Xeeni Muluku Oniiwa Mavekelo Onaahiya Awe Atthu Ehaawaka?
NNAAMWI atthu evekelaka, akina annihoverya akhala wira Muluku ookhala tthiri. Nto exeeni eniwiiriha ohoverya? Waaniheryasa, mwaha wa owehaka ohaawa wuulupale onikhumelela mulaponi. Mootoko wiikoha muriki exeeni enimwiiriha Muluku waahiya atthu ehaawaka?
Niireke Muluku aaphavela wira apinaatamu ekhaleke siisa sirya aya, oohimalela ni oohaawa? Nnaari. Maana vaakhanle wira eyo ekeekhai vaarowa ovilaka omuttittimiha. Moone ntakiheryo nna: Aakhanle wira mweettaka muhoona ekaaro esya, masi khiweha wira mpantta mukina yoohononeya, niireke mwaarowa ohimya wira epakiwe yoohononeya ene? Tthiri nnaari! Nyuwo mwaarowa okupali wira mwaneene aahipaka “moomalela saana”, masi yookhala wala ookhala ohononne.
Moolikanasa, okathi ninweha ahu mootikiniheya otthokiheya wa itthu siri mulaponi, masi khiyaweha waakanyerereya wa itthu eriyari ya apinaatamu, nto khannikupali wira ookhala aakanyenrye? Biibiliya onniixuttiha wira Muluku ahimpaka mulopwana oopacerya ni amwaarawe moomalela, masi awosa khiihonona mmensaya. (Otumererya 32:4, 5) Masi mihupi sooreera tiiya: Muluku oolaiherya waareeriha apinaatamu oowiiwelela wira ekhalane okumi woomalela. Nto xeeni onihiya awe oviraka okathi munceene?
Nto xeeni onivira aya okathi munceene?
Wira naakhuliwe nikoho nna, nihaana omusuwela ole oniphwanelela waalamulela apinaatamu. Yehova khaapanke apinaatamu wira yiilamuleleke mmensaya. Aaphavela wira Muluku okhale mulamuleli aya. Biibiliya onihimya so: “Mutthu khansuwela emalelo awe: owo khanwerya wettiha mavalo awe”. (Yeremiya 10:23) Mooriipiha murima, apinaatamu oopacerya yaahithanla ohiiwelela olamulelo wa Muluku. Ohiiwelela iwo waahiwiiriha ottheka. (1 Yohani 3:4) Yoottheka eyo yaahiwiiriha oyeleela okumi woomalela nto khiihonona vamosa ni osuulu aya.
Yehova oohiya siviraka iyaakha ikonto sinceene apinaatamu yiilamulelaka, masi itthu siniiraneya sihooniherya wira awo khaniwerya wiilamulela saana. Tivonto, ikuvernu sa apinaatamu sinnikumiherya ohaawa. Khiivo ekuvernu ewenrye omaliha ikhotto, ikrime, ohikhala exariya ni iretta.
Muluku Onrowa Olokiherya Sai Itthu Sihononen’ye?
Biibiliya onnileiherya wira moohipisa, elapo esya enirwa, Muluku onooruuha exariya. (2 Pedru 3:13) Yaale anithanla orumeela saana otaphuwa waya yaaphentaka akhwaaya ni Muluku, tanrowa okhala mParayiisu.—Otumererya 30:15, 16, 19, 20.
Biibiliya onihimya-tho wira: ‘nihiku na ophukeliwa’ nenno nnaattamela, Muluku onrowa omala-maliha ohaawa vamosa ni ale anikumiherya. (2 Pedru 3:7) Nuumala-vo, Muluku onrowa omuthanla Mwene Yesu Kristu wira aalamuleleke apinaatamu owiiwelela. (Daniyeli 7:13, 14) Nto exeeni omwene wa Yesu onrowa aya opaka? Biibiliya oni: “Vano atthu òmàla anoreriwa vathí-va anokhala-mu ni murettele womalela”.—Esalimo 37:11.
Mwene owo a wiirimu Yesu, onrowa omaliha iretta, wuuluvala, ni okhwa waakumiheriwe ni atthu ale yaamurukunuwenle Yehova yoowo ori ‘maphattuwelo èkumi’. (Esalimo 36:10) Yesu onrowa waapenuxa aretta othene yaale aneemya olamulelo awe woophenta. Biibiliya onihimya wira moolamuleloni mwa Yesu anatiri ala animwiiraneya:
◼ “Khavo-tho onkela ohimya wira: ‘Miyo ki muretta’: atthu othene anoleveleliwa sottheka saya”.—Yesaya 33:24.
◼ “[Muluku] owo onopuputtha maithori aya othene: Khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wisupulula 21:4.
Khahiyo etthu yoolipiha osuwela wira moohipisa Muluku onoopaka sileihenrya awe amala-malihaka ohaawa wotheene? Nto, ohaawa vano oniiraneya ohiniirihe oyeleela omuroromela wahu mulipa oniiwa mavekelo ahu, nto nihaana wiimananiha vanceene omuroromela.
Tthiri Muluku ookhala. Owo onniwiiwani okathi oninvekela anyu muxankihen’ye ene. Nave owo ohinkheliwa vanceene ophiya okathi woomala-maliha ohaawa wotheene.