Muhaana Opaka Exeeni Wira Mwakhaleke Elapo Esya?

Mwaha ovinre, ohooniherya wira moohipisa Muluku onoopwetexa olumwenku ola wootakhala ni onoomaliha mixankiho sotheene. Hiyo ninnikupali ni murima wotheene wira eyo enimwiiraneya. Mwaha wa xeeni? Mwaha woowi Nuulumo na Muluku, Biibiliya onnihimya eyo:

“Olumwenku ola onoomala”.—1 YOHANI 2:17.

Musuweleke wira aakhala atthu anrowa woopowa, mwaha woowi 1 Yohani 2:17, onnileiherya eyo:

“Ole oneettela ele Muluku oniphavela awe, onookhala mahiku otheene”.

Naaphavelaka woopowa nihaana opaka ele Muluku oniphavela awe. Nto wira nisuwele ele Muluku oniphavela awe, nihaana opacerya omusuwela.

‘MMUSUWELE’ MULUKU WIRA MOOPOWE

Ifootu: 1. Nfirimeera okilaathale ene vathi oxipitaali, okhulumunwe ene ni oxankale ene. 2. Okathi woophumurya owuryaka ekafe onninweha namuteko mukhwaawe ohakalanle ene ni osomaka erevista. 3. Namuteko mukhwaawe onnimusomela soolepa sa mBiibiliyani ni onninvaha ekartau jw.org.

Yesu aahimmye so: “Wira awo aphwanye okumi woohimala, ahaana woosuwelani oratteene nyuwo, Muluku mmosa-ru eekeekhai”. (Yohani 17:3) Wira noopowe okathi onrowa aya opwetexiwa olumwenku ola ni okhala mahiku otheene, nihaana ‘omusuwela’ Muluku. Masi musuweleke wira omusuwela Muluku khahiyo paahi osuwela wira owo ookhala wala osuwela itthu vakhaani paahi voohimya sa Muluku. Nihaana okhala mpatthani awe. Wira nilipihe ompatthani ahu ni atthu akina, nihaana oviriha okathi niri ene ni apatthani ahu awo. Nto nihaana opaka etthu emosaru naaphavelaka olipiha ompatthani ahu ni Muluku. Nwehe ikeekhai vakhaani nniixutta ahu mBiibiliyani sinrowa onikhaliherya okhalana ni olipiha ompatthani ahu ni Muluku.

Ikeekhai Nniixutta Ahu mBiibiliyani

Muluku oniphavela wira nakhaleke Mparayiisu.

Nuumala waapattuxa apinaatamu oopacerya, Adamu ni Eva, Muluku aahaapweha opuro wooreera wiihaniwa ejardim ya wEdeni. Awo khiyaarina etampi nave Muluku aahaavaha itthu sotheene yaaphavela aya wira ahakalaleke mahiku otheene. Vaakhanle wira khiyaahiyale okhala mpatthani a Muluku, awo khiyaakhala-khala akhwaaka. Masi Adamu ni Eva yaahithanla ohiiwelela nlamulo Muluku aavanhe awe.

Ninniixutta nthowa naya ninhaawa ahu.

Mwaha wa ohimwiiwelela Muluku, apinaatamu oopacerya Adamu ni Eva aayeleela eparakha ya okhala mahiku otheene vamosa ni osuulu aya wotheene. Biibiliya onihimya wira: “Etampi yookela moolumwenkuni mwaha wa mulopwana mmosa, nto etampi eyo yooruuha okhwa. Siiso, okhwa ohaaphwanya atthu otheene, okhala wira atthu otheene aattheka”. (aRoma 5:12) Ntoko siisaale mwaana okhanle awe oorava eretta ni anamuyari awe, anamwane otheene a Adamu aarava etampi. Nto ninnuuluvala ni okhwa.

Ninniixutta ele Muluku opanke awe wira onikhaliherye.

