Yesu Aahaavaha Eyoolya Atthu Anceene

Ohalaka okathi vakhaani wira opakiwe Paasikha a 32 EC, arummwa yaahihokolowa akhumaka muteko woolaleerya. Okhala wira awo yaahikhulumuwa, Yesu aahaakuxa ni ekalawa ni aahaarowana oBethisaida wira yaphumurye. Masi ehalaka vakhaani ophiya, Yesu aahiweha wira atthu anceene yaanimutthara. Nnaamwi Yesu aaphavela okhala paahi ni arummwa awe, owo aahiwaakhela atthu ale moophenta. Aahaapenuxa ale yaawereiwa ni aahipacerya owiixuttiha. Nihiku notheene Yesu aahiwiixuttiha sa Omwene wa Muluku. Makaaripi, arummwa yaahirwa omuleela wira: ‘Atthu ala aavoliwa. Mwaleele wira erowase mmuttettheni yaphavele yoolya’.

Yesu aahiwaakhula so: ‘Nkikhanle oowaruma orowa. Mwaavahe eyoolya yeenyu’. Arummwa yaahimuhimeerya wira: ‘Mumphavela nirowe nathume iphaawu wira naavahe atthu ala othene?’ Murummwa Filipe aahihimya-tho wira: ‘Hata naarina musurukhu munceene, khinaarowa owerya othuma iphaawu ni waavaha atthu ala ootheene’.

Yesu aahaakoha wira: ‘Khanikhalanne eyoolya hata vakhaani?’ Andreya aahaakhula wira: ‘Nirina iphaawu thanu ni ihopa piili paahi saamukhaani. Iya khasimphiyerya waakawela atthu ala otheene’. Yesu aahihimya so: ‘Muruuhe-va iphaawu ni ihopa sirina anyu’. Nuumala-vo aahaaleela atthu wira ekilaathi, khula nipuro atthu 50 aahiiso 100. Yesu aahikuxa iphaawu iye ni ihopa, aahiteexerya musulu ni aahipaka nivekelo. Nuumala ovekela, aahaavahererya eyoolya ele arummwa, nto awo yaahaakawela atthu. Alopwana 5.000 vamosa ni athiyana ni anamwane yaahilya mpakha ovona. Nuumala-vo, arummwa yaahittottela eyoolya yaahanle wira ehihononeye. Eyo yaahisareya ittanka 12! Tthiri ole waari mwiiriirya muulupale Yesu aapanke awe!

Atthu yaahitikinihiwa vanceene nto yaahiphavela wira Yesu okhale mwene aya. Masi Yesu aanisuwela wira ole khahiyo waari okathi Yehova aamuthanlenle awe wira okhale mwene. Nto aahaaruma atthu ale wira erowaseke owannyeya ni aahaaleela arummwa awe wira elapuwele ekhopela ekina ya Ephareya ya oGalileya. Arummwa yaahiwela ekalawa khurowasa, nave Yesu aahirowa omwaako mekhawe. Mwaha aya? Mwaha woowi aaphavela onvekela Tiithi awe. Hata aakhalana miteko sinceene, Yesu aaniivaha okathi wira olompeke.