Mwaha 108

Mu Ephiro Enirowa Odamaasiko

NYUWO munnimusuwela tanii ola ommaathale vathii? Ola ti Saulo. Muupuweleleke, owo ti yoole aawehererya malaya aalopwana yaale yanvonyakasa maluku Siteefano. Nkawehani omwaleya iwo onaarya! Exeeni eniiraneya?

Vattuli va wiiviwa Siteefano, Saulo onnihoolela mu waalupattha atthareli a Yesu wira aahaaxe. Owo onirowa empa ni empa ekhw’aya ni onaapurulela otaa ni waarihela awosa mukhatteya. Anceene a awiixutti annitthyawela mittetthe sikina ni anapacerya olaleya iwe “ihapari sooreera.” Masi Saulo onirowa mittetthe sikina wira aaphwanye atthareli a Yesu. Vano orii mmukwaha awe woorowa oDamaasiko. Masi, oryeene mphironi, ela ti etthu yootikiniha yeeyo eniiraneya:

Mootutuxerya omwaleya onikhuma musuluu onnivarela moomurukurerya Saulo. Owo onnimorela vathii, ntoko siniweha ahu va. Nuumala vo nsuu nnihimya so: ‘Saulo, Saulo! Xeeni nyuwo munikilupattha anyu?’ Alopwana yaawo ari ni Saulo anniweha omwaleya ni anniiwa oruma wa nsuu, masi khanwerya wiiwexexa enihimmwa.

‘Pwiya, nyuwo tanii?’ Saulo onnikoha.

‘Miyo ka Yesu, yoowo nyuwo munimulupattha anyu,’ nsuu ninnihimya. Yesu onnihimya ela okhala wira vaavo Saulo vanaalupattha awe atthareli a Yesu, Yesu onoona ntoko wira tonilupatthiwa owo mwaneene.

Vano Saulo onikoha oriki: ‘Pwiya, miyo kipake exeeni?’

‘Nvenyee ni murowee oDamaasiko,’ onnihimya Yesu. ‘Iwe nyuwo munrowa oleeliwa yeeyo munitthuneya anyu opaka.’ Vaavo Saulo vanivenya awe ni okhunula maitho awe, owo khonwerya woona etthu. Owo khonoona! Siiso alopwana arina awe anninvarelela ntata ni anamuhoola arowaka oDamaasiko.

Vano Yesu onnilavula ni mmosaa a awiixutti awe oDamaasiko, oriki: ‘Nvenyee, Ananiya. Murowee ephiro eniihaniwa Yowookowa. Mu empa ya Yuda mwamphavelase mulopwana oniihaniwa Saulo. Miyo koomuthanla wira okhalee murumeyi aka a vameekh’aya.’

Ananiya onniiwelela. Vaavo vanikumana awe ni Saulo, owo onnimunxaatherya matata awe ni onahimya oriki: ‘Pwiya ookiruma wira muwerye woona vasyaa-tho ni musareye ni munepa wootteela.’ Niinanoru etthu emosaa enilikana ni maapaliwe ennikhuma mmaithoni mwa Saulo, nto owo onniwerya woona vasyaa-tho.

Saulo onnivariheliwa muteko mmukhalelo muulupale wira waalaleeryeke atthu a maloko manceene. Owo onnisuweliwa okhala murummwa Paulo, sa yoowo ninrowa ahu wiixutta sikina sinceene. Masi wanipacerya, nrowee niwehee yeeyo Muluku enimuruma awe Pedru wira opakee.

Miteko 8:1-4; 9:1-20; 22:6-16; 26:8-20.