Ireferensia sa Okumi ni Orummwa Ahu Ekaderno Enirumeeliwa Omuthukumanoni
4-10 ya Feverero
MIHAKHU SINIKHUMA MBIIBILIYANI | AROMA 1-3
“Nvikaniheke Wiixuttiha Yowuupuxerya ya Murima anyu”
Yowuupuxerya ya Murima Yooloka Ohoolo wa Muluku
6 Niireke arumeyi a Yehova paahi tarina yowuupuxerya ya murima? Nkahaya muthokorerye moolumo oowuupuxeriwa a murummwa Paulo, oowi: ‘Amalapo khansuwela ikano sa Moise, vano, yettelaka sorera ntoko sinupuwelaya murim’aya, ankhili aya t’ikano saya, nnamwi ehikhalanne ikano sa Moise. Mwettelo aya onnoniherya wira ikano silempwale mmurimani mwaya. Ankhili aya ti namon’aya; tthiri, yirá sorera, murim’aya onnattela, yirá sonanara, murim’aya onnaripa’. (aRoma 2: 14, 15) Hata atthu yaale ahinsuwela-tho malamulo a Yehova, ikwaha sikina yowuupuxerya ya murima aya pooti owiiriha opaka itthu moovarihana ni malamulo a Muluku.
Yowuupuxerya ya Murima Yooloka Ohoolo wa Muluku
8 Munirumeela sai yowuupuxerya ya murima okathi onipaka anyu soothanla? Akina annoona okhweya otthara ele eniphavela murima aya, nto khiyapaka soothanla attharihelaka ele enaasivela paahi. Woonasa wene anuupuwela so: “Miyo nkinoona otthekeya waya etthu ela”. Murima ahu onoowerya oniwoka, mpakha opahula yowuupuxerya ya murima yooloka. Biibiliya onihimya so: “T’ani onwerya otokosa murima wa mutthu? Khivo etthu yotakhala envikana murima wowotha. Murim’owo khunttharuwa”. (Yeremiya 17:9) Tivonto, ele eniphavela murima ahu, ehikhaleke ti etthu enoona ahu okhala yootepexa otthuneya. Nto wanipacerya nihaana othokoreryaka ele enrowa omuhakalaliha Yehova Muluku.
9 Akhala wira soothanla sinipaka ahu sineettihiwa ni yowuupuxerya ya murima enivarihana ni Biibiliya, eyo enimooniheryaka wira ninnimoova Muluku, ohiya otthara itthu sinnisivela. Nkawehani ntakiheryo nla noovareleya muteko. Nehemiya yoowo aari guvernatoro oororomeleya, aahikhalana ediretu ya waavekela mpoosito atthu oYerusalemu. Hata vari siiso, khaavekenle. Nthowa xeeni? Owo khaaphavela hata vakhaani wooniwa ni Yehova okhala mutthu aapuherya atthu a Muluku. Owo aahimmye so: “Masi miyo nkinìre siso, mana kanimova Muluku”. (Nehemiya 5: 15) Omoova Muluku wekeekhai, eyo piiyo, woova ni murima wotheene ophavelaka ohimunyoonyiha Tiithi ahu a wiirimu, ti etthu eri yootepexa otthuneya. Omoova Muluku mwa enamuna eyo, onooniiriha ophavela otokosa Nuulumo na Muluku wira nipake soothanla sooloka.
Otokosa Itthu sa Efaita Soomunepani
w08 15/6 30 etti. 5
Iponto Suulupale sa Epaphelo ya aRoma
3:4. Vaavo malamulo aapinaatamu aniwana aya ni Nuulumo na Muluku, hiyo ninniimananiha wira Muluku ‘osuweliwe okhala naxariya’ niroromelaka moolumo awe ari mBiibiliyani ni opaka itthu moovarihana ni yootthuna awe. Akhala wira nnookhalela nthiti muteko woolaleya ihapari sa Omwene ni waapaka awiixutti, nnoowerya waakhaliherya atthu akina osuwela wira Muluku tekeekhai.
