Vaavo Vaniwereiwa Awe Mutthu Mmosa Vatthokoni

1, 2. Satana aarumenle sai ehasara ni eretta wira eererye ohonona ororomeleya wa Yobi?

TTHIRI, Yobi ohaana othokoreriwa okhala mulopwana yoole aarina etthoko yoohakalala. Olavulaka sa Yobi, Biibiliya onihimya wira “ari mutokwene mulupalexa wavikana atthu othene a ilapo s’onikhuma nsuwa”. Yobi aarina anamwane muloko, alopwana athanu nanli ni athiyana araru. Nave-tho, aahikhalana muhakhu waaphiyerya okhapelela saana etthoko awe. Etthu yootepa otthuneya ti yoowi owo aanihoolela etthoko awe mmukhalelo womunepani, ni aanaakhapelela anaawe wira akhale ooloka ohoolo wa Yehova. Itthu iya sotheene saahikhaliherya wira etthoko ele ekhale yowiiraana ni yoohakalala.​—Yobi 1:1-5.

² Mukhalelo ola waarina Yobi wahooniwa ni Satana, yoowo ori nwanani muulupale a Yehova Muluku. Satana, yoole okathi wotheene oniphavela wira aahapuxe arumeyi a Muluku, aahimutuphela Yobi orweela mwa opwetexa etthoko awe yoohakalala. Nuumala vo, Satana “ahikelela omuhaxa Yobi ni makhwatta ònanarexa, yakhunela erutthu awe yothene okhuma inawu mpakha mmuruni”. Nto, Satana aahirumeela ehasara ni eretta wira ohonone ororomeleya wa Yobi.—Yobi 2:6, 7.

3. Tisivi saari mikhalelo sa eretta ya Yobi?

³ Biibiliya khonihimya muthinto wa eretta yaarina Yobi. Masi, onninleela makhalelo a eretta ele. Erutthu awe yaakhuneeliwe ni makhwatta, nikhuli nawe naanithaleyasa khiyakhuma oru. Iphumu saakhuma mwaano mwa Yobi saari soohiirya, nto erutthu awe yaaninkha. Aanoona owerya vanceene. (Yobi 7:5; 19:17; 30:17, 30) Owereya wamphwannye Yobi waahimwiiriha okilaathi vattuurwani khikuxa nivali wira iisuneke. (Yobi 2:8) Tthiri, eyo yaari etthu yoomoriha ikharari!

4. Muxankiho xeeni ikwaha sinceene onikumana aya itthoko sotheene?

⁴ Mwaarowa opaka exeeni vaakhanle wira moowereiwa siisaale? Olelo va, Satana khonaakumiherya arumeyi a Muluku eretta ntoko ele ya Yobi. Masi, mwaha wa okhala alipa-oottheka, sooxankiha sa okumi, ohononeya wa mapuro anikhala ahu, hiyo pooti owehereryaka ikwaha sikina, mutthu mmosa a vatthokoni owereiwa. Hata niikhapelelaka wira nsyake owereiwa, otheene ahu pooti owereiwa, nnaamwi atthu vakhaani arowaka owereiwa ntoko Yobi. Vaavo mutthu a vatthokoni vaniwereiwa awe, tthiri eyo pooti okhala muxankiho. Tivonto, nrowe noone moota Biibiliya onnikhaliherya awe owanana nwanani ola onaaxankiha apinaatamu okathi wotheene.​—Musuweli 9:11; 2 Timótheyo 3:16.

MUNOONELA SAI OWEREIWA WA MUTTHU VATTHOKONI?

5. Exeeni enipaka aya atthu a vatthokoni vaavo mmosa vaniwereiwa awe eretta yaamukhaani?

⁵ Ohononeya wa makhalelo alimalenle ahu, moohicikha etthu ene enikumiherya, onnixankiha, vanceenexa akhala wira muxankiho owo onikhumelela mwaha wa owereiwa mu okathi munceene. Hata eretta yaamukhaani, enivekela marukunuxo ni wiimananiha. Atthu a vatthokoni ari akumi ahaana omaala wira ole oniwereiwa omumule. Waaniheryasa atthu awo ahaana ohiya ovara miteko sikina. Hata vari siiso, itthoko sinceene anamwane annoona othunku vaavo vaniwereiwa aya mukhw’aya aahiiso namuyari aya, nnaamwi ikwaha sikina vatthuneyaka owuupuxerya opaka eyo. (aKolosi 3:12) Voohimya sa eretta yaamukhaani, atthu a vatthokoni mweephattu annisuwela yoowiira. Ohiya vo, khuta mutthu a vatthokoni onniwehererya othokoreriwa mooreerela akhala wira mutthu owo onoowereiwa.​—Matheyo 7:12.

