Muruu Wa Namuloko Nenli
Mweettelo wa Okumi Onimuhakalaliha Muluku
Munrowa okhala sai mpatthani a Muluku?
Moota xeeni nikoho na Satana nnoovaraayani?
Mweettelo xeeni ohinimuhakalaliha Yehova?
Munrowa owerya sai okhalaka moomuhakalaliha Muluku?
MUTTHU a mukhalelo xeeni aarowa anyu omuthanla wira okhalee mpatthani inyu? Nyuwo mwaarowa omuthanla mutthu yoole onilikana anyu soophavela, mikhalelo ni moonelo itthu. Nto mwaarowa ophavela okhalana mpatthani mutthu orina mikhalelo sooloka, ntoko ororomeleya ni oreera murima.
2 Okhuma khalai, Muluku onnaathanla apinaatamu akina wira akhalee apatthani awexa. Mwa ntakiheryo, Yehova aahimuhimya Abrahamu okhala mpatthani awe. (Yesaya 41:8; Yakobo 2:23) Muluku aahimuhimya Davidi okhala “mulopwana onettela murim’aka”, mwaha woowi aari mmosaa aatthu yaaphentiwa ni Yehova. (Miteko s’Arummwa 13:22) Nto Yehova aahimoona mprofeta Daniyeli okhala ‘ophentiwa wavikana atthu akina’.—Daniyeli 9:23.
3 Nthowa xeeni Yehova aamuhimmya awe Abrahamu, Davidi, ni Daniyeli okhala apatthani awe? Saana, owo aahimuleela Abrahamu wira: “Muhìwelela molumo aka”. (Maphattuwelo 22:18) Siiso Yehova onnikhala mpatthani a yaale moowiiyeveiha aniira yeele enaavekela awe. Owo aahaaleela anaIsarayeli wira: “Mwiwe masu aka: mwirá siso, miyo kinokhala Muluku anyu, nyuwo munokhala nloko naka”. (Yeremiya 7:23) Akhala wira munoomwiiwelela Yehova, munookhala-tho mpatthani awe!
MOOTA YEHOVA ONAAKHALIHERYA AWE APATTHANI AWE
4 Muupuwele ele enitaphulela aya okhala mpatthani a Muluku. Biibiliya onihimya wira Yehova onniphavelasa okathi wooreera ‘wira akhaliherye ale animuroromela ni murim’aya wothene’. (2 Wahala a Mamwene 16:9) Nto Yehova onrowa wookhaliheryani sai? Ephiro emosaa erii mu Esalimo 32:8, memmo ninsoma ahu so: “Miyo [Yehova] kinimovahani miruku, kinimothonyeryani ephiro yorera, kinowixuttihani, kinimokhapelelani”.
5 Moota anivara aya murima, masuu ala a okhapelela wa Yehova! Mwavarihela muteko masuu awe, owo onrowa woovahani yoohoolela eniphaveleya ni wookhapelelani. Muluku oniphavela wookhaliheryani wira nvilele saana weehereriwa wanyu. (Esalimo 55:23) Siiso, vakhala wira munimurumeela Yehova ni murima wotheene, nyuwo munoowerya ororomela ntoko nasalimo ohimmye so: “Okathi p’ukathi kinnona wira Apwiya ari ni miyo: wona yawo annikivarela mono, nkinova etthu”. (Esalimo 16:8; 63:8) Aayo, Yehova onoowerya wookhaliheryani wira mukhalane mweettelo wa okumi onimusivela. Masi, ntoko sinisuwela anyu, ookhala nwanani mmosaa a Muluku yoowo oniphavela wira muhimusivelihe Muluku.
OVAANYIHA WA SATANA
6 Muruu wa 11 a eliivuru ela, wootthokiherya moota Satana Diabo savaanyinha awe olamulelo wa Muluku. Satana aahimootherya Muluku ni aahimmye wira Yehova khoonihenrye exariya, mwaha wa ohaahiya Adamu ni Eva ethanlaka mmensaya ele yaari yooloka ni ele yaari yoohiloka. Nuumala Adamu ni Eva ottheka ni elapo ehinatthi opacerya osareya anaaya, Satana aahivaanyiha ele eniwiiriha apinaatamu otheene omurumeela Muluku. Satana aavaanyinhe oriki: “Apinaatamu khanimurumeela Muluku mwaha wa omphenta. Mukivahe okathi wooreerela, nto miyo kinoowerya omuhiiha khuta mutthu omurumeela Muluku”. Yoohimmwa ya mulopwana mmosaa iihaniwa Yobi enooniherya wira ela ti etthu Satana yaakupali awe. Yobi aari aani? Nto aaheliwe sai muhina mu ovaanyiha wa Satana?
