Mwiixutteke ni Anamalaleerya Alimalenle Olaleerya

Mwekeekhai ninnitteeliwa murima mwaha wa okhalana anamalaleerya alimalenle muteko woolaleerya mmulokoni. Akina aaviriha iyaakha sinceene amurumeelaka Yehova moororomeleya. Akina taale yiixuntte olaleerya oratteene niinano. Awo ahoona wira Yesu tonihoolela muloko wa eKristau mahiku ala ookiserya ni toniiriha muteko woolaleerya ni waapaka awiixutti wuulaana valaponi. (Math. 28:19, 20) Mwaha wa wiirela waya mpantta muteko ola, awo ahaakhela “owerya” wuulupalexa, vanceenexa okathi wa mixankiho. (2 aKor. 4:7) Tthiri sookhala itthu sinceene anamalaleerya awo ookhoomala akhanle aya ooniixuttiha. Awo yavahiwa okathi wooreerela, anoowerya owiixuttiha akina ele enisuwela aya. (Esal. 71:18) Tthiri, vanooreerela wiivaha okathi wira niixuttihiwe ni anna awo. Moota xeeni?

Okathi Woolaleerya. Wira aweryeke olaleerya saana ale aniinaano ni ale ahilimalenle muteko owo anitthuneya wiixuttihiwa. Enamuna emosa ya wiixutta ni anna awo waaweha moota anilaleerya aya. (Nwehe muru oni “Nvareke Muteko Woolaleerya ni Nthiti” ori erevista Owehaweha 15 a Feverero 2015, ettima ya neeraru muru mwaamukhaani oni “Waakhaliherya Ale Ahilimalenle Muteko Woolaleerya.”) Mureerelo xeeni ophwannye anyu mwaha wa ovara muteko woolaleerya ni anna awo?

Niireke munoowerya omulattula namalaleerya olimalenle ovara muteko woolaleerya wira nvare hoothe? Vakhala wira namalaleerya owo toowereyasiwa, woonasa wene nyuwo pooti orowa wiiriha yoosoma anyu ya Biibiliya owannyawe. Nuumala wiiriha yoosoma eyo, munvekele namalaleerya owo olimalenle olaleerya wira woovaheni malakiheryo ni miruku sooreerela.

Nviriheke Okathi ni Anna Awo: Mwaasuwele anna awo alimalenle olaleerya nvirihaka okathi naawo. Mmulattuleke mmosa a anna awo okathi woomulompa muluku nto mmukoheke makoho. Vakhala wira namalaleerya owo toowereyasiwa, mpakeke marehereryo wira emusi anyu yamulompe muluku vatthokoni vawe. Mmukohe moota wiixuntte awe ekeekhai. Mareeliho xeeni aakhenle awe? Munnuwelo xeeni wonne awe wiiraneyaka mapuro awo? Itthu xeeni soohakalaliha siphwannye awe mmutekoni wa Yehova?

Musuweleke wira nnaamwi awo apacenrye ene khalai muteko woolaleerya khanisuwela itthu sotheene. Ntoko siniiraneya aya okhala wene, khula mmosa a anamalaleerya awo onnisuwela itthu soovirikana ni mukhwaawe. (aRom. 12:6-8) Woonasa wene akina ahuuluvala nto ahinawerya oviriha okathi munceene ni hiyo. Hata vari siiso, anoowerya oniixuttiha itthu sinceene siixuntte aya mwaha wa omurumeela waya Yehova moororomeleya.