Mpantta 6
Nthowa Naya Muluku Vanaahiya Awe Atthu Ahaawaka
1, 2. Axitiith’ihu oopacerya ahononne sai epacereryo yooloka yeeyo Muluku aavanhe awe?
EXEENI ettheken’ye? Exeeni ekhumelenle yeeyo ehononne epacereryo yooloka Muluku aavanh’awe axitiithi ihu oopacerya yaawo yaakhala mParayiisu wEedeni? Ohiya okhala murettele ni ovarihana mParayiisu, nthowa xeeni vakhanle aya otakhala ni ohaawa mu iyaakha sinceene?
2 Etthu yiiranen’ye tiila: Adamu ni Eva yaahirumeela othanla waya mootaphuwa mmukhalelo woohiloka. Awo yaahiliyala wira khiyaapakiwe wira akhumeleke saana ahittharaka malamulo a Muluku. Awo yaahithanla wiilamulela, yuupuwelaka wira opaka eyo yaarowa olokiherya ikumi saya. Siiso yaahitupha mikano sa otaphuwa waya seiyo saapakiwe ni Muluku.—Maphattuwelo, ekapiitulu 3.
Mwaha wa Olamulelo wa Olumwenku Wotheene
3-5. Nthowa xeeni Muluku ahaawiivaly’awe Adamu ni Eva, ni khaapaka anamathelana akina?
3 Nthowa xeeni Muluku ahaawiivaly’awe Adamu ni Eva, ni khaapaka anamathelana akina? Nthowa noowi waahivaanyihiwa ophwanelela wa Muluku olamulela olumwenku wotheene, eyo piiyo, ehakhi awe ya olamulela.
4 Nto nikoho naari nna: Tani oniphwanelela olamulela, ni tani onilamulela saana? Mwaha wookhala Mpattuxa a itthu sotheene ni Muluku oowerya sotheene, owo ookhalana ehakhi ya waalamulela apinaatamu. Okhala wira Muluku ti musuweli a itthu sotheene, olamulelo awe ti wootepa oreera wa soopattuxa sawe sotheene. Masi vano olamulelo wa Muluku waahivaanyihiwa. Nave-tho, niireke wira yookhala etthu yaattheken’ye ni ole ampattunxe awe, eyo piiyo, pinaatamu? Muhoolo mwaya hiyo ninrowa othokorerya moota ororomeleya wa pinaatamu ovaanyihiwa aya.
5 Mwaha wa apinaatamu wiilamulelaka, nookhumelela nikoho nikina: Niireke wira atthu anookhumela saana ahilamuleliwaka ni Muluku? Mwekeekhai Mpattuxa aanisuwela waakhuliwa wa nikoho nno. Masi etthu emosa yaareerela opaka wira apinaatamu aphwanye waakhula wa nikoho nno, yaari waavaha okathi munceene wira apake ele yaaphavela aya. Awo yaahithanla otthara mweettelo aya arumeelaka othanla waya mootaphuwa, nto Muluku aaheemererya yoothanla aya eyo.
6, 7. Exeeni emwiirinhe Muluku waahiya apinaatamu yiilamulelaka mu okathi munceene?
6 Mwaha wa Muluku waavaha apinaatamu okathi woophiyerya wira yiilamuleleke, owo aarowa ophuka moomalela mwaha ole, ooniheryaka ele yaari yooloka: olamuleliwa ni Muluku aahiiso wiilamulela. Okathi waarowa aya ovahiwa apinaatamu wahaana ophiyerya, wira apinaatamu apake itthu sotheene saaphavela aya mmyaha sa epoliitika, ikaafrika, siensia, ni mirette.
7 Tivonto, Muluku ohaahiya atthu yiilamulelaka mpakha olelo va wira ooniherye oratteene akhala wira olamulelo wa pinaatamu onookhumela saana voohihooleliwa ni Muluku. Nto pinaatamu onoowerya othanla oreera murima aahiiso otakhala murima, ophenta wala onyokha, exariya aahiiso ohikhala exariya. Masi onniphwanya sookhumelela sa othanla wawe, eyo piiyo, mikhalelo sooloka ni murettele aahiiso otakhala ni ohaawa.
Malaikha Annimurukunuwela Muluku
8, 9. (a) Waapacenrye sai orukunuwela wiirimu? (b) Tani-tho, ohiya Adamu ni Eva, Satana aawonke awe wira amurukunuwele Muluku?
8 Masi wookhala mwaha mukina onitthuneya othokorerya. Yaakhoottale olamulelo wa Muluku khahiyo yaari axitiithi ihu oopacerya paahi. Masi-tho tani yaakhala okathi ole? Yaari malaikha. Muluku ohinatthi waapattuxa apinaatamu, owo aahipaka mukhalelo mmosa wa okumi wootepa owerya ovikana ola wawihu, eyo piiyo, nummuru ninceene na malaikha, wira akhaleke wiirimu. Nave-tho, malaikha ala yaapakiwe ni mukhalelo wa othanla mootaphuwa ni wira yiiweleleke olamulelo wa Muluku.—Yobi 38:7; Esalimo 104:4, NM; Wisupulula 5:11.