7 Yobi aahikhala khalai, iyaakha soowiiraka 3.600 sivinre. Owo aari mutthu ooloka, ti nthowa naya Yehova aahimmye wira: “Mulaponi mothene khavo mutthu onlikana n’uwo. Ori mutthu òrera murima ni naxariya, òmuttittimiha Muluku ni òkhotta sotakhala”. (Yobi 1:8) Yobi aanimuhakalaliha Muluku.
8 Satana aahimmye wira Yobi khaamurumeela Muluku mahala ene. Diabo aamuhimenrye Yehova wira: “Nyuwo munnimwakiherya [Yobi] sotakhala sothene vamosá n’itthoko awe ni mihakhu sawe sothene. Nyuwo moreriha miteko sawe sothene: muhinjereriha muhuwo awe mpakha okhunela elapo. Masi mmwehererye yowo: mpwetexe mihakhu sawe sothene. Munimona wira owo onrowa wovehani”.—Yobi 1:10, 11.
9 Tthiri Satana aahimmye wira Yobi aamurumeela Muluku mwaha woophavela waakhela etthu paahi. Nave-tho Diabo aahimootherya Yobi oriki akhala wira aamweehereriwa, Yobi aarowa omurukunuwela Muluku. Yehova aakhunle sai ovaanyiha nno wa Satana? Okhala wira mwaha ole waaniphavela osuwela yaamwiiriha Yobi omurumeela Muluku, Yehova aahimweemererya Satana wira omweehererye Yobi. Weehereriwa wa Yobi, waarowa wooniherya nto akhala wira aanimphenta Muluku aahiiso khamphenta.
WEEHERERIWA WA YOBI
10 Moohipisa Satana aahimweehererya Yobi orumeelaka iphiro soovirikana. Inamaa sikina sa Yobi saahiiyiwa, nto ikina saahiiviwa. Arumeyi awe anceene yaahookotthiwa. Ela yaahimuruuhela osikhini. Ohiya vo, yaahikhumelela ehasara vaavo eyuupuri yaawiivale aya anamwane mulokoo a Yobi. Nnaamwi saakhumelenle itthu iya sootakhala, “Yobi khatthenke: khanvehale Muluku”.—Yobi 1:22.
11 Satana khaahiiye omweehererya Yobi. Owo pooti aahuupuwela wira, nnaamwi Yobi aavilenle vaavo vaapweteiwaly’awe muhakhu awe, arumeyi awe, ni an’awe, vakhala wira yaarowa omukhumelela eretta aarowa omurukunuwela Muluku. Yehova aahimuhiya Satana omphwanyihaka Yobi eretta yoohiirya, ni yoowereya. Hataa eretta ela khiyaamwiirinhe Yobi ohiya omukupali Muluku. Moovirikana ni vo, tthiri owo aahimmye so: “Kinolaleya ohittheka waka mpakha okhwa”.—Yobi 27:5.
12 Yobi khaasuwela wira mixankiho sawe saakumiheriwa ni Satana. Ohisuwelaka mathowa a ovaanyiha wa Diabo voohimya sa olamulelo wa Yehova, Yobi uupuwela wira Muluku taakumiherya mixankiho sawe. (Yobi 6:4; 16:11-14) Nnaamwi vaari siiso, Yobi aahivikaniha okhala oororomeleya wa Yehova. Mwaha wa Yobi ovikaniha okhala oororomeleya, waahooniherya wira Satana aamootha vaavo aahimmye awe wira Yobi aamurumeela Muluku ophavelaka waakhela etthu!
13 Ororomeleya wa Yobi waahimwiiriha Yehova waakhula ovaanyiha wooveeha wa Satana. Tthiri Yobi aari mpatthani a Yehova, nto Muluku aahimutthuvela mwaha wa ororomeleya wawe.—Yobi 42:12-17.
