Yoosoma 10
Sowiira Sinimunanara Muluku
Tuuvi onitthuneya okhala moonelo anyu mwa itthu seiye Muluku sinihimya awe okhala sootakhala? (1)
Mithinto xeeni sa orupihana sikhanle soohiloka? (2)
MuKristau ooneleke sai wootha? (3), owiira axooku oohiloka? (3), wiiya? (3), owali? (4), onammunepani? (5), ni ohapaliwa? (6)
Mutthu onrowa owerya sai ohiya opaka itthu sootakhala? (7)
1. Arumeyi a Muluku anisiveliwa opaka ele eri yooloka. Masi, awo ahaana-tho wiixutta onyokha itthu sootakhala. (Esalimo 97:10) Ela entaphulela onyokha sowiira seiye sinimunanara Muluku. Nto sowiira xeeni?
2. Onamuttompe: Orupihana ohithelanne, oraruwa, orupana mwaamunama, orupihana ammusiru ni orupihana wa alopwanaru aahiiso athiyanaru, sowiira iya sotheene siri itampi suulupale wa Muluku. (Onamukuttho 18:6; aRoma 1:26, 27; 1 aKorinto 6:9, 10) Akhala wira mulopwana ni muthiyana anikhala vamosa ahithelanne, awo ahaana ovalanasa aahiiso othelana moottharihela malamulo.—aHéberi 13:4.
3. Wootha, Axooku oohiloka, Wiiya: Yehova Muluku, khonootha. (Tito 1:2) Atthu yaale amphavela weemereriwa ni Yehova ahaana osyaka wootha. (Miruku 6:16-19; aKolosi 3:9, 10) Khuta xooku oohiloka toosareya nrima. Ti maana aya maKristau ahimmwiira aya xooku a muthinto ori wotheene woohiloka ntoko ilotariya, axooku a ikhavalo ni bingo. (aÉfeso 5:3-5) MaKristau khaniiya. Khanthuma itthu asuwelaka wira ti sowiiyiwa, nnakhala khankuxa itthu sa atthu akina aheemereriwe.—Okhuma 20:15; aÉfeso 4:28.
4. Oviruwa Vanceene ni Owali: Oviruwa vanceene onnimwiiriha mutthu opaka itthu sootakhala. (Maphattuwelo 4:5-8) Mutthu oowali khonwerya okhala mpatthani a Muluku. (Esalimo 11:5; Miruku 22:24, 25) Wunla ikuhu aahiiso oliverya yootakhala mwaha wa itthu soohiloka siireliwa ahu, etthu yoohiloka.—Miruku 24:29; aRoma 12:17-21.
5. Okhwiri ni Onammunepani: Atthu akina annirumeela owerya wa minepa sootakhala wira aloole iretta. Atthu akina annaarihela okhwiri awanani aya aphavelaka waaphwanyiha oretta aahiiso owiiva. Ole oniiriha itthu iyo sotheene wiiraneya ti Satana. Ti maana aya maKristau vahinvara aya itthu iyo. (Otumererya 18:9-13) Omwaattamela Yehova tekhanle yowaakiherya yoororomeleya akhala wira atthu akina aniphavela onrihela okhwiri.—Miruku 18:10.
6. Ohapaliwa: Khahiyo vootthekeya owurya vakhaani eviinyu, otheka aahiiso soowurya sikina soowaawa. (Esalimo 104:15; 1 Timótheyo 5:23) Masi owurya wootepana aahiiso ohapaliwa ti vootthekeya vamaithoni va Muluku. (1 aKorinto 5:11-13; 1 Timótheyo 3:8) Owurya wootepana onoowerya ohonona ekumi anyu ni oruuha mixankiho vatthokoni vanyu. Ohiya vo, onowiirihani okhala oowaakuva okuxeya ni soweehererya sikina.—Miruku 23:20, 21, 29-35.
7. Atthu yaale anivara itthu seiye Muluku sinihimya awe wira ti sotakhala khanrowa ‘okela momweneni mwa Muluku’. (aGalasia 5:19-21) Vakhala wira tthiri muniphavela omphenta Muluku ni omusiveliha, nyuwo munoowerya ottharuwa sowiira iyo. (1 Yohani 5:3) Mwiixutte onyokha ele Muluku enihimya awe wira ti yootthekeya. (aRoma 12:9) Mweetteke ni ale arina soolema sinimusivela Muluku. (Miruku 13:20) Waapaka okhala apatthani maKristau yaale ari oolipa mmukhalelo womunepani pooti okhala yookhaliherya yuulupale. (Yakobo 5:14) Etthu yuulupale mwa sotheene, ori omulipana Muluku munvekelaka wira ookhaliheryeni.—aFilipi 4:6, 7, 13.
[Efootu ya epaaxina 20]
Muluku onninyokha ohapaliwa, wiiya, omwiira xooku oohiloka ni sowiira sinooniherya owali