Etampi Exeeni?
Waakhuliwa wa mBiibiliyani
Etampi, etthu yeele mutthu ompaka awe, wala wuupuwela envirikana ni etthu anihimya aya malamulo a Muluku. Mutthu ompaka etampi onnooniherya ohittittimiha sooruma sa Muluku, opakaka itthu sihimmusivela Muluku. (1 Yohani 3:4; 5:17) Nave Biibiliya onnilavula etampi ya opaka itthu soohiloka mutthu osuwelaka wiira ohaana opaka itthu sooreera. — Yakobo 4:17.
Mattaava oopacerya aalepiwa awe Biibiliya, moolumo ataphuleliwe sintoko “etampi”, anithoonyerya “ohiwerya ohoma etthu”. Mwa ntakiheryo, wIsarayeli wa khalai, yaahikhala ekurupu emosa ya atoropa, yaawerya ovonya maluku moohikusya. (Makhulupale 20:16) Nto opaka etampi wala ottheka, onitaphulela okusya wala oheettela malamulo a xariya a Yehova.
Okhala wiira tonipattunxe, Muluku ookhalana edireito yoowaava apinaatamu malakiheryo ooweettela. (Wiisuupulula 4:11) Hiyo ninniphukeliwa mwaha wa itthu ninvara ahu. — aRoma 14:12.
Niireke vanniweryaneya okhootta etampi moomalela?
Nnaari. Biibiliya onihimya so: “Atthu otheene aattheka ni khaniwerya wooniherya ovuwa wa Muluku”. — (aRoma 3: 23; 1 Mamwene 8:46; Musuweli 7:20; 1 Yohani 1:8) Mwaha wa xeeni?
Atthu oopacerya Muluku aapattunxe awe, Adamu ni Eva, yaapakiwe ehirina etampi. Yaapakiwe oohittheka, olikanyihiwaka Muluku. (Maphattuwelo 1: 27) Nto okathi yaahaamwiiwelenle aya Muluku, yaahiperteri mukhalelo owo. (Maphattuwelo 3:5, 6, 17-19) Nuumala waayara anamwane, yaahaaraviha etampi ni ohimalela sintoko eretta mutthu oniyaraniwa awe. (aRoma 5:12) Mwene Davidi a wIsarayeli, aaheemererya wiira eyo ekeekhai, okathi aahimmye awe so: “Ame aka àkiyanre òtthekene”.— Esalimo 51:7.
Niireke itampi sikina ti sootepa wunnuwa ovikana sikina?
Aayo. Mwa ntakiheryo, Biibiliya onihimya wiira atthu a epooma ya oSodoma yaari “atakhali yanittheka valupale” nave soottheka saya saari “sotepa watta”. (Maphattuwelo 13:13; 18:20) Nrowe niwehe itthu tthaaru sinooniherya akhala wiira etampi yuulupale wala nnaari.
Etiipu ya etampi. Biibiliya onihimya wiira nihaana okhootta itampi suulupale, sintoko orupihana woohiloka, waakokhorela amuluku eethiru, wiiya, ohapaliwa, okuxa itthu sa aneene, wiiva, ni okhwiri. (1 aKorinto 6:9-11; Wiisuupulula 21:8) Biibiliya onooniherya wiira itampi iya ti soovirikana ni itampi mutthu onipaka awe moohilakela ntoko mwa ntakiheryo, miteko wala moolumo oohuupuweliwa saana anaawereya atthu akina. (Miruku 12:18; aEefeso 4:31, 32) Hata vari siiso, Biibiliya nave onooniherya wiira khivanreerela opeepheiha itampi. Opaka eyo pooti oniiriha opaka itampi suulupale. — Matheyo 5:27, 28.
Etthu yiirinhe opaka etampi eyo. Atthu akina annipaka itampi mwaha woohisuwela malamulo a Muluku. (Miteko 17:30; 1 Timootheyo 1:13) Biibiliya khoniyeviha itampi iyo, masi onooniherya wiira eyo ennivirikana ni ohiiwelela moolakela malamulo a Muluku. (Moothakoni 15:30, 31) Itampi soolakelela mutthu onipaka awe mwaha wookhala ootakhala murima.— (Yeremiya 16:12)
Akhala wiira eyo enimakela wiiraneya. Nave Biibiliya onooniherya wiira wookhala ovirikana eriyari ya opaka etampi mukwaha mmosa ni opaka mwa okathi munceene. (1 Yohani 3:4-8) Muluku khonisiveliwa ni mutthu oniixutta mweettelo wooreera, masi hata vari siiso “onapaka etampi voolakelela’.—aHeeberi 10:26, 27.
Mutthu opanke etampi yuulupale, woonasa wene murima awe wala muupuwelo awe pooti omphukelaka ni onvaha nthowa. Mwa ntakiheryo, Mwene Davidi aalempe so: “Sottheka saka sokisamiha ntoko màsi òwixa: sokilemela ntoko muritti ohinweryaka otexa”. (Esalimo 38:5) Hata vari siiso Biibiliya onninivaha nlipelelo ohimyaka so: “Atakhali ehiyeke iphiro saya: alipa-òttheka erukunuxe mirima saya. Etthikeleke w’Apwiya [Yehova], awo animwamorela ikharari: ehokoloweleke wa Muluku ahu, òwakuva olevelela”.— Yesaya 55:7.