Eprofesia ya Efaita Yinceene

1. Moohipisa nuumala Adamu ni Eva ottheka, Yehova aapanke exeeni? (Maphattuwelo 3:15)

MOOHIPISA nuumala Adamu ni Eva ottheka, Yehova aahihimya eprofesia ya efaita yinceene yaavanhe nlipelelo anamwane ootheene a Adamu ni Eva. Etthu Yehova aahimmye awe eri Maphattuwelo 3:15. — Musome.

2. Xeeni eprofesia eri Maphattuwelo 3:15 eri aya ya efaita yinceene?

² Eprofesia eyo eri eliivuru yoopacerya ya mBiibiliyani. Iliivuru sootheene sa mBiibiliyani sinnivarihana ni eprofesia eyo. Ntoko siisaale ekoola enuuraanyiha aya ipaphelo sootheene sa eliivuru, moolumo ari Maphattuwelo 3:15 annuuraanyiha ihapari sootheene sa mBiibiliyani, eyo piiyo, ihapari soowi Muluku oomuruma mutthu wira owoopole apinaatamu ni ompwetexa Satana Diabo ni atthu ootheene animutthara.b Nto atthu ootheene animphenta Yehova anoophwanya mareeliho manceene!

3. Mwaha ola, ninrowa waakhula makoho xeeni?

³ Mwaha ola, ninrowa waakhula makoho mararu voohimya sa eprofesia eri Maphattuwelo 3:15. Makoho ene taala: Atthu xeeni anilavuliwa eprofesia ela? Eprofesia ela yiiraneyale sai? Eprofesia ela enniphwanyiha mireerelo xeeni?

ATTHU ANILAVULIWA EPROFESIA ELA

4. Ti pani ori “enowa” ni nimmusuwela sai?

⁴ Atthu anilavuliwa eprofesia eri Maphattuwelo 3:14, 15 taala: “Enowa”, “osùlu” wa enowa, “muthiyana” ni “osùlu” wa muthiyana. Biibiliya onninikhaliherya waasuwela atthu awo.c Ninrowa opacerya omusuwela ti pani ori “enowa”. Yehova khaarowa olavula ni enowa, maana eyo khiyaarowa osuwela etthu Yehova aahimya awe oxardim wa wEdeni. Eyo enooniherya wira Yehova aalavula ni yoopattuxiwa erina ankhili. Masi yoopattuxiwa xeeni eyo? Wiisuupulula 12:9, onninikhaliherya omusuwela ole aathoonyerya enowa ele. “Enowa ele yulupalexa” ti Satana Diabo. Masi ti pani ori osuulu wa enowa?

5. Ti pani ori osuulu wa enowa?

⁵ Okathi mukina Biibiliya onnirumeela nuulumo noowi “osuulu” ophavelaka omuhimya mutthu ohireere waataana ni mutthu mukina onakhala mwa mwanawe. Nto osuulu wa enowa anihimmwa malaikha ootakhala ni apinaatamu animutakiha Satana yaawo ari awanani a Muluku ni arumeyi awe. Mwa ntakiheryo, osuulu owo onihela muhina malaikha ale yaamurukunuwenle Yehova mahiku a Nowe ni apinaatamu ootakhala animutakiha tiithi aya Satana Diabo. — Maph. 6:1, 2; Yoh. 8:44; 1 Yoh. 5:19; Yuda 6.

6. Xeeni “muthiyana” a eprofesia ohikhanle awe Eva?

⁶ Vano nrowe nimusuwele ti pani ori “muthiyana”. Muthiyana onilavuliwa-va khahiyo Eva. Mwaha wa xeeni? Nrowe niwehe nthowa nimosa. Eprofesia enihimya wira osuulu wa muthiyana waarowa ‘onyakela’ muru wa enowa. Ntoko niwenhe ahu, enowa enithoonyerya nlaikha nootakhala Satana Diabo. Nto vaakhanle wira muthiyana onilavuliwa-va ti Eva khivaarowa oweryaneya osuulu awe onyakela muru wa Diabo. Nto Satana aarowa opwetexiwa sai?

