Ohaawa Wotheene wa Apinaatamu Onoomala Moohipisa!
Khino nyuwo montoko wiikoha so: ‘Nthowa xeeni atthu vanihaawa aya vanceene?’ Mu iyaakha ikonto sinceene, apinaatamu annihaawa vanceene mwaha wa ikhotto, osikhini, ihasara, ecrime, ohikhala exariya, iretta, ni okhwa. Mu eseekulu 20 evinre, apinaatamu aahaawa vanceene ovikana khalai. Niireke wira ohaawa nno wotheene onoomala?
Waakhula woohakalaliha ti woowi aayo, ohaawa onoomala moohipisa! Biibiliya, Nuulumo na Muluku, onihimya wira: “Atakhali anorimela nananoru. . . . Vano atthu òmàla anoreriwa vathí-va: anokhala-mu ni murettele womalela”. Mpakha mahiku makavii atthu oomaala, vanrowa aya okhalaka vathii-va ni murettele? “Anaxariya animwakhela elapo yohiyeriw’aya: anrowa okhalaka-mo mahiku othene”.—Esalimo 37:10, 11, 29.
Nuumala Muluku omaliha otakhala ni ohaawa, elapo enrowa otatuxiwa okhala eparayiisu. Nto atthu anrowa okhalaka moohakalala ni ekumi yooloka okathi wotheene. Nuulumo na Muluku naahihimya vahinatthi wira: “[Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”.—Wisupulula 21:4.
Mu elapo eyo esyaa, hataa alipa-ookhwa anrowa ottikiheriwa okumi wira yaakhele mareeliho awo. Tivonto, “ale òrera murima n’ale òtakhala murima, anohihimuwa mokhwani”. (Miteko s’Arummwa 24:15) Mwaha wa nlipelelo nno na ohihimuwa, Yesu Kristu aahimuhimeerya mutakhali ole aarukununxe murima ni omwaamini wira: “Nyuwo munrowa okhala ni miyo mParayiisu”.—Luka 23:43, Tradução do Novo Mundo.
Ohaawa Okhumelenle Sai?
Okhala wira Muluku aahilakela waavaha apinaatamu itthu iyo sooloka, nthowa xeeni Muluku vaneemererya awe ohaawa okhumelelaka? Nthowa xeeni vaneemererya awe ohaawa ovikanihaka nlelo?
Vaavo Muluku vaapattunxe awe Adamu ni Eva, Owo aahaapaka ni erutthu yooloka ni muupuwelelo ooloka. Muluku aahaakuha mujardim mooreera ni aahaavaha muteko woohakalaliha ovara. Biibiliya onihimya wira: “Vawehalyawe itthu sothene sapattunxyawe, Muluku ahòna wira sothene sari sorera sana”. (Maphattuwelo
1:31) Vaakhanleke wira Adamu ni Eva yaahimwiiwelela Muluku, awo yaarowa waayaraka anamwane oomalela. Vano elapo yotheene yaarowa okhala eparayiisu, memmo atthu yaarowa aya okhalaka ni murettele ni ohakalala okathi wotheene.
Muluku aahaavaha Adamu ni Eva othanla mootaphuwa, etthu yootepa oreera, ntoko mpantta wa ikhalelo sa omutthu aya. Awo khiyaapakiwe ntoko maakina anivara muteko yoowo opakeliwa aya paahi. Masi, wira avikaniheke okhala oohakalala yaahaana ovarihela muteko saana othanla waya mootaphuwa, yiiwelelaka malamulo a Muluku. Ntoko Muluku sinihimya awe wira: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara”. (Yesaya 48:17) Ovarihela muteko moohiloka othanla mootaphuwa waarowa okumiherya maxakha, okhala wira apinaatamu khapakiwe wira akhumeleke saana voohilipana Muluku. Biibiliya onihimya so: “Mutthu khansuwela emalelo awe: owo khanwerya wettiha mavalo awe”.—Yeremiya 10:23.
Mooriipiha murima, axitiithi ahu oopacerya yuupuwela wira yanwerya okhumela saana voohilipana Muluku. Masi vaavo vahiiwelenly’aya olamulelo wa Muluku, owo kheemerenrye wira avikaniheke okhala oomalela. Siiso awo yaahipacerya otteettheya, nto wanikisa waya yaahuuluvala ni akhwa. Okhala wira hiyo na anaaya, nto noorava ohimalela ni okhwa.—aRoma 5:12.
Mwaha Muulupale: Tanii Oniphwanelela Olamulela?