w08 15/6 29 etti. 6
Iponto Suulupale sa Epaphelo ya aRoma
3:24, 25—Moota xeeni ‘mukuttho wa Yesu Kristu’ ottipinhe aya “itampi saapakiwe khalai”? Eprofesia yoopacerya yaalavula voohimya sa Mesiya, yeeyo eri Maphattuwelo 3:15, yiiraneyale mwakha wa 33 Nuumala Kristu Orwa, vaavo Yesu aiviwe awe vamwirini va nihaaxeryo. (aGal. 3:13, 16) Okathi Yehova alavunle awe eprofesia ela, mwa moonelo awe vaakhala wira mukuttho waahivahiwa maana khiivo etthu enwerya omukhoottiherya Muluku omaleliha yootthuna awe. Nto orumeelaka mukuttho wa Yesu Kristu, Yehova anwerya olevelela itampi sa osuulu wa Adamu waarowa waamini yooleiherya eyo. Nave-tho yowoopola wala mukuttho ohiiriha oweryaneya ohihimuwa wa atthu yaakhanle ohinatthi Kristu orwa valaponi.—Mit. 24:15.
Omusoma Biibiliya
11-17 ya Feverero
MIHAKHU SINIKHUMA MBIIBILIYANI | AROMA 4-6
“Muluku Ònithonyerya Khuluwi Oniphenta Wawe”
(aRoma 5:8, 12)
w11 15/6 12 etti. 5
Muluku Oonithoonyerya Oniphenta Wawe
5 Murummwa Paulo olavulaka sa ophenta wa Muluku, aapacenrye ni masu ala: “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”. (aRom. 5:12) Hiyo ninniwerya wiiwexexa mwaha ola maana Muluku oonisuweliha moota okumi waapinaatamu waapacenrye aya. Yehova aapattunxe atthu anli, Adamu ni Eva. Mpattuxa toomalela, nave apinaatamu oopacerya axitiithi ahu yaari oomalela. Muluku aakhoottihenrye etthu emosa, vaavo aalenle awe wira yaahimwiiwelele yaamookhwa. (Maph. 2:17) Mooriipiha murima, Adamu ni Eva yaahithanla ohiiwelela malamulo ookhweya a Muluku, ni yaahikhootta Okhulupale awe.—Otum. 32:4, 5.
w11 15/6 12 etti. 6
Muluku Oonithoonyerya Oniphenta Wawe
6 Adamu yaayanre anamwane nuumala ottheka, nto awo yaahaaraviha anaaya etampi ni sookumiherya saya. Ekeekhai wira anaaya khiyaatthekenle nlamulo na Muluku sintoko Adamu, ti maana aya yahaahimaniwe aya opaka etampi eyo maana nlelo yiira ehikhanle malamulo. (Map 2:17) Masi hata vari siiso osuulu wa Adamu waahirava etampi. Etampi ni okhwa waahaawerya atthu otheene mpakha okathi Muluku aavanhe awe aIsarayeli malamulo yooniherya wira atthu otheene toottheka. (Mmusome aRoma 5:13, 14.) Sookhumelela sa etampi pooti olikanyiheriwa ni iretta sikina sooraveya sintoko anemia mediterrânea wala hemofilia. (oretta oniiriha ephome oheetta saana mwerutthuni) Woonasa wene mootoko osoma wira mwanawe mukhulupale ooRussia Czar Nicholas a nenli ni Alexandra, aayariwe ni oretta ola oniiriha ephome opisa omaala okhuma nuumala mutthu ovulala. Vanooneya wira hata imusi sirina oretta owo, anamwane akina pooti okhalanaka oretta ola masi ohaawereya. Eyo etthu yoovirikana ni etampi. Khuuvo pinaatamu aawerya okhoottiherya sookhumelela sa etampi ya Adamu. Atthu otheene aarava. Nave etampi eyo okhala-wene enniiva. Eyo yaahaaraviha anaaya otheene. Niireke muxankiho owo wootakhala wammala?