7. Ntoko onooniherya awe Wiisuupulula 12:1, 2, 5, 10, ti pani ori muthiyana onilavuliwa Maphattuwelo 3:15?

⁷ Eliivuru yookiserya ya mBiibiliyani ennimuhimya oratteene ti pani ori muthiyana onilavuliwa eliivuru ya Maphattuwelo 3:15. (Mmusome Wiisuupulula 12:1, 2, 5, 10.) Muthiyana owo, khahiyo mutthu. Vanihimmwa wira mweeri ori vathi va inawu sawe, nave oowara ekhara erina itheneeri 12. Owo onnimuyara mwaana, niire so, Omwene wa Muluku. Okhala wira Omwene wa Muluku ori wiirimu, nto muthiyana owo ori wiirimu. Muthiyana owo onithoonyerya mpantta wa wiirimu wa mutthenkeso wa Yehova. Malaikha oororomeleya taniirela mpantta mutthenkeso owo. — aGal. 4:26.

8. Ti pani ori mpantta woopacerya wa osuulu wa muthiyana ni eyo yiiraneyale silini? (Maphattuwelo 22:15-18)

⁸ Biibiliya onninikhaliherya osuwela wira Yesu tori mpantta muulupale wa osuulu wa muthiyana. Nave Biibiliya onihimya wira osuulu owo waarowa okhuma nloko na Abrahamu. (Musome Maphattuwelo 22:15-18.) Eprofesia ela ehiiraneya, maana Yesu tori osuulu wa mulopwana ole oororomeleya. (Luka 3:23, 34) Osuulu wa muthiyana waahaana okhalana owerya wuulupale wira owerye ompwetexa Satana Diabo. Okathi Yesu aarina awe iyaakha 30, aahithanliwa ni munepa woowaarya wa Muluku ni aahikhala Mwaana mmoseene a Muluku. Nto eyo yaahimwiiriha okhala mpantta woopacerya wa osuulu wa muthiyana. (aGal. 3:16) Nuumala Yesu okhwa ni ohihimuxiwa, Muluku aahinvaha “ovuwa ni nttittimiho”, nave ‘Muluku aahinvaha okhulupale wotheene, wiirimu ni vathi-va’. Nto Yesu onrowa opwetexa “miteko sa Diabo”. — aHeeb. 2:7; Math. 28:18; 1 Yoh. 3:8.

9-10. (a) Atthu xeeni akina aniirela mpantta osuulu wa muthiyana ni okathi xeeni anipacerya aya wiirela mpantta? (b) Vano ninrowa oweha exeeni?

⁹ Ohiya paahi Yesu, atthu akina anniirela mpantta osuulu wa muthiyana. Nave murummwa Paulo aahihimya wira makristau ootheene oothanliwa anniirela mpantta osuulu wa muthiyana. Owo aahimmye so: “Vakhala wira mwa atthu a Kristu, otheene anyu mwa osuulu weekeekhai wa Abrahamu, nave munrowa waakhela etthu emosa-ru aaleiheriwe awe Abrahamu”. (aGal. 3:28, 29) Okathi mukristau onithanliwa awe ni munepa woowaarya wa Yehova, owo onniirela mpantta osuulu wa muthiyana. Nto atthu aniirela mpantta osuulu wa muthiyana ti Yesu Kristu ni makristau oothanliwa 144.000, yaawo anrowa olamulelaka ni Kristu wiirimu. (Wiis. 14:1) Atthu ootheene aniirela mpantta osuulu wa muthiyana anniimananiha wuupuwela ni opaka itthu ntoko Tiithi aya, Yehova Muluku.

¹⁰ Okhala wira nihaasuwela atthu ootheene anilavuliwa eprofesia eri Maphattuwelo 3:15, vano nrowe niwehe itthu Yehova opanke awe wira omaliherye eprofesia ela ni moota ennikhaliherya aya.

EPROFESIA ELA ENIIRANEYA SAI?