6. Moonelo xeeni onaaphwanya atthu a vatthokoni vaavo mutthu mukina vaniwereiwa awe eretta yuulupale yoopisa?

⁶ Nto, sai akhala wira eretta eyo ti yoowunnuwa ni enniwiiriha atthu a vatthokoni ohiya miteko saalimalenle aya ovara? Mwa ntakiheryo, sai akhala wira mutthu mmosa oophwanyiwa supiyaani, aahiiso orina eretta eniihaniwa Alzheimer, wala onixankiheya ni iretta sikina? Aahiiso sai akhala wira mutthu oniwereiwa eretta ya muupuwelo, ntoko ele eniihaniwa esquizofrenia (eretta enimwiiriha mutthu okhwa onepa)? Mweephattu hiyo ninnimoonela othunku vaavo vaniwereiwa awe ole onimphenta ahu. Masi, othunku owo pooti otthariwaka ni itthu sikina. Atthu otheene a vatthokoni annixankiheya vanceene, ni otaphuwa waya onnivukuwa mwaha wa ole oniwereiwa, nto pooti opacerya oriipiwa murima. Vano awo pooti wiikoha so: “Nthowa xeeni etthu ela enikiiraneela aya miyo?”

7. Owereiwa wa Yobi wawiirinhe amwaarawe opaka exeeni, ni woonasa wene exeeni yaaliyanle aya?

⁷ Etthu emosa-ru yaahixankiha muupuwelo wa mwaara a Yobi. Muupuweleke wira mwaarawe aahipweteiwa anaawe. Vaavo itthu iye siiraneya aya, moohaaniherya oxanka wawe waanincerereya. Wanikisa waya, vaavo vanweha awe iyawe yoowo aari mukumi ophwanyiwaka eretta yootakhala ni yoohiirya, woonasa wene aahipweteiwa etthu yaavikana ihasara iye, eyo piiyo, wataana waarina awe ni Muluku vamosa ni iyawe. Biibiliya onihimya wira: “Mwar’awe [Yobi] ahimuhimerya wira: Ni nlelo munnikhalela nthiti omuttittimiha Muluku? Exeni ehininvehanyu Muluku, wira mukhwé!”​—Yobi 2:9.

8. Vaavo mutthu a vatthokoni vaniwereiwa awe vanceene, yoolepa xeeni enrowa waakhaliherya ale ari akumi okhalana muupuwelo wooloka?

⁸ Atthu anceene anikhala ooxankiheya, hata oonanariwa, vaavo mootutuxerya itthu sinrukunuwa aya mwaha wa mutthu mukina oniwereiwa. Masi, muKristau onuupuwelela oratteene, ohaana woona wira yowiiraneya eyo eninvaha okathi wira ooniherye ophenta wawe wekeekhai. Ole omphenta neekeekhai “t’òvilela, t’òwarumela akhw’awe . . . [ni] khamphavela murerelo awe . . . onnakhurunuwela atthu othene, onnakupali atthu othene, onniroromela vohihiyererya, onnivilela sothene”. (1 aKorinto 13:4-7) Tivonto, ohiya paahi weemererya muupuwelo woohiloka onilamulelaka, ti vootthuneya wiimananiha vanceene wira niwerye oxintta muupuwelo owo.​—Miruku 3:21.

9. Vaavo mutthu vaniwereiwa awe vanceene, yoororomeliha xeeni eniwerya waakhaliherya momunepani ni mmuupuweleloni atthu a vatthokoni-vo?