w11 15/6 13 itti. 9-10
Muluku Oonithoonyerya Oniphenta Wawe
9 Anitaphulela-ni moolumo a eGriki oowi ‘ophwanyihiwa atthu exariya’ ni “sihaphwanyiha exariya”? Namataphulela mmosa a Biibiliya aahimmye so: “Nla nthoonyeryo nookhalela na mwaha onlikana ni mulattu wa otribunaali. Onilavula voohimya sa marukunuxo akhanle oomukhumelela mutthu ohoolo wa Muluku, ohiya orukunuxa makhalelo a mwerutthuni mwa mutthu owo . . . Nthoonyeryo nla, ninnimuhimya Muluku sintoko mphuki aawenhe wira namutthukiwa yoowo ooniwa okhala natampi ni aaroihiwe otribunaali ya Muluku, khorina nthowa. Muluku onnimutaphula namutthukiwa owo”.
10 Mwa enamuna xeeni Namalamula a xariya a elapo yotheene aarowa awe omutaphula natampi? (Maph. 18:25) Wira ophuke mwaha owo, moophenta Muluku aahimuruma mwanawe mmoseene orwa valaponi. Yesu aahipaka yootthuna ya Tiithi awe hata eehereriwa, oveehiwa, ni oruwaniwa. Aahooniherya ororomeleya mpakha wiiviwa vamwirini va nihaaxeryo. (aHéb. 2:10) Vaavo aavanhe awe ekumi yoomalela ya opinaatamu, Yesu aahivaha yowoopola yaarowa oliverya etampi ni okhwa wa osuulu wa Adamu.—Math. 20:28; aRom. 5:6-8.
Otokosa Itthu sa Efaita Soomunepani
w08 15/6 29 etti. 7
Iponto Suulupale sa Epaphelo ya aRoma
6:3-5—Onithoonyerya-ni ‘obatiziwa mwa Yesu Kristu’ ni obatiziwa “mokhwani mwawe?” Okathi Yehova aathanlale awe atthareli a Kristu ni munepa wootteela, awo yaahuuranihiwa ni Yesu ni yaahipacerya wiirela mpantta muloko wala erutthu ya Kristu, ehooleliwaka ni Yesu yoowo ori Muru. (1 aKor. 12:12, 13, 27; aKol. 1:18) Iwo waari obatiziwa waya mwa Yesu Kristu. MaKristau oothanliwa aahiiso oowoottihiwa nave ‘annibatiziwa mokhwani’ mwa enamuna yoowi annikhalana ekumi yoowiivahererya wala wiileva ni kharina yoolipelela ya waakhela ekumi valaponi. Okhwa waya ti wa yowoopola sintoko okhwa wa Yesu nnaamwi okhwa waya ohiweryaka woopola. ‘Obatiziwa mwa Yesu Kristu’ onimalelihiwa okathi awo anikhwa aya ni anihihimuxiwa aya wira yaakhele ekumi wiirimu.
Nlipelelo Xeeni Arina Aya Amuhavinre Aka?
Nuumala atthu ootakhala ohihimuxiwa, niireke anrowa ophukeliwa moovarihana ni miteko saya sa khalai? Nnaari. ARoma 6:7 onihimya so: “Vekekhai, ole okhwiye ohàkiheriwa etampi” awe. Atthu ootakhala murima aniliverya soottheka saya okathi anikhwa aya. Tthiri awo anrowa ophukeliwa moovarihana ni ele anrowa aya opaka nuumala ohihimuxiwa, ohiya ele epanke aya moohisuwela ahinatthi okhwa. Mureerelo xeeni anrowa aya ophwanya?
