Mwaha 13

Abrahamu—mpatthani A Muluku

NIMOSAA na mapuro yaale atthu yaaronwa aya okhala vattuli va Epula ya Mutaaseke niihaniwa Uri. Muttetthe ola waahikhala wootthuneya, waahikhana ipa sikina sooreera. Masi atthu a opuro ole yaakokhorela amuluku oowoka. Yaari ntoko siisaale saary’aya-tho oBabeli. Atthu a Uri ni a oBabeli khiyaari ntoko Nowee ni mwanawe Semi, yaawo yaavikaninhe omurumeela Yehova.

Wanikisa vaya, iyaakha 350 vattuli va epula ya mutaaseke, oororomeleya Nowee aahikhwa. Ela yiiranen’ye vattuli va iyaakha piili paahi vaavo vaayarinwa awe mulopwana owo onimoona anyu valataratoni-va. Owo aari mutthu a vameekh’awe vanceene wa Muluku. Nsina nawe naari Abrahamu. Owo aakhala ni emusi awe mmuttetthe yoole a Uri.

Nihiku nimosaa Yehova aahimuhimeerya Abrahamu wira: ‘Mukhumee mu Uri ni mwaahiye amusi anyu, nto murowee elapo enrowaaka woothonyeryani.’ Niireke wi Abrahamu aahimwiiwelela Muluku ni khuhiya ottuli opuha wotheene wa Uri? Aayo, owo aahiira siiso. Yaahiiraneya eyo okhala wira Abrahamu okathi wotheene aanimwiiwelela Muluku, nto aahisuweliwa okhala ntoko mpatthani a Muluku.

Akina a emusi ya Abrahamu yaahirowa vamosaa n’uwo vaavo owo vaakhummya awe mu Uri. Tiithi awe Terahi aahimutthara. Siiso-tho musulwaa awe Lothi. Nto, mweephattu, mwaara a Abrahamu Sara aahirowa-tho. Moovira wa okathi otheene aya yaahiphiya nipuro niihaniwa Harani, weiwo Terahi waakhwiiya awe. Awo yaari mapuro oorakamela vanceene ni Uri.

Vattuli va okathi wa vakhaani, Abrahamu ni a etthoko awe yaahikhuma oHarani ni yaahirwa elapo yiihaniwa Kanani. Iwe Yehova aahimmye so: ‘Ela elapo yeeyo miyo kinrowaaka waavaha aniinyu.’ Abrahamu aahimaka oKanani ni aakhala muheemani.

Muluku aahipacerya omukhaliherya Abrahamu, nto owo aahikhalana ipwittipwitthi makoto manceene ni inamaa sikina ni anamuteko imiya sinceene. Masi owo ni Sara khiyaarina anamwane oowaayara aya.

Vaavo Abrahamu vaarina awe iyaakha 99, Yehova aamuleelale so: ‘Natiri aka toowi nyuwo munrowa okhala tiithi a maloko manceene a atthu.’ Masi ela yaarowa wiiraneya sai, vooneyaka wi Abrahamu ni Sara vano yaari oowuuluvalexa wira akhalane mwaana?

Maphattuwelo 11:27-32; 12:1-7; 17:1-8, 15-17; 18:9-19.