EHIIRANEYA etthu emosaa yootakhala. Yohani Mbatiza iiviwe niinano va. Herodiya, mwaara a mwene, khaamphavela owo. Nto aahiwerya omwiiriha mwene orumiha wiikitthiwa muruu wa Yohani.

Vaavo Yesu vaniiwa awe ela, owo orii ooriipiwa murima vanceene. Owo onirowa mekhawe nipuro nihinviraviriwa. Masi atthu annimutthara. Vaavo Yesu vaniweha awe mittitthi, owo onnoonela othunku. Siiso onaaleela awosa sa omwene wa Muluku, ni onnaavoniha aretta aya.

Oxekuwa yoole awiixutti awe annoorwa wa owo ni anamuleela wira: ‘Vahiila, nto nna nipuro nihikhanle etthu. Mwaaleele atthu ala wira aroweke siiso awo anoowerya othuma yoolya aya mmittetthe sookhuveela.’

‘Awo khantthuneya orowa,’ onnaakhula Yesu. ‘Nyuwo mwaavahe etthu wira alye.’ Orukunuwelaka wa Filipe, Yesu onikoha wira: ‘Ninrowa othuma wuuwi yoolya yoophiyerya waalyiha atthu ala otheene?’

‘Onooyiiheya musurukhu munceene, munceenexa wira nthume yoolya eniphiyerya wira ori otheene okhalane paahi yoolya vakhaanixa,’ onnaakhula Filipe. Vano Andreya onihimya wira: ‘Mwammiravo ola, ookhalana iphaawu thanuu ni ihopa piili. Masi iya khisinaattamela ophiyerya wa atthu ala otheene.’

‘Mwaaleele atthu wira akilaathi vamalaxini,’ onnihimya Yesu. Nuumala vo owo onnimuxukhurela Muluku mwaha wa yoolya, ni onapacerya okawanya mapattuxa ene. Moottharelana, awiixutti anaavaha ephaawu ni ehopa atthu otheene. Aakhala alopwana 5.000, ni athiyana ni anamwane oovikana ikonto sinceene. Otheene aya annoolya mpakha ovona. Nto vaavo awiixutti vanithukumanya aya seiye saahanle, sinnisareya mavuku 12!

Vano Yesu onniwiiriha awiixutti awe okela mukalawani wira alapuwe Ephareya ya oGalileya. Okathi wa ohiyu onnikhumelela munamukhaya muulupale, ni mampili annitekhumiha ekalawa ninno-ninno. Awiixutti arii oowoova vanceene. Nuumala vo, ohiyu eriyari, awo annimoona mutthu eettaka vasuluu va maasi orwaaka wa awo. Awo annikhuwela mowoova, okhala wira khansuwela exeeni enoona aya.

‘Muhoove,’ onnihimya Yesu. ‘Ti miyaano!’ Nlelo awo khanwerya okupali ela. Siiso Pedru onihimya so: ‘Akhala wira tthiri ti nyuwo, Pwiya, mukiirele wira keette vasuluu va maasi kirowaka wa nyuwo.’ Yesu onnaakhula oriki: ‘Murweeke!’ Nto Pedru onnikhuma ni onneetta vasuluu va maasi! Nuumala vo owo onnoova ni onnipacerya osama, masi Yesu onnimoopola.

Valokenle ene, Yesu onnilyiha vasyaa-tho ikonto sinceene sa atthu. Ekwaha ela owo onipaka-tho siisaale ni iphaawu thanuu na piili ni ihopa saamukhaani vakhaani. Nto vasyaa-tho yookhala yoolya yoophiyerya wa otheene. Khahiyo vootikinihexa moota Yesu sinaakhapelela awe atthu? Vaavo vanilamulela awe ntoko mwene a Muluku hiyo khininrowa-tho oxankiheyaka ni etthu eri yotheene!.