Omusoma Biibiliya
18-24 ya Feverero
MIHAKHU SINIKHUMA MBIIBILIYANI | AROMA 7-8
“Niireke Nyuwo ‘Munnilipelela ni Wunlela’?”
w12 15/7 11 etti. 17
Mweemye Wira Yehova Oophwanyiheni Otaphuwa Wekeekhai
17 Okathi Paulo aalavula awe sa otaphuwa Yehova onrowa awe waavaha arumeyi awe valaponi, owo aalempe so: ‘sopattuxiwa sinnilipelela ni wunlela okathi Muluku onrowawe woniherya ovuwa w’ana’we’. Owo aahihimya-tho: “Okhala wira seiyo-tho sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku”. (aRom. 8:19-21) ‘Sopattuxiwa’ iyo, anihimmwa apinaatamu anrowa okhala valaponi, yaale anrowa ottottela mureerelo ‘woniheriwa’ wa aana oothanliwa a Muluku. Wooniheriwa iwo onrowa opacerya okathi ‘àna a Muluku’ aronwe wiirimu nuumala ohihimuxiwa, anrowa aya omukhaliherya Kristu waapwetexa atakhali ni owoopola atthu a ‘muttitthi mulupale’ wira akele elapo esya.—Wis. 7:9, 14.
w12 15/3 23 etti. 11
Nihakalaleke ni Yoolipelela Ahu
11 Okathi Yehova aaleihenrye awe orumeela ‘osulu’ waaleiheriwe wira ohukhumu “enowa” ya khalaixa yeeyo ensuweliwa okhala Satana Diabo, aahivaha “mathipelo a nlipelelo”. (Wis. 12:9; Maph. 3:15) ‘Osuulu’ owo, woopaceryani-wene onnihimmwa okhala Yesu Kristu. (aGál. 3:16) Mwaha wa okhwa wawe ni ohihimuwa, Yesu ohooniherya wira apinaatamu anootaphuliwa yaakhalihiwe aya epottha ya etampi ni okhwa. Wiiraneya wa yoolipelela eyo onivarihana ni ‘woniheriwa ovuwa w’ana’we’ Muluku. MaKristau athanleliwe orowa wiirimu, aniirela mpantta epantte ya nenli ya ‘osuulu’. Awo ‘animooniheriwa’ vaavo awo ni Kristu anrowa aya opwetexa olumwenku wootakhala wa Satana. (Wis. 2:26, 27) Eyo enrowa otaphulela woopoliwa wa ipwittipwitthi sikina okathi wa maxakha maalupale.—Wis. 7:9, 10, 14.
w12 15/3 23 etti. 12
Nihakalaleke ni Yoolipelela Ahu
12 Moohakalaliha soopattuxiwa sinoophwanya ohakalala ni otaphuwa wekeekhai okathi wa Olamulelo wa Kristu wa Iyaakha Ekonto Emosa! Okathi owo, ‘àna a Muluku’ ‘animoniheriwa’ vaavo anrowa aya orumeelaka ntoko anamukuttho ni Kristu, yeettiheryaka mireerelo sa mukuttho wa Yesu wa apinaatamu. Sintoko atthu a Omwene wa wiirimu, soopattuxiwa sinimoopoliwa mwaha wa sookumiherya sa etampi ni okhwa. Apinaatamu oowiiwelela, vakhaani-vakhaani anootaphuliwa “wakhalihiwaya ipottha, mwapwetexiwaya”. Akhala wira anoovikaniha okhala oororomeleya wa Yehova okathi wa iyaakha Ekonto ni okathi wa weehereriwa wookiserya onrowa okhumelela, masina aya anoolempwa “mulivuruni mw’ekumi” ni “khanttipihiwa-tho”. Awo anoophwanya “otaphuwa n’uvuwa w’àna a Muluku”. (Wis. 20:7, 8, 11, 12) Tthiri yoolipelela eyo ti yoohakalaliha!
Otokosa Itthu sa Efaita Soomunepani
Munnuupuwela?
