, aahiiso ale khalai yaari apatthani anyu. Akhala wira eyo enimwiiraneya muhaana wuupuwela masu a Yesu ari Marko 10:29, 30 yaawo ani: “Kinolèlani ekhweli wira: khavo ohiyale emp’awe n’axinn’awe n’axirokor’awe n’ame awe n’atithi awe n’ana’we walá imatta sawe mwaha wa miyo ni mwaha w’Ehapari Yorera, ohinrowa winjereriwa mpakha miloko mulokó nanano vathí-va ipa n’axinna n’axirokora n’aximai n’anamwane n’imatta vamosá n’ulupatthiwa. Nave womalelani onimwakhela ekumi yohimala”. Nto, muhihiye wiimananiha wira mulipihe wataana wanyu ni Yehova ni weettela malamulo awe a exariya.

Vakhala wira munoophavela opatisiwa, mmuleele mutokweene onuuraanyiha nikhuuru na axitokweene. Axitokweene anirowa othokorerya ni nyuwo makoho anittharelana wira ewehe akhala wira munniphwanelela opatisiwa. Nyuwo pooti opacerya othokorerya makoho ala mekhinyu okathi munipaka anyu yoosoma anyu ya omwaneene.

Okathi muniilokiherya anyu wira muthokorerye makoho ala, muhaana osoma ni wuupuwelela soolepa siromoliwe. Nyuwo pooti olepa itthu vakhaani muliivuruni-mu wala opuro mukina, mwaphavela. Nave pooti orumeela itthu silempe anyu ni ohula eliivirinyu ela okathi onikohiwa anyu makoho ni axitokweene. Akhala wira makoho makina annooxankihani wiiwexexa, pooti omukoha ole onoosomihani Biibiliya aahiiso axitokweene wira yookhaliheryeni.

Okathi munithokorerya anyu makoho ala ni axitokweene, muhaana osyaka ohimya itthu sinceene aahiiso waakhula mwa inamuna sooxankiha. Moolumo ayu ahaana okhala ookhuveya ni oowiiweya. Nave-tho makoho manceene, muhaana oromola yoolepa emosa aahiiso piili sinooniherya moota Biibiliya sinikhaliherya awe waakhula wanyu.

Akhala wira khamunisuwela soowiixuttiha sinceene soopacerya sa mBiibiliyani, axitokweene anoopaka marehereryo wira mukhaliheriwe. Eyo enimookhaliheryani olavula ni masu anyu voohimya sa moota muniiwexexa anyu Soolepa wira mphwanelele opatisiwa muhoolo.

[Yoolakiherya wa axitokweene a muloko: Malakiheryo anihimya moota woothokorerya makoho ala ni ale aniphavela opatisiwa ari ipaaxina 208-212.]