Ireferensia sa Okumi ni Orummwa Ahu Ekaderno Enirumeeliwa Omuthukumanoni
2-8 YA NOVEMBRO
MIHAKHU SINIKHUMA MBIIBILIYANI | OKHUMA 39-40
“Moise Aahitthara Saana Malakiheryo Otheene Aavahiwe Awe”
w11 15/9 epaax. 27 etti. 13
Niireke Yehova Onnoosuwelani?
13 Owo ahooniherya okhala mutthu oomaala ni oowiiyeviha ottharaka saana malakiheryo a Yehova. (Okhum. 7:6; 40:16) Khiivo etthu enooniherya wira Moise ikwaha sikina aaniixinliha ni enamuna Yehova aapaka awe itthu, wala aaninyoonyiheya mwaha wootthara malakiheryo a Yehova. Mwa ntakiheryo, Yehova aahinvaha malakiheryo a moota aarowa awe oteka eheema, ntoko ekoore ya mikhoi sene ni nummuru na mikhoi saarowa orumeeliwa wira sipakaniwe ikuwo sa muheemani. (Okhum. 26:1-6) Olelo-va, vakhala wira mutokweene mmosa onnoovahani malakiheryo, woonasa wene oowaatta, ikwaha sikina nyuwo pooti onyoonyiheyaka. Masi Yehova mutokweene oomalela, onvaha malakiheryo mwa niphento ni onnaaroromela arumeyi awe. Okathi onnivaha awe malakiheryo manceene, owo onipaka eyo ni mathowa ooloka. Nwehe wira Moise khaanyoonyiheyale ni Yehova uupuwelaka wira khaarina efaita wala aakhoottiheriwa otaphuwa mwaha wonvaha malakiheryo manceene.
w05 15/7 epaax. 27 etti. 3
Niireke Munniroromeleya ni Itthu Sotheene?
3 AHéberi 3:5 onihimya so: “Moise aari murumeyi oororomeleya”. Exeeni yaamwiirinhe Moise okhala profeta oororomeleya? Okathi aateka awe ni weemexa eheema, “Moise ahìwelela, khwira sothene ntoko Apwiya samurummyaya”. (Okhuma 40:16) Olelo-va, hiyo sintoko arumeyi a Yehova, ninnooniherya ororomeleya wahu vaavo nimmwiiwelela ahu Yehova moororomeleya. Tthiri, eyo enihela muhina ovikaniha ororomeleya hata nivirihaka soweeha wala mixankiho sinceene. Masi, hata niweryaka oxintta mixankiho suulupale, eyo khentaphulela wira naatthu oororomeleya. Okhala wira Yesu ohimmye wira: “Mutthu oniroromeleya ni itthu saamukhaani, nave onniroromeleya ni itthu suulupale. Masi mutthu ohiniroromeleya ni itthu saamukhaani, nave khoniroromeleya ni itthu suulupale”. (Luka 16:10) Nto nihaana ovikaniha ororomeleya hata ni itthu sinkhala ntoko wira ti saamukhaani.
Otokosa Itthu sa Efaita Soomunepani
it-3 epaax. 219 etti. 5
Esapala ya Mwaamunama Oniitthaniwa Foca
Moota aIsarayeli Yaaphwanya Aya Esapala ya Foca. Vakhala wira nuulumo noowi tá·hhash, na mBiibiliyani ninthoonyerya enamuna emosa ya axinama aniitthaniwa foca, ninnikhumelela nikoho noowi: Vaaweryaneya sai aIsarayeli ophwanya esapala ya foca? Nnaamwi inama iyo siniitthaniwa foca sikhalakha mapuro ooriiryexa aniitthaniwa regiões árticas ni antárticas, ifoca sikina sinnikhala mapuro ooviha. Nave-tho mahiku ala, ifoca sikina sinnivikaniha okhala mapuro a ephareya ya oMediteraaneo, ni mapuro makina ari maasi ooviha. Okathi aalempwa awe Biibiliya, inama iyo woonasa wene saaniphwanyaneya sinceene ephareya ya oMediteraaneo wala ephareya Yooxeerya.