Ovirikana xeeni okhanle eriyari ya “ophavela sintthunaya makhalelo òtakhala” ni “ophavela sintthunaya Eroho [munepa]”? (aRom. 3:6)
Mutthu oneettihiwa ni soophavela sa erutthu, oniphavela paahi ovara itthu sintthuna aya makhalelo ootakhala. Mutthu oniphavela sintthuna erooho aahiiso munepa, onnivaha efaita itthu sootthuneya sa mookumini ni muteko wa Yehova. Ophavela sintthuna aya munepa onniphwanyiha murettele, masi ophavela sintthuna aya erutthu aahiiso makhalelo ootakhala, onniphwanyiha okhwa.—w16.12, ipax. 15-17.
w09 15/11 7 etti. 20
Exeeni Mavekelo Anyu Anooniherya Aya Voohimya sa Nyuwo?
20 Waaniheryasa ikwaha sikina hiyo pooti ohoonaka etthu yoohimya vaavo nimpaka ahu mavekelo ahu a omwaneene. Paulo aalempe so: “Khaninsuwela olompa ntoko vanrerelaya. Eroho yeyo [munepa] enninilompela ni wipulela ohinweryahu otaphulela. Vano Muluku, ontokosa mirima, onnisuwela orattene entthunaya ovekela eroho [munepa]”. (aRom. 8:26, 27) Yehova aahirumiha wira mavekelo manceene elempwe mBiibiliyani. Owo onnithokorerya sooveka iyo sintoko sooveka sahu, ni onnaakhula. Muluku onninisuwela ni onnisuwela yootaphulela ya itthu aarumme awe munepa awe ohimya aarumeelaka alipa-oomulepa Biibiliya. Okathi munepa onnilompela aya Yehova onnaakhula mavekelo ahu wala onnipaka etthu mwa mureerelo ahu. Masi vaavo ninsuwela ahu saana Nuulumo na Muluku, nnimoonaka okhweya osuwela etthu yoohimya okathi ninvekela ahu.
Omusoma Biibiliya
25 a Feverero–3 a Março
MIHAKHU SINIKHUMA MBIIBILIYANI | AROMA 9-11
“Nlikanyiho na Mwiri wa Olivera”
w11 15/5 23 etti. 13
‘Wixa n’usuwela wa Muluku!’
Murummwa Paulo aahaalikanyiha ale aniirela mpantta osuulu wa Abrahamu ni miritta sa mwiri wa olivera a nthoonyeryo. (aRom. 11:21) Olivera owo oowaaliwa onithoonyerya wiiraneya wa yoolakela ya Muluku voohimya sa nivarihano na Abrahamu. Muraraapi wa mwiri owo ti woowaarya, ni onithoonyerya Yehova sintoko Muluku onaavaha ekumi aIsarayeli oomunepani. (Yes. 10:20; aRom. 11:16) Exa wala erikittili enithoonyerya Yesu yoowo ori mpantta woopacerya wa osuulu wa Abrahamu. Miritta wala iritta, anithoonyerya makristau 144.000 yaawo ari mpantta wa nenli wa osuulu wa Abrahamu.
w11 15/5 24 etti. 15
‘Wixa n’usuwela wa Muluku!’
15 Nto exeeni Yehova aapanke awe wira aakhwaniherye yoolakela awe? Paulo aahitthokiherya wira miritta wala iritta sa mwiri wa olivera a mutakhwani saahilupanyiwa ni mwiri wa olivera oowaaliwa. (Mmusome aRoma 11:17, 18.) Nto maKristau oothanliwa ni munepa, yaawo anikhuma maloko makina, sintoko atthu akina yaari muloko wa oRoma, yaahilupanyiwa mwa nthoonyeryo ni olivera owo a nthoonyeryo. Mwa enamuna eyo, awo yaahipakeya osuulu wa Abrahamu. Woopaceryani wene awo yaari sintoko iritta sa olivera a mutakhwani ni khiyaalipelela wiirela mpantta nivarihano nlo na vameekhaaya. Masi Yehova aahaatthukulela ephiro wira epakeye aYuda oomunepani.—aRom. 2:28, 29.
w11 15/5 25 etti. 19
‘Wixa n’usuwela wa Muluku!’
