YOOSOMA 8
Abrahamu ni Sara Yaahimwiiwelela Muluku
Waattamela oBabeli yaahikhala epooma yiitthaniwa Uri, weiwo atthu yaakokhorela aya amuluku anceene, omuhiya Yehova. Masi epooma ele aahikhala mulopwana mmosa aamukokhorela Yehova paahi. Nsina nawe naari Abrahamu.
Yehova aahimuhimeerya Abrahamu wira: ‘Mukhume mulaponi mwanyu, mwaahiye amusi anyu ni muthaamele elapo enrowa aka woothoonyeryani’. Nuumala-vo Muluku aahimuleiherya wira: ‘Miyo kinimookhalihani nloko nuulupale, kinimwaareeliha atthu otheene a mulaponi mwaha wa nyuwo’.
Abrahamu khaasuwela opuro aaroihiwa awe ni Yehova, masi owo aahimuroromela Yehova. Nto, Abrahamu aahivenya ni mwaarawe Sara, vamosa ni paapa awe aitthaniwa Terahi, ni musulwaawe Lothi. Awo yaahikuxa itthu saya ni mowiiwelela yaahipacerya mukwaha aya woorakama.
Abrahamu aarina iyaakha 75 vaavo owo ni emusi awe yaaphiyale aya elapo Yehova aaphavela awe owooniherya. Elapo eyo yiitthaniwa oKanani. Muluku aahimuleiherya Abrahamu wira: ‘Elapo ela yotheene munoona anyu, miyo kinimwaavaha aniinyu’. Masi Abrahamu ni Sara yiira yuuluvanle ene ni khiyaarina mwaana. Nto Yehova aarowa omaleliha sai yooleiherya awe?
“Mwaha wo wamini, Abrahamu ahimwiwelela Muluku, . . . khuvenya arowaka elapo Muluku yamuhimenryawe onvaha ntoko yohiyeriwa: owo ahihiya elapo awe ahisuwelaka warowawe”.—aHéberi 11:8