⁹ Vaavo mutthu mmosa vaniwereiwa awe vanceene, exeeni eniwerya opakiwa wira osukiwe mukhalelo womunepani ni okhala saana wa etthoko eyo? Ekeekhai wira khuta eretta enivekela okhapeleliwa ni olooliwa mooreerela, ni khivaarowa okhala vooloka orumeela eliivuru ela wira ntumererye enamuna yotheene ya oloola, ekhale ele ya olooliwa vate aahiiso oxipitaali. Masi, mmukhalelo womunepani Yehova ‘onnavenxa ale ammora’. (Esalimo 145:14) Mwene Davidi aalempe so: “Òreriwa t’ale anakhapelela alipa-òthoiwa: nihiku n’ohawa Apwiya anowòpola. Apwiya animwasuka, animwavaha ekumi. . . . Apwiya animwakhapelela okathi w’ohawa”. (Esalimo 41:2-4) Yehova onnaasuka arumeyi awe mmukhalelo womunepani, hata okathi yoole anikhulumuwa aya muupuwelo. (2 aKorinto 4:7) Atthu anceene aniwereiwa iretta suulupale vatthokoni vaya, anniromola masu a nasalimo wira: “Miyo nkirere otakhaliwa: mukivahe-tho ekumi, ntoko sikihimenryanyu”.​—Esalimo 119:107.

MUKHALELO WOOLOKA ONIVONIHA

10, 11. (a) Etthu xeeni enitthuneya opaka wira etthoko ekhumele saana? (b) Muthiyana mmosa eettihenrye sai owereiwa wa iyawe?

¹⁰ Muruku mmosa wa Biibiliya onihimya wira: ‘Munepa wa mutthu onnivaha ikuru okathi woowereiwa, masi munepa wowooceya, tani onrowa ovaha ikuru wira ovilele?’ (Miruku 18:14, NM) Okhala oothanana pooti wiiniha murima wa atthu a vatthokoni, vamosa ni ‘munepa wa mutthu’. Masi, “murima womàla okumi w’erutthu”. (Miruku 14:30) Okhumela saana wa etthoko aahiiso nnaari mu weettiherya eretta yuulupale, onlipa vanceene ni mukhalelo aahiiso munepa onooniherya aya atthu a vatthokoni-vo.​—Nwehe Miruku 17:22.

¹¹ Muthiyana mmosa muKristau aahaana ovilela ohiwerya wa iyawe mwaha wa eretta yuulupale, yaamukhumelenle nuuvira iyaakha thanu namosa athelanne ene. Onnilavula oriki: “Malavulelo a iyaka yahaakanyereya vanceene, ni vaanixankiha olavulana. Kaahaana wiimananiha vanceene wira kiiwexexe ele yaaphavela awe ohimya”. Nto, nkahaya muupuwelele owereya ni oxanka wamphwanya iyawe. Exeeni anamathelana ale yaapanke aya? Nnaamwi yaarakamenle opuro waari muloko wa eKristau, murokora ola aahiimananiha wira iikhapeleleke mmukhalelo womunepani, ovikanihaka osoma soohimmwa isya siri mu irevista A Sentinela ni Despertai! Irevista iya saahimulipiha momunepani wira iikhapeleleke owo ni iyawe mpakha okhwa wa iyawe, nuuvira iyaakha xexe.

12. Ntoko Yobi, okhaliherya xeeni ikwaha sikina onivaha awe ole oniwereiwa?

¹² Yobi taavikaninhe ororomeleya nnaamwi oryeene taawereiwa. Yobi aahimukoha mwaarawe wira: “Navahiwaka sorera, ninnakhela mmatatani mwa Muluku: exeni ehinakhelelahu sotakhala mmatatani mwawe?” (Yobi 2:10) Ti maana aya mwiixutti Yakobo aamuhimmye awe Yobi okhala ntakiheryo noolokexa na opixa murima ni ovilela! Mu epaphelo ya Yakobo 5:11, hiyo ninsoma so: “Nyuwo muhìwa ohimmwaka ovilela wa Yobi: nave mosuwela sorera Muluku sanvahalyawe wokiseryani. Tthiri Muluku t’òkhupanyerya ni t’òsareya othunku”. Moolikanasa, olelo va, mwaha wa ole oniwereiwa wooniherya mukhalelo wooloka, ikwaha sinceene onnaakhaliherya atthu akina a vatthokoni okhalana muupuwelo wooloka.