MOOTA NYUWO MUNIHELIWA ANYU MUHINA
14 Omuroromela Muluku, mwaha yoowo Satana aavaanyinha awe, khiwanvara Yobi paahi. Nyuwo-tho munniheliwa muhina. Ela enooniheriwa saana mMiruku 27:11, memmo Masuu a Yehova anihimya aya wira: “Mwan’aka, nwetteleke ankhili: siso miyo kinotteliwa murima, kinowerya omwakhula onkiveha”. Masuu ala, yaalempwale sivinre ene iyaakha sinceene nuumala Yobi okhwa, anooniherya wira nlelo Satana aaninveeha Muluku ni owootherya arumeyi Awe. Tthiri nakhalana mweettelo wa okumi onimuhakalaliha Yehova, nnookhaliherya waakhula ovaanyiha woowoka wa Satana, ni nnoohakalaliha murima wa Muluku. Nyuwo munoonela sai eyo? Hataa vatthuneyaka opaka mirukunuxo mookumi mwanyu, khimunoona wira ti vooreera wooniherya wira ovaanyiha wa Diabo wootha?
15 Moone wira Satana aahimmye so: “Ekumi khinakakhanyihiwa. Atthu annivaha sothene sirinaya wira esuke ekumi aya”. (Yobi 2:4) Mwaha woohimya wira “atthu”, Satana aahiiwanyeeha wira ovaanyiha wawe khiwaamuhimya Yobi paahi, masi apinaatamu otheene. Ola mwaha muulupalexa. Satana oovaanyiha omuroromela wanyu Muluku. Diabo onoosiveliwa owoonani nyuwo muhimwiiwelelaka Muluku ni muhiyaka mweettelo wa xariya okathi vanikhumelela aya mixankiho. Nto Satana oneererya sai waakhwaniherya ela?
16 Ntoko sooniheriwa aya mMuruu wa 10, Satana onirumeela iphiro sinceene wira eererye waahapuxa atthu wa Muluku. Ephiro emosaa, owo onaatuphela atthu “ntoko kharamu onòpa murukulu, amphavelaka òmukhura”. (1 Pedru 5:8) Mwekeekhai, yoohapuwela ya Satana pooti wooneya vaavo apatthani, amusi, aahiiso atthu akina vanivaanyiha aya wiimananiha wanyu omwiixutta Biibiliya ni ovarihela muteko ele eniixutta anyu.a (Yohani 15:19, 20) Ephiro ekina, Satana “onnìtatuxa wira òneye ntoko nlaikha nowarya”. (2 aKorinto 11:14) Diabo pooti orumeela olavilavi wira oowokeeni ni owiirihani ohiya mweettelo wa okumi onimuhakalaliha Muluku. Owo onoowerya-tho orumeela ovololiheya, ophavelaka owiirihani wiixoona okhala oohiwerya omuhakalaliha Muluku. (Miruku 24:10) Hataa Satana okhalaka ntoko “kharamu onòpa murukulu” aahiiso “nlaikha nowarya”, ovaanyiha wawe omosaru: Owo onihimya wira vaavo vanikumana anyu ni soweeha, nyuwo munrowa omuhiya omurumeela Muluku. Munrowa waakhula sai ovaanyiha wawe ni wooniherya omuroromela wanyu Muluku, ntoko Yobi?
MWIIWELELEKE SOORUMA SA YEHOVA
17 Wira mwaakhule ovaanyiha wa Satana, muhaana otthara mweettelo wa okumi onimuhakalaliha Muluku. Ela enitaphulela exeeni? Biibiliya onaakhula wira: “Mwaphenteke Apwiya Muluku anyu ni murim’anyu wothene n’iroho anyu yothene n’ikuru sanyu sothene”. (Otumererya 6:5) Vaavo omphenta wanyu Muluku vaninnuwa aya, nyuwo munrowa ophavelaka vanceene opaka ele enoovekelaaweni. Murummwa Yohani aalempe so: “Nnimphenta sai Muluku? Nnimphenta nettelaka soruma sawe”. Akhala wira munomphenta Yehova ni murima anyu wotheene, nyuwo munrowa woona wira “soruma sa Muluku khasinnirikela wettela”.—1 Yohani 5:3.
18 Tisivi sikhanle sooruma sa Yehova? Sooruma sikina sinihela muhina mweettelo onitthuneya ahu osyaka. Mwa ntakiheryo, nwehee ekaaxa eri mu epaaxina 122, yeeyo eri ni muruu onii: “Mukhootte Ele Yehova Eninyokh’awe”. Vakaaxani-vo munrowa ophwanya olempwale ene mweettelo yoowo moowiiwanyeya Biibiliya onikhoottiha awe. Wanipacerya, sowiira sikina silempwale vo pooti wooneya okhala ntoko soohitthekeyexa. Masi nuumala wuupuwelela soolepa sihimmwale vale, nyuwo munrowa wiiwexexa wira malamulo a Yehova ta miruku. Opaka mirukunuxo mmweettelo anyu pooti okhala etthu yoovilexa mookumini mwanyu. Hataa vari siiso, mweettelo wa okumi onimuhakalaliha Muluku onniruuha ohakalala wuulupale. (Yesaya 48:17, 18) Nyuwo munoowerya otthara mweettelo owo. Ninsuwela sai?
