YOOSOMA 9

Yeremiya Khaahiyale Olavula Moolumo a Yehova

Yeremiya orukureriwe ene ni muttitthi wa atthu oonanariwa — Xeeni atthu yaananariwa aya vaavo Yeremiya aalavula awe masu a Muluku?

Yeremiya okumihiwaka mulittini mowiixa mwa mattophe — Yehova aahimoopola Yeremiya

Ikwaha sikina, atthu annintheya wala onanariwa vaavo nnaaleela ahu masu a Yehova. Eyo pooti oniiriha ohilavula masu a Muluku. Eyo yootoko owiiraneelani?— Biibiliya onnimuromola mmiravo yoowo amphenta Yehova, masi aahanle vakhaani ohiya olavula masu a Yehova. Owo aari Yeremiya. Nrowe nimusuwele saana.

Oryeene mmiravo, Yehova aahimuruma waaleela atthu wira ehiye opaka itthu soohiloka. Nto Yeremiya aanoona ovila ni omoopiha ovara muteko owo. Owo aahimuleela Yehova wira: ‘Nkinsuwela olavula. Miyo ka mwanamwane’. Masi Yehova aahimuhimeerya wira: ‘Muhoove; miyo kinimookhaliheryani’.

Nto Yeremiya, aahaalopola aYuda wira awo yaamuhaawa yaahihiye opaka itthu sootakhala. Niireke atthu awo yaahiiwa ele Yeremiya aalavula awe?— Nnaari. Awo yaanimutheya ni onveeha. Atthu akina yaaniphavela omwiiva! Niireke Yeremiya aahoova?— Aayo. Owo aahimyale so: ‘Nkinlavula-tho masu a Yehova!’ Masi niireke owo aahihiya olavula masu a Muluku?— Nnaari. Owo aanimphenta Yehova vanci. Tivonto aakhaliheriwe awe ni Yehova.

Mwa ntakiheryo, ekwaha emosa alopwana ootakhala yaahinvara Yeremiya khumurihela mulittini moowiixerya mwaari nttophe. Mulittini mmo khiyaakhanle yoolya wala maasi. Alopwana ale yaaphavela omwiiva Yeremiya. Masi Yehova aahimukhaliherya!

Exeeni muniixutta anyu sa ntakiheryo na Yeremiya?— Hata ikwaha sikina aawoova awanani awe, owo khaahiyale olavula masu a Yehova. Nto vaavo munilavula anyu masu a Yehova, akina pooti wootheyani wala onanariwa. Woonasa wene nyuwo pooti onyoonyiwa, aahiiso woova. Masi muhihiye olavula moolumo a Yehova. Owo onimookhaliheryani ntoko aamukhaliherya awe Yeremiya.

MUSOME MBIIBILIYANI MWANYU

Yeremiya 1:4-8; 20:7-9; 26:8-19, 24; 38:6-13