Mpantta 7
Exeeni Enikhumelela Mwaha Wa Orukunuweliwa Muluku?
1-3. Moota xeeni okathi woonihenrye aya wira Yehova tonihimya ekeekhai?
VOOHIMYA sa mwaha onilavula sa ehakhi ya Muluku waalamulela apinaatamu, exeeni enikhumelela iseekulu iya sotheene apinaatamu aniilamulela aya mmensaya ahihooleliwaka ni Muluku? Niireke wira apinaatamu aawerya wooniherya wira tanilamulela oratteene onvikana Muluku? Nathokorerya mwaha owo moovarihana ni ohaaxana okhanle eriyari ya apinaatamu, tthiri nnoowerya ohimya wira nnaari.
2 Okathi axitiith’ihu oopacerya yaakhontte aya olamulelo wa Muluku, sahaaphwanya ihasara. Yaahiiruuhela ohaawa, vamosa ni apinaatamu otheene. Khuuvo yaarowa aya omootheryaka. Nuulumo na Muluku nnihimya so: “Masi nyuwo mw’àtthu òhononeya: khamumphwanela-tho wìhaniwa an’awe. Mwaha w’ohìwananeya wanyu nyuwo mwá nloko nonanara ni nokhotta”.—Otumererya 32:5.
3 Itthu sinaakhumelela apinaatamu sinnooniherya wira soolopola sa Muluku aavanhe awe Adamu ni Eva ti sekeekhai, nto vaakhanle wira yaamukhootta marehereryo a Muluku, awo yaamuuluvala ni wanikisa waya, yaamookhwa. (Maphattuwelo 2:17; 3:19) Awo yaahihiya olamuleliwa ni Muluku, nto nuuvira okathi yaahuuluvala ni okhwa.
4. Nthowa xeeni otheene ahu niyariwe ahu oottheka, khiyawereiwa ni okhwa?
4 Moottharelana, etthu yaawiiranenle anamwane a Adamu ni Eva, ti yeele aRoma 5:12 onitthokiherya awe oriki: “Mutthu mmosá pahi [Adamu, yoowo ori tiithi a apinaatamu otheene] t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene”. Nto, okathi axitiith’ihu oopacerya yaakhontte aya olamuleliwa ni Muluku, awo yaahipakeya anamattheka. Moovarihana ni malamulo a oyara, awo yaamwaaraviha yoottheka anaaya. Ti nthowa naya otheene ahu niyariwe ahu oottheka, khiyawereiwa ni okhwa.
5, 6. Etthu xeeni yooniheren’ye voohimya sa wiimananiha wa apinaatamu oruuha murettele wekeekhai ni othaaciri?
5 Iseekulu sinceene soovira. Ilamulelo sinceene sihoorwa ni soorowa. Siheereriwa mikhalelo sinceene sa olamulelo. Masi ikwaha sinceene sinnaakhumelela apinaatamu itthu sootakhala. Nuuvira iyaakha ikonto thanu namosa, mutthu aamuupuwelaka wira apinaatamu aarowa vahoolo ni anoowerya okhaliha murettele, exariya, ni othaaciri mulaponi motheene, ni wira mpakha va, awo ahiixutta mikhalelo sooloka, ntoko oreera murima, omoriwa ikharari ni okhaliheryana.
6 Masi, etthu eniiraneya olelo ti yoovirikana n’iyo. Khiivo ekuvernu yoopinaatamu ewenrye oruuha murettele ni othaaciri wa atthu otheene. Mu eseekulu 20 paahi, hiyo nooweha wookotthiwa wa atthu anceene ekwaha emosa paahi. Ni atthu anivikana imilyau 100 ahiiviwa mukhottoni. Olelo va, atthu oohikontareya annihaaxiwa, wookotthiwa ni otthukweliwa mwaha wa nthalu ni ovirikana ipoliitika.
Mikhalelo sa Olelo va
7. Moota xeeni onitthokiheriwa aya mukhalelo wa apinaatamu olelo va?
7 Moowuncererya, nkahaya muupuwelele mikhalelo sa apinaatamu olelo va. Ekrime ni otuphelana, soosareya. Olya mirette soopahula, khoreere waalelaniwa. Iretta sinravihaniwa mooraruwani, sihuulaana. Eretta yeele ehinreera wooviwa, SIDA, ennaaphwanya atthu imilyau sene. Khuta mwaakha, atthu imilyau miloko sene annookhwa etala aahiiso iretta, masi atthu vakhaani aakhalana muhakhu munceene. Apinaatamu annihonona ni orumeela moohiloka elapo. Mapuro otheene, okumi wa vatthokoni ni mikhalelo sooloka, sinnihononeya. Mwekeekhai, okumi onikuxiwa olelo va, onnooniherya olamulela woohiloka wa ‘muluku a olumwenku ola’, ori Satana. Elapo ela, yeeyo enilamulela awe, kherina ophenta, ti yootakhala ni yoosareya atthu oowiiya.—2 aKorinto 4:4.
8. Nthowa xeeni sowaakhwaniherya sa apinaatamu sihikhanle aya ethoonyeryo ya orowa vahoolo wekeekhai?
8 Muluku ohaavaha apinaatamu okathi woophiyerya wira apake itthu sotheene saaphavela aya mmyaha sa siensia ni ikaruma soovarela muteko. Masi niireke wira eyo ethoonyeryo ya orowa vahoolo, vaavo mareetthe anturukiwa aya ni ikapwitthi, itanki, iviyau sinriha ibomba, ni ibomba nuclear? Niireke wira orowa vahoolo, vaavo atthu aniwerya aya orowa osulu, eyo piiyo, vamweerini ni mapuro makina, masi vathi va ahiweryaka okhala oowiiraana hata ni murettele? Niireke wira orowa vahoolo, vaavo atthu anoova aya weetta mustaraatani ohiyu, nnakhala othana, mmapuro makina?