19 Yehova khonkhala-khala onivekelaka etthu ehinwerya ahu. (Otumererya 30:11-14) Owo onnisuwela ele eniwerya ahu ni mikano sahu onivikana hiyo. (Esalimo 103:14) Mwa sotheene, Yehova onoowerya onivaha ikuruu wira nimwiiweleleke. Murummwa Paulo olempe so: “Muluku t’òroromeleya: khanihiya wira mwehereriwe ovikana ikuru sanyu. Okathi onehereriwanyu, Muluku onimovahani ikuru sinweryananyu ovilela n’uxintta”. (1 aKorinto 10:13) Yehova onoowerya woovahani “owerya nno wulupalexa” wira ookhaliheryeni ovilela weehereriwa. (2 aKorinto 4:7) Nuumala ovilela soweeha sinceene, Paulo aahimmye wira: “Kinniwerya sothene mwa Kristu onkivaha ikuru”.—aFilipi 4:13.
MUNNUUHERYE MIKHALELO SINIMUSIVELA MULUKU
20 Mwekeekhai, ophavela omuhakalaliha Yehova onihela muhina itthu sinceene ohiya paahi okhootta itthu sininyokha awe. Nave-tho nyuwo muhaana ophenta itthu siniphenta awe. (aRoma 12:9) Nyuwo khimunisiveliwa okhalana apatthani atthu anlikana ni nyuwo mmoonelo itthu, soophavela ni ovaha efaita itthu? Ola tokhanle mwiirelo wa Yehova. Nto mwiixutte ophenta itthu seiyo Yehova siniphenta awe. Itthu sikina sirii mu Esalimo 15:1-5, memmo ninsoma ahu sa atthu yaawo Muluku onaahimya awe okhala apatthani awe. Apatthani a Yehova aakhalana ele Biibiliya enihimya awe okhala sowiima sa “Eroho [“munepa”, NM]”. Sowiima iya sinihela muhina mikhalelo ntoko “ophentana, otteliwa murima, murettele, ovilela, othunku, orera murima, ororomeleya, wiyeviha, wisumaliha”.—aGalasia 5:22, 23.
21 Omusoma ni omwiixutta Biibiliya khuta nihiku, onrowa wookhaliheryani okhalana mikhalelo sinimusivela Yehova. Nto wiixutta ele Muluku enivekela awe onrowa wookhaliheryani okhalana muupuwelelo wa Muluku. (Yesaya 30:20, 21) Vaavo omphenta wanyu Yehova vaninnuwa aya, munrowa ophavelaka vanceene mweettelo wa okumi onimuhakalaliha Muluku.
22 Vanitthuneya wiimananiha wira mutthu okhalane mweettelo wa okumi onimuhakalaliha Yehova. MBiibiliyani, orukunuxa okumi anyu onnilikanyihiwa ni orula omutthu anyu wa khalai ni owara omutthu wa niinano. (aKolosi 3:9, 10) Masi voohimya sa sooruma sa Yehova, nasalimo aalempe so: “Kettelaka seiyo, kinoreriwa”. (Esalimo 19:12) Nyuwo-tho munrowa woona wira mweettelo wa okumi onimuhakalaliha Muluku onnitthuveliwa vanceenexa. Mwiira siiso, nyuwo munrowa waakhula ovaanyiha wa Satana ni ohakalaliha murima wa Yehova!
[Footnote]
a Ela khenitaphulela wira khuta mutthu onoonyokhani onilamuleliwa ni Satana. Masi Satana orii muluku a mukhalelo ola wa itthu, ni elapo yotheene enilamuleliwa n’uwo. (2 aKorinto 4:4; 1 Yohani 5:19) Nto nohaana osuwela wira okhalana mweettelo wa okumi onimuhakalaliha Muluku, khonrowa ophaveliwa ni atthu, nto atthu akina anrowa woonyokhakani.
ELE BIIBILIYA ENIIXUTTIH’AWE
▪ Mwaamwiiwelelaka Muluku munookhala mpatthani awe.—Yakobo 2:23.
