Vahikhanle Wira Yehova Toniteka Empa, Ale Anteka Yanvara Mahala. (Esal. 127:1)—Mwaha ola okumihiwe mwa Anuário de 2013 a Anamoona a Yehova.
Epaaxina 148, ettima 4, mpakha epaaxina 150 ettima 4—MIANMAR
Otthuneya wa Efiliyaali Esya
Mwa okathi owo, anna yaahithaamiha efiliyaali yaari muttetthe wa eRua 39 aroihaka epredio yaarina andari anli mwa nivate naarina imeetru soophiyeryaka 2 000 quadrados wa ephiro yiitthaniwa Inya muttetthe woothaaciri onikela epheyo wa epooma. Masi vano, opuro ola musya waari woophunyeya. Viv Mouritz, aronwe okathi owo oxukurya oMianmar ntoko mutokweene onixukurya ifiliyaali onnuupuwela iiraka: “Axinna 25 yaawo yaari a emusi ya oBetheli yaanivara muteko mwa makhalelo ooxankiha. Ekozinya khiyaarina efugau yuulupale. Nto murokora aapeyasa ni efugau yaamukhaani eletriko. Opuro sinkatthiwa ikuwo khiyaakhanle maakina anivara muteko owo, nto murokora mmosa aakaattha vathi vaari nlitti. Axinna yaaniphavela othuma efugau ni maakina anikhattha ikuwo masi ikaruma iyo khivaaweryaneya oruuha sikumihiwaka ilapo sikina.
Tthiri, vaanitthuneya wira axinna akhalane efiliyaali yoowunnuwa. Nto, Nikhuuru Noolamulela naahemererya wira enyaanyiwe epredio yaarina andari anli wira epakiwe ya andari axexe yaarowa okhalana ikwaartu ni iskritorio. Masi anna ahinatthi opaceryaa muteko owo, saahikhala mixankiho suulupale saatthuneya oxinttiwa. Wanipacerya, vaanitthuneya weemereriwa ni makhuuru 6 a guvernu. Wanenli, empresa yaateka ipa ni iponti sa mapuro ale khiyaalimalenle ovara ni aço, nto khiyaarowa owerya oteka enupa eyo. Yaneeraru, Anna owiivahererya ookhuma ilapo sikina khiyaatthuniheriwa okela elapo ele. Ni wanikisa waya, ikaruma saarowa ovareliwa muteko kisaaphwanyaneya mapuro ale, ni khisaakhanle ooruuhiwa ilapo sikina. Tthiri, khivanivila ohimya wira muteko waakhala wira khiwaarowa wiiraneya. Nto, anna yaahimuroromela Yehova. Akhala wira Yehova amphavela, efiliyaali esya yaamutekiwa tthiri!—Esal. 127:1.
‘Khamunrowa Oreeriwa ni Ikuru sa Anakhotto, Masi ni Munepa Aka’
Kyaw Win, munna onivara edepartamento Juridico ya ofiliyaali onihimya so: “Edukumento ya palano yooteka empa yaahivira mapuro mathanu wa yaale 6 a guvernu, ohela muhina Edepartamento ya Myaha sa Itiini. Nto Ekomisau ya Desenvolvimento ya Epooma ya Yangon yaahihimya wira enupa yuulupale ya andari axexe yaarowa okhala yoorakama nto khukhootta yoovekela ahu. Niroiha tho edukumento yeele, masi yaahikhoottiwa tho. Ekomisau ya Ofiliyaali yaahikitumererya wira kivilele. Nto kaaninvekela mooluttuweliwa Yehova ni kaahiroiha-tho ekwaha ya neeraru edukumento ele. Nto yaaheemereriwa.
Moottharelana naahirowa eMinisterio ya Imigração. Vano iwo naahileeliwa wira atthu a elapo ekina yanwerya okela elapo ele ni okhala mahiku 7 ntoko maturista paahi. Masi, vaavo naatthokihenrye ahu wira alipa ale owiivahererya a ilapo sikina yaanisuwela itthu sootthuneya ni yaarowa wiixuttiha inamuna sikina soorowa vahoolo sooteka ipa wa anamuteko a mapuro ale, awosa yaahiweemererya okhala myeeri 6.
Nto, naahirowa oMinisterio wa Comercio weiwo nasuwenle ahu wira oruuha etthu enikhuma elapo ekina waanikhoottihiwa. Masi, vaavo naatthokihenrye ahu yoolukama ya empa ahu, yaahinivaha elisensa yooruuha ikaruma sa miteko sooteka mwa esisapo ya emilyau emosa ya idoolare. Nihimye exeeni wa mpoosito wooruuha itthu ilapo sikina? Naahirowa oMininisterio wa Finanças ni naahemereriwa oruuha ikaruma sahu sinikhuma ilapo sikina moohiliva mpoosito. Nto makhalelo awo ni makina-tho, nahoona ekeekhai ya moolumo a Muluku ani: “Nyuwo khamunrowa oreeriwa ni ikuru sa anakhotto, nnakhala ni owerya wanyu, masi ni munepa aka, ‘onihimya ti Yehova aanakhotto’”.—Zak. 4:6, Tradução do Novo Mundo.