Nilokiherye Inamuna Sahu Soolaleerya—Niwiinihaka Nikuruta Ale Aniinaano
Otthuneya Waya: Awiixutti asya a Yesu ahaana wiixuttihiwa “wettela sothene” sinirumme awe, eyo enihela muhina osuwela owiixuttiha ekeekhai atthu akina. (Math. 28:19, 20) Atthu aniinaano anceene ahiilepiha Exikola ya Orummwa wa Muluku ni woonasa wene aapacerya waalaleerya mohiilokiherya amusi ni apatthani aya. Masi okathi anitepa aya osiveliwa ele eniixutta aya, nto anasuwela wira Yehova oniphavela wira atthu otheene yiiwe ihapari sooreera, woonasa wene awo pooti ovekelaka wira apacerye okhala anamalaleerya. (aRom. 10:13, 14) Nuumala atthu awo aniinaano weemereriwa okhala anamalaleerya oohibatiziwa, vannireerela waakhaliherya wira asuweleke olaleerya ni yinnuweke omunepani.—Luka 6:40.
Moota Woopaka Eyo:
• Mwaakhaliherye anamalaleerya aniinaano okhalana iliivuru sinitthuneya wira arumeeleke okathi woolaleerya ni wiixuttiha. Mmooniherye moota munithokiha anyu murupa onirowana anyu muteko woolaleerya, ni mmutthokiherye moota woorumeela khula eliivuru eri mmurupani mmo.
• Mmukhaliherye othanla enamuna yoolaleerya yookhweya eri Orummwa Ahu wa Omwene ni mwinsayari hoothe. Mmulakiherye wira orumeeleke masu awe okathi onilaleerya awe orumeelaka enamuna eyo. Mweererye orumeela inamuna soolaleerya siri eliivuru Beneficie-se, epaaxina 82, sinoona anyu ovareleya muteko muttetthe onikhala anyu. Muttittimiherye otthuneya waya owara ni wiitthokiha mooreerela.—2 aKor. 6:3, 4.
• Mmwiiniheke nikuruta khula okathi. Mmooniherye namalaleerya owo aniinaano maapha a muttetthe, ni mmwiixuttihe moota woorumeela eformulaario Registro de Casa em Casa. Mmooniherye moota woowaalepa atthu ale anisiveliwa ekeekhai. Mmwiixuttihe moota woomurumeela jw.org ni elivirinyu Boas Novas Para Pessoas de Todas as Nações okathi woolaleerya. Mmukhaliherye osuwela wunnuuherya osiveliwa ekeekhai wa atthu anaaphwanya awe olaleeryaka.—1 aKor. 3:6.
• Mumpixeryeke murima ni mmuttottopeleke. (Mir. 25:11) Munvahe ntakiheryo nooloka. Nthiti nanyu ni omphenta wanyu onookumiherya mireerelo sinceene muhoolo.
Mweererye ela Mweeri Yoola:
• Nvare muteko wa olaleerya empa ti empa ni ole onimusomiha anyu Biibiliya, ni mmurowane mukwaha wooxekurya wala yoosoma ya Biibiliya. Vakhala wira khamurina mutthu onimusomiha anyu Biibiliya, mmulattule ole onimoona anyu wira nlelo kholimalenle olaleerya wira ovare muteko ni nyuwo.