Yookhumelela Nuuvira wa Okathi
9, 10. (a) Etthu xeeni iseekulu sinceene sivinre yoonihenrye aya? (b) Nthowa xeeni Muluku ohinrowa awe owaakha apinaatamu yoovaha ya othanla mootaphuwa?
9 Etthu yooniheren’ye nuuvira iseekulu sinceene, ti yoowi apinaatamu khanwerya weettiha mavalo aya mookhumela saana ahihooleliwaka ni Muluku. Awo khanwerya opaka eyo, ntoko siisaale vahinwerya aya okhala ahilyaaka, ahiwuryaka, nnakhala ahimumulaka. Ekeekhai tiila: Hiyo nipakiwe wira neetteleke malamulo a Mpattuxa ahu, siiso ntoko yoolya, maasi, ni epheyo sinniiriha aya okhalana okumi.
10 Mwaha wa weemererya wira otakhala ovikaniheke, Muluku ohooniherya moomalela sookhumelela sooriipiha murima sa orumeela othanla mootaphuwa mmukhalelo woohiloka. Othanla mootaphuwa eri yoovaha yootepa oreera, tivonto Muluku ohiwankh’awe apinaatamu nuumala ottheka, masi ohaahiya wira awehe itthu sinikhumelela mwaha wa orumeela moohiloka yoovaha ya othanla mootaphuwa. Nuulumo na Muluku ninnihimya ekeekhai niiraka: “[Mutthu] khanwerya wettiha mavalo awe”. Nave-tho ninnihimya wira: “Tthiri vathí-va àkhala [atthu] akina arina owerya, àkhala-tho akina anihawa epuheriwaka” n’ale arina owerya.—Yeremiya 10:23; Musuweli 8:9.
11. Niireke wira wookhala olamulelo wa apinaatamu owenrye omaliha ohaawa?
11 Mwaha wa Muluku weemererya wira apinaatamu alamuleleke mu iyaakha iya ikonto thanu namosa, onooniherya tthiri wira pinaatamu khoniwerya omaliha ohaawa. Khuuvo pinaatamu otonko owerya opaka eyo. Mwa ntakiheryo, okathi waakhala awe Mwene Salomoni a wIsarayeli, yoowo aari oosuwelexa, oothaaciri, ni oowerya, owo khaawenrye omaliha ohaawa waakumiheriwe mwaha wa olamulelo wa apinaatamu. (Musuweli 4:1-3) Moolikanasa, nnaamwi aronwe ene vahoolo voohimya sa etecnologia, anamalamulela ahu a mulaponi olelo va, khanwerya omaliha ohaawa. Vootepa-tho othananiha, apinaatamu yaawo ahinihooleliwa ni Muluku, ahincererya ohaawa, ohiya omaliha.
Muluku Onniwerya Oweha Itthu sa Muhoolo
12-14. Mireerelo xeeni sinrowa okhumelela muhoolo mwaha wa Muluku weemererya wira apinaatamu ahaaweke?
12 Mwaha wa Muluku weemererya wira apinaatamu ahaaweke, onniniwereya vanceene. Masi owo oniweha itthu sa muhoolo, ni oosuwela itthu sooreera sinrowa wiiraneya muhoolo. Moonelo owo wa Muluku onookumiherya mireerelo wa soopattuxiwa sotheene, ohiya mu iyaakha vakhaani paahi aahiiso iyaakha ikonto vakhaani, masi onrowa okhala mu iyaakha imilyau sene, aayo, mu okathi woohimala.
13 Vakhala wira mutthu muhoolo aarowa orumeela moohiloka yoovaha ya othanla mootaphuwa, ovaanyihaka moota Muluku onipaka awe itthu, nto khivaarowa otthuneya ovahiwa okathi mukina wira owehiwe ole onihimya ekeekhai. Mwaha woowi ohaavaha anamarukunuwela iyaakha ikonto sene, Muluku oovaha ntakiheryo noohimala, nenno ninvareleya muteko wa khuta mutthu a molumwenkuni.
14 Mwaha woowi Yehova oheemererya otakhala ni ohaawa ovikanihaka mpakha olelo va, nto vanrowa wooneya moomalela wira etthu yotheene ehinvarihana n’uwo khenrowa okhumela saana. Moohaaniherya, vanimoonihereya wira khuuvo mukhalelo yoowo ohinlamuleliwa ni Muluku, okhale wa pinaatamu aahiiso malaikha, onrowa okumiherya mireerelo sihinimala. Vano, Muluku onookhalana mathowa oophwanelela waapwetexa mowaakuveya ale ahinimwiiwelela. “[Apwiya] annapwetexa atakhali othene”.—Esalimo 145:20; aRoma 3:4.
[Elatarato eri epaaxina 15]
Nuumala axitiith’ihu oopacerya othanla okhala ahilamuleliwaka ni Muluku, wanikisa awo yaahuuluvala ni okhwa
[Ilatarato siri epaaxina 16]
Olamulelo wa apinaatamu moohimwiiwelela Muluku, ohooniherya okhala ehasara
[Masu a elatarato]
U.S. Coast Guard photo