Mulipihaneke Okathi Woolaleerya
1. Ninrowa omutakiha sai Paulo vaavo ninlaleerya ahu ni anna akina?
1 Murummwa Paulo aanoonela okhala eparakha ‘yolipihana’ mukina ni mukhwaawe vaavo aalaleerya awe ni anna akina. (aRom. 1:12) Niireke okathi onilaleerya anyu, munnittottela muraarelo wira mmulipihe ni omukhaliherya munninyu? Mwa ntakiheryo, pooti omuleela itthu sinookhaliheryani okhala namalaleerya ooloka.
2. Nimulipiheke sai ole onilaleeryana ahu, ni xeeni opaka eyo oryaaya wootthuneya?
2 Mukhaleke Oolipiha: Anna akina annoovelela olavula okathi woolaleerya. Eyo ennooneya orweela wa ethoi aya wala moota anilavula aya. Nto, nnoowerya waalipiha naattottopelaka mwekeekhai. Inamuna xeeni sikina sowaalipiha anna? Mutokweene mmosa ooweetteetta onnimuleela ole onilaleeryana awe itthu sinimwiiriha woova, ni moota onvekela Yehova onimukhaliherya awe. Munna mukina onihimya wira etthu enimukhaliherya omulipiha ole onilaleeryana awe ori otheya. Owo onincererya so: “Ikwaha sikina kinninvekela Muluku wira okikhaliherye mmwaha owo”. Niireke ehaavo etthu ekina enookhaliheryani wira mulipe okathi woolaleerya? Nyuwo pooti omuleela etthu eyo ole onilaleeryana anyu.
3. Nimuleeleke exeeni mukhwiihu wira nimukhaliherye okhumela saana mmutekoni woolaleerya?
3 Mwiixuttihaneke: Niireke munnirumeela etthu ekina enikhaliherya opacerya ovaanela, ntoko nikoho wala etthu ekina yooreerela mmuttettheni? Niireke ahaavo masu alokihenrye anyu a epantte ya olaleerya wookhweya anikhumela saana? Nto mmuhimeeryeke mukhwiinyu. (Mir. 27:17) Mwaarowaka mukwaha wootthikela oxukurya, mmuleeleke mukhwiinyu ele enrowa anyu olavula, ni moota mwiilokihenrye anyu. Nuumala wiiriha yoosoma, pooti omuleela ele ewiirinheni othanla mwaha owo, yoolepa, ni enamuna eyo yowiixuttiha.
4. Xeeni nintthuneya ahu waakhaliheryaka anamalaleerya akhwiihu?
4 Anamalaleerya a eseekulu yoopacerya, khahiyo paahi yaaphavela waakhaliherya ale oohaamini. Masi-tho, awo yaanilipihana. (Mit. 11:23; 15:32) Murummwa Paulo, aahimwiixuttiha Timootheyo ni aahimutumererya waaleela akina ele yiixuntte awe. (2 Tim. 2:2) Nto, vaavo vahinliyala ahu owiirela itthu sooreera axinna ahu okathi woolaleerya, ninnincererya ohakalala waya ni okhumela saana, vamosa ni omuhakalaliha Tiithi ahu a wiirimu.—aHéb. 13:15, 16.