13. Wiilikanyiha xeeni ohintthuneya opakiwa ni etthoko erina mutthu oniwereiwa?

¹³ Atthu anceene aniwanana eretta vatthokoni, anneemererya wira wanipacerya vannixankiha weettiherya mwaha owo. Nave-tho, anihimya wira moota atthu anoonela aya mukhalelo owo, ti vootthuneya vanceenexa. Pooti okhala vooxankiha wanipacerya opaka marukunuxo ni olokiherya moota woweetta vano. Masi akhala wira mutthu onniimananiha tthiri, owo pooti osuwela moota woweettiherya mukhalelo owo okhumelenle. Nto, khahiyo vooloka wiilikanyiha ni ale ahirina muretta vatthokoni, nuupuwelaka wira mukhalelo aya ti wooloka ni wira ‘hiyo ntakhaliwe!’ Mwekeekhai, khuuvo onsuwela tthiri mixankiho siniwiiraneela atthu akina. MaKristau otheene annimaaliheya ni moolumo a Yesu oowi: “Nyuwo othene mukhulumunwe, mulemeliwene muritti mulupale, mukirwele miyo: komumuliheni”.​—Matheyo 11:28.

OPWEHA KHUTA ETTHU OPURO AYA

14. Moota xeeni khuta etthu enrowa aya opwehiwa opuro aya?

¹⁴ Okathi mutthu vaniwereiwa awe vatthokoni, ti vooloka wuupuwela moolumo oowuupuxeriwa anihimya wira: “Yattá anvaha miruku sorera, miteko iyo sinokelela oholo”. (Miruku 15:22) Niireke wira atthu a vatthokoni-vo yanwerya okilaathi poromosa wira alavulase voohimya sa ele ekumihenrye eretta eyo? Tthiri vaamureerela opaka eyo munvekelaka Muluku ni mphavelaka malakiheryo mu Nuulumo na Muluku. (Esalimo 25:4) Exeeni enitthuneya olavuliwa okathi owo? Tthiri, sookhala soothanla sinitthuneya opakiwa ntoko murette woolya, ni musurukhu onitthuneya. Vanceenexa tani onrowa omuthokoreryaka? Atthu akina a vatthokoni anrowa okhaliherya sai? Murehereryo opakiwe onrowa onvara sai khuta mmosa a vatthokoni? Sootthuneya somunepani ni itthu sikina sinrowa okhapeleliwa sai?

15. Okhaliherya xeeni onivaha awe Yehova wa itthoko seiye sirina mutthu oniwereiwa?

¹⁵ Ovekela olakiheriwa ni Yehova, wuupuwelela Nuulumo nawe, ni otthara ephiro enooniheriwa ni Biibiliya, ikwaha sinceene onnikumiherya mareeliho anivikana ale naawehererya ahu. Ikwaha sikina ole oniwereiwa pooti ohivona. Masi omuroromela Yehova ikwaha sotheene onnikumiherya mureerelo mmikhalelo sotheene. (Esalimo 55:22) Nasalimo olempe so: “Vano nyuwo, Muluku, mokilipiha n’ukiphenta wanyu. Ovelavela n’uxanka wahìniha murim’aka: vano nyuwo mokihakalaliha, khukitteliha murima”.​—Esalimo 94:18, 19; Nwehe-tho Esalimo 63:6-8.

MOOTA WOWAAKHALIHERYA ANAMWANE

16, 17. Itthu xeeni siniwerya opakiwa vaavo vanivaanela anyu ni anamwane okathi oniwereiwa awe munnaya?

¹⁶ Owereiwa mutthu vatthokoni eretta yuulupale, pooti waakumiherya muxankiho anamwane. Ti vootthuneya anamuyari waakhaliherya anaaya wiiwexexa itthu sinitthuneya opaka mwaha wa ele ekhumelenle. Akhala wira ole oniwereiwa mwaana, nto annawe ahaana osuwelihiwa wira okhapelela ni othokoreriwa onivahiwa awe, khontaphulela wira anamwane akina khamphentiwa vanceene. Ohiya waahiya yiivahaka nthowa aahiiso wiinana n’ule oniwereiwa, anamuyari anoowerya waakhaliherya anamwane wira yaataaneke ni aphentaneke vanceene, ni wira akhaliheryeke miteko sinivariwa moophavela ophukiwa muxankiho onikumiherya eretta.

