Xeeni Muluku Okhalanaka Nikhuuru Nootthokiheya?

1. Xeeni Muluku aatthokihale awe anaIsarayeli a khalai?

Muluku aahipaka osuulu wa Abrahamu okhala nloko nawe, khuvaha malamulo awe. Nloko nlo aahivaha nsina na “Isarayeli”, nto khotumererya okhapelela nuulumo nawe vamosa ni okokhorela wekeekhai. (Esalimo 147:19, 20) Atthu a maloko othene yanwerya ophwanya mireerelo mwaha wa anaIsarayeli.​—Musome Maphattuwelo 22:18.

Muluku aahaathanla anaIsarayeli wira ekhale anamoona awe. Sowiiraneya voohimya sa anaIsarayeli, sinnooniherya moota atthu aniphwanya aya mireerelo mwaha wa wiiwelela malamulo a Muluku. (Otumererya 4:6) Nto, orweela wa anaIsarayeli, atthu akina yaanimusuwela Muluku ekeekhai.​—Mmusome Yesaya 43:10, 12.

2. Xeeni maKristau ekeekhai aryaaya ootthokiheya?

Nuuvira okathi anaIsarayeli yaahimmwareela Muluku; nto Yehova khurantteliha nloko naya ni muloko wa eKristau. (Matheyo 21:43; 23:37, 38) Vano, maKristau ekeekhai takhanle anamoona a Yehova ohiya anaIsarayeli.​—Musome Miteko 15:14, 17.

Yesu aahaatthokiha atthareli awe wira alaleeryeke ni waapaka awiixutti atthu a maloko otheene. (Matheyo 10:7, 11; 24:14; 28:19, 20) Vano muteko owo, onnaattamela wanikisa, niire so, omala wa makhalelo ala ootakhala. Ntoko etthu ehitonko wiiraneya, Yehova onniwiiraaniha atthu a khula ilapo wira amukokhoreleke ni ekeekhai. (Wisupulula 7:9, 10) Makristau ekeekhai tootthokiheya wira yaalipiheke ni waakhaliherya akina. Khuta elapo khanivirikana omuthokorerya waya Biibiliya mmuthukumanoni.​—Mmusome aHéberi 10:24, 25.

3. Mmahiku ala, nikhuuru na Anamoona a Yehova nipacenrye sai?

Mwaakha wa 1870, ekrupu yaamukhaani ya alipa-oomusoma Biibiliya yaahipacerya ophwanya ikeekhai sa mBiibiliya, sahaathokoreriwa mwa iyaakha sinceene. Awosa yaahiixutta wira Yesu aahipaka nikhuuru na muloko wa eKristau wira nilaleeryeke; nto khupacerya muteko woolaleerya Omwene ilapo sotheene. Eyaakha ya 1931 yaahikuxa nsina noowi: Anamoona a Yehova.​—Musome Miteko 1:8; 2:1, 4; 5:42.

4. Anamoona a Yehova anivara sai miteko saya?

Eseekulu yoopacerya, miloko sa eKristau sa ilapo sinceene, saahittottela mureerelo miruku sa nikhuuru noolamulela nenno naakupali ni otthara malakiheryo a Yesu ntoko Muru wa muloko. (Miteko 16:4, 5) Olelo va, Anamoona a Yehova olumwenku wotheene anikhaliheriwa ni axitokweene oororomeleya a Nikhuuru Noolamulela na Anamoona a Yehova. Nikhuuru Noolamulela ninneettiha muteko wa ifiliyaali sa Anamoona a Yehova: miteko sa otaphulela, wimpirimiri, ni okawa iliivuru voohimya sa Biibiliya mmattaava oowiiraka 600. Tthiri, Nikhuuru Noolamulela ninnivaha malakiheryo a Biibiliya anilipiha miloko sinivikana 100.000. Khula muloko alopwana aniphwanelela, annithanliwa okhala axitokweene, wala amahoolela. Alopwana ala, moophenta, annikhapelela ipwittipwitthi sa Muluku.​—Mmusome 1 Pedru 5:2, 3.

Anamoona a Yehova aatthokiheya wira alaleeryeke ihapari sooreera ni waapaka awiixutti. Ntoko arummwa a khalai, ninnilaleerya khula empa. (Miteko 20:20) Naaphwanya atthu anisiveliwa ikeekhai, ninniwiixuttiha Biibiliya. Masi Anamoona a Yehova khahiyo nikhuuru paahi. Hiyo niri ntoko atthu a emusi erina Tiithi oophenta. Hiyo ninnikhaliheryana ntoko axinna. (2 aTesalonika 1:3) Okhala wira atthu a Yehova aatthokiheya wira emuhakalalihe Muluku ni waakhaliherya akina, nto awo ti atthu ootepa ohakalala mulaponi.​—Musome Esalimo 33:12; Miteko 20:35.