Niireke Vannireerela Ophavelasa Ottottopeliwa ni Apinaatamu?
Nuumala otekiwa etabernaakulu, “neku nahikhunela ehema y’okumana n’Apwiya: ovuwa w’Apwiya wahisareya muhemani memmo”. (Okhum. 40:34) Tthiri Yehova aahooniherya osiveliwa wawe ni empa ele!
Omusoma Biibiliya
9-15 YA NOVEMBRO
MIHAKHU SINIKHUMA MBIIBILIYANI | ONAMUKUTTHO 1-3
“Yoolakela ya Soovaha”
it-3 epaax. 120 etti. 6
Soovaha
Mikuttho soopahiwa. Mikuttho saapahiwa aanivahiwa enama yotheene Muluku; nto ale yaavaha mikuttho khiyaahalana nnakhala epantte emosa ya enama eyo. (Munwehe Mak 11:30, 31, 39, 40.) Awo yaanipaka eyo wira yoovaha aya yaakheliwe ni Yehova, wala yooniherye wira saneemereriwa mikuttho sa oleveleliwa itampi. Sintoko “mukuttho wopahiwa”, Yesu Kristu oovaha erutthu awe yoomalela ni murima awe wotheene.
it-3 epaax. 123 etti. 5
Soovaha
Mikuttho sa ephepa aahiiso sa ipyo. Mikuttho sa ephepa aahiiso sa ipyo, saavahiwa vamosa ni mikuttho sa opatthani, mikuttho soopahiwa, mikuttho sooleveleliwa itampi ni ipyo soopacerya sa mmatta, ikwaha sikina, awo yaapaka eyo ekwaha emosa paahi. (Okh 29:40-42; Ona 23:10-13, 15-18; Mot 15:8, 9, 22-24; 28:9, 10, 20, 26-28; 29) Awo yaanipaka eyo yooniheryaka oxukhurela oreera murima wa Yehova mwaha woowaareeliha ni waathokorerya.
it-3 epaax. 121 etti. 1
Soovaha
Mikuttho sa opatthani (wala mikuttho sa murettele). Mikuttho sa opatthani sooweemereriwa ni Yehova saathoonyerya murettele atthu yaarina aya ni Yehova. Nto ale yaavaha mukuttho, anamukuttho ni Yehova yaamala olya vamosa, eyo yooniherya murettele yaarina aya ni Yehova. Atthu otheene yalya ari ene ni mwiikho (khula mwiikho waahimmwa ni nlamulo) wala aakhuura enama ovinre ene okathi weemereriwa ni nlamulo ahaana wiiviwa. Mwaha woowi anooniherya ohittittimiha eyoolya eyo, ori ene ni mwiikho aahiiso ovinre ene okathi weemereriwa ni Yehova ooniherya ohittittimiha itthu sowaarya.—Ona 7:16-21; 19:5-8.
Otokosa Itthu sa Efaita Soomunepani
w04 15/5 epax. 22 etti. 1
Iponto Suulupale sa Eliivuru ya Onamukuttho
2:13—Xeeni vaari aya vooloka ohela maakha soovaha sotheene? Awo khiyaapaka eyo wira esiviheke inama saavahiwa mukuttho paahi. Woonasa wene, awo yaanihela maakha soovaha sotheene okhala wira yaathoonyerya ohipweteya aahiiso ohintta.
it-2 epaax. 246 etti. 2
Makhura Wala Ekortuura
Yoolakela ya nlamulo nlo. Moovarihana ni nlamulo na Nivarihano, ephome ni ekortuura saathokoreriwa okhala sa Yehova paahi. Nto mutthu aakhuura ekortuura ya enama yaareeriheliwe Muluku, aanimutthekela Yehova. Nto mutthu aapaka eyo ahaana wiiviwa.—Ona 7:23-25; Ona 3:11, 16
w04 15/5 epaax. 22 etti. 2
Iponto Suulupale sa Eliivuru ya Onamukuttho
3:17. Okhala wira ekortuura yaanooniwa okhala mpantta woolokexa wala woonunexa, mpantta owo waakhoottihiwa okhuuriwa, waaniwooniherya aIsarayeli wira mpantta woolokexa waari wa Yehova. (Maphattuwelo 45:18) Eyo ennuupuxerya wira nihaana onvaha Yehova mpantta ahu woolokexa eyo piiyo, omurumeela Yehova ni murima ahu wotheene.—Miruku 3:9, 10; aKolosi 3:23, 24.
