Yoosoma 10

Moota Woophwanya Etiini Yekeekhai

Mwaphavela okhala mpatthani a Muluku, muhaana ovarihela muteko etiini eneemereriwa ni Muluku. Yesu aahimmye wira “alipa-òkokhorela èkekhai” yammukokhorela Muluku moovarihana ni ‘ekeekhai’. (Yohani 4:23, 24) Orii moota mmosaa paahi wooloka w’omukokhorela Muluku. (aÉfeso 4:4-6) Etiini yekeekhai eniroiha wookumini woohimala ni etiini yoowoka eniroiha wopweteyani.—Matheyo 7:13, 14.

Munosuwela etiini yekeekhai nwehaka sowiira sa atthu a etiini eyo. Okhala wira Yehova t’oreera murima, anamakokhorela awe eekeekhai ahaana okhala atthu ooreera murima. Ntoko murarance ooloka oniima irarance sooloka, etiini yekeekhai erina atthu ooloka.—Matheyo 7:15-20.

Apatthani a Yehova aakhalana nttittimiho nowiixerya na Biibiliya. Annisuwela wi Biibiliya ta Muluku. Annemererya wi yeele enihimya awe ehoolele okumi aya, yaaphukele mixankiho saya ni yaakhaliherye wiixutta etthu voohimya sa Muluku. (2 Timótheyo 3:16) Annihaayasa wira yeele enilaleeryaaya.

Apatthani a Yehova annooniherya wi anniphentana mukina ni mukhw’awe. Yesu aahooniherya waaphenta atthu eixuttihaka etthu voohimya sa Muluku, mu waavoniha yaawereiwa. Atthu a etiini yekeekhai annooniherya-tho wira annaaphenta akina. Ntoko Yesu, khanaathanya oohaawa aahiiso atthu a nloko nikina. Yesu aahimmye wira atthu yaamwaasuwela awiixutti awe mwaha wa ophentana yaarowaaya wooniheryaka mukina ni mukhw’awe.—Yohani 13:35.

Apatthani a Muluku annivuwiha nsina Nawe, Yehova. Mutthu mukina aakhootta oromola nsina nanyu, ola aamukhala mmosaa aapatthananyuxa? Nnaari! Nakhalana mpatthani ahu, ninniromola nsina nawe ni ninnimulavula saana w’akina. Vanonto, amphavela okhala apatthani a Muluku ahaana oromola nsina nawe ni olavula sa owo w’akina. Yehova oniphavela wi nireke yeeyo.—Matheyo 6:9; aRoma 10:13, 14.

Ntoko Yesu, apatthani a Muluku anniwiixuttiha akina Omwene wa Muluku. Omwene wa Muluku ekuvernu ya wirimu enrowa otatuxa elapo okhala eparayiisu. Apatthani a Muluku annaaleela akina ihapari sooreera sa Omwene wa Muluku.—Matheyo 24:14.

Anamoona a Yehova annihaayasa okhala apatthani a Muluku. Annimuttittimiha Biibiliya ni anniphentana eriyari aya. Nave-tho anniromola ni ovuwiha nsina na Muluku ni anniwiixuttiha akina Omwene wa Muluku. Anamoona a Yehova olelo-va annivara miteko sa etiini yekeekhai veelaponi.