11. Osuulu wa muthiyana waalummwale sai nxitta?

¹¹ Eprofesia eri Maphattuwelo 3:15, yaahimmye wira enowa yaarowa ‘oluma nnawu’ na osuulu wa muthiyana. Eprofesia ela yaahiiraneya okathi yoole Satana aawiirinhe awe ayuda ni aroma omwiiva Mwaana a Muluku. (Luka 23:13, 20-24) Okathi mutthu onivulala awe nxitta, owo onnikhala okathi vakhaani ohipakaka itthu aawerya awe opaka ohinatthi ovulala. Mwa enamuna emosaru, Yesu khaawerya opaka etthu okathi iiviwe awe ni aari awe mmahiye mahiku mararu. — Math. 16:21.

12. Silini ni moota xeeni muru wa enowa onrowa aya onyakeliwa?

¹² Wira eprofesia eri Maphattuwelo 3:15 yiiraneye, Yesu aahaana ohihimuxiwa. Mwaha wa xeeni? Mwaha woowi, osuulu wa muthiyana waahaana onyakela muru wa enowa. Eyo ennooniherya wira nikhwatta naari nxitta na Yesu naahaana ovola. Eyo ti etthu yiiraneyale! Maana nuuvira mahiku mararu, Yesu aahihihimuxiwa wira akhaleke wiirimu woohitthikela okhwa. Waphiya okathi Yehova othanlale awe, Yesu onrowa onyakela muru wa Satana, niire so, Yesu onrowa ompwetexa Satana. (aHeeb. 2:14) Yesu ni makristau oothanliwa anrowa opwetexa osuulu wa enowa, eyo piiyo, awanani ootheene a Muluku. — Wiis. 17:14; 20:4, 10.d

EPROFESIA ELA ENNIKHALIHERYA SAI?

13. Wiiraneya wa eprofesia ela onnikhaliherya sai?

¹³ Akhala wira mwa murumeyi a Yehova, eprofesia ela enimookhaliheryani vanceene. Moota xeeni? Okathi Yesu aarwiiye awe valaponi, owo aahitakiha oratteene mikhalelo sa Tiithi awe. (Yoh. 14:9) Okathi nniixutta ahu voohimya sa Yesu ninnimusuwela ni omphenta Yehova Muluku. Ohiya-vo, soowiixuttiha sa Yesu ni moota oneettiha awe miloko sa makristau eekeekhai olumwenku wootheene, onninikhaliherya vanceene. Nave onniniixuttiha moota wookhala wira nimusiveliheke Yehova. Nto okhwa wa Yesu weiwo waakhala ntoko olummwa nxitta onniniphwanyiha mireerelo ootheene ahu. Moota xeeni? Nuumala Yesu wiiviwa ni ohihimuxiwa, owo aahinvaha Yehova efaita ya ephome awe, yeeyo aavanhe awe wira ‘sittipihiwe itampi sahu sotheene’. — 1 Yoh. 1:7.

14. Ninsuwela sai wira eprofesia yaapakiwe oxardim wa wEdeni khiyaarowa wiiraneya okathi ene yoole? Mutthokiherye.

¹⁴ Eprofesia Yehova aapanke awe exardim ya wEdeni, yaanooniherya wira khiyaarowa wiiraneya okathi ene yoolexa. Eprofesia yaahimmye wira muthiyana aamukumiherya osuulu, vano Satana Diabo aamwaathukumanya atthareli awe, nto ikrupu iya piili saarowa onyokhanaka vanceene. Wanvira okathi munceene wira itthu iyo siiraneye. Wiiwexexa oratteene eprofesia ela, onninikhaliherya osuwela wira naarowa onyokhiwaka ni Satana Diabo vamosa ni olumwenku ola wootakhala. Eyo ti etthu Yesu aalenle awe awiixutti awe. (Mar. 13:13; Yoh. 17:14) Eyo ti etthu ninweha ahu yiiraneyaka, otepexa wene iyaakha 100 sivinre. Moota xeeni?