¹⁷ Akhala wira anamuyari animwaatthokiherya anaaya mukhalelo wa ole oniwereiwa, eyo enimwaakhweiherya wiiwexexa, ohiya waalakiherya itthu soovila ni moota onrowa awe olooliwa oxipitaali. Wira siiso onimwaakhaliherya osuwela moota sinoona awe ole oniwereiwa. Akhala wira anamwane ale akina animoona wira ole oniwereiwa khoniwerya ovara miteko awo siniwerya aya, vanimwaakhweela wooniherya ‘ophenta ntoko axinna’ vamosa ni “ikharari”.​—1 Pedru 3:8.

18. Anamwane oowunnuwela anrowa okhaliheriwa sai wiiwexexa mikhalelo sinikhumelela mwaha wa owereiwa, ni moota xeeni ela enrowa aya waakhaliherya?

¹⁸ Anamwane oowunnuwela ahaana okhaliheriwa osuwela wira mixankiho sookhala, ni wira atthu otheene a vatthokoni ahaana wiimananiha. Okhala wira anamuyari ahaana opaka ekonsulta oxipitaali aahiiso othuma murette, waaniheryasa pooti ohiwerya opaka sotheene siniphavela anaaya. Niireke wira anamwane anrowa onyoonyiheya yuupuwelaka wira anookhoottiheriwa? Aahiiso niireke wira anrowa wiiwexexa mukhalelo owo ni opaka ele enitthuneya? Sotheene sinlipa ni moota sinithokoreriwa aya myaha iyo ni moota atthu a vatthokoni sinoonela aya. Tthiri, mu itthoko sinceene owereiwa mutthu wookhaliherya wira anamwane yiixutte otthara muruku wa Paulo, oni: “Ehikhale etthu enìranyu mphavelaka oxinttana walá wittottopa: nto mwiyeviheke, khula mutthu awonelaka vatthu akhw’awe vowivikana mmansawe. Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”.​—aFilipi 2:3, 4.

MOOTA NNOONELA AHU INAMUNA SA OLOOLIWA OXIPITAALI

19, 20. (a) Muritti xeeni orina aya ahooleli a itthoko vaavo mutthu mmosa a vatthokoni vaniwereiwa awe? (b) Nnaamwi ehikhanle eliivuru eniixuttiha moota wooloola, moota xeeni Biibiliya onilakiherya awe moota wooloola iretta?

¹⁹ MaKristau arina muupuwelelo woweereryaneya khanikhootta olooliwa oxipitaali, akhala wira olooliwa iwo khontthekela nlamulo na Muluku. Vaavo vaniwereiwa awe mutthu vatthokoni, anniphavela vanceene nikhaliheryo wira ole oniwereiwa ovone. Masi, vanitthuneya ovarerya olooliwa iwo, okhala wira ikwaha sinceene oloola wa matotoro pooti ovirikana. Nave-tho, mahiku ala sookhala iretta isya ni sooxankiha, seiyo nlelo sihinisuweliwa oratteene moota wooloola. Nave-tho ikwaha sikina onnixankiha omphwanya anaalisi ookhalela. Nto, muKristau onrowa opaka exeeni?

