Yehova Aahimuruma Yeremiya Olaleerya

Yehova aahimuthanla Yeremiya wira okhale profeta a oYuda. Owo aahimuruma orowa waalaleerya atthu ni waalopola wira yaahaana ohiya opaka itthu soohiloka. Yeremiya aahaakhula so: ‘Nlelo ka mmiravo. Nkinsuwela olavula’. Yehova aahimuleela wira: ‘Muhoove. Miyo kinimooleelani etthu munrowa anyu ohimya. Nave kinimookhaliheryani’.

Yehova aahimuruma Yeremiya waathukumanya makhulupale ni opwexa murinki wa oloko ohoolo waya, ni waaleela wira: ‘Yerusalemu onrowa opwexiwa siisa’. Okathi Yeremiya aapanke awe etthu aarummwale awe ni Yehova, makhulupale yaahinanariwa vanceene. Mulipa a mukuttho aitthaniwa Paxehuri aahimmana Yeremiya ni aahimutthukelela vanripuni. Ohiyu wotheene, Yeremiya khaawenrye weeteteya. Mmeeloni mwaya vaasiisu, vaavo Paxehuri aamutaphunle awe, Yeremiya aahihimya wira: ‘Koovela. Kinoohiya olaleerya’. Masi niireke aahihiya tthiri? Nnaari. Nuumala-vo, Yeremiya aahuupuwelela saana mwaha ole khuhimya so: ‘Masu a Yehova anlikana ni mooro wooviha ori mweerutthuni mwaka. Nkinwerya ohiya olaleerya’. Yeremiya aahivikaniha waalopola atthu.

Sivinre ene iyaakha sinceene, aahithanliwa mwene a niinano oYuda. Anamukuttho ni maprofeta oowootha khiyaasiveliwa ni ihapari sa Yeremiya. Awosa yaahaaleela makhulupale wira: ‘Mulopwana ola onniphwanela wiiviwa’. Yeremiya aahaaleela wira: ‘Mwakiiva, nyuwo munrowa omwiiva mutthu ohitthenke. Yehova tokirumme olaleya masu ala. Khahiyo kirimwiipakelela’. Makhulupale ale yiiwakaru masu awo, yaahihimya wira: ‘Mulopwana ola khamphwanela wiiviwa.’

Yeremiya aahivikaniha olaleerya, nave makhulupale yaahinanariwa-tho vanceene. Awosa yaahinvekela mwene wira oweemiherye omwiiva Yeremiya. Mwene aahiwiirela wira emwiiriheke Yeremiya etthu yaaphavela aya. Awo yaahinvara Yeremiya, khimurihela mweehimeni moowiixa, memmo mwaari nttophe. Atthu awo yaaphavela wira Yeremiya okhwe. Nto owo aahipacerya ophara munttopheni memmo.

Nuumala-vo, murumeyi mmosa a vate va mwene, aihaniwa Ebedi-Meleki aahimuleela mwene wira: ‘Makhulupale aamurihela Yeremiya mweehimeni! Naahimukumihe, onimookhwa’. Mwene aahimuruma Ebedi-Meleki waakuxa alopwana 30 wira erowe yamukumihe Yeremiya mweehimeni. Niireke hiyo nnoowerya omutakiha Yeremiya yoowo ahaaphavela wira itthu sikina simuhiihe olaleerya?