Omusoma Biibiliya
16-22 YA NOVEMBRO
MIHAKHU SINIKHUMA MBIIBILIYANI | ONAMUKUTTHO 4-5
“Munvaheke Yehova Ikuru Sanyu ni Okathi Anyu”
it-3 epaax. 122 etti. 9
Soovaha
Mukuttho woolevelela soottheka. Mikuttho sa oleveleliwa itampi saanivahiwa mwaha wa yoottheka, okhala wira khula etthu entthekela nlamulo, etampi. Saari itampi sa omwaneene, seiyo mutthu akhalana awe nthowa, saanivirikana ni soovaha sikina sa oleveleliwa yoottheka, seiyo saavahiwa wira mutthu ophwanelele waakhela eparakha aarina awe.—Munwehe Yes 53:10.
w09 1/6 epaax. 26 etti. 3
Owo Onnisuwela Wira na Atthu Oohimalela
Nuupuwelelaka omoriwa ikharari wa Yehova, Nlamulo naahimya wira: “Akhalá mutthu ohikhalanne musurukhu w’othumela epwittipwitthi hatá epuri, ohana wavaha Apwiya, mwaha w’etampi awe, masiya manli walá ipomba pili nlelo mihoro”. (Eveersu 7) Masu oowi “Akhalá mutthu ohikhalanne musurukhu” nave pooti otaphuleliwa so “akhala wira khamurina etthu.” Nto akhala wira mwIsarayeli mmosa aari ootepa othoiwa vahaawerya awe othuma epwittipwitthi emosa, Muluku anaakhelela ni murima awe wotheene ele mutthu owo aarina awe wira ovahe, eyo piiyo, masiya manli wala ipomba piili.
w09 1/6 epaax. 26 etti. 4
Owo Onnisuwela Wira na Atthu Oohimalela
Ankhi vakhala wira mutthu owo khorina musurukhu woothumana masiya manli? Nlamulo naahimya so: “Aruhe ntoko yovaha mwaha wa mwikho awe, otthú w’etrigu, mpantte wanamuloko w’efa, ahelaka mukuttho w’otaphula mwikho”. (Eveersu 11) Mutthu aari ootepa othoiwa, Yehova aaneemya wira ovaheke mukuttho ohirina ephome. WIsarayeli wa khalai, okhala oothoiwa khiyaamukhoottiherya mutthu waakhela mareeliho a oleveleliwa soottheka sawe wala eparakha yookhalana murettele ni Muluku.
Otokosa Itthu sa Efaita Soomunepani
Mwiixutteke Etthu ni Apatthani Oororomeleya a Yehova
14 Oreera murima onoowerya onikhaliherya okhala oororomeleya wa Yehova ni wa atthu akina. Mwa ntakiheryo, nyuwo pooti osuwela wira muKristau mmosa oopaka etampi yuulupale. Woonasa wene, nyuwo munniphavela omooniherya ororomeleya wanyu, vanceenexa akhala mpatthani wala mmusi anyu. Masi ovitha etampi eyo, mwaarowa wooniherya ohiroromeleya wa Muluku. Ni nyuwo moosuwela wira muhaana opacerya omooniherya ororomeleya wanyu Yehova. Tivonto, ntoko Natani, muhaana omuttaruxa mukhwiinyu, masi mooreerela murima. Mmutumererye mutthu owo ophavela nikhaliheryo na axitokweene. Akhala wira khonipaka eyo mowaakuveya, nto ororomeleya wanyu wa Yehova ohaana owiirihani orowa waaleela axitokweene. Opaka eyo, enooniherya wira munniroromeleya wa Yehova ni munnimureerela murima mukhwiinyu. Axitokweene anoomukhaliherya mutthu owo moophwanelela.—Mmusome Onamukuttho 5:1; aGalasia 6:1.