9 Biibiliya onooniherya wira orukunuwela woopacerya wiiranen’ye wiirimu. Nlaikha nimosa naaphavela otaphuwa moomalela. Nlaikha nno naaphavela-tho wira nikokhoreliweke ni apinaatamu. (Matheyo 4:8, 9) Nlaikha nna naarukununwe, ti naawiirinhe Adamu ni Eva omurukunuwela Muluku, nihimyaka mowootha wira Muluku aanaakhoottiherya atthu awe etthu yooloka. (Maphattuwelo 3:1-5) Tivonto vaniitthaniwa aya okhala Diabo (Nawoothe) ni Satana (Nwanani). Muhoolo mwaya, Satana aahiwoka malaikha makina wira amurukunuwele Muluku. Vano, awo aasuweliwa okhala axetwani.—Otumererya 32:17; Wisupulula 12:9; 16:14.
10. Exeeni ekhumelenle mwaha wa apinaatamu ni malaikha omurukunuwela Muluku?
10 Mwaha wa apinaatamu omurukunuwela Muluku, aakhweeherya wira Satana ni axetwani awe yaahapuweleke. Ti mulattu aya Biibiliya vanimuhimya awe Satana okhala “muluku a vathí-va”, yoowo ‘ottiyenle miruku saya’. Tivonto Nuulumo na Muluku vanihimya aya wira “elapo yothene enniweriwa ni Mutakhali”. Yesu mwaneene aahimwiitthana Satana okhala “ole onruma vathí-va”.—2 aKorinto 4:4; 1 Yohani 5:19; Yohani 12:31.
Myaha Miili
11. Mwaha xeeni mukina Satana anvaanyinhe awe Muluku?
11 Satana aahikumiherya mwaha mukina yoowo wanvaanyiha Muluku. Tthiri, Satana aahimmye wira Muluku khaapanke apinaatamu oratteene ni wira khuuvo mutthu onrowa ophavela opaka etthu yooloka okathi oneehereriwa awe. Mwekeekhai, aahimmye wira okathi atthu aneehereriwa aya, awo yaarowa onveeha Muluku. (Yobi 2:1-5) Soohimya iyo sa Satana soovaanyiha ororomeleya wa apinaatamu.
12-14. Moota xeeni okathi waarowa aya wooniherya ekeekhai voohimya sa myaha miili seiyo sikumiheriwe ni Satana?
12 Tivonto, Muluku oovaha okathi munceene soopattuxa sawe sotheene wira siwehe moota sinrowa aya ophukiwa myaha iye, eyo piiyo, ororomeleya wa apinaatamu ni akhala wira ekuvernu ya Muluku ti yoophwanelela. (Mulikanyihe ni Okhuma 9:16.) Ele yaarowa okhumelela mu sowiiraneya sa apinaatamu, yaamooniherya akhala wira myaha iye miili saakumiheriwe saari sekeekhai.
13 Etthu yoopacerya tiila: okathi waarowa wooniherya exeeni voohimya sa mwaha wa olamulelo wa olumwenku wotheene, eyo piiyo, ophwanelela wa olamulelo wa Muluku? Niireke wira apinaatamu yaamwiilamulela mekhaya ni khikhumela saana voohihooleliwa ni Muluku? Niireke wira wookhala omwene wa pinaatamu ohinihooleliwa ni Muluku, waarowa okumiherya elapo yoohikhala ekhotto, ekrime, ni ohikhala exariya? Ookhala pinaatamu aarowa omaliha ohaawa, nto khikumiherya mikhalelo sooloka wa atthu otheene? Ookhala mutthu aarowa omaliha iretta, wuuluvala, ni okhwa? Olamulelo wa Muluku opakiwe wira olokiherye itthu iyo sotheene.—Maphattuwelo 1:26-31.
14 Voohimya sa mwaha wa nenli woowi Muluku khonipanke saana, exeeni okathi waarowa aya wooniherya mmwaha owo? Niireke wira yaari etthu yootthekeya moota Muluku saapattunxe awe apinaatamu? Niireke wira ookhala mutthu aarowa opaka etthu yooloka okathi woweehereriwa? Niireke wira aakhala atthu yaarowa wooniherya wira anniphavela ekuvernu ya Muluku ohiya wiilamulela?
[Elatarato eri epaaxina 13]
Muluku ohaavaha apinaatamu okathi wira apake itthu sotheene saaphavela aya
[Masu a elatarato]
Shuttle: Based on NASA photo