15. Xeeni olumwenku onninyokha awe vanceene? Xeeni vahinreerela aya omoova vanceene Satana?

¹⁵ Moohipisa nuumala Yesu okhalihiwa Mwene, mwaakha wa 1914, Satana aahoomoliwa wiirimu. Owo ooriheliwa vathi-va olipelelaka okathi onrowa awe opwetexiwa. (Wiis. 12:9, 12) Masi owo khahiyo orimwiikhuraana paahi onalipelela opweteixiwa iwo. Okhala wira khoreere onanariwa, onnaalupattha vanceene arumeyi a Muluku. (Wiis. 12:13, 17) Ti nthowa naya olumwenku wa Satana onaanyokha awe vanceene arumeyi a Yehova. Masi khivanireerela omoova Satana vamosa ni atthu awe. Ohiya-vo, nihaana okupali etthu murummwa Paulo aakupali awe okathi aahimmye awe so: “Akhala wira Muluku ori ni hiyo, ti pani onrowa onivirikanya?” (aRom. 8:31) Hiyo ninnimukupali Yehova ni murima wootheene, mwaha woowi onnimaliherya eprofesia eri Maphattuwelo 3:15.

16-18. Eprofesia eri Maphattuwelo 3:15, enimukhaliherya sai Edward, Ursula ni Jessica?

¹⁶ Yooleiherya ya Yehova eri Maphattuwelo 3:15, enoonikhaliherya ovilela mixankiho sinrowa oniphwanya muhoolo. Munna oniihaniwa Edward, yoowo onirumeela ntoko misionaario oGuam, ohimmye so: “Okumi aka wootheene kaahikhalana mixankiho ni kaaninyoonyiheya, nto itthu iyo sootheene saaneehererya omuroromela waka Yehova. Wuupuwelela eprofesia eri Maphattuwelo 3:15, onnikikhaliherya ohihiya omuroromela Yehova”. Munna Edward onnilipelela okathi Yehova onrowa awe omaliha mixankiho sahu sootheene.

¹⁷ Murokora mmosa a wAlemanha oniihaniwa Ursula, ohimmye wira, wiiwexexa oratteene eprofesia eri Maphattuwelo 3:15, onnimukhaliherya okupali ni murima wootheene wira Biibiliya onikhuma wa Muluku. Owo ohoona moota iprofesia sikina sinivarihana aya ni eprofesia ela, nto eyo ennimuhakalaliha vanceene. Owo onihimya so: “Nuumala osuwela wira moowaakuveya Yehova aahipaka etthu wira aavahe nlipelelo apinaatamu, eyo yookikhaliherya ni yookivara murima vanceene”.

¹⁸ Murokora mmosa a oMicrónesia oniihaniwa Jessica, ohimmye so: “Mpakha-va kinnuupuwela moota khaahakalanle aka okathi woopacerya koonale aka wira koophwanya ekeekhai! Kaahoona wira yaaniraneya eprofesia eri Maphattuwelo 3:15. Wuupuwela eyo ennikikhaliherya woona wira olelo-va khanirina okumi weekeekhai. Eprofesia ela ennilipiha okupali waka wira omurumeela waka Yehova ti etthu yootepexa oloka niinaano-va ni enninivaha nlipelelo nooloka na muhoolo”.

19. Etthu xeeni ennikupaliha wira mpantta wookiserya wa eprofesia eri Maphattuwelo 3:15, enniiraneya?

¹⁹ Ntoko niwenhe ahu, olelo-va eprofesia eri Maphattuwelo 3:15, enniiraneya. Nave nihaasuwela oratteene ti pani ari osuulu wa muthiyana ni osuulu wa enowa. Yesu yoowo ori mpantta muulupale ni woopacerya wa osuulu wa muthiyana, nikhwatta naari vanxittani noovola. Vano owo Mwene oowerya ni ohinikhwa. Nave woonasa wene, Yehova ohaathanla atthu ootheene anrowa olamulelaka ni Yesu wiirimu. Okhala wira mpantta woopacerya wa eprofesia ela ohiiraneya, ninnikupali ni murima wootheene wira mpantta wookiserya onimwiiraneya. Ninnikupali ni murima wootheene wira muru wa enowa onoonyakattiwa. Tthiri arumeyi a Yehova anoohakalala vanceene okathi Satana onrowa awe opwetexiwa. Masi nlipelelaka ophiya nihiku nno, nihikhulumuwe. Mmuroromeleke Yehova Muluku ahu, maana owo ohooniherya wira toororomeleya. Nave ninnikupali ni murima wootheene wira orumaka osuulu wa muthiyana, Yehova onoophwanyiha mareeliho ahinimala “maloko othene a mulaponi”. — Maph. 22:18.