Sotheene Iya Sintaphulela Exeeni?

YESU KRISTU aahimmye so: ‘Omala wa olumwenku ola’ onrowa osuwanyeihiwa ni ekhotto, othowa wa yoolya, ekwerere, ni itetere.​—Matheyo 24:1-8; Luka 21:10, 11.

Okhuma eyaakha ya 1914 ahookhwa atthu mwaha wa ikhotto eriyari ya nloko ni nloko nikhw’aya eriyari ya nihimo nnihimo nikhw’aya, ikwaha sinceene ela enniiraneya mwaha wa wiihela muhina wa ahooleli a itiini mmiyaha sa epoliitika, ni mahiku ala, mwaha wa wuulaana wa terrorismu.

Nnaamwi varuweriwaka eyoolya yinceene, othowa wa yoolya etthu eniwiiraneela atthu imilyau sinceene elapo yotheene. Khuta mwaakha annookhwa atthu imilyau sinceene mwaha wa othowa wa yoolya.

Ekwerere, eniira mpantta wa ethoonyeryo yoohimmwa ni Yesu. Emalakaru Ekhotto Yoopacerya ya Olumwenku, eretta ya kamasi yoowiiva atthu oovikana 21.000.000. Okathi woovira, ipahuu iya saakhumelela mapuro kamosa-kamosa paahi, masi okathi ola iya sinnikhumelela mulaponi motheene vamosaa ni musisironi moorakamela. SIDA onniwiiva atthu anceene mulaponi motheene, ni ipahuu ntoko elapaha, malaria, makokho ni koolera sinnivikaniha waawereya atthu mu ilapo soohaawa.

Vanihimmwa wira sinniiraneya itetere sinceene soovirikana otupa waya khuta mwaakha. Nnaamwi sikhanle ene ikaruma sa ophima otupa wa itetere ni waalopola atthu, ihasara sookumiheriwa ni itetere mmapuro oowaatta atthu, soopakeya okhala soohimmwa sa khuta nihiku.

Biibiliya aahihimya-tho vahinatthi: “Musuwelexe wira, okathi wokiserya, anophiya mahiku òxanka. Atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona. Awo anonveha Muluku, anokhala òhiwìwelela anamuyari aya, òhixukhuru, òhittittimiha itthu sowarya, òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku; antthuna woneyaka ntoko atthu òwamini, nto anokhotta ikuru so wamini weiwo. Nave yawo, nyuwo muhettaneké”.​—2 Timótheyo 3:1-5.

Nyuwo khimuneemererya wira hiyo ninkhala “mahiku òxanka”?

Nyuwo munnoona wira atthu anceene, t’owiisupuwelela mmansaya paahi, oosiveliwa musurukhu, ni anrima?

Tanii aarowa ovaanya wira olumwenku orii woosareya atthu oonyesererya, oohixukhuru, oohiphavela wiiwanana ni oohiroromeleya?

Nyuwo munnoona wira ohiwiiwelela axitiithi vamosaa ni othoiwa niphento mootakhalexa ohincerereya vaalupalexa, ohiya paahi mapuro vakhaani masi elapo yotheene?

Moohaaniherya nyuwo moosuwela nto wira hiyo ninkhala mu olumwenku woosareya ophenta soohakalaliha erutthu, masi woothoiwa oreera murima. Ti siiso mmoota Biibiliya aahimmya awe mikhalelo saarowa wooneyaka mu “okathi wokiserya”.

Siniphaveleya toko ithoonyeryo sikina wira nisuwele okathi onikhala ahu? Yesu aahihimya-tho vahinatthi wira okathi mmosaru yoowo, ihapari sooreera sa Omwene wa Muluku saarowa olaleeriwa elapo yotheene enikhaliwa. (Matheyo 24:14) Tthiri sinnilaleeriwa ihapari iyo?

A Sentinela, erevista erina mathipelo a mBiibiliya yoolakela aya erii olaleerya ihapari sooreera sa Omwene wa Yehova, moohihiyererya ennipakiwa mu ilavulelo sinceene ovikana erevista ekina.

Khuta mwaakha, Anamoona a Yehova anniveleela iwoora soovikana ebilyau emosaa yaavahaka onamoona atthu akina voohimya sa Omwene wa Muluku.

Mu okathi ola, Anamoona a Yehova, annilaleya iliivuru sinimutthokiherya Biibiliya mu ilavulelo soowiiraka 400, hataa mu ilavulelo sa mapuro oorakamela ni ikrupu s’atthu vakhaani. Anamoona a Yehova aapixa ihapari sooreera w’atthu a maloko otheene; awo aalaleerya-tho isisiro sinceene ni mittetthe saamukhaani seiyo sihinooneliwa okhala etthu ni ahooleli a elapo. Mu isisiro sinceene, awo annivikaniha moohihiyererya eprograma aya ya omwiixuttiha Biibiliya.

