Yoosoma 14

Moota Anamoona a Yehova Ary’aya Oolokihereya

Opacenrye silini mulokiheryo wa anamoona a Yehova a mahiku ala? (1)

Mithukumano sa Anamoona a Yehova siniiriwa sai? (2)

Onikhuma woowi musurukhu wooliverya itthu? (3)

Tani anihoolela khula muloko? (4)

Mithukumano xeeni suulupale sinipakiwa khula mwaakha? (5)

Muteko xeeni onivariwa oseedi wa Anamoona a Yehova ni ofiliyaali ya khuta elapo? (6)

1. Mulokiheryo wa Anamoona a Yehova a mahiku ala opacenrye eyaakha ya 1870. Wanipacerya awo yiitthaniwa Anamasoma a Biibiliya. Masi mwaakha wa 1931, awo yaahikuxa nsina nri mBiibiliyani noowi Anamoona a Yehova. (Yesaya 43:10) Okhuma mapacereryo a vakhaani, mulokiheryo ohinnuwa mpakha waahela muhina Anamoona imilyau sinceene, yaawo anilaleerya mwa nthiti ilapo sinivikana 230.

2. Miloko sinceene sa Anamoona a Yehova sinnithukumana ikwaha tthaaru khuta esumana. Ninnoolattulani orowa owiriyana muthukumano mmosa onithanla anyu. (aHeberi 10:24, 25) Biibiliya tokhanle mathipelo wa ele enisomihiwa. Ninnipakiwa nivekelo wanipacerya ni wanikisa wa mithukumano. Mmithukumano sinceene atthu anniipa masipo ni murima wotheene ‘amuttottopelaka’ Muluku. (aÉfeso 5:18, 19) Khuuvo mutthu onikhoottiheriwa okela ni kheneettihiwa ephace ovekiwaka musurukhu.​—Matheyo 10:8.

3. Miloko sinceene sinniira mithukumano saya muSalau ya Omwene. Ela enaattela okhala empa yohaattiheriwa itthu, etekiwe ni Anamoona yaawo anivara muteko ahilipelelaka oliviwa. Nyuwo khamunrowa ophwanya Musalau ya Omwene ilatarato sowuupiwa, mwiikimanyo ni itthu sikina sinikokhoreliwa. Musurukhu wooliverya itthu oniphwanyiwa orweela mwa soosonkherya soohikhanyereriwa. Wa ale aniphavela ovaha, yookhala ekaaxa eniheliwa soosonkherya.​—2 aKorinto 9:7.

4. Khuta muloko aakhala axitokweene wala amahoolela. Awo tanihoolela wiixuttiha mmulokoni. (1 Timótheyo 3:1-7; 5:17) Awo anikhaliheriwa ni arumeyi oorumeela. (1 Timótheyo 3:8-10, 12, 13) Alopwana awo khanooniwa okhala ootepexa otthuneya waavikana akina mmulokoni. (2 aKorinto 1:24) Khanivahiwa maihaneliwo a vameekh’aya. (Matheyo 23:8-10) Khaniwara ikuwo sinooniherya ovirikana ni akina. Hata khanliviwa mwaha wa muteko onivara aya mmulokoni. Mowiivahererya, axitokweene awo annikhapelela sootthuneya somunepani sa muloko attharihelaka nuulumo na Muluku. Okathi wa mixankiho, awo annivaha yoomaaliha ni malakiheryo.​—Yakobo 5:14-16; 1 Pedru 5:2, 3.

5. Khuta mwaakha Anamoona a Yehova annipaka-tho mithukumano sa muttetthe wala mithukumano sa eDistritu. Okathi owo miloko sinceene sinnithukumana vamosa wira sittottele mureerelo eprograma ya vameekh’aya ya wiixutta orumeeliwaka Biibiliya. Khuta muthukumano muulupale aahiiso muthukumano wa muttetthe obatiziwa wa awiixutti aniinaano etthu enimakela wiiraneya.​—Matheyo 3:13-17; 28:19, 20.

6. Eseedi ya Anamoona a Yehova ilapo sotheene eri oNova York. Mapuro awo tonikhala Nikhuuru Noolamulela, eyo piiyo, ekrupu ya axitokweene oosuwela itthu, yaawo aneettiha miloko sa ilapo sotheene. Olumwenku wotheene sookhala-tho ifiliyaali soovikana 100. Ofiliyaali, anna oowiivahererya annikhaliherya wimprimiri iliivuru sinimutthokiherya Biibiliya ni oroiha mmilokoni. Ifiliyaali iyo sinnivaha-tho malakiheryo voohimya sa muteko woolaleerya. Xeeni vahimpaka anyu marehereryo wira murowe mwaxukurye efiliyaali yaattamenle anyu?