Biibiliya onihimya wira: “Tthiri, Muluku oophentexa olumwenku, mpakha onvaha Mwanawe mmoseene, wira otheene ale anooniherya omwaamini yoowo, ahipwetexiwe, masi akhalane okumi woohimala”. (Yohani 3:16) Muluku oomuruma Yesu orwa valaponi wira ovahe okumi awe mwa mureerelo ahu. Olavulaka sa ophenta iwo wa Muluku, mulopwana orina iyaakha 86 a wÍndia oniihaniwa Prabhakar onihimya so: “Eyo ennooniherya wira Yehovaa onnikiphenta vanceene. Nave okiphenta wawe onnikivaha nlipelelo na okhala mahiku otheene”.

Ninniixutta omuxukhurela Muluku mwaha wa ele onipakenle awe.

Biibiliya onihimya wira nnimooniherya wira ninnimuxukhurela Muluku mwaha wa ele onipakenle awe ‘niiwelelaka sooruma’ sawe. (1 Yohani 2:3) Moophenta, Yehova onninooniherya etthu nikhanle ahu oopaka niinaano-va wira nihakalaleke. (Yesaya 48:17, 18) Muluku khoniphavela wira nihaaweke. Akhala wira nnoottharaka malakiheryo awe, owo ooleiherya wira khahiyo paahi ninrowa ohakalalaka niinaano-va, masi-tho ninrowa okhalaka mahiku otheene.

MUSOMEKE NUULUMO NA MULUKU KHULA NIHIKU

Nfirimeera ole owehaka osulu nuumala omusoma Biibiliya okathi wa ophumurya. — Nyuwo munimoopowa okathi olumwenku ola onrowa awe opwetexiwa, munvekelaka Muluku wira ookhaliheryeni opaka ele oniphavela awe

Wira nikhale akumi, nihaana olya khula nihiku. Yesu aahimmye so: “Mutthu khonikhala mukumi mwaha wa ephaawu paahi, masi onnikhala mukumi ni khula nuulumo ninkhuma wa Yehova”.—Matheyo 4:4.

Olelo-va, nuulumo na Yehova nimphwanyaneya mBiibiliyani. Vaavo munimusoma anyu Biibiliya, munoosuwela itthu Muluku aapanke awe khalai, onipaka awe niinaano-va, onrowa awe opaka muhoolo ni okhala mpatthani awe.

MUNVEKELEKE NIKHALIHERYO MULUKU

Muhaana opaka exeeni akhala wira munniphavela wiiwelela malamulo a Muluku masi vanoovilani ohiya opaka itthu soohiloka? Etthu enrowa wookhaliheryani ori omusuwela oratteene Muluku.

Nwehe yowiiraneya ya muthiyana ninrowa ahu omwiihanaka Sakura, yoowo aarina mweettelo woohiloka. Nuumala opacerya omusoma Biibiliya, owo aahiixutta yooruma ya Muluku enihimya wira: “Mutthyawe orupihana woohiloka!” (1 aKorinto 6:18) Sakura aahinvekela Muluku wira onvahe ikuru ni omukhaliherye ohiya opaka itthu soohiloka. Masi mpakha-va, owo onniwanana muxankiho owo. Owo onihimya so: “Vaavo kinuupuwela aka orupihana woohiloka, kinninvekela Yehova. Maana kinnisuwela wira nkinrowa owerya owanana muxankiho aka mekhaka. Nivekelo ninnikikhaliherya omwaattamela Yehova”. Ntoko Sakura, atthu imilyau sinceene aamusuwela Muluku. Owo ohaavaha ikuru saakhalihenrye opaka marukunuxo mookumini mwaya wira amuhakalaliheke.—aFilipi 4:13.

Vaavo munimusuwela anyu oratteene Muluku, nyuwo munrowa otepaka ‘osuweliwa ni Muluku’ ni okhala mpatthani awe. (aGalasia 4:9; Esalimo 25:14) Mwiira siiso, nyuwo munimoopowa wira mwakhaleke elapo esya. Masi elapo esya enrowa okhala sai? Mwaha onittharelana nnooweha.

a Biibiliya onihimya wira Yehova, nsina na Muluku.