Mwaha 48
Maxibioni Amiruku
MITTETTHE sinceene sa oKanani vano sirii soolikana ene wira siwane ni aIsarayeli. Iyo sinuupuwela wira sinrowa oxintta. Masi atthu a muttetthe a vakhiviru wa Xibioni khanuupuwela siiso. Awo anikupali wira Muluku onnaakhaliherya anaIsarayeli, nto awo khamphavela owana ni Muluku. Siiso nyuwo munnisuwela ele maXibioni eniira aya?
Awo annilakela wiipakiha okhala a otteiwenexa. Siiso alopwana akina a yaawo anniwara ikuwo soothaala ni ixapattho soolala. Annaakapattiha abuuru aya isaakho soothaala, annikuxa-tho iphaawu sakhalai sowuuma. Nuumala vo annirowa wa Yoxuwa ni khiyahimya ariki: ‘Ninkhuma elapo ya otteiwenexa, okhala wira nihiiwa sa Muluku anyu muulupale, Yehova. Nihiiwa itthu sotheene seiyo sivanrya awe wa nyuwo wEjiitu. Siiso ahooleli ahu aanihimeerya olokiherya soolya sa mukwaha ni orwa ni ohimya wa nyuwo wira: “Hiyo na arumeyi anyu. Munlaphele wira khimunrowa owana ni hiyo.” Nyuwo munniwerya woona ikuwo sahu iya soonanara mwaha wa mukwaha woorakama ni iphaawu sahu sihuuma ni ti sakhalai.’
Yoxuwa ni ahooleli akina annaakupalisi maXibioni. Siiso annilaphela wira khanrowa owana n’awo. Masi nuumala mahiku mararuu annisuwela wira maXibioni anikhala tthiri vakhiviru.
‘Munootothenrye-ni muhimyaka wira munkhuma elapo y’otteiwene?’ Yoxuwa onnaakoha awosa.
MaXibioni annaakhula wira: ‘Nihiira eyo okhala wi naahiiwa wira Muluku anyu Yehova ooleiherya woovahani elapo ela yotheene ya oKanani. Siiso naari oowoova wira nyuwo mwaarowa oniiva.’ Masi anaIsarayeli annisuka oleiherya waya, awo khaniwiiva maXibioni. Mmapuroni mwaya annaapaka awo okhala arumeyi aya.
Mwene oYerusalemu orii oonanariwa mwaha woowi maXibioni aapaka murettele ni aIsarayeli. Siiso owo onnihimya wa mamwene makina maxexee: ‘Rwaasani ni mukikhaliherye owana ni Xibioni.’ Nto ela ti etthu eniira aya mamwene ala mathanuu. Niireke wira maXibioni yaahikhala a miruku opaka murettele ni aIsarayeli, vaavo-nto vaniiriha aya mamwene ala mathanuu orwa owana n’awo? Ninrowa woona.