it-3 epaax. 529 etti. 1
Waarya
Inama ni Mihokorokho sa Mmatta. Ntakiheryo nimosa ti na mpantta wa namuloko. Akhala wira mutthu mmosa onnipweha mpantta mmosa wa namuloko, niire so, mpantta mmosa wa etrigu, nuumala-vo mutthu owo wala mmusi awe moohilakela onarumeela, mutthu aanitthekela nlamulo na Muluku na ottittimiha itthu sowaarya. Nlamulo naahimya wira owo ahaana oliverya ikwaha piili ovikana ele aakunxe awe, ohiya ovaha mukuttho wa enyompe ekumi ya munikotoni mwawe. Nto eyo yaaniiriha ottittimihiwa vanceene itthu sowaarya seiyo saari sa Yehova.—Ona 5:14-16.
Omusoma Biibiliya
23-29 YA NOVEMBRO
MIHAKHU SINIKHUMA MBIIBILIYANI | ONAMUKUTTHO 6-7
“Mooniherye Oxukhurela Wanyu”
Itthu Nniixutta Ahu ni Eliivuru ya Onamukuttho
9 Etthu ya nenli nniixutta ahu: Ninnimurumeela Yehova mwaha woowi ninnimuxukhurela vanceene. Etthu ela nniixutta ahu ennooneya ni mikuttho sa opatthani saapakiwa ni aIsarayeli. Mikuttho iyo, waari mpantta wootthuneya wa okokhorela wIsarayeli wa khalai. Eliivuru ya Onamukuttho ninnoona wira aIsarayeli yaanivaha mukuttho wa opatthani, yoowo waari ‘mukuttho wowatthapela Apwiya’. (Okhum. 7:11-13, 16-18) AIsarayeli khiyaavaha mukuttho owo mwaha wookhanyereriwa, masi yaavaha vootthuna waya. Nave yaanivaha mukuttho owo mwaha woowi yaanimphenta Muluku aya, Yehova. Mutthu aavaha mukuttho owo aanikhuura enama ene ni emusi awe ni anamukuttho. Masi mpantta mmosa wa enama eyo aavahiwa Yehova paahi. Mpantta xeeni?
w00 15/8 epaax. 15 etti. 15
Mikuttho Sinimusivela Muluku
15 Yoovaha ekina mutthu aapaka awe vootthuna wawe enihimmwa eliivuru ya Onamukuttho ekapiitulu 3, waari mukuttho wa opatthani. Nave nsina nlo pooti otaphulelaka “mukuttho wa murettele”. Mwa nttaava na eHeeberi, nuulumo noowi “murettele” khinintaphulela paahi ohikhala ekhotto aahiiso muxankiho mukina. Moovarihana ni eliivuru Estudos nas Instituições Mosaicas nuulumo nlo mBiibiliyani nintaphulela so: “Okhalana waataana wooloka ni Muluku, oreelihiwa, ohakalala ni otteeliwa murima.” Mikuttho sa opatthani khisavahiwa paahi wira mutthu okhalane murettele ni Muluku, wala wira omukurunuxe murima, masi wira ooniherye oxukhurela wawe aahiiso otthapela murettele aarina awe ni Muluku, yoowo arina aya ale aneemereriwa ni yena.
