Yesu Onooponle Sai?
Waakhuliwa wa Mbiibiliyani
Yesu owooponle atthu oororomeleya okathi aavahe awe okumi awe ntoko mukuttho. (Matheyo 20:28) Ti nthowa aya Biibiliya onimuhimya awe Yesu okhala “moopoli a olumwenku”. (1 Yohani 4:14) Nave onnincererya ohimyaka so: “Khuuvo onwerya onoopola, okhala wira khanikhanle nsina nikina mulaponi, Muluku othanlale awe eriyari ya atthu wira noopoliwe” — Miteko 4:12.
Yesu ‘ohookhwa mwaha wa atthu otheene’ otepexa wene wa ale animwaamini. (aHeeberi 2:9; Yohani 3:16) Nuumala-vo, ‘Muluku aahimuhihimuxa mookhwaani’, nave Yesu aahittikela wiirimu ntoko nlaikha. (Miteko 3:15) Wiirimu Yesu “onniwerya owoopola voomalela otheene ale aninvekela Muluku mwa nsina nawe, mwaha woowi onnikhala mukumi mahiku otheene”, “wira onvekeleke Muluku wira aakhaliherye”.— aHeeberi 7:25.
Xeeni vanitthuneya ahu okhaliheriwa ni Yesu?
Ootheene ahu ninyariwa nitthenke ene. (aRoma 3:23) Etampi enninrakameliha Muluku, nave ennikumiherya okhwa. (aRoma 6:23) Masi Yesu ori ntoko “mulipa-onwaakiha omilattuni” atthu anaamini mukuttho awe. (1 Yohani 2:1, enoota) Yesu onnaakhaliherya, onvekelaka Muluku wiira owiriyaneke mavekelo aya ni waalevelela soottheka saya. Onnipaka eyo orumeelaka mukuttho wowoopola. (Matheyo 1:21; aRoma 8:34) Tthiri Muluku onnaakhula mavekelo awo okhala wiira annivarihana ni itthu oniphavela awe. Muluku oomuruma Yesu orwa mulaponi “wira olumwenku woopoliwe mwaha wa yoowo”. — Yohani 3:17.
Niireke omwaamini Yesu paahi onniphiyerya wiira noopowe?
Nnaari. Nnaamwi vatthuneyaka omwaamini Yesu wiira noopowe, masi yookhala etthu ekina ninreerela ahu opaka. (Miteko 16:30, 31) Biibiliya onihimya so: “Ntoko erutthu ehirina okumi eri aya yookhwa, siiso-tho, waamini ohirina miteko, ti wookhwa”. (Yakobo 2:26) Wiira noopowe, nihaana:
Wiixutta voohimya sa Yesu ni Tiithi awe, Yehova. — Yohani 17:3.
Owaamini. — Yohani 12:44; 14:1.
Wooniherya owaamini wahu neettelaka itthu anniruma aya. (Luka 6:46; 1 Yohani 2:17) Yesu aahiixuttiha wiira khahiyo paahi atthu ootheene animwiitthana “Apwiya” yaamoopowa, masi paahi yaarowa woopowa taale yaarowa ‘opakaka itthu simphavela awe Tiithi awe ori wiirimu’. — Matheyo 7:21.
Ohihiya wooniherya waamini hata siniphwanyaka mixankiho. Yesu aahooniherya saana okathi aalavunle awe so: “Ole onivilela mpakha wookiseryani, tonrowa woopowa”. — Matheyo 24:13.