▪ Satana aahivaanyiha ororomeleya wa apinaatamu otheene.—Yobi 1:8, 10, 11; 2:4; Miruku 27:11.
▪ Nohaana okhootta sowiira sihimphavela Muluku.—1 aKorinto 6:9, 10.
▪ Nnoowerya omuhakalaliha Yehova ninyokhaka ele eninyokha awe ni ophenta ele eniphenta awe.—aRoma 12:9.
[Study Questions]
1, 2. Mwaahimye atthu akina yaawo Yehova yaawoonaly’awe okhala apatthani awexa.
3. Nthowa xeeni Yehova vaathanlale awe atthu akina wira akhalee apatthani awe?
4, 5. Yehova onaakhaliherya sai atthu awe?
6. Satana aawoothenrye exeeni apinaatamu?
7, 8. (a) Exeeni yaamwiirinhe Yobi okhala oohilikana ni atthu akina mu okathi ole? (b) Satana aamoothenrye exeeni Yobi?
9. Yehova aakhunle sai ovaanyiha wa Satana, ni nthowa xeeni?
10. Soweeha xeeni samphwannye Yobi, nto Yobi aapanke exeeni?
11. (a) Mu ekwaha ya nenli, Satana aamoothenrye exeeni Yobi, nto Yehova aamweemerenrye opaka exeeni Satana? (b) Yobi oonenle sai eretta awe yoowereya?
12. Yobi oonihenrye sai wira ovaanyiha wa Diabo waari wootha?
13. Yaamwiiranenle exeeni Yobi mwaha wa omuroromela Muluku?
14, 15. Nthowa xeeni vanihimya ahu wira ovaanyiha wa Satana omuhimyaka Yobi, onaahela muhina apinaatamu otheene?
16. (a) Iphiro xeeni sinirumeela Satana moophavela waahapuxa atthu wa Muluku? (b) Diabo onrowa orumeela sai iphiro iya wira oohapuxeni?
17. Nthowa xeeni nuulupale ninniiriha wiiwelela sooruma sa Yehova?
18, 19. (a) Muhimye sooruma sikina sa Yehova. (Nwehee ekaaxa eri mu epaaxina 122.) (b) Ninsuwela sai wira Muluku khonnivekela etthu ehinwerya ahu?
20. Mikhalelo xeeni sinimusivela Muluku sinitthuneya anyu okhalana, ni nthowa xeeni siry’aya sootthuneya?
21. Exeeni enrowa wookhaliheryani okhalana mikhalelo sinimusivela Yehova?
22. Akhala wira mweettelo wa okumi anyu onimuhakalaliha Muluku, munrowa waakhula exeeni?
[Box/Pictures on page 122, 123]
MUKHOOTTE ELE YEHOVA ENINYOKH’AWE
Omwiiva mutthu.—Okhuma 20:13; 21:22, 23.
Orupihana woohiloka.—Onamukuttho 20:10, 13, 15, 16; aRoma 1:24, 26, 27, 32; 1 aKorinto 6:9, 10.
Onammunepani.—Otumererya 18:9-13; 1 aKorinto 10:21, 22; aGalasia 5:20, 21.
Waakokhorela amuluku eethiru.—1 aKorinto 10:14.
Ohapaliwa.—1 aKorinto 5:11.
Wiiya.—Onamukuttho 5:21, 24; aÉfeso 4:28.
Wootha.—Miruku 6:16, 19; aKolosi 3:9; Wisupulula 22:15.
Milili.—1 aKorinto 5:11.
Owali.—Esalimo 11:5; Miruku 22:24, 25; Malakhiya 2:16; aGalasia 5:20.
Moolumo oohiloka.—Onamukuttho 19:16; aÉfeso 5:4; aKolosi 3:8.
Orumeela ephomee moohiloka.—Maphattuwelo 9:4; Miteko s’Arummwa 15:20, 28, 29.
Ohithokorerya emusi awe.—1 Timótheyo 5:8.
Okhaliherya ikhotto aahiiso okhaliherya owana-wana wa anapoliitika a elapo ela.—Yesaya 2:4; Yohani 6:15; 17:16.
Ompaha soona aahiiso mirette soohapala sinihimmwa okhala soohakalaliha.—Marko 15:23; 2 aKorinto 7:1.
[Pictures on page 118]
Yobi aahitthuveliwa mwaha wa ororomeleya wawe