²⁰ Nnaamwi namalepa mmosa a Biibiliya aari totoro, ni murummwa Paulo anvanhe miruku Timootheyo mmyaha sa oloola, Soolempwa sinnivaha malakiheryo oomunepani ni a mweettelo wooloka, masi khahiyo eliivuru enivaha malakiheryo a moota wooloola iretta. (aKolosi 4:14; 1 Timótheyo 5:23) Tivonto, mmyaha sa olooliwa, maKristau anihoolela itthoko tarina muritti wa opaka soothanla soweereryaneya. Waaniheryasa, awo pooti ophavelaka osuwela moonelo wa matotoro makina. (Nwehe Miruku 18:17.) Mwekeekhai ahaana ophavelaka enamuna yooloka ya oloola mmureerelo wa mmusi aya oniwereiwa, ni anceene anniphavela olooliwa iwo eriyari ya matotoro ooxipitaali. Akina aniphavela inamuna sikina sa olooliwa. Nave-tho, ela etthu enithanla awe mutthu mwaneene. Nto, okathi onithokorerya aya myaha iya, maKristau annivikaniha othokorerya ‘masu a Muluku okhala muthuko oniwettiha ni onamwalela ephiro envira aya’. (Esalimo 119:105) Annivikaniha otthara malakiheryo ari mBiibiliyani. (Yesaya 55:8, 9) Mwekeekhai, annisyaka ophavelasa olooliwa onihela muhina minepa sootakhala, ni olooliwa onihonona malamulo a Biibiliya.​—Esalimo 36:10; Miteko s’Arummwa 15:28, 29; Wisupulula 21:8.

21, 22. Moota xeeni maama mmosa a wAsia aatthanre awe nlamulo na Biibiliya, nto yoothanla awe yoonihenrye sai okhala yooloka?

²¹ Nkawehani ele yiiranen’ye ni muthiyana a wAsia. Okathi aapacenrye awe wiixutta voohimya sa Biibiliya, orweela mwa Yoosoma ya Biibiliya ni Anamoona a Yehova, ohiphin’ye okathi, owo aahimuyara mwaana mwaamuthiyana aalemela waattamela ekiilu emosa nnimeya. Maama ole aahixanka mwaha woowi totoro aamulenle wira mwaana ole khaarowa wunnuwa saana ni khaakhala-khala eettaka. Totoro aamulakihenrye wira amuhiye nipuro ninkhapeleliwa anamwane arina muxankiho moota ole. Iyawe khaasuwela yoowiira. Nto tani aarowa awe onvekela miruku?

²² Maama owo onihimya wira: “Kinnuupuwela ele yiixuntte aka mBiibiliyani wira ‘anamwane nivahiwe ni Muluku: nayaraka an’ihu, noreriwa’”. (Esalimo 127:3) Maama ole aahithanla orowana owaani mwanawe wira amukhapeleleke. Wanipacerya waanivila, masi okhaliheriwaka ni apatthani awe maKristau a muloko wa Anamoona a Yehova a muttetthe ole, maama ola aahiwerya omukhapelela mwanawe onvahaka ele yaari yootthuneya. Nuumala iyaakha 12, mwaana ole aaniwerya orowa Osalau ya Omwene, khiyahakalala ni amiravo akina. Maama awe onihimya wira: “Kinnixukhurela vanceene malamulo a Biibiliya, yaawo akikhalihenrye opaka etthu yooloka. Biibiliya ookikhaliherya ovikaniha okhalana muupuwelelo wooloka ohoolo wa Yehova Muluku, ni osyaka oriipiwa murima mwaha wa opaka yoothanla yoohiloka”.

23. Nimaaliho xeeni Biibiliya onaavaha awe ale aniwereiwa, ni ale anaakhapelela?

²³ Iretta sinrowa omala. Profeta Yesaya aahihimya wira okathi owo “khavo-tho onkela ohimya wira: ‘Miyo ki muretta’”. (Yesaya 33:24) Natiri owo onrowa waakhwanihereya moohipisa mu elapo esya yeeyo enaattamela. Masi, vaavo vaniwehererya ahu okathi owo, olelo va ninniwereiwa ni okhwa. Etthu yooreera tiila: Nuulumo na Muluku ninninivaha malakiheryo ni onikhaliherya. Malamulo a mweettelo anivaha Biibiliya annivareleya muteko okathi wotheene, ni annivikana muupuwelo wa apinaatamu oottheka, yoowo onimakela orukunuwa. Tivonto, mutthu a miruku onneemererya ele enihimya nasalimo wira: “Soruma s’Apwiya ti sorera: sinnivaha ekumi ya nanano. Molumo Àpwiya t’òroromeleya: annavaha miruku atthu òwiyeviha. . . . Solamula s’Apwiya ti s’ekekhai: sothene iya ti sa xariya. . . . Kettelaka seiyo, kinnireriwa [vanceene]”.​—Esalimo 19:8, 10, 12.