w00 15/8 epaax. 19 etti. 8
Mikuttho Sininvuwiha ni Sinimusivela Yehova
8 Mutthu aavaha mukuttho ahaana okhala sai? Nlamulo naahimya wira mutthu aavaha mukuttho, ahaana wiirattela ni ohikhalana mwiikho. Mutthu aaphavela ovaha mukuttho oranve ene mwiikho, wanipacerya ahaana ovaha mukuttho woolivela itampi, wira otthikele okhalana waataana wooloka ni Yehova. Nto opaka eyo, Yehova aamweemererya mukuttho wa opatthani aavaha awe. (Onamukuttho 5:1-6, 15, 17) Niireke ninnisuwela otthuneya waya okhala ooloka vamaithoni va Yehova? Naaphavelaka wira Muluku eemererye okokhorela wahu, nihaana olokiherya moowakuveya khula etthu enivonyola malamulo awe. Nto nihaana ottottela mureerelo mareheryo Yehova onikumiherya awe, eyo piiyo, “axitokweene a mmulokoni” ni Yesu Kristu yoowo okhanle “mukuttho oniliverya itampi sahu”.—Yakobo 5:14; 1 Yohani 2:1, 2.
Otokosa Itthu sa Efaita Soomunepani
it-2 epaax. 148 etti. 4
Mooro
Moovarihana ni yoolema ya aYuda, yaakupali wira mooro waapatta valtari waapattihiwe wanipacerya mwa mwiiriirya ni Muluku, masi Biibiliya onnivaanyiha eyo. Moovarihana ni malakiheryo Yehova anvanhe awe Moise, anamwane a Aroni yahaana ‘oruha moro, opweha ikhuni vasulu v’áltari’ ahinatthi ohela mukuttho.—Ona 1:7, 8
si epaax. 27 etti. 15
Eliivuru Yaneeraru ya mBiibiliyani—Onamukuttho
15 (3) Mukuttho wooliverya itampi wahaana ovahiwa ni mutthu aapaka etampi moohilakela aahiiso mwaha woohisuwela wala owokiwa. Mukuttho wa inama waavahiwa, waahela muhina nummuru na atthu yiirenle mpantta yoottheka eyo: Namukuttho, atthu otheene, mukhulupale aahiiso mutthu pure. Moovirikana ni mikuttho soopahiwa ni sa opatthani atthu yaavaha aya vootthuna waya, mikuttho sooliverya itampi yaari yooruma, atthu otheene yahaana ovaha.—4:1-35; 6:24-30.
Omusoma Biibiliya
30 A NOVEMBRO–6 A DEZEMBRO
MIHAKHU SINIKHUMA MBIIBILIYANI | ONAMUKUTTHO 8-9
“Etthu Yooniherya Wira aIsarayeli Yaanireelihiwa ni Yehova”
it-2 epaax. 414 etti. 6
Ovahiwa Onamukuttho
Moise aahimurapiha Aroni, vamosa ni anaawe yaihaniwa, Nadabi, Abihu ni Eleyazari aahiiso (aahaaruma wira yiirapihe mmansaya) mpasiyani mwa ekoobiri yeeyo yaakhala vate, nuumala-vo aahinwariha Aroni ikuwo sa onamukuttho. (Mot 3:2, 3) Nto, owanreene ikuwo iyo sooreera, Aroni ahivahiwa muritti, ikuwo iyo saathoonyerya mikhalelo ni muteko wa muritti avahiwa awe. Nuumala-vo, Moise aahireeliha etabernaakulu, itthu sotheene sa muhina ni iferemento saya, ntoko altaari a mikuttho soopahiwa, ipasiya ni itthu sikina saakhanle memmo saarumeeliwa. Nto eyo yaaniiriha okhala soowaarya, maana saarumeeliwa paahi wira sivareliweke muteko wa Yehova. Wanikisa waya, Moise aahimoottiha wala omuthanla Aroni omuttikitthelaka makhura vamuru vawe.—On 8:6-12; Okh 30:22-33; Esa 133:2.
it-2 epaax. 415 etti. 8
Ovahiwa Onamukuttho
Nihiku na neethanu neeraru, namukuttho owanreene ikuwo sa onamukuttho (ohikhaliheriwaka ni Moise), aahipaceriha ovara muteko wooleveleliwa itampi nloko na aIsarayeli ekwaha yoopacerya. Maana vaanitthuneya oreerihiwa ohiya paahi mwaha wookhala atthu oohimalela, masi mwaha woohimwiiwelela Yehova epakaka elatarato ya eweero ya mwaanyompe yeeyo yaamwiirinhe Yehova onanariwa vanceene. (Ona 9:1-7; Okh 32:1-10) Okathi aamalinhe awe ovara muteko ole wa onamukuttho, Yehova ahooniherya wira aaneemererya orumihaka mooro mwa mwiiriirya, yoowo waakhumme eriyari na neeku naahoolela aIsarayeli ni waapanhe mukuttho wotheene waahanle valtari.—Ona 9:23, 24.