Aayo, ihapari sooreera sa Omwene wa Muluku sinnilaleeriwa elapo yotheene enikhaliwa, ohiya waarukunuxa atthu otheene, masi waavaha onamoona. Atthu a mapuro otheene annivahiwa okathi wira yooniherye, yakhala wira annimuthokorerya ole opattunxe erimu ni elapo ya vathii, ni yakhala wira animooniherya ottittimiha malamulo awe ni omphenta namwaattamanani aya.​—Luka 10:25-27; Wisupulula 4:11.

Moohipisa, Omwene wa Muluku onrowa omaliha mulaponi, otakhala wotheene, ni opaka elapo yotheene okhala eparayiisu.​—Luka 23:43, Tradução do Novo Mundo.

[Ekaaxa/eri epaaxina 6]

Mahiku Ookiserya a Xeeni?

Ala khahiyo mahiku ookiserya aapinaatamu. Okhala wira wa ale aniira yotthuna ya Muluku, Biibiliya onnaavaha nlipelelo na okhala moohimala.​—Yohani 3:16, 36; 1 Yohani 2:17.

Ala khahiyo mahiku ookiserya a elapo ya vathii. Nuulumo na Muluku nnihimya wira elapo ya vathii enrowa okhala moohimala.​—Esalimo 37:29; 104:5; Yesaya 45:18.

Vahinatthi, ala mahiku ookiserya a mukhalelo ola wa itthu soohaaxa, ohirina ophenta, ni yaale anithipelela ovarexexa makhalelo ootakhala a mukhalelo ola wa itthu.​—Miruku 2:21, 22.

[Ekaaxa/eri epaaxina 7]

Tthiri Biibiliya Nuulumo na Muluku?

Ikwaha sinceene, maprofeta a mBiibiliya yaalepa so: “Mwiwe enihimyaya Apwiya”. (Yesaya 43:14; Yeremiya 2:2) Hataa Yesu Kristu, Mwaana a Muluku, aahittittimiherya iiraka ‘molumo kinohimeryakani khahiyó awaka’. (Yohani 14:10) Moowiiwanyeya, Biibiliya onihimya so: “Solempwa sothene supuxeriwé ni Muluku”.​—2 Timótheyo 3:16.

Moovarihana ni United Bible Societies khiivo eliivuru ekina epakiwe erina ilavulelo—sinivikana 2.200, monvikana Biibiliya. Vano khiivo eliivuru ekina ekaiwale mowaattexa​—ovikana ibilyau xexee. Akhala wira ola muhupi wa Muluku wa apinaatamu otheene, nyuwo khimunaakhulela wira Biibiliya aarowa osuweliwa n’atthu anceene?

Moophavela osuwela saana ithoonyeryo soowi Biibiliya uupuxeriwee ni Muluku, nwehee eliivuru enii: A Bíblia​—Palavra de Deus ou de Homem?, yoolaleiwa ni Anamoona a Yehova.

Nyuwo mwamusoma Biibiliya ni nttittimiho mwaha wa okhala Nuulumo neekeekhai na Muluku, munrowa otthuveliwa vaalupalexa.

[Ekaaxa/Ilatarato siri epaaxina 8]

Omwene wa Muluku Exeeni?

Erii ekuvernu ya wirimu yeeyo enilamuleliwa ni Muluku eekeekhai, Yehova, Mpattuxa a erimu ni elapo ya vathii.​—Yeremiya 10:10, 12.

Biibiliya onimuthoonya Yesu Kristu ntoko yoowo ovahiwe ni Muluku owerya wa olamulela. (Wisupulula 11:15) Vaavo vaary’awe elapo ya vathii, Yesu aahooniherya wira aahikhalana owerya wootikiniha weiwo aavahiwa awe ni Muluku​—owerya wa omaaliha epheyo ni otupa wa ephareya, waavoniha aretta a khula enamuna, ni hataa waavenxa alipa-ookhwa. (Matheyo 9:2-8; Marko 4:37-41; Yohani 11:11-44) Eprofecia ya mBiibiliya yaahihimya vahinatthi wira Muluku aarowa onvaha-tho Yesu ‘owerya n’uttittimihiwa n’umwene: [wira] atthu a ilapo sothene ni a maloko othene ni a ilavulelo sothene emurumeleke’. (Daniyeli 7:13, 14) Ekuvernu eyo eniihaniwa Omwene wa wirimu; ti wirimu weiwo vano Yesu Kristu onilamulela awe.

[Ilatarato siri epaaxina 7]

Olaleeriwa wa ihapari sooreera elapo yotheene