Nthowa xeeni Muluku ohaapwetenxa awe Adamu ni Eva khimpaka mulopwana ni muthiyana mukina? Nthowa noowi waahivaanyihiwa ophwanelela wa Muluku olamulela olumwenku wotheene, eyo piiyo, ehakhi awe ya olamulela. Nto nikoho naari nna: Tanii oniphwanelela olamulela, ni tanii onilamulela saana? Ohiya vo: Niireke wira apinaatamu yanwerya okhumela saana ahilamuleliwaka ni Muluku? Mwaha wa Muluku waavaha okathi woophiyerya wira apinaatamu yiilamuleleke, owo aarowa wooniherya moomalela ele eri yooloka: olamuleliwa ni Muluku aahiiso wiilamulela. Okathi waarowa ovahiwa apinaatamu waahaana okhala woophiyerya wira yeererye mithinto sotheene sa epoliitika, sa makhalelo a atthu, sa weettiha muhakhu, ni sa itiini, vohihooleliwa ni Muluku.
Nto exeeni ekhumelenle mwaha wa apinaatamu othanla wiilamulela? Mu iyaakha ikonto sinceene sa olamulelo wa apinaatamu, atthu anootepa ohaawa. Eseekulu 20 evinre, atthu aahaawa vanceene ovikana khalai. Atthu imilyau sinceene ahookotthiwa okathi wa Ekhotto ya Nenli ya Olumwenku Wotheene. Nto atthu oovikanaka imilyau 100 ahookhwa mukhottoni. Ecrime ni ohaaxana soosareya mulaponi. Olyiwa mirette sootakhala ohuulaana elapo yotheene. Iretta sinraviwa moorupihanani sinnaaphwanya atthu anceene. Khuta mwaakha annookhwa atthu imilyau miloko sinceene mwaha wa etala ni iretta. Okumi wa vatthokoni ni makhalelo ooloka aahononeya mapuro otheene. Khiivo ekuvernu ya pinaatamu eniwerya omaliha mixankiho iya. Khiivo ekuvernu ewenrye omaliha wuuluvala, iretta ni okhwa.
Mukhalelo wa apinaatamu orii ntoko siisaale Biibiliya saahimmye awe vahinatthi sa okathi ahu ola. Nuulumo na Muluku ninnihimya mahiku ahu ala okhala “okathi wokiserya” a mukhalelo ola wa itthu, ni wira “anophiya mahiku òxanka”. Vano, ntoko saahimmya awe Biibiliya, “atthu òtakhala murima ni òwòtha anovira etepaka”.—2 Timótheyo 3:1-5, 13.
Ohaawa Ohanle Vakhaani Omala
Itthu sotheene siniiraneya, sinooniherya wira nrii vakhiviru vaavo mukhalelo wa olamulelo wa apinaatamu voohilipana Muluku, vanrowa awe omala. Nto vaasuwanyeya wira, olamulelo wa apinaatamu wohihooleliwa ni Muluku, khonkhala-khala okhumelaka saana. Paahi olamulelo wa Muluku toniwerya oruuha murettele, ohakalala, ekumi yooloka, ni okumi woohimala. Tivonto, ohanle okathi vakhaani wira Yehova omalihe otakhala ni ohaawa. Moohipisa Muluku onrowa ophuka miyaha sa atthu omalihaka mukhalelo ola wotheene woohiloka wa itthu.
Eprofecia ya Biibiliya enihimya wira: “Mahiku òmwene owo [wa apinaatamu anilamulela olelo va], Muluku a wirimu onokumiherya omwene [wa wirimu] ohinrowa omala. . . . Omwene owo onohonona n’upwetexa omwene wothene wa mulaponi [onilamulela olelo va], numalá onrowa okhalaka wa mahiku othene”. (Daniyeli 2:44) Yowiixuttiha yuulupale ya Biibiliya ti yoowi: Yehova toniphwanelela olamulela olumwenku wotheene, aahiiso torina ehakhi ya olamulela, orumeelaka Omwene awe wa wirimu. Vaavo vaahimya awe sa ethoonyeryo yuulupale ya “okathi wokiserya”, Yesu aalavunle so: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.—Matheyo 24:14.
Waphiya vale wanikisa, tanii onrowa woopowa? Biibiliya onaakhula so: “Mutthu òloka onophwanya elapo y’okhala: mutthu àxariya onokhala mulaponi-memmo. Vano atthu òtakhala murima anopwetexiwa”. (Miruku 2:21, 22) Atthu ooloka taale aniixutta yotthuna ya Yehova ni aneettela. Yesu Kristu aahimmye wira: “Ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Tthiri, “makhalelo ala anomala vamosá . . . nto ole onettela otthuna wa Muluku onokhala mahiku othene”.—1 Yohani 2:17.
Voohikhala wira varii nthoonyeryo nikina, soromoliwa sotheene sa mBiibiliyani vasulu, siri sa Biblia—Solempwa Sowarya.