Itthu Nniixutta Ahu ni Eliivuru ya Onamukuttho
13 Etthu ya neexexe nniixutta ahu: Yehova onnireeliha mpantta wa valaponi wa mutthenkeso awe. Nkahaya muupuwele ele yiiraneyale 1512 ohinatthi Kristu orwa, okathi yaatekiwe aya etabernaakulu omwaako Sinayi. (Okhum. 40:17) Moise aahihoolela niira nne vaavo Aroni ni anaawe yaathanliwe aya okhala anamukuttho. Nloko notheene na aIsarayeli, naahithukumana wira yaawehe anamukuttho ale avahaka mikuttho soopacerya sa inama. (Onam. 9:1-5) Yehova oonihenrye sai wira aaneemererya enamuna ele esya ya onamukuttho? Okathi Aroni ni Moise yaareeliha aya atthu otheene, Yehova aahirumiha mooro okhumaka wiirimu yoowo waapanhe moomalela mikuttho iyo saari valtaari.—Mmusome Onamukuttho 9:23, 24.
Otokosa Itthu sa Efaita Soomunepani
Xeeni Vanitthuneya Ahu Okhala Oowaarya?
6 Yooruma yoowi anamukuttho a wIsarayeli yaahaana orattela erutthu aya, yookhalana yootaphulela yuulupale wa atthu a Yehova olelo-va. Atthu nnaasomiha ahu Biibiliya, ikwaha sinceene annisiveliwa woona wira opuro onimukokhorela ahu Yehova ti wooratteleya saana, nave-tho hiyo niri oowiiwariha saana. Tthiri wiirattela wa anamukuttho onninikhaliherya osuwela wira khula mutthu oniphavela owela vamwaako wa Yehova ohaana okhalana “murima woloka”. (Musome Esalimo 24:3, 4; Yes. 2:2, 3.) Muteko nninvarela ahu Muluku ohaana ovariwa ni mutthu orina muupuwelelo ni murima wooloka ohela muhina orattela erutthu awe. Eyo enivekela wiivarerya okathi ti okathi, nto vaatthuneyaka khiyapaka marukunuxo maalupale wira mutthu okhale oowaarya. (2 aKor. 13:5) Mwa ntakiheryo, mutthu oopatisiwa moolakelela oniweha epornografia ohaana wiikohaka so: ‘kiireke miyo nlelo kiri oowaarya?’ Nuumala-vo ohaana ovekela nikhaliheryo wira ottharuwe yoolema eyo yoohiirya.—Yak. 5:14.
it-3 epaax. 17 etti. 6
Moise
Muluku aahimuthanla Moise okhala namitthaka a Nlamulo na nivarihano na aIsarayeli, nto muteko owo waari wa vameekhaaya, maana khuuvo pinaatamu otonko okhalana eparakha eyo ohikhanle Yesu Kristu, yoowo ori mulipa owaataaniha a nlamulo nsya. Ntoko namitthaka, Moise aahikhalana eparakha ya ohoolela otekiwa wa etabernaakulu ni iferemento saya seiyo Muluku aahimmye awe moota woopakiwa. Nave Muluku aahimuruma Moise okhaliha onamukuttho, omureeliha Aroni omuttikitthelaka makhura vamosa ni etabernaakulu. Nuumala-vo, Moise aahihoolela muteko woopacerya wa onamukuttho.—Okh ikapiitulu 25-29; Ona ikapiitulu 8, 9.
Omusoma Biibiliya