19 Aayo, yoolakela ya Yehova voohimya sa aIsarayeli a Muluku enniiraneya mootikiniha. (aGál. 6:16) Sintoko aahimmye awe Paulo, “atthu othene a Isarayeli animòpowa”. (aRom. 11:26) Okathi Yehova othanlale awe, “atthu othene a Isarayeli” aahiiso, aIsarayeli otheene oomunepani, anrowa okhala mamwene ni anamukuttho wiirimu. Khiivo etthu ekhanle okhoottiherya wiiraneya wa yootthuna ya Yehova!
Otokosa Itthu sa Efaita Soomunepani
w13 15/6 etti. 5
Mweemererye Olokiheriwa ni Malakiheryo a Yehova
5 Exeeni eniiraneya akhala wira apinaatamu annikhootta olokiheriwa ni Mulipa-Oowuupa Muulupale? Nto owo onivarihela sai muteko okhulupale awe? Nkahaya muupuwele ele eniirihiwa aya oloko akhala wira ele enuupiwa khekhumale ntoko saaphavela awe mulipa-oowuupa. Mulipa-oowuupa onnirumeela oloko ole wira opake enamuna ekina ya mwaapu, aahiiso ononyaanya paahi mwaapu ole! Okathi oloko ohinivareleya aya muteko, ikwaha sinceene orina nthowa ti mulipa-oowuupa. Nto eyo kheniiraneya ni Mulipa-Oonuupa, Yehova. (Otum. 32:4) Okathi mutthu ohiniphavela awe wuupeya saana mmatatani mwa Yehova, mutthu owo tonikhalana nthowa. Moota Yehova onivarihela awe okhulupale awe, ontthariha moota apinaatamu aneemererya aya orukunuxa makhalelo aya, wira elokiheriwe. Ale aneemererya, annuupiwa wala olokiheriwa mwa enamuna enaaphwanyiha mureerelo. Mwa ntakiheryo, maKristau oowoottihiwa ti ‘miyapu sa omoreliwa ikharari’ yuupiwe ntoko miyaapu ‘sovuwa wulupale’. Nave-tho, ale anikhootta wuupiwa, annimunyokha Muluku, khiyakhala miyaapu sipakeliwe ‘opwetexiwa’.—aRom. 9:19-23.
it-1 517 etti. 5
Oluttuweliwa
Oluttuweliwa mwa enamuna yoohikhalela. Mutthu pooti okhala ooluttuweliwa, mwaha wa mathowa makina masi, hata vari siiso ohinamusiveliha Muluku. Eyo yaahiwiiraneela aYuda akina a eseekulu yoopacerya. Awo yuupuwela wira yaamuhimmwa okhala anaxariya mwaha wa weettela nlamulo na Moise mooluttuweliwa. Masi Paulo aahiwooniherya wira oluttuweliwa waya khahiyo waari wookhalela, maana khiyaarina osuwela wekeekhai. Ti maana aya awo yahaawenrye aya ophwanya exariya yekeekhai enikhuma wa Muluku. Awo yaahaana osuwela soovonya saya ni omuhokolowela Muluku emuttharaka Kristu, wira ephwanye exariya ni woopoliwa. (aRo 10:1-10) Saulo ooTarso aari mmosa a atthu awo. Owo aari mutthu ooluttuweliwa ni etiini ya aYuda mpakha ovikana mitita, ‘alupattaka n’ikuru sothene muloko wa Muluku ni ophavelaka opwetexa’. Paulo aaniiwelela moomalela ikano iyo ni aakhala mwa mutthu “òhittheka”. (aGál 1:13, 14; aFil 3:6) Masi hata vari siiso, oluttuweliwa wawe ni etiini ya eYuda, khahiyo waari wookhalela. Owo aahikhalana murima wooloka ti maana aya Yehova aamureerenle awe murima orweela wa Kristu vaavo aamuroihale awe ephiro ya okokhorela weekeekhai.—1 Ti 1:12, 13.
Omusoma Biibiliya