Yoxuwa ni MaGibeyoni

Ihapari sa opwetexiwa wa Yerikho saahuulaana mittetthe sikina sa oKanani. Nto mamwene aya yaahiiwanana wira yaatuphele aIsarayeli. Masi maGibeyoni yaahimpaka palano mukina. Awo yaahiwara ikuwo soothaala ni yaahirowa wa Yoxuwa, amuleela wira: ‘Hiyo ninkhuma elapo yoottaiwene. Nihiiwa alavuliwaka Yehova ni miteko sotheene opanke awe wEjiitu ni oMowabi. Xontte munlaphele wira khamumpwetexa epooma, nto hiyo nnookhala arumeyi anyu’.

Yoxuwa aahipaka ompatthani naawo ni aahaaleela wira khaarowa owiivakasa. Vano mmurottoni mwaya, Yoxuwa aahileeliwa wira atthu awo yaakhala vakhiviru. Yaari a elapo yeele ya oKanani. Yoxuwa aahaakoha wira: ‘Xeeni muhalaka oniwoka?’ Awosa yaahaakhula wira: ‘Noova wiiviwa! Nipanke eyo okhala wira naahiiwa wira Yehova Muluku anyu ori ni nyuwo. Xontte muhiniive’. Nto Yoxuwa khaawiivale okhala wira aahilapha.

Moohipisa, mamwene 5 a oKanani ni anakhotto aya, yaahiiwanana waatuphela maGibeyoni. Yoxuwa ni anakhotto awe yaaheetta ohiyu wotheene wira yawaakihe maGibeyoni. Mmeeloni mwaya voosiisu yaahipacerya owaniwa ekhotto. AKanani yaahipacerya otthyawa erowaka mapuro oovirikana. Khula opuro yaarowa aya, Yehova aanaamoroxela maluku maalupale a maralala. Vano Yoxuwa aahinvekela Yehova wira eemexe nsuwa. Xeeni Yoxuwa aavenke awe eyo, variki eyo yahaatonko wiiraneya? Mwaha woowi Yoxuwa aanimuroromela Yehova. Nsuwa naaheemela opuro omosa nihiku ntero mpakha aIsarayeli owiivakasa mamwene a oKanani ni anakhotto aya.